| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. নাগদত্তসুত্তং
7. Nāgadattasuttaṃ
২২৭. একং সমযং আযস্মা নাগদত্তো কোসলেসু ৰিহরতি অঞ্ঞতরস্মিং ৰনসণ্ডে। তেন খো পন সমযেন আযস্মা নাগদত্তো অতিকালেন গামং পৰিসতি, অতিদিৰা পটিক্কমতি। অথ খো যা তস্মিং ৰনসণ্ডে অধিৰত্থা দেৰতা আযস্মতো নাগদত্তস্স অনুকম্পিকা অত্থকামা আযস্মন্তং নাগদত্তং সংৰেজেতুকামা যেনাযস্মা নাগদত্তো তেনুপসঙ্কমি; উপসঙ্কমিত্ৰা আযস্মন্তং নাগদত্তং গাথাহি অজ্ঝভাসি –
227. Ekaṃ samayaṃ āyasmā nāgadatto kosalesu viharati aññatarasmiṃ vanasaṇḍe. Tena kho pana samayena āyasmā nāgadatto atikālena gāmaṃ pavisati, atidivā paṭikkamati. Atha kho yā tasmiṃ vanasaṇḍe adhivatthā devatā āyasmato nāgadattassa anukampikā atthakāmā āyasmantaṃ nāgadattaṃ saṃvejetukāmā yenāyasmā nāgadatto tenupasaṅkami; upasaṅkamitvā āyasmantaṃ nāgadattaṃ gāthāhi ajjhabhāsi –
‘‘কালে পৰিস নাগদত্ত, দিৰা চ আগন্ত্ৰা অতিৰেলচারী।
‘‘Kāle pavisa nāgadatta, divā ca āgantvā ativelacārī;
সংসট্ঠো গহট্ঠেহি, সমানসুখদুক্খো॥
Saṃsaṭṭho gahaṭṭhehi, samānasukhadukkho.
‘‘ভাযামি নাগদত্তং সুপ্পগব্ভং, কুলেসু ৰিনিবদ্ধং।
‘‘Bhāyāmi nāgadattaṃ suppagabbhaṃ, kulesu vinibaddhaṃ;
মা হেৰ মচ্চুরঞ্ঞো বলৰতো, অন্তকস্স ৰসং উপেসী’’তি 1॥
Mā heva maccurañño balavato, antakassa vasaṃ upesī’’ti 2.
অথ খো আযস্মা নাগদত্তো তায দেৰতায সংৰেজিতো সংৰেগমাপাদীতি।
Atha kho āyasmā nāgadatto tāya devatāya saṃvejito saṃvegamāpādīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. নাগদত্তসুত্তৰণ্ণনা • 7. Nāgadattasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. নাগদত্তসুত্তৰণ্ণনা • 7. Nāgadattasuttavaṇṇanā
