| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
১১. নাগপেতৰত্থুৰণ্ণনা
11. Nāgapetavatthuvaṇṇanā
পুরতোৰ সেতেন পলেতি হত্থিনাতি ইদং সত্থরি জেতৰনে ৰিহরন্তে দ্ৰে ব্রাহ্মণপেতে আরম্ভ ৰুত্তং। আযস্মা কির সংকিচ্চো সত্তৰস্সিকো খুরগ্গেযেৰ অরহত্তং পত্ৰা সামণেরভূমিযং ঠিতো তিংসমত্তেহি ভিক্খূহি সদ্ধিং অরঞ্ঞাযতনে ৰসন্তো তেসং ভিক্খূনং পঞ্চন্নং চোরসতানং হত্থতো আগতং মরণম্পি বাহিত্ৰা তে চ চোরে দমেত্ৰা পব্বাজেত্ৰা সত্থু সন্তিকং অগমাসি। সত্থা তেসং ভিক্খূনং ধম্মং দেসেসি, দেসনাৰসানে তে ভিক্খূ অরহত্তং পাপুণিংসু। অথাযস্মা সংকিচ্চো পরিপুণ্ণৰস্সো লদ্ধূপসম্পদো তেহি পঞ্চহি ভিক্খুসতেহি সদ্ধিং বারাণসিং গন্ত্ৰা ইসিপতনে ৰিহাসি। মনুস্সা থেরস্স সন্তিকং গন্ত্ৰা ধম্মং সুত্ৰা পসন্নমানসা ৰীথিপটিপাটিযা ৰগ্গৰগ্গা হুত্ৰা আগন্তুকদানং অদংসু। তত্থ অঞ্ঞতরো উপাসকো মনুস্সে নিচ্চভত্তে সমাদপেসি, তে যথাবলং নিচ্চভত্তং পট্ঠপেসুং।
Puratovasetena paleti hatthināti idaṃ satthari jetavane viharante dve brāhmaṇapete ārambha vuttaṃ. Āyasmā kira saṃkicco sattavassiko khuraggeyeva arahattaṃ patvā sāmaṇerabhūmiyaṃ ṭhito tiṃsamattehi bhikkhūhi saddhiṃ araññāyatane vasanto tesaṃ bhikkhūnaṃ pañcannaṃ corasatānaṃ hatthato āgataṃ maraṇampi bāhitvā te ca core dametvā pabbājetvā satthu santikaṃ agamāsi. Satthā tesaṃ bhikkhūnaṃ dhammaṃ desesi, desanāvasāne te bhikkhū arahattaṃ pāpuṇiṃsu. Athāyasmā saṃkicco paripuṇṇavasso laddhūpasampado tehi pañcahi bhikkhusatehi saddhiṃ bārāṇasiṃ gantvā isipatane vihāsi. Manussā therassa santikaṃ gantvā dhammaṃ sutvā pasannamānasā vīthipaṭipāṭiyā vaggavaggā hutvā āgantukadānaṃ adaṃsu. Tattha aññataro upāsako manusse niccabhatte samādapesi, te yathābalaṃ niccabhattaṃ paṭṭhapesuṃ.
তেন চ সমযেন বারাণসিযং অঞ্ঞতরস্স মিচ্ছাদিট্ঠিকস্স ব্রাহ্মণস্স দ্ৰে পুত্তা একা চ ধীতা অহেসুং। তেসু জেট্ঠপুত্তো তস্স উপাসকস্স মিত্তো অহোসি। সো তং গহেত্ৰা আযস্মতো সংকিচ্চস্স সন্তিকং অগমাসি। আযস্মা সংকিচ্চো তস্স ধম্মং দেসেসি। সো মুদুচিত্তো অহোসি। অথ নং সো উপাসকো আহ – ‘‘ত্ৰং একস্স ভিক্খুনো নিচ্চভত্তং দেহী’’তি । ‘‘অনাচিণ্ণং অম্হাকং ব্রাহ্মণানং সমণানং সক্যপুত্তিযানং নিচ্চভত্তদানং, তস্মা নাহং দস্সামী’’তি। ‘‘কিং ময্হম্পি ভত্তং ন দস্সসী’’তি? ‘‘কথং ন দস্সামী’’তি আহ। ‘‘যদি এৰং যং ময্হং দেসি, তং একস্স ভিক্খুস্স দেহী’’তি। সো ‘‘সাধূ’’তি পটিস্সুণিত্ৰা দুতিযদিৰসে পাতোৰ ৰিহারং গন্ত্ৰা একং ভিক্খুং আনেত্ৰা ভোজেসি।
Tena ca samayena bārāṇasiyaṃ aññatarassa micchādiṭṭhikassa brāhmaṇassa dve puttā ekā ca dhītā ahesuṃ. Tesu jeṭṭhaputto tassa upāsakassa mitto ahosi. So taṃ gahetvā āyasmato saṃkiccassa santikaṃ agamāsi. Āyasmā saṃkicco tassa dhammaṃ desesi. So muducitto ahosi. Atha naṃ so upāsako āha – ‘‘tvaṃ ekassa bhikkhuno niccabhattaṃ dehī’’ti . ‘‘Anāciṇṇaṃ amhākaṃ brāhmaṇānaṃ samaṇānaṃ sakyaputtiyānaṃ niccabhattadānaṃ, tasmā nāhaṃ dassāmī’’ti. ‘‘Kiṃ mayhampi bhattaṃ na dassasī’’ti? ‘‘Kathaṃ na dassāmī’’ti āha. ‘‘Yadi evaṃ yaṃ mayhaṃ desi, taṃ ekassa bhikkhussa dehī’’ti. So ‘‘sādhū’’ti paṭissuṇitvā dutiyadivase pātova vihāraṃ gantvā ekaṃ bhikkhuṃ ānetvā bhojesi.
