| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১০. পুপ্ফৰগ্গো
10. Pupphavaggo
১. নদীসুত্তৰণ্ণনা
1. Nadīsuttavaṇṇanā
৯৩. পুপ্ফৰগ্গস্স পঠমে পব্বতেয্যাতি পব্বতে পৰত্তা। ওহারিনীতি সোতে পতিতপতিতানি তিণপণ্ণকট্ঠাদীনি হেট্ঠাহারিনী। দূরঙ্গমাতি নিক্খন্তট্ঠানতো পট্ঠায চতুপঞ্চযোজনসতগামিনী। সীঘসোতাতি চণ্ডসোতা। কাসাতিআদীনি সব্বানি তিণজাতানি। রুক্খাতি এরণ্ডাদযো দুব্বলরুক্খা। তে নং অজ্ঝোলম্বেয্যুন্তি তে তীরে জাতাপি ওনমিত্ৰা অগ্গেহি উদকং ফুসন্তেহি অধিওলম্বেয্যুং, উপরি লম্বেয্যুন্তি অত্থো। পলুজ্জেয্যুন্তি সমূলমত্তিকায সদ্ধিং সীসে পতেয্যুং। সো তেহি অজ্ঝোত্থটো ৰালুকমত্তিকোদকেহি মুখং পৰিসন্তেহি মহাৰিনাসং পাপুণেয্য।
93. Pupphavaggassa paṭhame pabbateyyāti pabbate pavattā. Ohārinīti sote patitapatitāni tiṇapaṇṇakaṭṭhādīni heṭṭhāhārinī. Dūraṅgamāti nikkhantaṭṭhānato paṭṭhāya catupañcayojanasatagāminī. Sīghasotāti caṇḍasotā. Kāsātiādīni sabbāni tiṇajātāni. Rukkhāti eraṇḍādayo dubbalarukkhā. Te naṃ ajjholambeyyunti te tīre jātāpi onamitvā aggehi udakaṃ phusantehi adhiolambeyyuṃ, upari lambeyyunti attho. Palujjeyyunti samūlamattikāya saddhiṃ sīse pateyyuṃ. So tehi ajjhotthaṭo vālukamattikodakehi mukhaṃ pavisantehi mahāvināsaṃ pāpuṇeyya.
এৰমেৰ খোতি এত্থ সোতে পতিতপুরিসো ৰিয ৰট্টসন্নিস্সিতো বালপুথুজ্জনো দট্ঠব্বো, উভতোতীরে কাসাদযো ৰিয দুব্বলপঞ্চক্খন্ধা, ‘‘ইমে গহিতাপি মং তারেতুং ন সক্খিস্সন্তী’’তি তস্স পুরিসস্স অজানিত্ৰা গহণং ৰিয ইমে খন্ধা ‘‘ন ময্হং সহাযা’’তি বালপুথুজ্জনস্স অজানিত্ৰা চতূহি গাহেহি গহণং, গহিতগহিতানং পলুজ্জনত্তা পুরিসস্স ব্যসনপ্পত্তি ৰিয চতূহি গাহেহি গহিতানং খন্ধানং ৰিপরিণামে বালপুথুজ্জনস্স সোকাদিব্যসনপ্পত্তি ৰেদিতব্বা। পঠমং।
Evamevakhoti ettha sote patitapuriso viya vaṭṭasannissito bālaputhujjano daṭṭhabbo, ubhatotīre kāsādayo viya dubbalapañcakkhandhā, ‘‘ime gahitāpi maṃ tāretuṃ na sakkhissantī’’ti tassa purisassa ajānitvā gahaṇaṃ viya ime khandhā ‘‘na mayhaṃ sahāyā’’ti bālaputhujjanassa ajānitvā catūhi gāhehi gahaṇaṃ, gahitagahitānaṃ palujjanattā purisassa byasanappatti viya catūhi gāhehi gahitānaṃ khandhānaṃ vipariṇāme bālaputhujjanassa sokādibyasanappatti veditabbā. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. নদীসুত্তং • 1. Nadīsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. নদীসুত্তৰণ্ণনা • 1. Nadīsuttavaṇṇanā
