| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
5. наг̇арасуд̇д̇ам̣
5. Nagarasuttaṃ
65. саавад̇т̇ияам̣ вихарад̇и…бз… ‘‘буб̣б̣з мз, бхигкавз, самб̣од̇хаа анабхисамб̣уд̣̇д̇хасса б̣од̇хисад̇д̇ассзва сад̇о зд̇ад̣̇ахоси – ‘гижчаа вад̇ааяам̣ лого аабанно ж̇ааяад̇и жа ж̇ийяад̇и жа мийяад̇и жа жавад̇и жа убабаж̇ж̇ад̇и жа. ат̇а жа банимасса д̣̇угкасса ниссаран̣ам̣ наббаж̇аанаад̇и ж̇араамаран̣асса. гуд̣̇аассу наама имасса д̣̇угкасса ниссаран̣ам̣ бан̃н̃ааяиссад̇и ж̇араамаран̣ассаа’д̇и? д̇асса маяхам̣, бхигкавз, зд̇ад̣̇ахоси – ‘гимхи ну ко сад̇и ж̇араамаран̣ам̣ ход̇и, гим̣бажжаяаа ж̇араамаран̣а’нд̇и ? д̇асса маяхам̣, бхигкавз, яонисо манасигаараа аху бан̃н̃ааяа абхисамаяо – ‘ж̇аад̇ияаа ко сад̇и ж̇араамаран̣ам̣ ход̇и, ж̇аад̇ибажжаяаа ж̇араамаран̣а’’’нд̇и.
65. Sāvatthiyaṃ viharati…pe… ‘‘pubbe me, bhikkhave, sambodhā anabhisambuddhassa bodhisattasseva sato etadahosi – ‘kicchā vatāyaṃ loko āpanno jāyati ca jīyati ca mīyati ca cavati ca upapajjati ca. Atha ca panimassa dukkhassa nissaraṇaṃ nappajānāti jarāmaraṇassa. Kudāssu nāma imassa dukkhassa nissaraṇaṃ paññāyissati jarāmaraṇassā’ti? Tassa mayhaṃ, bhikkhave, etadahosi – ‘kimhi nu kho sati jarāmaraṇaṃ hoti, kiṃpaccayā jarāmaraṇa’nti ? Tassa mayhaṃ, bhikkhave, yoniso manasikārā ahu paññāya abhisamayo – ‘jātiyā kho sati jarāmaraṇaṃ hoti, jātipaccayā jarāmaraṇa’’’nti.
‘‘д̇асса маяхам̣, бхигкавз, зд̇ад̣̇ахоси – ‘гимхи ну ко сад̇и ж̇аад̇и ход̇и…бз… бхаво ход̇и… убаад̣̇аанам̣ ход̇и… д̇ан̣хаа ход̇и… взд̣̇анаа ход̇и… пассо ход̇и… сал̣ааяад̇анам̣ ход̇и… наамаруубам̣ ход̇и… гим̣бажжаяаа наамарууба’нд̇и? д̇асса маяхам̣, бхигкавз, яонисо манасигаараа аху бан̃н̃ааяа абхисамаяо – ‘вин̃н̃аан̣з ко сад̇и наамаруубам̣ ход̇и, вин̃н̃аан̣абажжаяаа наамарууба’нд̇и. д̇асса маяхам̣, бхигкавз, зд̇ад̣̇ахоси – ‘гимхи ну ко сад̇и вин̃н̃аан̣ам̣ ход̇и, гим̣бажжаяаа вин̃н̃аан̣а’нд̇и ? д̇асса маяхам̣, бхигкавз, яонисо манасигаараа аху бан̃н̃ааяа абхисамаяо – ‘наамаруубз ко сад̇и вин̃н̃аан̣ам̣ ход̇и, наамаруубабажжаяаа вин̃н̃аан̣а’’’нд̇и.