এৰং গচ্ছন্তে কালে ভিক্খূনং পটিপত্তিং দিস্ৰা ধম্মঞ্চ সুণিত্ৰা তস্স কনিট্ঠভাতা চ ভগিনী চ সাসনে অভিপ্পসন্না পুঞ্ঞকম্মরতা চ অহেসুং। এৰং তে তযো জনা যথাৰিভৰং দানানি দেন্তা সমণব্রাহ্মণে সক্করিংসু গরুং করিংসু মানেসুং পূজেসুং। মাতাপিতরো পন নেসং অস্সদ্ধা অপ্পসন্না সমণব্রাহ্মণেসু অগারৰা পুঞ্ঞকিরিযায অনাদরা অচ্ছন্দিকা অহেসুং। তেসং ধীতরং দারিকং মাতুলপুত্তস্সত্থায ঞাতকা ৰারেসুং। সো চ আযস্মতো সংকিচ্চস্স সন্তিকে ধম্মং সুত্ৰা সংৰেগজাতো পব্বজিত্ৰা নিচ্চং অত্তনো মাতু-গেহং ভুঞ্জিতুং গচ্ছতি। তং মাতা অত্তনো ভাতু-ধীতায দারিকায পলোভেতি। তেন সো উক্কণ্ঠিতো হুত্ৰা উপজ্ঝাযং উপসঙ্গমিত্ৰা আহ – ‘‘উপ্পব্বজিস্সামহং, ভন্তে, অনুজানাথ ম’’ন্তি। উপজ্ঝাযো তস্স উপনিস্সযসম্পত্তিং দিস্ৰা আহ – ‘‘সামণের, মাসমত্তং আগমেহী’’তি। সো ‘‘সাধূ’’তি পটিস্সুণিত্ৰা মাসে অতিক্কন্তে তথেৰ আরোচেসি। উপজ্ঝাযো পুন ‘‘অড্ঢমাসং আগমেহী’’তি আহ। অড্ঢমাসে অতিক্কন্তে তথেৰ ৰুত্তে পুন ‘‘সত্তাহং আগমেহী’’তি আহ। সো ‘‘সাধূ’’তি পটিস্সুণি। অথ তস্মিং অন্তোসত্তাহে সামণেরস্স মাতুলানিযা গেহং ৰিনট্ঠচ্ছদনং জিণ্ণং দুব্বলকুট্টং ৰাতৰস্সাভিহতং পরিপতি। তত্থ ব্রাহ্মণো ব্রাহ্মণী দ্ৰে পুত্তা ঘীতা চ গেহেন অজ্ঝোত্থটা কালমকংসু। তেসু ব্রাহ্মণো ব্রাহ্মণী চ পেতযোনিযং নিব্বত্তিংসু, দ্ৰে পুত্তা ধীতা চ ভুম্মদেৰেসু। তেসু জেট্ঠপুত্তস্স হত্থিযানং নিব্বত্তি, কনিট্ঠস্স অস্সতরীরথো, ধীতায সুৰণ্ণসিৰিকা। ব্রাহ্মণো চ ব্রাহ্মণী চ মহন্তে মহন্তে অযোমুগ্গরে গহেত্ৰা অঞ্ঞমঞ্ঞং আকোটেন্তি, অভিহতট্ঠানেসু মহন্তা মহন্তা ঘটপ্পমাণা গণ্ডা উট্ঠহিত্ৰা মুহুত্তেনেৰ পচিত্ৰা পরিভেদপ্পত্তা হোন্তি। তে অঞ্ঞমঞ্ঞস্স গণ্ডে ফালেত্ৰা কোধাভিভূতা নিক্করুণা ফরুসৰচনেহি তজ্জেন্তা পুব্বলোহিতং পিৰন্তি, ন চ তিত্তিং পটিলভন্তি।
Evaṃ gacchante kāle bhikkhūnaṃ paṭipattiṃ disvā dhammañca suṇitvā tassa kaniṭṭhabhātā ca bhaginī ca sāsane abhippasannā puññakammaratā ca ahesuṃ. Evaṃ te tayo janā yathāvibhavaṃ dānāni dentā samaṇabrāhmaṇe sakkariṃsu garuṃ kariṃsu mānesuṃ pūjesuṃ. Mātāpitaro pana nesaṃ assaddhā appasannā samaṇabrāhmaṇesu agāravā puññakiriyāya anādarā acchandikā ahesuṃ. Tesaṃ dhītaraṃ dārikaṃ mātulaputtassatthāya ñātakā vāresuṃ. So ca āyasmato saṃkiccassa santike dhammaṃ sutvā saṃvegajāto pabbajitvā niccaṃ attano mātu-gehaṃ bhuñjituṃ gacchati. Taṃ mātā attano bhātu-dhītāya dārikāya palobheti. Tena so ukkaṇṭhito hutvā upajjhāyaṃ upasaṅgamitvā āha – ‘‘uppabbajissāmahaṃ, bhante, anujānātha ma’’nti. Upajjhāyo tassa upanissayasampattiṃ disvā āha – ‘‘sāmaṇera, māsamattaṃ āgamehī’’ti. So ‘‘sādhū’’ti paṭissuṇitvā māse atikkante tatheva ārocesi. Upajjhāyo puna ‘‘aḍḍhamāsaṃ āgamehī’’ti āha. Aḍḍhamāse atikkante tatheva vutte puna ‘‘sattāhaṃ āgamehī’’ti āha. So ‘‘sādhū’’ti paṭissuṇi. Atha tasmiṃ antosattāhe sāmaṇerassa