| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೮. ನಾಗಪುಪ್ಫಿಯತ್ಥೇರಅಪದಾನವಣ್ಣನಾ
8. Nāgapupphiyattheraapadānavaṇṇanā
ಸುವಚ್ಛೋ ನಾಮ ನಾಮೇನಾತಿಆದಿಕಂ ಆಯಸ್ಮತೋ ನಾಗಪುಪ್ಫಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಥೇರೋ ಪುರಿಮಜಿನನಿಸಭೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತೋ ವುದ್ಧಿಪ್ಪತ್ತೋ ವೇದತ್ತಯಾದೀಸು ಸಕಸಿಪ್ಪೇಸು ನಿಪ್ಫತ್ತಿಂ ಪತ್ವಾ ತತ್ಥ ಸಾರಂ ಅದಿಸ್ವಾ ಹಿಮವನ್ತಂ ಪವಿಸಿತ್ವಾ ತಾಪಸಪಬ್ಬಜ್ಜಂ ಪಬ್ಬಜಿತ್ವಾ ಝಾನಸಮಾಪತ್ತಿಸುಖೇನ ವೀತಿನಾಮೇಸಿ। ತಸ್ಮಿಂ ಸಮಯೇ ಪದುಮುತ್ತರೋ ಭಗವಾ ತಸ್ಸಾನುಕಮ್ಪಾಯ ತತ್ಥ ಅಗಮಾಸಿ। ಸೋ ತಾಪಸೋ ತಂ ಭಗವನ್ತಂ ದಿಸ್ವಾ ಲಕ್ಖಣಸತ್ಥೇಸು ಛೇಕತ್ತಾ ಭಗವತೋ ಲಕ್ಖಣರೂಪಸಮ್ಪತ್ತಿಯಾ ಪಸನ್ನೋ ವನ್ದಿತ್ವಾ ಅಞ್ಜಲಿಂ ಪಗ್ಗಯ್ಹ ಅಟ್ಠಾಸಿ। ಆಕಾಸತೋ ಅನೋತಿಣ್ಣತ್ತಾ ಪೂಜಾಸಕ್ಕಾರೇ ಅಕತೇಯೇವ ಆಕಾಸೇನೇವ ಪಕ್ಕಾಮಿ। ಅಥ ಸೋ ತಾಪಸೋ ಸಸಿಸ್ಸೋ ನಾಗಪುಪ್ಫಂ ಓಚಿನಿತ್ವಾ ತೇನ ಪುಪ್ಫೇನ ಭಗವತೋ ಗತದಿಸಾಭಾಗಮಗ್ಗಂ ಪೂಜೇಸಿ।
Suvaccho nāma nāmenātiādikaṃ āyasmato nāgapupphiyattherassa apadānaṃ. Ayampi thero purimajinanisabhesu katādhikāro tattha tattha bhave vivaṭṭūpanissayāni puññāni upacinanto padumuttarabhagavato kāle brāhmaṇakule nibbatto vuddhippatto vedattayādīsu sakasippesu nipphattiṃ patvā tattha sāraṃ adisvā himavantaṃ pavisitvā tāpasapabbajjaṃ pabbajitvā jhānasamāpattisukhena vītināmesi. Tasmiṃ samaye padumuttaro bhagavā tassānukampāya tattha agamāsi. So tāpaso taṃ bhagavantaṃ disvā lakkhaṇasatthesu chekattā bhagavato lakkhaṇarūpasampattiyā pasanno vanditvā añjaliṃ paggayha aṭṭhāsi. Ākāsato anotiṇṇattā pūjāsakkāre akateyeva ākāseneva pakkāmi. Atha so tāpaso sasisso nāgapupphaṃ ocinitvā tena pupphena bhagavato gatadisābhāgamaggaṃ pūjesi.
೩೯. ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವನ್ತೋ ಸಬ್ಬತ್ಥ ಪೂಜಿತೋ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧಾಸಮ್ಪನ್ನೋ ಪಬ್ಬಜಿತ್ವಾ ವತ್ತಪಟಿಪತ್ತಿಯಾ ಸಾಸನಂ ಸೋಭಯಮಾನೋ ನಚಿರಸ್ಸೇವ ಅರಹಾ ಹುತ್ವಾ ‘‘ಕೇನ ನು ಖೋ ಕುಸಲಕಮ್ಮೇನ ಮಯಾ ಅಯಂ ಲೋಕುತ್ತರಸಮ್ಪತ್ತಿ ಲದ್ಧಾ’’ತಿ ಅತೀತಕಮ್ಮಂ ಸರನ್ತೋ ಪುಬ್ಬಕಮ್ಮಂ ಪಚ್ಚಕ್ಖತೋ ಞತ್ವಾ ಸಞ್ಜಾತಸೋಮನಸ್ಸೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಸುವಚ್ಛೋ ನಾಮ ನಾಮೇನಾತಿಆದಿಮಾಹ। ತತ್ಥ ವಚ್ಛಗೋತ್ತೇ ಜಾತತ್ತಾ ವಚ್ಛೋ, ಸುನ್ದರೋ ಚ ಸೋ ವಚ್ಛೋ ಚೇತಿ ಸುವಚ್ಛೋ। ನಾಮೇನ ಸುವಚ್ಛೋ ನಾಮ ಬ್ರಾಹ್ಮಣೋ ಮನ್ತಪಾರಗೂ ವೇದತ್ತಯಾದಿಸಕಲಮನ್ತಸತ್ಥೇ ಕೋಟಿಪ್ಪತ್ತೋತಿ ಅತ್ಥೋ। ಸೇಸಂ ಹೇಟ್ಠಾ ವುತ್ತನಯತ್ತಾ ಉತ್ತಾನತ್ಥಮೇವಾತಿ।
39. So tena puññena devamanussesu saṃsaranto ubhayasampattiyo anubhavanto sabbattha pūjito imasmiṃ buddhuppāde sāvatthiyaṃ kulagehe nibbatto vuddhimanvāya saddhāsampanno pabbajitvā vattapaṭipattiyā sāsanaṃ sobhayamāno nacirasseva arahā hutvā ‘‘kena nu kho kusalakammena mayā ayaṃ lokuttarasampatti laddhā’’ti atītakammaṃ saranto pubbakammaṃ paccakkhato ñatvā sañjātasomanasso pubbacaritāpadānaṃ pakāsento suvaccho nāma nāmenātiādimāha. Tattha vacchagotte jātattā vaccho, sundaro ca so vaccho ceti suvaccho. Nāmena suvaccho nāma brāhmaṇo mantapāragū vedattayādisakalamantasatthe koṭippattoti attho. Sesaṃ heṭṭhā vuttanayattā uttānatthamevāti.
ನಾಗಪುಪ್ಫಿಯತ್ಥೇರಅಪದಾನವಣ್ಣನಾ ಸಮತ್ತಾ।
Nāgapupphiyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೮. ನಾಗಪುಪ್ಫಿಯತ್ಥೇರಅಪದಾನಂ • 8. Nāgapupphiyattheraapadānaṃ