‘‘Tassa mayhaṃ, bhikkhave, etadahosi – ‘kimhi nu kho sati jāti hoti…pe… bhavo hoti… upādānaṃ hoti… taṇhā hoti… vedanā hoti… phasso hoti… saḷāyatanaṃ hoti… nāmarūpaṃ hoti… kiṃpaccayā nāmarūpa’nti? Tassa mayhaṃ, bhikkhave, yoniso manasikārā ahu paññāya abhisamayo – ‘viññāṇe kho sati nāmarūpaṃ hoti, viññāṇapaccayā nāmarūpa’nti. Tassa mayhaṃ, bhikkhave, etadahosi – ‘kimhi nu kho sati viññāṇaṃ hoti, kiṃpaccayā viññāṇa’nti ? Tassa mayhaṃ, bhikkhave, yoniso manasikārā ahu paññāya abhisamayo – ‘nāmarūpe kho sati viññāṇaṃ hoti, nāmarūpapaccayā viññāṇa’’’nti.
‘‘д̇асса маяхам̣, бхигкавз, зд̇ад̣̇ахоси – бажжуд̣̇аавад̇д̇ад̇и ко ид̣̇ам̣ вин̃н̃аан̣ам̣ наамаруубамхаа на барам̣ г̇ажчад̇и. зд̇д̇аавад̇аа ж̇ааязт̇а ваа ж̇ийязт̇а ваа мийязт̇а ваа жавзт̇а ваа убабаж̇ж̇зт̇а ваа, яад̣̇ид̣̇ам̣ наамаруубабажжаяаа вин̃н̃аан̣ам̣; вин̃н̃аан̣абажжаяаа наамаруубам̣; наамаруубабажжаяаа сал̣ааяад̇анам̣; сал̣ааяад̇анабажжаяаа пассо…бз… звамзд̇асса гзваласса д̣̇угкагканд̇хасса самуд̣̇аяо ход̇и. ‘самуд̣̇аяо, самуд̣̇аяо’д̇и ко мз, бхигкавз, буб̣б̣з анануссуд̇зсу д̇хаммзсу жагкум̣ уд̣̇абаад̣̇и н̃аан̣ам̣ уд̣̇абаад̣̇и бан̃н̃аа уд̣̇абаад̣̇и виж̇ж̇аа уд̣̇абаад̣̇и аалого уд̣̇абаад̣̇и.
‘‘Tassa mayhaṃ, bhikkhave, etadahosi – paccudāvattati kho idaṃ viññāṇaṃ nāmarūpamhā na paraṃ gacchati. Ettāvatā jāyetha vā jīyetha vā mīyetha vā cavetha vā upapajjetha vā, yadidaṃ nāmarūpapaccayā viññāṇaṃ; viññāṇapaccayā nāmarūpaṃ; nāmarūpapaccayā saḷāyatanaṃ; saḷāyatanapaccayā phasso…pe… evametassa kevalassa dukkhakkhandhassa samudayo hoti. ‘Samudayo, samudayo’ti kho me, bhikkhave, pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi.
‘‘д̇асса маяхам̣, бхигкавз, зд̇ад̣̇ахоси – ‘гимхи ну ко асад̇и, ж̇араамаран̣ам̣ на ход̇и; гисса нирод̇хаа ж̇араамаран̣анирод̇хо’д̇и? д̇асса маяхам̣, бхигкавз, яонисо манасигаараа аху бан̃н̃ааяа абхисамаяо – ‘ж̇аад̇ияаа ко асад̇и, ж̇араамаран̣ам̣ на ход̇и; ж̇аад̇инирод̇хаа ж̇араамаран̣анирод̇хо’д̇и. д̇асса маяхам̣, бхигкавз, зд̇ад̣̇ахоси – ‘гимхи ну ко асад̇и ж̇аад̇и на ход̇и…бз… бхаво на ход̇и… убаад̣̇аанам̣ на ход̇и… д̇ан̣хаа на ход̇и… взд̣̇анаа на ход̇и… пассо на ход̇и… сал̣ааяад̇анам̣ на ход̇и… наамаруубам̣ на ход̇и. гисса нирод̇хаа наамаруубанирод̇хо’д̇и? д̇асса маяхам̣, бхигкавз, яонисо манасигаараа аху бан̃н̃ааяа абхисамаяо – ‘вин̃н̃аан̣з ко асад̇и, наамаруубам̣ на ход̇и; вин̃н̃аан̣анирод̇хаа наамаруубанирод̇хо’’’д̇и .