mātulāniyā gehaṃ vinaṭṭhacchadanaṃ jiṇṇaṃ dubbalakuṭṭaṃ vātavassābhihataṃ paripati. Tattha brāhmaṇo brāhmaṇī dve puttā ghītā ca gehena ajjhotthaṭā kālamakaṃsu. Tesu brāhmaṇo brāhmaṇī ca petayoniyaṃ nibbattiṃsu, dve puttā dhītā ca bhummadevesu. Tesu jeṭṭhaputtassa hatthiyānaṃ nibbatti, kaniṭṭhassa assatarīratho, dhītāya suvaṇṇasivikā. Brāhmaṇo ca brāhmaṇī ca mahante mahante ayomuggare gahetvā aññamaññaṃ ākoṭenti, abhihataṭṭhānesu mahantā mahantā ghaṭappamāṇā gaṇḍā uṭṭhahitvā muhutteneva pacitvā paribhedappattā honti. Te aññamaññassa gaṇḍe phāletvā kodhābhibhūtā nikkaruṇā pharusavacanehi tajjentā pubbalohitaṃ pivanti, na ca tittiṃ paṭilabhanti.
অথ সামণেরো উক্কণ্ঠাভিভূতো উপজ্ঝাযং উপসঙ্কমিত্ৰা আহ – ‘‘ভন্তে, মযা পটিঞ্ঞাতদিৰসা ৰীতিৰত্তা, গেহং গমিস্সামি, অনুজানাথ ম’’ন্তি। অথ নং উপজ্ঝাযো ‘‘অত্থঙ্গতে সূরিযে কালপক্খচাতুদ্দসিযা পৰত্তমানায এহী’’তি ৰত্ৰা ইসিপতনৰিহারস্স পিট্ঠিপস্সেন থোকং গন্ত্ৰা অট্ঠাসি। তেন চ সমযেন তে দ্ৰে দেৰপুত্তা সদ্ধিং ভগিনিযা তেনেৰ মগ্গেন যক্খসমাগমং সম্ভাৰেতুং গচ্ছন্তি, তেসং পন মাতাপিতরো মুগ্গরহত্থা ফরুসৰাচা কাল়রূপা আকুলাকুললূখপতিতকেসভারা অগ্গিদড্ঢতালক্খন্ধসদিসা ৰিগলিতপুব্বলোহিতা ৰলিতগত্তা অতিৰিয জেগুচ্ছবীভচ্ছদস্সনা তে অনুবন্ধন্তি।
Atha sāmaṇero ukkaṇṭhābhibhūto upajjhāyaṃ upasaṅkamitvā āha – ‘‘bhante, mayā paṭiññātadivasā vītivattā, gehaṃ gamissāmi, anujānātha ma’’nti. Atha naṃ upajjhāyo ‘‘atthaṅgate sūriye kālapakkhacātuddasiyā pavattamānāya ehī’’ti vatvā isipatanavihārassa piṭṭhipassena thokaṃ gantvā aṭṭhāsi. Tena ca samayena te dve devaputtā saddhiṃ bhaginiyā teneva maggena yakkhasamāgamaṃ sambhāvetuṃ gacchanti, tesaṃ pana mātāpitaro muggarahatthā pharusavācā kāḷarūpā ākulākulalūkhapatitakesabhārā aggidaḍḍhatālakkhandhasadisā vigalitapubbalohitā valitagattā ativiya jegucchabībhacchadassanā te anubandhanti.
অথাযস্মা সংকিচ্চো যথা সো সামণেরো তে সব্বে গচ্ছন্তে পস্সতি, তথারূপং ইদ্ধাভিসঙ্খারং অভিসঙ্খরিত্ৰা সামণেরং আহ – ‘‘পস্সসি ত্ৰং, সামণের, ইমে গচ্ছন্তে’’তি? ‘‘আম, ভন্তে, পস্সামী’’তি। ‘‘তেন হি ইমেহি কতকম্মং পটিপুচ্ছা’’তি। সো হত্থিযানাদীহি গচ্ছন্তে অনুক্কমেন পটিপুচ্ছি। তে আহংসু – ‘‘যে পচ্ছতো পেতা আগচ্ছন্তি, তে পটিপুচ্ছা’’তি। সামণেরো তে পেতে গাথাহি অজ্ঝভাসি –
Athāyasmā saṃkicco yathā so sāmaṇero te sabbe gacchante passati, tathārūpaṃ iddhābhisaṅkhāraṃ abhisaṅkharitvā sāmaṇeraṃ āha – ‘‘passasi tvaṃ, sāmaṇera, ime gacchante’’ti? ‘‘Āma, bhante, passāmī’’ti. ‘‘Tena hi imehi katakammaṃ paṭipucchā’’ti. So hatthiyānādīhi gacchante anukkamena paṭipucchi. Te āhaṃsu – ‘‘ye pacchato petā āgacchanti, te paṭipucchā’’ti. Sāmaṇero te pete gāthāhi ajjhabhāsi –
৭৩.
