| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
10. පුප්‌ඵවග්‌ගො
10. Pupphavaggo
1. නදීසුත්‌තවණ්‌ණනා
1. Nadīsuttavaṇṇanā
93. පුප්‌ඵවග්‌ගස්‌ස පඨමෙ පබ්‌බතෙය්‍යාති පබ්‌බතෙ පවත්‌තා. ඔහාරිනීති සොතෙ පතිතපතිතානි තිණපණ්‌ණකට්‌ඨාදීනි හෙට්‌ඨාහාරිනී. දූරඞ්‌ගමාති නික්‌ඛන්‌තට්‌ඨානතො පට්‌ඨාය චතුපඤ්‌චයොජනසතගාමිනී. සීඝසොතාති චණ්‌ඩසොතා. කාසාතිආදීනි සබ්‌බානි තිණජාතානි. රුක්‌ඛාති එරණ්‌ඩාදයො දුබ්‌බලරුක්‌ඛා. තෙ නං අජ්‌ඣොලම්‌බෙය්‍යුන්‌ති තෙ තීරෙ ජාතාපි ඔනමිත්‌වා අග්‌ගෙහි උදකං ඵුසන්‌තෙහි අධිඔලම්‌බෙය්‍යුං, උපරි ලම්‌බෙය්‍යුන්‌ති අත්‌ථො. පලුජ්‌ජෙය්‍යුන්‌ති සමූලමත්‌තිකාය සද්‌ධිං සීසෙ පතෙය්‍යුං. සො තෙහි අජ්‌ඣොත්‌ථටො වාලුකමත්‌තිකොදකෙහි මුඛං පවිසන්‌තෙහි මහාවිනාසං පාපුණෙය්‍ය.
93. Pupphavaggassa paṭhame pabbateyyāti pabbate pavattā. Ohārinīti sote patitapatitāni tiṇapaṇṇakaṭṭhādīni heṭṭhāhārinī. Dūraṅgamāti nikkhantaṭṭhānato paṭṭhāya catupañcayojanasatagāminī. Sīghasotāti caṇḍasotā. Kāsātiādīni sabbāni tiṇajātāni. Rukkhāti eraṇḍādayo dubbalarukkhā. Te naṃ ajjholambeyyunti te tīre jātāpi onamitvā aggehi udakaṃ phusantehi adhiolambeyyuṃ, upari lambeyyunti attho. Palujjeyyunti samūlamattikāya saddhiṃ sīse pateyyuṃ. So tehi ajjhotthaṭo vālukamattikodakehi mukhaṃ pavisantehi mahāvināsaṃ pāpuṇeyya.
එවමෙව ඛොති එත්‌ථ සොතෙ පතිතපුරිසො විය වට්‌ටසන්‌නිස්‌සිතො බාලපුථුජ්‌ජනො දට්‌ඨබ්‌බො, උභතොතීරෙ කාසාදයො විය දුබ්‌බලපඤ්‌චක්‌ඛන්‌ධා, ‘‘ඉමෙ ගහිතාපි මං තාරෙතුං න සක්‌ඛිස්‌සන්‌තී’’ති තස්‌ස පුරිසස්‌ස අජානිත්‌වා ගහණං විය ඉමෙ ඛන්‌ධා ‘‘න මය්‌හං සහායා’’ති බාලපුථුජ්‌ජනස්‌ස අජානිත්‌වා චතූහි ගාහෙහි ගහණං, ගහිතගහිතානං පලුජ්‌ජනත්‌තා පුරිසස්‌ස බ්‍යසනප්‌පත්‌ති විය චතූහි ගාහෙහි ගහිතානං ඛන්‌ධානං විපරිණාමෙ බාලපුථුජ්‌ජනස්‌ස සොකාදිබ්‍යසනප්‌පත්‌ති වෙදිතබ්‌බා. පඨමං.
Evamevakhoti ettha sote patitapuriso viya vaṭṭasannissito bālaputhujjano daṭṭhabbo, ubhatotīre kāsādayo viya dubbalapañcakkhandhā, ‘‘ime gahitāpi maṃ tāretuṃ na sakkhissantī’’ti tassa purisassa ajānitvā gahaṇaṃ viya ime khandhā ‘‘na mayhaṃ sahāyā’’ti bālaputhujjanassa ajānitvā catūhi gāhehi gahaṇaṃ, gahitagahitānaṃ palujjanattā purisassa byasanappatti viya catūhi gāhehi gahitānaṃ khandhānaṃ vipariṇāme bālaputhujjanassa sokādibyasanappatti veditabbā. Paṭhamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. නදීසුත්‌තං • 1. Nadīsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. නදීසුත්‌තවණ්‌ණනා • 1. Nadīsuttavaṇṇanā