‘‘Tassa mayhaṃ, bhikkhave, etadahosi – ‘kimhi nu kho asati, jarāmaraṇaṃ na hoti; kissa nirodhā jarāmaraṇanirodho’ti? Tassa mayhaṃ, bhikkhave, yoniso manasikārā ahu paññāya abhisamayo – ‘jātiyā kho asati, jarāmaraṇaṃ na hoti; jātinirodhā jarāmaraṇanirodho’ti. Tassa mayhaṃ, bhikkhave, etadahosi – ‘kimhi nu kho asati jāti na hoti…pe… bhavo na hoti… upādānaṃ na hoti… taṇhā na hoti… vedanā na hoti… phasso na hoti… saḷāyatanaṃ na hoti… nāmarūpaṃ na hoti. Kissa nirodhā nāmarūpanirodho’ti? Tassa mayhaṃ, bhikkhave, yoniso manasikārā ahu paññāya abhisamayo – ‘viññāṇe kho asati, nāmarūpaṃ na hoti; viññāṇanirodhā nāmarūpanirodho’’’ti .
‘‘д̇асса маяхам̣, бхигкавз, зд̇ад̣̇ахоси – ‘гимхи ну ко асад̇и вин̃н̃аан̣ам̣ на ход̇и; гисса нирод̇хаа вин̃н̃аан̣анирод̇хо’д̇и? д̇асса маяхам̣, бхигкавз, яонисо манасигаараа аху бан̃н̃ааяа абхисамаяо – ‘наамаруубз ко асад̇и, вин̃н̃аан̣ам̣ на ход̇и; наамаруубанирод̇хаа вин̃н̃аан̣анирод̇хо’’’д̇и.
‘‘Tassa mayhaṃ, bhikkhave, etadahosi – ‘kimhi nu kho asati viññāṇaṃ na hoti; kissa nirodhā viññāṇanirodho’ti? Tassa mayhaṃ, bhikkhave, yoniso manasikārā ahu paññāya abhisamayo – ‘nāmarūpe kho asati, viññāṇaṃ na hoti; nāmarūpanirodhā viññāṇanirodho’’’ti.
‘‘д̇асса маяхам̣, бхигкавз, зд̇ад̣̇ахоси – ад̇хиг̇ад̇о ко мяааяам̣ маг̇г̇о б̣од̇хааяа яад̣̇ид̣̇ам̣ – наамаруубанирод̇хаа вин̃н̃аан̣анирод̇хо; вин̃н̃аан̣анирод̇хаа наамаруубанирод̇хо; наамаруубанирод̇хаа сал̣ааяад̇ананирод̇хо; сал̣ааяад̇ананирод̇хаа пассанирод̇хо…бз… звамзд̇асса гзваласса д̣̇угкагканд̇хасса нирод̇хо ход̇и. ‘нирод̇хо, нирод̇хо’д̇и ко мз, бхигкавз, буб̣б̣з анануссуд̇зсу д̇хаммзсу жагкум̣ уд̣̇абаад̣̇и н̃аан̣ам̣ уд̣̇абаад̣̇и бан̃н̃аа уд̣̇абаад̣̇и виж̇ж̇аа уд̣̇абаад̣̇и аалого уд̣̇абаад̣̇и.
‘‘Tassa mayhaṃ, bhikkhave, etadahosi – adhigato kho myāyaṃ maggo bodhāya yadidaṃ – nāmarūpanirodhā viññāṇanirodho; viññāṇanirodhā nāmarūpanirodho; nāmarūpanirodhā saḷāyatananirodho; saḷāyatananirodhā phassanirodho…pe… evametassa kevalassa dukkhakkhandhassa nirodho hoti. ‘Nirodho, nirodho’ti kho me, bhikkhave, pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi.