73.
‘‘পুরতোৰ সেতেন পলেতি হত্থিনা, মজ্ঝে পন অস্সতরীরথেন।
‘‘Puratova setena paleti hatthinā, majjhe pana assatarīrathena;
পচ্ছা চ কঞ্ঞা সিৰিকায নীযতি, ওভাসযন্তী দস সব্বসো দিসা॥
Pacchā ca kaññā sivikāya nīyati, obhāsayantī dasa sabbaso disā.
৭৪.
74.
‘‘তুম্হে পন মুগ্গরহত্থপাণিনো, রুদংমুখা ছিন্নপভিন্নগত্তা।
‘‘Tumhe pana muggarahatthapāṇino, rudaṃmukhā chinnapabhinnagattā;
মনুস্সভূতা কিমকত্থ পাপং, যেনঞ্ঞমঞ্ঞস্স পিৰাথ লোহিত’’ন্তি॥
Manussabhūtā kimakattha pāpaṃ, yenaññamaññassa pivātha lohita’’nti.
তত্থ পুরতোতি সব্বপঠমং। সেতেনাতি পণ্ডরেন। পলেতীতি গচ্ছতি। মজ্ঝে পনাতি হত্থিং আরুল়্হস্স সিৰিকং আরুল়্হায চ অন্তরে। অস্সতরীরথেনাতি অস্সতরীযুত্তেন রথেন পলেতীতি যোজনা। নীযতীতি ৰহীযতি। ওভাসযন্তী দস সব্বসো দিসাতি সব্বতো সমন্ততো সব্বা দস দিসা অত্তনো সরীরপ্পভাহি ৰত্থাভরণাদিপ্পভাহি চ ৰিজ্জোতযমানা। মুগ্গরহত্থপাণিনোতি মুগ্গরা হত্থসঙ্খাতেসু পাণীসু যেসং তে মুগ্গরহত্থপাণিনো, ভূমিসণ্হকরণীযাদীসু পাণিৰোহারস্স লব্ভমানত্তা হত্থসদ্দেন পাণি এৰ ৰিসেসিতো। ছিন্নপভিন্নগত্তাতি মুগ্গরপ্পহারেন তত্থ তত্থ ছিন্নপভিন্নসরীরা। পিৰাথাতি পিৰথ।
Tattha puratoti sabbapaṭhamaṃ. Setenāti paṇḍarena. Paletīti gacchati. Majjhe panāti hatthiṃ āruḷhassa sivikaṃ āruḷhāya ca antare. Assatarīrathenāti assatarīyuttena rathena paletīti yojanā. Nīyatīti vahīyati. Obhāsayantī dasa sabbaso disāti sabbato samantato sabbā dasa disā attano sarīrappabhāhi vatthābharaṇādippabhāhi ca vijjotayamānā. Muggarahatthapāṇinoti muggarā hatthasaṅkhātesu pāṇīsu yesaṃ te muggarahatthapāṇino, bhūmisaṇhakaraṇīyādīsu pāṇivohārassa labbhamānattā hatthasaddena pāṇi eva visesito. Chinnapabhinnagattāti muggarappahārena tattha tattha chinnapabhinnasarīrā. Pivāthāti pivatha.
এৰং সামণেরেন পুট্ঠা তে পেতা সব্বং তং
Evaṃ sāmaṇerena puṭṭhā te petā sabbaṃ taṃ
পৰত্তিং চতূহি গাথাহি পচ্চভাসিংসু –
Pavattiṃ catūhi gāthāhi paccabhāsiṃsu –
৭৫.
75.
‘‘পুরতোৰ যো গচ্ছতি কুঞ্জরেন, সেতেন নাগেন চতুক্কমেন।
‘‘Puratova yo gacchati kuñjarena, setena nāgena catukkamena;
অম্হাক পুত্তো অহু জেট্ঠকো সো, দানানি দত্ৰান সুখী পমোদতি॥
Amhāka putto ahu jeṭṭhako so, dānāni datvāna sukhī pamodati.
৭৬.
76.
‘‘যো যো মজ্ঝে অস্সতরীরথেন, চতুব্ভি যুত্তেন সুৰগ্গিতেন।
‘‘Yo yo majjhe assatarīrathena, catubbhi yuttena suvaggitena;
অম্হাক পুত্তো অহু মজ্ঝিমো সো, অমচ্ছরী দানপতী ৰিরোচতি॥
Amhāka putto ahu majjhimo so, amaccharī dānapatī virocati.
৭৭.
77.
