| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౭. నాగదత్తసుత్తం
7. Nāgadattasuttaṃ
౨౨౭. ఏకం సమయం ఆయస్మా నాగదత్తో కోసలేసు విహరతి అఞ్ఞతరస్మిం వనసణ్డే. తేన ఖో పన సమయేన ఆయస్మా నాగదత్తో అతికాలేన గామం పవిసతి, అతిదివా పటిక్కమతి. అథ ఖో యా తస్మిం వనసణ్డే అధివత్థా దేవతా ఆయస్మతో నాగదత్తస్స అనుకమ్పికా అత్థకామా ఆయస్మన్తం నాగదత్తం సంవేజేతుకామా యేనాయస్మా నాగదత్తో తేనుపసఙ్కమి; ఉపసఙ్కమిత్వా ఆయస్మన్తం నాగదత్తం గాథాహి అజ్ఝభాసి –
227. Ekaṃ samayaṃ āyasmā nāgadatto kosalesu viharati aññatarasmiṃ vanasaṇḍe. Tena kho pana samayena āyasmā nāgadatto atikālena gāmaṃ pavisati, atidivā paṭikkamati. Atha kho yā tasmiṃ vanasaṇḍe adhivatthā devatā āyasmato nāgadattassa anukampikā atthakāmā āyasmantaṃ nāgadattaṃ saṃvejetukāmā yenāyasmā nāgadatto tenupasaṅkami; upasaṅkamitvā āyasmantaṃ nāgadattaṃ gāthāhi ajjhabhāsi –
‘‘కాలే పవిస నాగదత్త, దివా చ ఆగన్త్వా అతివేలచారీ;
‘‘Kāle pavisa nāgadatta, divā ca āgantvā ativelacārī;
సంసట్ఠో గహట్ఠేహి, సమానసుఖదుక్ఖో.
Saṃsaṭṭho gahaṭṭhehi, samānasukhadukkho.
‘‘భాయామి నాగదత్తం సుప్పగబ్భం, కులేసు వినిబద్ధం;
‘‘Bhāyāmi nāgadattaṃ suppagabbhaṃ, kulesu vinibaddhaṃ;
మా హేవ మచ్చురఞ్ఞో బలవతో, అన్తకస్స వసం ఉపేసీ’’తి 1.
Mā heva maccurañño balavato, antakassa vasaṃ upesī’’ti 2.
అథ ఖో ఆయస్మా నాగదత్తో తాయ దేవతాయ సంవేజితో సంవేగమాపాదీతి.
Atha kho āyasmā nāgadatto tāya devatāya saṃvejito saṃvegamāpādīti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౭. నాగదత్తసుత్తవణ్ణనా • 7. Nāgadattasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౭. నాగదత్తసుత్తవణ్ణనా • 7. Nāgadattasuttavaṇṇanā
