| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. ပုပ္ဖဝဂ္ဂော
10. Pupphavaggo
၁. နဒီသုတ္တဝဏ္ဏနာ
1. Nadīsuttavaṇṇanā
၉၃. ပုပ္ဖဝဂ္ဂသ္သ ပဌမေ ပဗ္ဗတေယ္ယာတိ ပဗ္ဗတေ ပဝတ္တာ။ ဩဟာရိနီတိ သောတေ ပတိတပတိတာနိ တိဏပဏ္ဏကဋ္ဌာဒီနိ ဟေဋ္ဌာဟာရိနီ။ ဒူရင္ဂမာတိ နိက္ခန္တဋ္ဌာနတော ပဋ္ဌာယ စတုပဉ္စယောဇနသတဂာမိနီ။ သီဃသောတာတိ စဏ္ဍသောတာ။ ကာသာတိအာဒီနိ သဗ္ဗာနိ တိဏဇာတာနိ။ ရုက္ခာတိ ဧရဏ္ဍာဒယော ဒုဗ္ဗလရုက္ခာ။ တေ နံ အဇ္ဈောလမ္ဗေယ္ယုန္တိ တေ တီရေ ဇာတာပိ ဩနမိတ္ဝာ အဂ္ဂေဟိ ဥဒကံ ဖုသန္တေဟိ အဓိဩလမ္ဗေယ္ယုံ, ဥပရိ လမ္ဗေယ္ယုန္တိ အတ္ထော။ ပလုဇ္ဇေယ္ယုန္တိ သမူလမတ္တိကာယ သဒ္ဓိံ သီသေ ပတေယ္ယုံ။ သော တေဟိ အဇ္ဈောတ္ထဋော ဝာလုကမတ္တိကောဒကေဟိ မုခံ ပဝိသန္တေဟိ မဟာဝိနာသံ ပာပုဏေယ္ယ။
93. Pupphavaggassa paṭhame pabbateyyāti pabbate pavattā. Ohārinīti sote patitapatitāni tiṇapaṇṇakaṭṭhādīni heṭṭhāhārinī. Dūraṅgamāti nikkhantaṭṭhānato paṭṭhāya catupañcayojanasatagāminī. Sīghasotāti caṇḍasotā. Kāsātiādīni sabbāni tiṇajātāni. Rukkhāti eraṇḍādayo dubbalarukkhā. Te naṃ ajjholambeyyunti te tīre jātāpi onamitvā aggehi udakaṃ phusantehi adhiolambeyyuṃ, upari lambeyyunti attho. Palujjeyyunti samūlamattikāya saddhiṃ sīse pateyyuṃ. So tehi ajjhotthaṭo vālukamattikodakehi mukhaṃ pavisantehi mahāvināsaṃ pāpuṇeyya.
ဧဝမေဝ ခောတိ ဧတ္ထ သောတေ ပတိတပုရိသော ဝိယ ဝဋ္ဋသန္နိသ္သိတော ဗာလပုထုဇ္ဇနော ဒဋ္ဌဗ္ဗော, ဥဘတောတီရေ ကာသာဒယော ဝိယ ဒုဗ္ဗလပဉ္စက္ခန္ဓာ, ‘‘ဣမေ ဂဟိတာပိ မံ တာရေတုံ န သက္ခိသ္သန္တီ’’တိ တသ္သ ပုရိသသ္သ အဇာနိတ္ဝာ ဂဟဏံ ဝိယ ဣမေ ခန္ဓာ ‘‘န မယ္ဟံ သဟာယာ’’တိ ဗာလပုထုဇ္ဇနသ္သ အဇာနိတ္ဝာ စတူဟိ ဂာဟေဟိ ဂဟဏံ, ဂဟိတဂဟိတာနံ ပလုဇ္ဇနတ္တာ ပုရိသသ္သ ဗ္ယသနပ္ပတ္တိ ဝိယ စတူဟိ ဂာဟေဟိ ဂဟိတာနံ ခန္ဓာနံ ဝိပရိဏာမေ ဗာလပုထုဇ္ဇနသ္သ သောကာဒိဗ္ယသနပ္ပတ္တိ ဝေဒိတဗ္ဗာ။ ပဌမံ။
Evamevakhoti ettha sote patitapuriso viya vaṭṭasannissito bālaputhujjano daṭṭhabbo, ubhatotīre kāsādayo viya dubbalapañcakkhandhā, ‘‘ime gahitāpi maṃ tāretuṃ na sakkhissantī’’ti tassa purisassa ajānitvā gahaṇaṃ viya ime khandhā ‘‘na mayhaṃ sahāyā’’ti bālaputhujjanassa ajānitvā catūhi gāhehi gahaṇaṃ, gahitagahitānaṃ palujjanattā purisassa byasanappatti viya catūhi gāhehi gahitānaṃ khandhānaṃ vipariṇāme bālaputhujjanassa sokādibyasanappatti veditabbā. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. နဒီသုတ္တံ • 1. Nadīsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. နဒီသုတ္တဝဏ္ဏနာ • 1. Nadīsuttavaṇṇanā
