| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
७. नागदत्तसुत्तं
7. Nāgadattasuttaṃ
२२७. एकं समयं आयस्मा नागदत्तो कोसलेसु विहरति अञ्ञतरस्मिं वनसण्डे। तेन खो पन समयेन आयस्मा नागदत्तो अतिकालेन गामं पविसति, अतिदिवा पटिक्कमति। अथ खो या तस्मिं वनसण्डे अधिवत्था देवता आयस्मतो नागदत्तस्स अनुकम्पिका अत्थकामा आयस्मन्तं नागदत्तं संवेजेतुकामा येनायस्मा नागदत्तो तेनुपसङ्कमि; उपसङ्कमित्वा आयस्मन्तं नागदत्तं गाथाहि अज्झभासि –
227. Ekaṃ samayaṃ āyasmā nāgadatto kosalesu viharati aññatarasmiṃ vanasaṇḍe. Tena kho pana samayena āyasmā nāgadatto atikālena gāmaṃ pavisati, atidivā paṭikkamati. Atha kho yā tasmiṃ vanasaṇḍe adhivatthā devatā āyasmato nāgadattassa anukampikā atthakāmā āyasmantaṃ nāgadattaṃ saṃvejetukāmā yenāyasmā nāgadatto tenupasaṅkami; upasaṅkamitvā āyasmantaṃ nāgadattaṃ gāthāhi ajjhabhāsi –
‘‘काले पविस नागदत्त, दिवा च आगन्त्वा अतिवेलचारी।
‘‘Kāle pavisa nāgadatta, divā ca āgantvā ativelacārī;
संसट्ठो गहट्ठेहि, समानसुखदुक्खो॥
Saṃsaṭṭho gahaṭṭhehi, samānasukhadukkho.
‘‘भायामि नागदत्तं सुप्पगब्भं, कुलेसु विनिबद्धं।
‘‘Bhāyāmi nāgadattaṃ suppagabbhaṃ, kulesu vinibaddhaṃ;
मा हेव मच्चुरञ्ञो बलवतो, अन्तकस्स वसं उपेसी’’ति 1॥
Mā heva maccurañño balavato, antakassa vasaṃ upesī’’ti 2.
अथ खो आयस्मा नागदत्तो ताय देवताय संवेजितो संवेगमापादीति।
Atha kho āyasmā nāgadatto tāya devatāya saṃvejito saṃvegamāpādīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ७. नागदत्तसुत्तवण्णना • 7. Nāgadattasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ७. नागदत्तसुत्तवण्णना • 7. Nāgadattasuttavaṇṇanā