‘‘যা সা চ পচ্ছা সিৰিকায নীযতি, নারী সপঞ্ঞা মিগমন্দলোচনা।
‘‘Yā sā ca pacchā sivikāya nīyati, nārī sapaññā migamandalocanā;
অম্হাক ধীতা অহু সা কনিট্ঠিকা, ভাগড্ঢভাগেন সুখী পমোদতি॥
Amhāka dhītā ahu sā kaniṭṭhikā, bhāgaḍḍhabhāgena sukhī pamodati.
৭৮.
78.
‘‘এতে চ দানানি অদংসু পুব্বে, পসন্নচিত্তা সমণব্রাহ্মণানং।
‘‘Ete ca dānāni adaṃsu pubbe, pasannacittā samaṇabrāhmaṇānaṃ;
মযং পন মচ্ছরীনো অহুম্হ, পরিভাসকা সমণব্রাহ্মণানং।
Mayaṃ pana maccharīno ahumha, paribhāsakā samaṇabrāhmaṇānaṃ;
এতে চ দত্ৰা পরিচারযন্তি, মযঞ্চ সুস্সাম নল়োৰ ছিন্নো’’তি॥
Ete ca datvā paricārayanti, mayañca sussāma naḷova chinno’’ti.
৭৫. তত্থ পুরতোৰ যো গচ্ছতীতি ইমেসং গচ্ছন্তানং যো পুরতো গচ্ছতি। ‘‘যোসো পুরতো গচ্ছতী’’তি ৰা পাঠো, তস্স যো এসো পুরতো গচ্ছতীতি অত্থো। কুঞ্জরেনাতি কুং পথৰিং জীরযতি, কুঞ্জেসু ৰা রমতি চরতীতি ‘‘কুঞ্জরো’’তি লদ্ধনামেন হত্থিনা। নাগেনাতি, নাস্স অগমনীযং অনভিভৰনীযং অত্থীতি নাগা, তেন নাগেন। চতুক্কমেনাতি চতুপ্পদেন। জেট্ঠকোতি পুব্বজো।
75. Tattha puratova yo gacchatīti imesaṃ gacchantānaṃ yo purato gacchati. ‘‘Yoso purato gacchatī’’ti vā pāṭho, tassa yo eso purato gacchatīti attho. Kuñjarenāti kuṃ pathaviṃ jīrayati, kuñjesu vā ramati caratīti ‘‘kuñjaro’’ti laddhanāmena hatthinā. Nāgenāti, nāssa agamanīyaṃ anabhibhavanīyaṃ atthīti nāgā, tena nāgena. Catukkamenāti catuppadena. Jeṭṭhakoti pubbajo.
৭৬-৭৭. চতুব্ভীতি চতূহি অস্সতরীহি। সুৰগ্গিতেনাতি সুন্দরগমনেন চাতুরগমনেন। মিগমন্দলোচনাতি মিগী ৰিয মন্দক্খিকা। ভাগড্ঢভাগেনাতি ভাগস্স অড্ঢভাগেন, অত্তনা লদ্ধকোট্ঠাসতো অড্ঢভাগদানেন হেতুভূতেন। সুখীতি সুখিনী। লিঙ্গৰিপল্লাসেন হেতং ৰুত্তং।
76-77.Catubbhīti catūhi assatarīhi. Suvaggitenāti sundaragamanena cāturagamanena. Migamandalocanāti migī viya mandakkhikā. Bhāgaḍḍhabhāgenāti bhāgassa aḍḍhabhāgena, attanā laddhakoṭṭhāsato aḍḍhabhāgadānena hetubhūtena. Sukhīti sukhinī. Liṅgavipallāsena hetaṃ vuttaṃ.
৭৮. পরিভাসকাতি অক্কোসকা। পরিচারযন্তীতি দিব্বেসু কামগুণেসু অত্তনো ইন্দ্রিযানি ইতো চিতো চ যথাসুখং চারেন্তি, পরিজনেহি ৰা অত্তনো পুঞ্ঞানুভাৰনিস্সন্দেন পরিচরিযং কারেন্তি। মযঞ্চ সুস্সাম নল়োৰ ছিন্নোতি মযং পন ছিন্নো আতপে খিত্তো নল়ো ৰিয সুস্সাম, খুপ্পিপাসাহি অঞ্ঞমঞ্ঞং দণ্ডাভিঘাতেহি চ সুক্খা ৰিসুক্খা ভৰামাতি।
78.Paribhāsakāti akkosakā. Paricārayantīti dibbesu kāmaguṇesu attano indriyāni ito cito ca yathāsukhaṃ cārenti, parijanehi vā attano puññānubhāvanissandena paricariyaṃ kārenti. Mayañca sussāma naḷova chinnoti mayaṃ pana chinno ātape khitto naḷo viya sussāma, khuppipāsāhi aññamaññaṃ daṇḍābhighātehi ca sukkhā visukkhā bhavāmāti.
