| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
১০. নদীসোতসুত্তং
10. Nadīsotasuttaṃ
১০৯. ৰুত্তঞ্হেতং ভগৰতা, ৰুত্তমরহতাতি মে সুতং –
109. Vuttañhetaṃ bhagavatā, vuttamarahatāti me sutaṃ –
‘‘সেয্যথাপি , ভিক্খৰে, পুরিসো নদিযা সোতেন ওৰুয্হেয্য পিযরূপসাতরূপেন। তমেনং চক্খুমা পুরিসো তীরে ঠিতো দিস্ৰা এৰং ৰদেয্য – ‘কিঞ্চাপি খো ত্ৰং, অম্ভো পুরিস, নদিযা সোতেন ওৰুয্হসি পিযরূপসাতরূপেন, অত্থি চেত্থ হেট্ঠা রহদো সঊমি সাৰট্টো সগহো সরক্খসো যং ত্ৰং, অম্ভো পুরিস, রহদং পাপুণিত্ৰা মরণং ৰা নিগচ্ছসি মরণমত্তং ৰা দুক্খ’ন্তি। অথ খো সো, ভিক্খৰে, পুরিসো তস্স পুরিসস্স সদ্দং সুত্ৰা হত্থেহি চ পাদেহি চ পটিসোতং ৰাযমেয্য।
‘‘Seyyathāpi , bhikkhave, puriso nadiyā sotena ovuyheyya piyarūpasātarūpena. Tamenaṃ cakkhumā puriso tīre ṭhito disvā evaṃ vadeyya – ‘kiñcāpi kho tvaṃ, ambho purisa, nadiyā sotena ovuyhasi piyarūpasātarūpena, atthi cettha heṭṭhā rahado saūmi sāvaṭṭo sagaho sarakkhaso yaṃ tvaṃ, ambho purisa, rahadaṃ pāpuṇitvā maraṇaṃ vā nigacchasi maraṇamattaṃ vā dukkha’nti. Atha kho so, bhikkhave, puriso tassa purisassa saddaṃ sutvā hatthehi ca pādehi ca paṭisotaṃ vāyameyya.
‘‘উপমা খো মে অযং, ভিক্খৰে, কতা অত্থস্স ৰিঞ্ঞাপনায। অযং চেত্থ 1 অত্থো – ‘নদিযা সোতো’তি খো, ভিক্খৰে, তণ্হাযেতং অধিৰচনং।
‘‘Upamā kho me ayaṃ, bhikkhave, katā atthassa viññāpanāya. Ayaṃ cettha 2 attho – ‘nadiyā soto’ti kho, bhikkhave, taṇhāyetaṃ adhivacanaṃ.
‘‘‘পিযরূপং সাতরূপ’ন্তি খো, ভিক্খৰে, ছন্নেতং অজ্ঝত্তিকানং আযতনানং অধিৰচনং।
‘‘‘Piyarūpaṃ sātarūpa’nti kho, bhikkhave, channetaṃ ajjhattikānaṃ āyatanānaṃ adhivacanaṃ.
‘‘‘হেট্ঠা রহদো’তি খো, ভিক্খৰে, পঞ্চন্নং ওরম্ভাগিযানং সংযোজনানং অধিৰচনং।
‘‘‘Heṭṭhā rahado’ti kho, bhikkhave, pañcannaṃ orambhāgiyānaṃ saṃyojanānaṃ adhivacanaṃ;
‘‘‘ঊমিভয’ন্তি খো 3, ভিক্খৰে, কোধুপাযাসস্সেতং অধিৰচনং।
‘‘‘Ūmibhaya’nti kho 4, bhikkhave, kodhupāyāsassetaṃ adhivacanaṃ;
‘‘‘আৰট্ট’ন্তি খো 5, ভিক্খৰে, পঞ্চন্নেতং কামগুণানং অধিৰচনং।
‘‘‘Āvaṭṭa’nti kho 6, bhikkhave, pañcannetaṃ kāmaguṇānaṃ adhivacanaṃ;
‘‘‘গহরক্খসো’তি খো 7, ভিক্খৰে, মাতুগামস্সেতং অধিৰচনং।
‘‘‘Gaharakkhaso’ti kho 8, bhikkhave, mātugāmassetaṃ adhivacanaṃ;
‘‘‘পটিসোতো’তি খো, ভিক্খৰে, নেক্খম্মস্সেতং অধিৰচনং।
‘‘‘Paṭisoto’ti kho, bhikkhave, nekkhammassetaṃ adhivacanaṃ;
‘‘‘হত্থেহি চ পাদেহি চ ৰাযামো’তি খো, ভিক্খৰে, ৰীরিযারম্ভস্সেতং অধিৰচনং।
‘‘‘Hatthehi ca pādehi ca vāyāmo’ti kho, bhikkhave, vīriyārambhassetaṃ adhivacanaṃ;
‘‘‘চক্খুমা পুরিসো তীরে ঠিতোতি খো, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্সা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘‘Cakkhumā puriso tīre ṭhitoti kho, bhikkhave, tathāgatassetaṃ adhivacanaṃ arahato sammāsambuddhassā’’ti. Etamatthaṃ bhagavā avoca. Tatthetaṃ iti vuccati –
‘‘সহাপি দুক্খেন জহেয্য কামে, যোগক্খেমং আযতিং পত্থযানো।
‘‘Sahāpi dukkhena jaheyya kāme, yogakkhemaṃ āyatiṃ patthayāno;
সম্মপ্পজানো সুৰিমুত্তচিত্তো, ৰিমুত্তিযা ফস্সযে তত্থ তত্থ।
Sammappajāno suvimuttacitto, vimuttiyā phassaye tattha tattha;
স ৰেদগূ ৰূসিতব্রহ্মচরিযো, লোকন্তগূ পারগতোতি ৰুচ্চতী’’তি॥
Sa vedagū vūsitabrahmacariyo, lokantagū pāragatoti vuccatī’’ti.
অযম্পি অত্থো ৰুত্তো ভগৰতা, ইতি মে সুতন্তি। দসমং।
Ayampi attho vutto bhagavatā, iti me sutanti. Dasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১০. নদীসোতসুত্তৰণ্ণনা • 10. Nadīsotasuttavaṇṇanā
