| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༡༠. པུཔྥཝགྒོ
10. Pupphavaggo
༡. ནདཱིསུཏྟཝཎྞནཱ
1. Nadīsuttavaṇṇanā
༩༣. པུཔྥཝགྒསྶ པཋམེ པབྦཏེཡྻཱཏི པབྦཏེ པཝཏྟཱ། ཨོཧཱརིནཱིཏི སོཏེ པཏིཏཔཏིཏཱནི ཏིཎཔཎྞཀཊྛཱདཱིནི ཧེཊྛཱཧཱརིནཱི། དཱུརངྒམཱཏི ནིཀྑནྟཊྛཱནཏོ པཊྛཱཡ ཙཏུཔཉྩཡོཛནསཏགཱམིནཱི། སཱིགྷསོཏཱཏི ཙཎྜསོཏཱ། ཀཱསཱཏིཨཱདཱིནི སབྦཱནི ཏིཎཛཱཏཱནི། རུཀྑཱཏི ཨེརཎྜཱདཡོ དུབྦལརུཀྑཱ། ཏེ ནཾ ཨཛ྄ཛྷོལམྦེཡྻུནྟི ཏེ ཏཱིརེ ཛཱཏཱཔི ཨོནམིཏྭཱ ཨགྒེཧི ཨུདཀཾ ཕུསནྟེཧི ཨདྷིཨོལམྦེཡྻུཾ, ཨུཔརི ལམྦེཡྻུནྟི ཨཏྠོ། པལུཛྫེཡྻུནྟི སམཱུལམཏྟིཀཱཡ སདྡྷིཾ སཱིསེ པཏེཡྻུཾ། སོ ཏེཧི ཨཛ྄ཛྷོཏྠཊོ ཝཱལུཀམཏྟིཀོདཀེཧི མུཁཾ པཝིསནྟེཧི མཧཱཝིནཱསཾ པཱཔུཎེཡྻ།
93. Pupphavaggassa paṭhame pabbateyyāti pabbate pavattā. Ohārinīti sote patitapatitāni tiṇapaṇṇakaṭṭhādīni heṭṭhāhārinī. Dūraṅgamāti nikkhantaṭṭhānato paṭṭhāya catupañcayojanasatagāminī. Sīghasotāti caṇḍasotā. Kāsātiādīni sabbāni tiṇajātāni. Rukkhāti eraṇḍādayo dubbalarukkhā. Te naṃ ajjholambeyyunti te tīre jātāpi onamitvā aggehi udakaṃ phusantehi adhiolambeyyuṃ, upari lambeyyunti attho. Palujjeyyunti samūlamattikāya saddhiṃ sīse pateyyuṃ. So tehi ajjhotthaṭo vālukamattikodakehi mukhaṃ pavisantehi mahāvināsaṃ pāpuṇeyya.
ཨེཝམེཝ ཁོཏི ཨེཏྠ སོཏེ པཏིཏཔུརིསོ ཝིཡ ཝཊྚསནྣིསྶིཏོ བཱལཔུཐུཛྫནོ དཊྛབྦོ, ཨུབྷཏོཏཱིརེ ཀཱསཱདཡོ ཝིཡ དུབྦལཔཉྩཀྑནྡྷཱ, ‘‘ཨིམེ གཧིཏཱཔི མཾ ཏཱརེཏུཾ ན སཀྑིསྶནྟཱི’’ཏི ཏསྶ པུརིསསྶ ཨཛཱནིཏྭཱ གཧཎཾ ཝིཡ ཨིམེ ཁནྡྷཱ ‘‘ན མཡ྄ཧཾ སཧཱཡཱ’’ཏི བཱལཔུཐུཛྫནསྶ ཨཛཱནིཏྭཱ ཙཏཱུཧི གཱཧེཧི གཧཎཾ, གཧིཏགཧིཏཱནཾ པལུཛྫནཏྟཱ པུརིསསྶ བྱསནཔྤཏྟི ཝིཡ ཙཏཱུཧི གཱཧེཧི གཧིཏཱནཾ ཁནྡྷཱནཾ ཝིཔརིཎཱམེ བཱལཔུཐུཛྫནསྶ སོཀཱདིབྱསནཔྤཏྟི ཝེདིཏབྦཱ། པཋམཾ།
Evamevakhoti ettha sote patitapuriso viya vaṭṭasannissito bālaputhujjano daṭṭhabbo, ubhatotīre kāsādayo viya dubbalapañcakkhandhā, ‘‘ime gahitāpi maṃ tāretuṃ na sakkhissantī’’ti tassa purisassa ajānitvā gahaṇaṃ viya ime khandhā ‘‘na mayhaṃ sahāyā’’ti bālaputhujjanassa ajānitvā catūhi gāhehi gahaṇaṃ, gahitagahitānaṃ palujjanattā purisassa byasanappatti viya catūhi gāhehi gahitānaṃ khandhānaṃ vipariṇāme bālaputhujjanassa sokādibyasanappatti veditabbā. Paṭhamaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ནདཱིསུཏྟཾ • 1. Nadīsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ནདཱིསུཏྟཝཎྞནཱ • 1. Nadīsuttavaṇṇanā
