| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๗. นาคทตฺตสุตฺตํ
7. Nāgadattasuttaṃ
๒๒๗. เอกํ สมยํ อายสฺมา นาคทโตฺต โกสเลสุ วิหรติ อญฺญตรสฺมิํ วนสเณฺฑฯ เตน โข ปน สมเยน อายสฺมา นาคทโตฺต อติกาเลน คามํ ปวิสติ, อติทิวา ปฎิกฺกมติฯ อถ โข ยา ตสฺมิํ วนสเณฺฑ อธิวตฺถา เทวตา อายสฺมโต นาคทตฺตสฺส อนุกมฺปิกา อตฺถกามา อายสฺมนฺตํ นาคทตฺตํ สํเวเชตุกามา เยนายสฺมา นาคทโตฺต เตนุปสงฺกมิ; อุปสงฺกมิตฺวา อายสฺมนฺตํ นาคทตฺตํ คาถาหิ อชฺฌภาสิ –
227. Ekaṃ samayaṃ āyasmā nāgadatto kosalesu viharati aññatarasmiṃ vanasaṇḍe. Tena kho pana samayena āyasmā nāgadatto atikālena gāmaṃ pavisati, atidivā paṭikkamati. Atha kho yā tasmiṃ vanasaṇḍe adhivatthā devatā āyasmato nāgadattassa anukampikā atthakāmā āyasmantaṃ nāgadattaṃ saṃvejetukāmā yenāyasmā nāgadatto tenupasaṅkami; upasaṅkamitvā āyasmantaṃ nāgadattaṃ gāthāhi ajjhabhāsi –
‘‘กาเล ปวิส นาคทตฺต, ทิวา จ อาคนฺตฺวา อติเวลจารี;
‘‘Kāle pavisa nāgadatta, divā ca āgantvā ativelacārī;
สํสโฎฺฐ คหเฎฺฐหิ, สมานสุขทุโกฺขฯ
Saṃsaṭṭho gahaṭṭhehi, samānasukhadukkho.
‘‘ภายามิ นาคทตฺตํ สุปฺปคพฺภํ, กุเลสุ วินิพทฺธํ;
‘‘Bhāyāmi nāgadattaṃ suppagabbhaṃ, kulesu vinibaddhaṃ;
มา เหว มจฺจุรโญฺญ พลวโต, อนฺตกสฺส วสํ อุเปสี’’ติ 1ฯ
Mā heva maccurañño balavato, antakassa vasaṃ upesī’’ti 2.
อถ โข อายสฺมา นาคทโตฺต ตาย เทวตาย สํเวชิโต สํเวคมาปาทีติฯ
Atha kho āyasmā nāgadatto tāya devatāya saṃvejito saṃvegamāpādīti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๗. นาคทตฺตสุตฺตวณฺณนา • 7. Nāgadattasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗. นาคทตฺตสุตฺตวณฺณนา • 7. Nāgadattasuttavaṇṇanā