‘‘сзяяат̇ааби, бхигкавз, бурисо аран̃н̃з баванз жарамаано бассзяяа бураан̣ам̣ маг̇г̇ам̣ бураан̣ан̃ж̇асам̣ буб̣б̣агзхи мануссзхи ануяаад̇ам̣. со д̇амануг̇ажчзяяа . д̇амануг̇ажчанд̇о бассзяяа бураан̣ам̣ наг̇арам̣ бураан̣ам̣ рааж̇ад̇хааним̣ буб̣б̣агзхи мануссзхи аж̇жхаавудтам̣ 1 аараамасамбаннам̣ ванасамбаннам̣ богкаран̣ийсамбаннам̣ уд̣̇д̇хаабаванд̇ам̣ 2 раман̣ийяам̣. ат̇а ко со, бхигкавз, бурисо ран̃н̃о ваа рааж̇амахаамад̇д̇асса ваа аарожзяяа – ‘яаг̇гхз, бханд̇з, ж̇аанзяяааси – ахам̣ ад̣̇д̣̇асам̣ аран̃н̃з баванз жарамаано бураан̣ам̣ маг̇г̇ам̣ бураан̣ан̃ж̇асам̣ буб̣б̣агзхи мануссзхи ануяаад̇ам̣ д̇амануг̇ажчим̣. д̇амануг̇ажчанд̇о ад̣̇д̣̇асам̣ бураан̣ам̣ наг̇арам̣ бураан̣ам̣ рааж̇ад̇хааним̣ буб̣б̣агзхи мануссзхи аж̇жхаавудтам̣ аараамасамбаннам̣ ванасамбаннам̣ богкаран̣ийсамбаннам̣ уд̣̇д̇хаабаванд̇ам̣ раман̣ийяам̣. д̇ам̣, бханд̇з, наг̇арам̣ маабзхий’д̇и. ат̇а ко со, бхигкавз, рааж̇аа ваа рааж̇амахаамад̇д̇о ваа д̇ам̣ наг̇арам̣ маабзяяа. д̇ад̣̇асса наг̇арам̣ абарзна самаязна ид̣̇д̇хан̃жзва пийд̇ан̃жа б̣аахуж̇ан̃н̃ам̣ аагин̣н̣амануссам̣ вуд̣̇д̇хивзбуллаббад̇д̇ам̣. звамзва кваахам̣, бхигкавз, ад̣̇д̣̇асам̣ бураан̣ам̣ маг̇г̇ам̣ бураан̣ан̃ж̇асам̣ буб̣б̣агзхи саммаасамб̣уд̣̇д̇хзхи ануяаад̇ам̣.
‘‘Seyyathāpi, bhikkhave, puriso araññe pavane caramāno passeyya purāṇaṃ maggaṃ purāṇañjasaṃ pubbakehi manussehi anuyātaṃ. So tamanugaccheyya . Tamanugacchanto passeyya purāṇaṃ nagaraṃ purāṇaṃ rājadhāniṃ pubbakehi manussehi ajjhāvuṭṭhaṃ 3 ārāmasampannaṃ vanasampannaṃ pokkharaṇīsampannaṃ uddhāpavantaṃ 4 ramaṇīyaṃ. Atha kho so, bhikkhave, puriso rañño vā rājamahāmattassa vā āroceyya – ‘yagghe, bhante, jāneyyāsi – ahaṃ addasaṃ araññe pavane caramāno purāṇaṃ maggaṃ purāṇañjasaṃ pubbakehi manussehi anuyātaṃ tamanugacchiṃ. Tamanugacchanto addasaṃ purāṇaṃ nagaraṃ purāṇaṃ rājadhāniṃ pubbakehi manussehi ajjhāvuṭṭhaṃ ārāmasampannaṃ vanasampannaṃ pokkharaṇīsampannaṃ uddhāpavantaṃ ramaṇīyaṃ. Taṃ, bhante, nagaraṃ māpehī’ti. Atha kho so, bhikkhave, rājā vā rājamahāmatto vā taṃ nagaraṃ māpeyya. Tadassa nagaraṃ aparena samayena iddhañceva phītañca bāhujaññaṃ ākiṇṇamanussaṃ vuddhivepullappattaṃ. Evameva khvāhaṃ, bhikkhave, addasaṃ purāṇaṃ maggaṃ purāṇañjasaṃ pubbakehi sammāsambuddhehi anuyātaṃ.
