| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. புப்ப²வக்³கோ³
10. Pupphavaggo
1. நதீ³ஸுத்தவண்ணனா
1. Nadīsuttavaṇṇanā
93. புப்ப²வக்³க³ஸ்ஸ பட²மே பப்³ப³தெய்யாதி பப்³ப³தே பவத்தா. ஓஹாரினீதி ஸோதே பதிதபதிதானி திணபண்ணகட்டா²தீ³னி ஹெட்டா²ஹாரினீ. தூ³ரங்க³மாதி நிக்க²ந்தட்டா²னதோ பட்டா²ய சதுபஞ்சயோஜனஸதகா³மினீ. ஸீக⁴ஸோதாதி சண்ட³ஸோதா. காஸாதிஆதீ³னி ஸப்³பா³னி திணஜாதானி. ருக்கா²தி ஏரண்டா³த³யோ து³ப்³ப³லருக்கா². தே நங் அஜ்ஜோ²லம்பெ³ய்யுந்தி தே தீரே ஜாதாபி ஓனமித்வா அக்³கே³ஹி உத³கங் பு²ஸந்தேஹி அதி⁴ஓலம்பெ³ய்யுங், உபரி லம்பெ³ய்யுந்தி அத்தோ². பலுஜ்ஜெய்யுந்தி ஸமூலமத்திகாய ஸத்³தி⁴ங் ஸீஸே பதெய்யுங். ஸோ தேஹி அஜ்ஜொ²த்த²டோ வாலுகமத்திகோத³கேஹி முக²ங் பவிஸந்தேஹி மஹாவினாஸங் பாபுணெய்ய.
93. Pupphavaggassa paṭhame pabbateyyāti pabbate pavattā. Ohārinīti sote patitapatitāni tiṇapaṇṇakaṭṭhādīni heṭṭhāhārinī. Dūraṅgamāti nikkhantaṭṭhānato paṭṭhāya catupañcayojanasatagāminī. Sīghasotāti caṇḍasotā. Kāsātiādīni sabbāni tiṇajātāni. Rukkhāti eraṇḍādayo dubbalarukkhā. Te naṃ ajjholambeyyunti te tīre jātāpi onamitvā aggehi udakaṃ phusantehi adhiolambeyyuṃ, upari lambeyyunti attho. Palujjeyyunti samūlamattikāya saddhiṃ sīse pateyyuṃ. So tehi ajjhotthaṭo vālukamattikodakehi mukhaṃ pavisantehi mahāvināsaṃ pāpuṇeyya.
ஏவமேவ கோ²தி எத்த² ஸோதே பதிதபுரிஸோ விய வட்டஸன்னிஸ்ஸிதோ பா³லபுது²ஜ்ஜனோ த³ட்ட²ப்³போ³, உப⁴தோதீரே காஸாத³யோ விய து³ப்³ப³லபஞ்சக்க²ந்தா⁴, ‘‘இமே க³ஹிதாபி மங் தாரேதுங் ந ஸக்கி²ஸ்ஸந்தீ’’தி தஸ்ஸ புரிஸஸ்ஸ அஜானித்வா க³ஹணங் விய இமே க²ந்தா⁴ ‘‘ந மய்ஹங் ஸஹாயா’’தி பா³லபுது²ஜ்ஜனஸ்ஸ அஜானித்வா சதூஹி கா³ஹேஹி க³ஹணங், க³ஹிதக³ஹிதானங் பலுஜ்ஜனத்தா புரிஸஸ்ஸ ப்³யஸனப்பத்தி விய சதூஹி கா³ஹேஹி க³ஹிதானங் க²ந்தா⁴னங் விபரிணாமே பா³லபுது²ஜ்ஜனஸ்ஸ ஸோகாதி³ப்³யஸனப்பத்தி வேதி³தப்³பா³. பட²மங்.
Evamevakhoti ettha sote patitapuriso viya vaṭṭasannissito bālaputhujjano daṭṭhabbo, ubhatotīre kāsādayo viya dubbalapañcakkhandhā, ‘‘ime gahitāpi maṃ tāretuṃ na sakkhissantī’’ti tassa purisassa ajānitvā gahaṇaṃ viya ime khandhā ‘‘na mayhaṃ sahāyā’’ti bālaputhujjanassa ajānitvā catūhi gāhehi gahaṇaṃ, gahitagahitānaṃ palujjanattā purisassa byasanappatti viya catūhi gāhehi gahitānaṃ khandhānaṃ vipariṇāme bālaputhujjanassa sokādibyasanappatti veditabbā. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நதீ³ஸுத்தங் • 1. Nadīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நதீ³ஸுத்தவண்ணனா • 1. Nadīsuttavaṇṇanā
