| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. புப்ப²வக்³கோ³
10. Pupphavaggo
1. நதீ³ஸுத்தங்
1. Nadīsuttaṃ
93. ஸாவத்தி²னிதா³னங் . ‘‘ஸெய்யதா²பி, பி⁴க்க²வே, நதீ³ பப்³ப³தெய்யா ஓஹாரினீ தூ³ரங்க³மா ஸீக⁴ஸோதா. தஸ்ஸா உபோ⁴ஸு தீரேஸு 1 காஸா சேபி ஜாதா அஸ்ஸு, தே நங் அஜ்ஜோ²லம்பெ³ய்யுங்; குஸா சேபி ஜாதா அஸ்ஸு, தே நங் அஜ்ஜோ²லம்பெ³ய்யுங்; பப்³ப³ஜா 2 சேபி ஜாதா அஸ்ஸு, தே நங் அஜ்ஜோ²லம்பெ³ய்யுங்; பீ³ரணா சேபி ஜாதா அஸ்ஸு, தே நங் அஜ்ஜோ²லம்பெ³ய்யுங்; ருக்கா² சேபி ஜாதா அஸ்ஸு, தே நங் அஜ்ஜோ²லம்பெ³ய்யுங். தஸ்ஸா புரிஸோ ஸோதேன வுய்ஹமானோ காஸே சேபி க³ண்ஹெய்ய, தே பலுஜ்ஜெய்யுங். ஸோ ததோனிதா³னங் அனயப்³யஸனங் ஆபஜ்ஜெய்ய. குஸே சேபி க³ண்ஹெய்ய, பப்³ப³ஜே சேபி க³ண்ஹெய்ய, பீ³ரணே சேபி க³ண்ஹெய்ய, ருக்கே² சேபி க³ண்ஹெய்ய, தே பலுஜ்ஜெய்யுங் . ஸோ ததோனிதா³னங் அனயப்³யஸனங் ஆபஜ்ஜெய்ய. ஏவமேவ கோ², பி⁴க்க²வே, அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி, ரூபவந்தங் வா அத்தானங்; அத்தனி வா ரூபங், ரூபஸ்மிங் வா அத்தானங். தஸ்ஸ தங் ரூபங் பலுஜ்ஜதி. ஸோ ததோனிதா³னங் அனயப்³யஸனங் ஆபஜ்ஜதி. வேத³னங்… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி, விஞ்ஞாணவந்தங் வா அத்தானங் ; அத்தனி வா விஞ்ஞாணங் , விஞ்ஞாணஸ்மிங் வா அத்தானங். தஸ்ஸ தங் விஞ்ஞாணங் பலுஜ்ஜதி. ஸோ ததோனிதா³னங் அனயப்³யஸனங் ஆபஜ்ஜதி. தங் கிங் மஞ்ஞத², பி⁴க்க²வே, ரூபங் நிச்சங் வா அனிச்சங் வா’’தி? ‘‘அனிச்சங் ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணங் நிச்சங் வா அனிச்சங் வா’’தி? ‘‘அனிச்சங் ப⁴ந்தே’’. ‘‘தஸ்மாதிஹ…பே॰… ஏவங் பஸ்ஸங்…பே॰… நாபரங் இத்த²த்தாயாதி பஜானாதீ’’தி. பட²மங்.
93. Sāvatthinidānaṃ . ‘‘Seyyathāpi, bhikkhave, nadī pabbateyyā ohārinī dūraṅgamā sīghasotā. Tassā ubhosu tīresu 3 kāsā cepi jātā assu, te naṃ ajjholambeyyuṃ; kusā cepi jātā assu, te naṃ ajjholambeyyuṃ; pabbajā 4 cepi jātā assu, te naṃ ajjholambeyyuṃ; bīraṇā cepi jātā assu, te naṃ ajjholambeyyuṃ; rukkhā cepi jātā assu, te naṃ ajjholambeyyuṃ. Tassā puriso sotena vuyhamāno kāse cepi gaṇheyya, te palujjeyyuṃ. So tatonidānaṃ anayabyasanaṃ āpajjeyya. Kuse cepi gaṇheyya, pabbaje cepi gaṇheyya, bīraṇe cepi gaṇheyya, rukkhe cepi gaṇheyya, te palujjeyyuṃ . So tatonidānaṃ anayabyasanaṃ āpajjeyya. Evameva kho, bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Tassa taṃ rūpaṃ palujjati. So tatonidānaṃ anayabyasanaṃ āpajjati. Vedanaṃ… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ ; attani vā viññāṇaṃ , viññāṇasmiṃ vā attānaṃ. Tassa taṃ viññāṇaṃ palujjati. So tatonidānaṃ anayabyasanaṃ āpajjati. Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ bhante’’. ‘‘Tasmātiha…pe… evaṃ passaṃ…pe… nāparaṃ itthattāyāti pajānātī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. நதீ³ஸுத்தவண்ணனா • 1. Nadīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நதீ³ஸுத்தவண்ணனா • 1. Nadīsuttavaṇṇanā
