| Library / Tipiṭaka / तिपिटक • Tipiṭaka / पेतवत्थुपाळि • Petavatthupāḷi |
११. नागपेतवत्थु
11. Nāgapetavatthu
७३.
73.
‘‘पुरतोव 1 सेतेन पलेति हत्थिना, मज्झे पन अस्सतरीरथेन।
‘‘Puratova 2 setena paleti hatthinā, majjhe pana assatarīrathena;
पच्छा च कञ्ञा सिविकाय नीयति, ओभासयन्ती दस सब्बतो 3 दिसा॥
Pacchā ca kaññā sivikāya nīyati, obhāsayantī dasa sabbato 4 disā.
७४.
74.
‘‘तुम्हे पन मुग्गरहत्थपाणिनो, रुदंमुखा छिन्नपभिन्नगत्ता।
‘‘Tumhe pana muggarahatthapāṇino, rudaṃmukhā chinnapabhinnagattā;
मनुस्सभूता किमकत्थ पापं, येनञ्ञमञ्ञस्स पिवाथ लोहित’’न्ति॥
Manussabhūtā kimakattha pāpaṃ, yenaññamaññassa pivātha lohita’’nti.
७५.
75.
‘‘पुरतोव यो गच्छति कुञ्जरेन, सेतेन नागेन चतुक्कमेन।
‘‘Puratova yo gacchati kuñjarena, setena nāgena catukkamena;
अम्हाक पुत्तो अहु जेट्ठको सो 5, दानानि दत्वान सुखी पमोदति॥
Amhāka putto ahu jeṭṭhako so 6, dānāni datvāna sukhī pamodati.
७६.
76.
‘‘यो सो मज्झे अस्सतरीरथेन, चतुब्भि युत्तेन सुवग्गितेन।
‘‘Yo so majjhe assatarīrathena, catubbhi yuttena suvaggitena;
अम्हाक पुत्तो अहु मज्झिमो सो, अमच्छरी दानवती विरोचति॥
Amhāka putto ahu majjhimo so, amaccharī dānavatī virocati.
७७.
77.
‘‘या सा च पच्छा सिविकाय नीयति, नारी सपञ्ञा मिगमन्दलोचना।
‘‘Yā sā ca pacchā sivikāya nīyati, nārī sapaññā migamandalocanā;
अम्हाक धीता अहु सा कनिट्ठिका, भागड्ढभागेन सुखी पमोदति॥
Amhāka dhītā ahu sā kaniṭṭhikā, bhāgaḍḍhabhāgena sukhī pamodati.
७८.
78.
‘‘एते च दानानि अदंसु पुब्बे, पसन्नचित्ता समणब्राह्मणानं।
‘‘Ete ca dānāni adaṃsu pubbe, pasannacittā samaṇabrāhmaṇānaṃ;
मयं पन मच्छरिनो अहुम्ह, परिभासका समणब्राह्मणानं।
Mayaṃ pana maccharino ahumha, paribhāsakā samaṇabrāhmaṇānaṃ;
एते च दत्वा परिचारयन्ति, मयञ्च सुस्साम नळोव छिन्नो’’ति 7॥
Ete ca datvā paricārayanti, mayañca sussāma naḷova chinno’’ti 8.
७९.
79.
‘‘किं तुम्हाकं भोजनं किं सयानं, कथञ्च यापेथ सुपापधम्मिनो।
‘‘Kiṃ tumhākaṃ bhojanaṃ kiṃ sayānaṃ, kathañca yāpetha supāpadhammino;
पहूतभोगेसु अनप्पकेसु, सुखं विराधाय 9 दुक्खज्ज पत्ता’’ति॥
Pahūtabhogesu anappakesu, sukhaṃ virādhāya 10 dukkhajja pattā’’ti.
८०.
80.
‘‘अञ्ञमञ्ञं वधित्वान, पिवाम पुब्बलोहितं।
‘‘Aññamaññaṃ vadhitvāna, pivāma pubbalohitaṃ;
८१.
81.
‘‘इच्चेव मच्चा परिदेवयन्ति, अदायका पेच्च 13 यमस्स ठायिनो।
‘‘Icceva maccā paridevayanti, adāyakā pecca 14 yamassa ṭhāyino;
ये ते विदिच्च 15 अधिगम्म भोगे, न भुञ्जरे नापि करोन्ति पुञ्ञं॥
Ye te vidicca 16 adhigamma bhoge, na bhuñjare nāpi karonti puññaṃ.
८२.
82.
‘‘ते खुप्पिपासूपगता परत्थ, पच्छा 17 चिरं झायरे डय्हमाना।
‘‘Te khuppipāsūpagatā parattha, pacchā 18 ciraṃ jhāyare ḍayhamānā;
कम्मानि कत्वान दुखुद्रानि, अनुभोन्ति दुक्खं कटुकप्फलानि॥
Kammāni katvāna dukhudrāni, anubhonti dukkhaṃ kaṭukapphalāni.
८३.
83.
‘‘इत्तरं हि धनं धञ्ञं, इत्तरं इध जीवितं।
‘‘Ittaraṃ hi dhanaṃ dhaññaṃ, ittaraṃ idha jīvitaṃ;
इत्तरं इत्तरतो ञत्वा, दीपं कयिराथ पण्डितो॥
Ittaraṃ ittarato ñatvā, dīpaṃ kayirātha paṇḍito.
८४.
84.
‘‘ये ते एवं पजानन्ति, नरा धम्मस्स कोविदा।
‘‘Ye te evaṃ pajānanti, narā dhammassa kovidā;
ते दाने नप्पमज्जन्ति, सुत्वा अरहतं वचो’’ति॥
Te dāne nappamajjanti, sutvā arahataṃ vaco’’ti.
नागपेतवत्थु एकादसमं।
Nāgapetavatthu ekādasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पेतवत्थु-अट्ठकथा • Petavatthu-aṭṭhakathā / ११. नागपेतवत्थुवण्णना • 11. Nāgapetavatthuvaṇṇanā
