| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
နဂန္တဗ္ဗဂန္တဗ္ဗဝာရကထာဝဏ္ဏနာ
Nagantabbagantabbavārakathāvaṇṇanā
၁၈၁. န ဂန္တဗ္ဗောတိ ကိံ သန္ဓာယ? ‘‘အညတ္ရ သင္ဃေနာ’’တိ ဝစနတော ယသ္မိံ ဝိဟာရေ သတံ ဘိက္ခူ ဝိဟရန္တိ, တေ သဗ္ဗေ ကေနစိဒေဝ ကရဏီယေန ဒသ ဒသ ဟုတ္ဝာ ဝိသုံ ဝိသုံ နာနာဥဒကုက္ခေပသီမာဒီသု ဌတ္ဝာ ဥပောသထံ ကာတုံ လဘန္တိ။ နဝကမ္မသာလာဒိကာ နာနာသီမာကောဋိ ဥပောသထာဓိဋ္ဌာနတ္ထံ သီမာပိ နဒီပိ န ဂန္တဗ္ဗာ။ ဂရုကံ ပာတိမောက္ခုဒ္ဒေသံ ဝိသ္သဇ္ဇိတ္ဝာ လဟုကသ္သ အကတ္တဗ္ဗတ္တာ ‘‘အညတ္ရ သင္ဃေနာ’’တိ ဝစနံ သာဓေတိ။ တတ္ထ ‘‘ယသ္မိံ အာဝာသေ ဥပောသထကာရကာ ။ပေ.။ အကတ္ဝာ န ဂန္တဗ္ဗော’’တိ ဝစနတော ဝိသ္သဋ္ဌဥပောသထာပိ အာဝာသာ ဂန္တုံ ဝဋ္ဋတီတိ သိဒ္ဓံ။ ‘‘တတော ပာရိသုဒ္ဓိဥပောသထကရဏတ္ထံ ဝိသ္သဋ္ဌဥပောသထာ ဂန္တုံ ဝဋ္ဋတိ, ခဏ္ဍသီမံ ဝာ ပဝိသိတုန္တိ အပရေ ဝဒန္တီ’’တိ ဝုတ္တံ။ ဣမိနာ နေဝ ဥပောသထန္တရာယောတိ ‘‘အတ္တနော ဥပောသထန္တရာယော’’တိ လိခိတံ။
181.Na gantabboti kiṃ sandhāya? ‘‘Aññatra saṅghenā’’ti vacanato yasmiṃ vihāre sataṃ bhikkhū viharanti, te sabbe kenacideva karaṇīyena dasa dasa hutvā visuṃ visuṃ nānāudakukkhepasīmādīsu ṭhatvā uposathaṃ kātuṃ labhanti. Navakammasālādikā nānāsīmākoṭi uposathādhiṭṭhānatthaṃ sīmāpi nadīpi na gantabbā. Garukaṃ pātimokkhuddesaṃ vissajjitvā lahukassa akattabbattā ‘‘aññatra saṅghenā’’ti vacanaṃ sādheti. Tattha ‘‘yasmiṃ āvāse uposathakārakā …pe… akatvā na gantabbo’’ti vacanato vissaṭṭhauposathāpi āvāsā gantuṃ vaṭṭatīti siddhaṃ. ‘‘Tato pārisuddhiuposathakaraṇatthaṃ vissaṭṭhauposathā gantuṃ vaṭṭati, khaṇḍasīmaṃ vā pavisitunti apare vadantī’’ti vuttaṃ. Iminā neva uposathantarāyoti ‘‘attano uposathantarāyo’’ti likhitaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၀၃. နဂန္တဗ္ဗဝာရော • 103. Nagantabbavāro
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / နဂန္တဗ္ဗဂန္တဗ္ဗဝာရကထာ • Nagantabbagantabbavārakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / နဂန္တဗ္ဗဂန္တဗ္ဗဝာရကထာဝဏ္ဏနာ • Nagantabbagantabbavārakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / လိင္ဂာဒိဒသ္သနကထာဒိဝဏ္ဏနာ • Liṅgādidassanakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၀၃. နဂန္တဗ္ဗဂန္တဗ္ဗဝာရကထာ • 103. Nagantabbagantabbavārakathā
