| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
12. நதீ³ஸுத்தங்
12. Nadīsuttaṃ
160. ‘‘ஸெய்யதா²பி, பி⁴க்க²வே, க³ங்கா³ நதீ³ பாசீனநின்னா பாசீனபோணா பாசீனபப்³பா⁴ரா. அத² மஹாஜனகாயோ ஆக³ச்செ²ய்ய குத்³தா³ல-பிடகங் ஆதா³ய – ‘மயங் இமங் க³ங்க³ங் நதி³ங் பச்சா²னின்னங் கரிஸ்ஸாம பச்சா²போணங் பச்சா²பப்³பா⁴ர’ந்தி. தங் கிங் மஞ்ஞத², பி⁴க்க²வே, அபி நு ஸோ மஹாஜனகாயோ க³ங்க³ங் நதி³ங் பச்சா²னின்னங் கரெய்ய பச்சா²போணங் பச்சா²பப்³பா⁴ர’’ந்தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘க³ங்கா³, ப⁴ந்தே, நதீ³ பாசீனநின்னா பாசீனபோணா பாசீனபப்³பா⁴ரா. ஸா ந ஸுகரா பச்சா²னின்னங் காதுங் பச்சா²போணங் பச்சா²பப்³பா⁴ரங். யாவதே³வ பன ஸோ மஹாஜனகாயோ கிலமத²ஸ்ஸ விகா⁴தஸ்ஸ பா⁴கீ³ அஸ்ஸா’’தி. ‘‘ஏவமேவ கோ², பி⁴க்க²வே, பி⁴க்கு²ங் அரியங் அட்ட²ங்கி³கங் மக்³க³ங் பா⁴வெந்தங் அரியங் அட்ட²ங்கி³கங் மக்³க³ங் ப³ஹுலீகரொந்தங் ராஜானோ வா ராஜமஹாமத்தா வா மித்தா வா அமச்சா வா ஞாதீ வா ஞாதிஸாலோஹிதா வா போ⁴கே³ஹி அபி⁴ஹட்டு²ங் பவாரெய்யுங் – ‘ஏஹம்போ⁴ புரிஸ, கிங் தே இமே காஸாவா அனுத³ஹந்தி, கிங் முண்டோ³ கபாலமனுஸங்சரஸி! ஏஹி, ஹீனாயாவத்தித்வா போ⁴கே³ ச பு⁴ஞ்ஜஸ்ஸு, புஞ்ஞானி ச கரோஹீ’தி. ஸோ வத, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் பா⁴வெந்தோ அரியங் அட்ட²ங்கி³கங் மக்³க³ங் ப³ஹுலீகரொந்தோ ஸிக்க²ங் பச்சக்கா²ய ஹீனாயாவத்திஸ்ஸதீதி – நேதங் டா²னங் விஜ்ஜதி. தங் கிஸ்ஸ ஹேது? யஞ்ஹி தங், பி⁴க்க²வே, சித்தங் தீ³க⁴ரத்தங் விவேகனின்னங் விவேகபோணங் விவேகபப்³பா⁴ரங் தங் வத ஹீனாயாவத்திஸ்ஸதீதி – நேதங் டா²னங் விஜ்ஜதி. கத²ஞ்ச, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் பா⁴வேதி அரியங் அட்ட²ங்கி³கங் மக்³க³ங் ப³ஹுலீகரோதி? இத⁴ , பி⁴க்க²வே, பி⁴க்கு² ஸம்மாதி³ட்டி²ங் பா⁴வேதி விவேகனிஸ்ஸிதங்…பே॰… ஸம்மாஸமாதி⁴ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்…பே॰… ஏவங் கோ², பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் பா⁴வேதி, அரியங் அட்ட²ங்கி³கங் மக்³க³ங் ப³ஹுலீகரோதீ’’தி. (யத³பி ப³லகரணீயங், தத³பி வித்தா²ரேதப்³ப³ங்.) த்³வாத³ஸமங்.
160. ‘‘Seyyathāpi, bhikkhave, gaṅgā nadī pācīnaninnā pācīnapoṇā pācīnapabbhārā. Atha mahājanakāyo āgaccheyya kuddāla-piṭakaṃ ādāya – ‘mayaṃ imaṃ gaṅgaṃ nadiṃ pacchāninnaṃ karissāma pacchāpoṇaṃ pacchāpabbhāra’nti. Taṃ kiṃ maññatha, bhikkhave, api nu so mahājanakāyo gaṅgaṃ nadiṃ pacchāninnaṃ kareyya pacchāpoṇaṃ pacchāpabbhāra’’nti? ‘‘No hetaṃ, bhante’’. ‘‘Taṃ kissa hetu’’? ‘‘Gaṅgā, bhante, nadī pācīnaninnā pācīnapoṇā pācīnapabbhārā. Sā na sukarā pacchāninnaṃ kātuṃ pacchāpoṇaṃ pacchāpabbhāraṃ. Yāvadeva pana so mahājanakāyo kilamathassa vighātassa bhāgī assā’’ti. ‘‘Evameva kho, bhikkhave, bhikkhuṃ ariyaṃ aṭṭhaṅgikaṃ maggaṃ bhāventaṃ ariyaṃ aṭṭhaṅgikaṃ maggaṃ bahulīkarontaṃ rājāno vā rājamahāmattā vā mittā vā amaccā vā ñātī vā ñātisālohitā vā bhogehi abhihaṭṭhuṃ pavāreyyuṃ – ‘ehambho purisa, kiṃ te ime kāsāvā anudahanti, kiṃ muṇḍo kapālamanusaṃcarasi! Ehi, hīnāyāvattitvā bhoge ca bhuñjassu, puññāni ca karohī’ti. So vata, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto sikkhaṃ paccakkhāya hīnāyāvattissatīti – netaṃ ṭhānaṃ vijjati. Taṃ kissa hetu? Yañhi taṃ, bhikkhave, cittaṃ dīgharattaṃ vivekaninnaṃ vivekapoṇaṃ vivekapabbhāraṃ taṃ vata hīnāyāvattissatīti – netaṃ ṭhānaṃ vijjati. Kathañca, bhikkhave, bhikkhu ariyaṃ aṭṭhaṅgikaṃ maggaṃ bhāveti ariyaṃ aṭṭhaṅgikaṃ maggaṃ bahulīkaroti? Idha , bhikkhave, bhikkhu sammādiṭṭhiṃ bhāveti vivekanissitaṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkarotī’’ti. (Yadapi balakaraṇīyaṃ, tadapi vitthāretabbaṃ.) Dvādasamaṃ.
ப³லகரணீயவக்³கோ³ ச²ட்டோ².
Balakaraṇīyavaggo chaṭṭho.
தஸ்ஸுத்³தா³னங் –
Tassuddānaṃ –
ப³லங் பீ³ஜஞ்ச நாகோ³ ச, ருக்கோ² கும்பே⁴ன ஸூகியா;
Balaṃ bījañca nāgo ca, rukkho kumbhena sūkiyā;
ஆகாஸேன ச த்³வே மேகா⁴, நாவா ஆக³ந்துகா நதீ³தி.
Ākāsena ca dve meghā, nāvā āgantukā nadīti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 11-12. ஆக³ந்துகஸுத்தாதி³வண்ணனா • 11-12. Āgantukasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 11-12. ஆக³ந்துகஸுத்தாதி³வண்ணனா • 11-12. Āgantukasuttādivaṇṇanā
