| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. නාගදත්‌තසුත්‌තං
7. Nāgadattasuttaṃ
227. එකං සමයං ආයස්‌මා නාගදත්‌තො කොසලෙසු විහරති අඤ්‌ඤතරස්‌මිං වනසණ්‌ඩෙ. තෙන ඛො පන සමයෙන ආයස්‌මා නාගදත්‌තො අතිකාලෙන ගාමං පවිසති, අතිදිවා පටික්‌කමති. අථ ඛො යා තස්‌මිං වනසණ්‌ඩෙ අධිවත්‌ථා දෙවතා ආයස්‌මතො නාගදත්‌තස්‌ස අනුකම්‌පිකා අත්‌ථකාමා ආයස්‌මන්‌තං නාගදත්‌තං සංවෙජෙතුකාමා යෙනායස්‌මා නාගදත්‌තො තෙනුපසඞ්‌කමි; උපසඞ්‌කමිත්‌වා ආයස්‌මන්‌තං නාගදත්‌තං ගාථාහි අජ්‌ඣභාසි –
227. Ekaṃ samayaṃ āyasmā nāgadatto kosalesu viharati aññatarasmiṃ vanasaṇḍe. Tena kho pana samayena āyasmā nāgadatto atikālena gāmaṃ pavisati, atidivā paṭikkamati. Atha kho yā tasmiṃ vanasaṇḍe adhivatthā devatā āyasmato nāgadattassa anukampikā atthakāmā āyasmantaṃ nāgadattaṃ saṃvejetukāmā yenāyasmā nāgadatto tenupasaṅkami; upasaṅkamitvā āyasmantaṃ nāgadattaṃ gāthāhi ajjhabhāsi –
‘‘කාලෙ පවිස නාගදත්‌ත, දිවා ච ආගන්‌ත්‌වා අතිවෙලචාරී;
‘‘Kāle pavisa nāgadatta, divā ca āgantvā ativelacārī;
සංසට්‌ඨො ගහට්‌ඨෙහි, සමානසුඛදුක්‌ඛො.
Saṃsaṭṭho gahaṭṭhehi, samānasukhadukkho.
‘‘භායාමි නාගදත්‌තං සුප්‌පගබ්‌භං, කුලෙසු විනිබද්‌ධං;
‘‘Bhāyāmi nāgadattaṃ suppagabbhaṃ, kulesu vinibaddhaṃ;
මා හෙව මච්‌චුරඤ්‌ඤො බලවතො, අන්‌තකස්‌ස වසං උපෙසී’’ති 1.
Mā heva maccurañño balavato, antakassa vasaṃ upesī’’ti 2.
අථ ඛො ආයස්‌මා නාගදත්‌තො තාය දෙවතාය සංවෙජිතො සංවෙගමාපාදීති.
Atha kho āyasmā nāgadatto tāya devatāya saṃvejito saṃvegamāpādīti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. නාගදත්‌තසුත්‌තවණ්‌ණනා • 7. Nāgadattasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. නාගදත්‌තසුත්‌තවණ්‌ණනා • 7. Nāgadattasuttavaṇṇanā