এৰং অত্তনো পাপং সম্পৰেদেত্ৰা ‘‘মযং তুয্হং মাতুলমাতুলানিযো’’তি আচিক্খিংসু। তং সুত্ৰা সামণেরো সঞ্জাতসংৰেগো ‘‘এৰরূপানং কিব্বিসকারীনং কথং নু খো ভোজনানি সিজ্ঝন্তী’’তি পুচ্ছন্তো –
Evaṃ attano pāpaṃ sampavedetvā ‘‘mayaṃ tuyhaṃ mātulamātulāniyo’’ti ācikkhiṃsu. Taṃ sutvā sāmaṇero sañjātasaṃvego ‘‘evarūpānaṃ kibbisakārīnaṃ kathaṃ nu kho bhojanāni sijjhantī’’ti pucchanto –
৭৯.
79.
‘‘কিং তুম্হাকং ভোজনং কিং সযানং, কথঞ্চ যাপেথ সুপাপধম্মিনো।
‘‘Kiṃ tumhākaṃ bhojanaṃ kiṃ sayānaṃ, kathañca yāpetha supāpadhammino;
পহূতভোগেসু অনপ্পকেসু, সুখং ৰিরাধায দুক্খজ্জ পত্তা’’তি॥ –
Pahūtabhogesu anappakesu, sukhaṃ virādhāya dukkhajja pattā’’ti. –
ইমং গাথমাহ। তত্থ কিং তুম্হাকং ভোজনন্তি কীদিসং তুম্হাকং ভোজনং? কিং সযানন্তি কীদিসং সযনং? ‘‘কিং সযানা’’তি কেচি পঠন্তি, কীদিসা সযনা, কীদিসে সযনে সযথাতি অত্থো। কথঞ্চ যাপেথাতি কেন পকারেন যাপেথ, ‘‘কথং ৰো যাপেথা’’তিপি পাঠো, কথং তুম্হে যাপেথাতি অত্থো। সুপাপধম্মিনোতি সুট্ঠু অতিৰিয পাপধম্মা। পহূতভোগেসূতি অপরিযন্তেসু উল়ারেসু ভোগেসু সন্তেসু। অনপ্পকেসূতি ন অপ্পকেসু বহূসু। সুখং ৰিরাধাযাতি সুখহেতুনো পুঞ্ঞস্স অকরণেন সুখং ৰিরজ্ঝিত্ৰা ৰিরাধেত্ৰা। ‘‘সুখস্স ৰিরাধেনা’’তি কেচি পঠন্তি। দুক্খজ্জ পত্তাতি অজ্জ ইদানি ইদং পেতযোনিপরিযাপন্নং দুক্খং অনুপ্পত্তাতি।
Imaṃ gāthamāha. Tattha kiṃ tumhākaṃ bhojananti kīdisaṃ tumhākaṃ bhojanaṃ? Kiṃ sayānanti kīdisaṃ sayanaṃ? ‘‘Kiṃ sayānā’’ti keci paṭhanti, kīdisā sayanā, kīdise sayane sayathāti attho. Kathañca yāpethāti kena pakārena yāpetha, ‘‘kathaṃ vo yāpethā’’tipi pāṭho, kathaṃ tumhe yāpethāti attho. Supāpadhamminoti suṭṭhu ativiya pāpadhammā. Pahūtabhogesūti apariyantesu uḷāresu bhogesu santesu. Anappakesūti na appakesu bahūsu. Sukhaṃ virādhāyāti sukhahetuno puññassa akaraṇena sukhaṃ virajjhitvā virādhetvā. ‘‘Sukhassa virādhenā’’ti keci paṭhanti. Dukkhajja pattāti ajja idāni idaṃ petayonipariyāpannaṃ dukkhaṃ anuppattāti.
এৰং সামণেরেন পুট্ঠা পেতা তেন পুচ্ছিতমত্থং ৰিস্সজ্জেন্তা –
Evaṃ sāmaṇerena puṭṭhā petā tena pucchitamatthaṃ vissajjentā –
৮০.
80.
‘‘অঞ্ঞমঞ্ঞং ৰধিত্ৰান, পিৰাম পুব্বলোহিতং।
‘‘Aññamaññaṃ vadhitvāna, pivāma pubbalohitaṃ;
বহুং ৰিত্ৰা ন ধাতা হোম, নচ্ছাদিম্হসে মযং॥
Bahuṃ vitvā na dhātā homa, nacchādimhase mayaṃ.
৮১.
81.
‘‘ইচ্চেৰ মচ্চা পরিদেৰযন্তি, অদাযকা পেচ্চ যমস্স ঠাযিনো।
‘‘Icceva maccā paridevayanti, adāyakā pecca yamassa ṭhāyino;
যে তে ৰিদিচ্চ অধিগম্ম ভোগে, ন ভুঞ্জরে নাপি করোন্তি পুঞ্ঞং॥
Ye te vidicca adhigamma bhoge, na bhuñjare nāpi karonti puññaṃ.
৮২.
82.
‘‘তে খুপ্পিপাসূপগতা পরত্থ, পচ্ছা চিরং ঝাযরে ডয্হমানা।
‘‘Te khuppipāsūpagatā parattha, pacchā ciraṃ jhāyare ḍayhamānā;
কম্মানি কত্ৰান দুখুদ্রানি, অনুভোন্তি দুক্খং কটুকপ্ফলানি॥
Kammāni katvāna dukhudrāni, anubhonti dukkhaṃ kaṭukapphalāni.
৮৩.
83.
‘‘ইত্তরঞ্হি ধনং ধঞ্ঞং, ইত্তরং ইধ জীৰিতং।
‘‘Ittarañhi dhanaṃ dhaññaṃ, ittaraṃ idha jīvitaṃ;
ইত্তরং ইত্তরতো ঞত্ৰা, দীপং কযিরাথ পণ্ডিতো॥
Ittaraṃ ittarato ñatvā, dīpaṃ kayirātha paṇḍito.
৮৪.
84.
‘‘যে তে এৰং পজানন্তি, নরা ধম্মস্স কোৰিদা।
‘‘Ye te evaṃ pajānanti, narā dhammassa kovidā;
তে দানে নপ্পমজ্জন্তি, সুত্ৰা অরহতং ৰচো’’তি॥ –
Te dāne nappamajjanti, sutvā arahataṃ vaco’’ti. –
পঞ্চ গাথা অভাসিংসু।
Pañca gāthā abhāsiṃsu.
৮০-৮১. তত্থ ন ধাতা হোমাতি ধাতা সুহিতা তিত্তা ন হোম। নচ্ছাদিম্হসেতি ন রুচ্চাম, ন রুচিং উপ্পাদেম, ন তং মযং অত্তনো রুচিযা পিৰিস্সামাতি অত্থো। ইচ্চেৰাতি এৰমেৰ। মচ্চা পরিদেৰযন্তীতি মযং ৰিয অঞ্ঞেপি মনুস্সা কতকিব্বিসা পরিদেৰন্তি কন্দন্তি। অদাযকাতি অদানসীলা মচ্ছরিনো। যমস্স ঠাযিনোতি যমলোকসঞ্ঞিতে যমস্স ঠানে পেত্তিৰিসযে ঠানসীলা । যে তে ৰিদিচ্চ অধিগম্মভোগেতি যে তে সম্পতি আযতিঞ্চ সুখৰিসেসৰিধাযকে ভোগে ৰিন্দিত্ৰা পটিলভিত্ৰা। ন ভুঞ্জরে নাপি করোন্তি পুঞ্ঞন্তি অম্হে ৰিয সযম্পি ন ভুঞ্জন্তি, পরেসং দেন্তা দানমযং পুঞ্ঞম্পি ন করোন্তি।
80-81. Tattha na dhātā homāti dhātā suhitā tittā na homa. Nacchādimhaseti na ruccāma, na ruciṃ uppādema, na taṃ mayaṃ attano ruciyā pivissāmāti attho. Iccevāti evameva. Maccā paridevayantīti mayaṃ viya aññepi manussā katakibbisā paridevanti kandanti. Adāyakāti adānasīlā maccharino. Yamassa ṭhāyinoti yamalokasaññite yamassa ṭhāne pettivisaye ṭhānasīlā . Ye te vidicca adhigammabhogeti ye te sampati āyatiñca sukhavisesavidhāyake bhoge vinditvā paṭilabhitvā. Na bhuñjare nāpi karonti puññanti amhe viya sayampi na bhuñjanti, paresaṃ dentā dānamayaṃ puññampi na karonti.
৮২. তে খুপ্পিপাসূপগতা পরত্থাতি তে সত্তা পরত্থ পরলোকে পেত্তিৰিসযে জিঘচ্ছাপিপাসাভিভূতা হুত্ৰা। চিরং ঝাযরে ডয্হমানাতি খুদাদিহেতুকেন দুক্খগ্গিনা ‘‘অকতং ৰত অম্হেহি কুসলং, কতং পাপ’’ন্তিআদিনা ৰত্তমানেন ৰিপ্পটিসারগ্গিনা পরিডয্হমানা ঝাযন্তি, অনুত্থুনন্তীতি অত্থো। দুখুদ্রানীতি দুক্খৰিপাকানি। অনুভোন্তি দুক্খং কটুকপ্ফলানীতি অনিট্ঠফলানি পাপকম্মানি কত্ৰা চিরকালং দুক্খং আপাযিকদুক্খং অনুভৰন্তি।
82.Te khuppipāsūpagatā paratthāti te sattā parattha paraloke pettivisaye jighacchāpipāsābhibhūtā hutvā. Ciraṃ jhāyare ḍayhamānāti khudādihetukena dukkhagginā ‘‘akataṃ vata amhehi kusalaṃ, kataṃ pāpa’’ntiādinā vattamānena vippaṭisāragginā pariḍayhamānā jhāyanti, anutthunantīti attho. Dukhudrānīti dukkhavipākāni. Anubhonti dukkhaṃ kaṭukapphalānīti aniṭṭhaphalāni pāpakammāni katvā cirakālaṃ dukkhaṃ āpāyikadukkhaṃ anubhavanti.
৮৩-৮৪. ইত্তরন্তি ন চিরকালট্ঠাযী, অনিচ্চং ৰিপরিণামধম্মং। ইত্তরং ইধ জীৰিতন্তি ইধ মনুস্সলোকে সত্তানং জীৰিতম্পি ইত্তরং পরিত্তং অপ্পকং। তেনাহ ভগৰা – ‘‘যো চিরং জীৰতি, সো ৰস্সসতং অপ্পং ৰা ভিয্যো’’তি (দী॰ নি॰ ২.৯১; সং॰ নি॰ ১.১৪৫; অ॰ নি॰ ৭.৭৪)। ইত্তরং ইত্তরতো ঞত্ৰাতি ধনধঞ্ঞাদিউপকরণং মনুস্সানং জীৰিতঞ্চ ইত্তরং পরিত্তং খণিকং ন চিরস্সন্তি পঞ্ঞায উপপরিক্খিত্ৰা। দীপং কযিরাথ পণ্ডিতোতি সপঞ্ঞো পুরিসো দীপং অত্তনো পতিট্ঠং পরলোকে হিতসুখাধিট্ঠানং করেয্য। যে তে এৰং পজানন্তীতি যে তে মনুস্সা মনুস্সানং ভোগানং জীৰিতস্স চ ইত্তরভাৰং যাথাৰতো জানন্তি, তে দানে সব্বকালং নপ্পমজ্জন্তি। সুত্ৰা অরহতং ৰচোতি অরহতং বুদ্ধাদীনং অরিযানং ৰচনং সুত্ৰা, সুতত্তাতি অত্থো। সেসং পাকটমেৰ।
83-84.Ittaranti na cirakālaṭṭhāyī, aniccaṃ vipariṇāmadhammaṃ. Ittaraṃ idha jīvitanti idha manussaloke sattānaṃ jīvitampi ittaraṃ parittaṃ appakaṃ. Tenāha bhagavā – ‘‘yo ciraṃ jīvati, so vassasataṃ appaṃ vā bhiyyo’’ti (dī. ni. 2.91; saṃ. ni. 1.145; a. ni. 7.74). Ittaraṃ ittarato ñatvāti dhanadhaññādiupakaraṇaṃ manussānaṃ jīvitañca ittaraṃ parittaṃ khaṇikaṃ na cirassanti paññāya upaparikkhitvā. Dīpaṃ kayirātha paṇḍitoti sapañño puriso dīpaṃ attano patiṭṭhaṃ paraloke hitasukhādhiṭṭhānaṃ kareyya. Ye te evaṃ pajānantīti ye te manussā manussānaṃ bhogānaṃ jīvitassa ca ittarabhāvaṃ yāthāvato jānanti, te dāne sabbakālaṃ nappamajjanti. Sutvā arahataṃ vacoti arahataṃ buddhādīnaṃ ariyānaṃ vacanaṃ sutvā, sutattāti attho. Sesaṃ pākaṭameva.
এৰং তে পেতা সামণেরেন পুট্ঠা তমত্থং আচিক্খিত্ৰা ‘‘মযং তুয্হং মাতুলমাতুলানিযো’’তি পৰেদেসুং। তং সুত্ৰা সামণেরো সঞ্জাতসংৰেগো উক্কণ্ঠং পটিৰিনোদেত্ৰা উপজ্ঝাযস্স পাদেসু সিরসা নিপতিত্ৰা এৰমাহ – ‘‘যং, ভন্তে, অনুকম্পকেন করণীযং অনুকম্পং উপাদায, তং মে তুম্হেহি কতং, মহতা ৰতম্হি অনত্থপাততো রক্খিতো, ন দানি মে ঘরাৰাসেন অত্থো, অভিরমিস্সামি ব্রহ্মচরিযৰাসে’’তি। অথাযস্মা সংকিচ্চো তস্স অজ্ঝাসযানুরূপং কম্মট্ঠানং আচিক্খি। সো কম্মট্ঠানং অনুযুঞ্জন্তো নচিরস্সেৰ অরহত্তং পাপুণি। আযস্মা পন সংকিচ্চো তং পৰত্তিং ভগৰতো আরোচেসি। সত্থা তমত্থং অট্ঠুপ্পত্তিং কত্ৰা সম্পত্তপরিসায ৰিত্থারেন ধম্মং দেসেসি, সা দেসনা মহাজনস্স সাত্থিকা অহোসীতি।
Evaṃ te petā sāmaṇerena puṭṭhā tamatthaṃ ācikkhitvā ‘‘mayaṃ tuyhaṃ mātulamātulāniyo’’ti pavedesuṃ. Taṃ sutvā sāmaṇero sañjātasaṃvego ukkaṇṭhaṃ paṭivinodetvā upajjhāyassa pādesu sirasā nipatitvā evamāha – ‘‘yaṃ, bhante, anukampakena karaṇīyaṃ anukampaṃ upādāya, taṃ me tumhehi kataṃ, mahatā vatamhi anatthapātato rakkhito, na dāni me gharāvāsena attho, abhiramissāmi brahmacariyavāse’’ti. Athāyasmā saṃkicco tassa ajjhāsayānurūpaṃ kammaṭṭhānaṃ ācikkhi. So kammaṭṭhānaṃ anuyuñjanto nacirasseva arahattaṃ pāpuṇi. Āyasmā pana saṃkicco taṃ pavattiṃ bhagavato ārocesi. Satthā tamatthaṃ aṭṭhuppattiṃ katvā sampattaparisāya vitthārena dhammaṃ desesi, sā desanā mahājanassa sātthikā ahosīti.
নাগপেতৰত্থুৰণণনা নিট্ঠিতা।
Nāgapetavatthuvaṇaṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ১১. নাগপেতৰত্থু • 11. Nāgapetavatthu