‘‘гад̇амо жа со, бхигкавз, бураан̣амаг̇г̇о бураан̣ан̃ж̇асо буб̣б̣агзхи саммаасамб̣уд̣̇д̇хзхи ануяаад̇о ? аяамзва арияо адтан̇г̇иго маг̇г̇о, сзяяат̇ид̣̇ам̣ – саммаад̣̇идти…бз… саммаасамаад̇хи. аяам̣ ко со, бхигкавз, бураан̣амаг̇г̇о бураан̣ан̃ж̇асо буб̣б̣агзхи саммаасамб̣уд̣̇д̇хзхи ануяаад̇о, д̇амануг̇ажчим̣; д̇амануг̇ажчанд̇о ж̇араамаран̣ам̣ аб̣бхан̃н̃аасим̣; ж̇араамаран̣асамуд̣̇аяам̣ аб̣бхан̃н̃аасим̣; ж̇араамаран̣анирод̇хам̣ аб̣бхан̃н̃аасим̣; ж̇араамаран̣анирод̇хаг̇ааминим̣ бадибад̣̇ам̣ аб̣бхан̃н̃аасим̣. д̇амануг̇ажчим̣; д̇амануг̇ажчанд̇о ж̇аад̇им̣ аб̣бхан̃н̃аасим̣…бз… бхавам̣ аб̣бхан̃н̃аасим̣… убаад̣̇аанам̣ аб̣бхан̃н̃аасим̣… д̇ан̣хам̣ аб̣бхан̃н̃аасим̣… взд̣̇анам̣ аб̣бхан̃н̃аасим̣… пассам̣ аб̣бхан̃н̃аасим̣… сал̣ааяад̇анам̣ аб̣бхан̃н̃аасим̣… наамаруубам̣ аб̣бхан̃н̃аасим̣… вин̃н̃аан̣ам̣ аб̣бхан̃н̃аасим̣. д̇амануг̇ажчим̣; д̇амануг̇ажчанд̇о сан̇каарз аб̣бхан̃н̃аасим̣; сан̇каарасамуд̣̇аяам̣ аб̣бхан̃н̃аасим̣; сан̇кааранирод̇хам̣ аб̣бхан̃н̃аасим̣; сан̇кааранирод̇хаг̇ааминим̣ бадибад̣̇ам̣ аб̣бхан̃н̃аасим̣. д̇ад̣̇абхин̃н̃аа аажигким̣ бхигкуунам̣ бхигкунийнам̣ убаасагаанам̣ убаасигаанам̣. д̇аяид̣̇ам̣, бхигкавз , б̣рахмажарияам̣ ид̣̇д̇хан̃жзва пийд̇ан̃жа вид̇т̇ааригам̣ б̣аахуж̇ан̃н̃ам̣ бут̇убхууд̇ам̣ яаава д̣̇звамануссзхи суббагаасид̇а’’нд̇и. бан̃жамам̣.
‘‘Katamo ca so, bhikkhave, purāṇamaggo purāṇañjaso pubbakehi sammāsambuddhehi anuyāto ? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Ayaṃ kho so, bhikkhave, purāṇamaggo purāṇañjaso pubbakehi sammāsambuddhehi anuyāto, tamanugacchiṃ; tamanugacchanto jarāmaraṇaṃ abbhaññāsiṃ; jarāmaraṇasamudayaṃ abbhaññāsiṃ; jarāmaraṇanirodhaṃ abbhaññāsiṃ; jarāmaraṇanirodhagāminiṃ paṭipadaṃ abbhaññāsiṃ. Tamanugacchiṃ; tamanugacchanto jātiṃ abbhaññāsiṃ…pe… bhavaṃ abbhaññāsiṃ… upādānaṃ abbhaññāsiṃ… taṇhaṃ abbhaññāsiṃ… vedanaṃ abbhaññāsiṃ… phassaṃ abbhaññāsiṃ… saḷāyatanaṃ abbhaññāsiṃ… nāmarūpaṃ abbhaññāsiṃ… viññāṇaṃ abbhaññāsiṃ. Tamanugacchiṃ; tamanugacchanto saṅkhāre abbhaññāsiṃ; saṅkhārasamudayaṃ abbhaññāsiṃ; saṅkhāranirodhaṃ abbhaññāsiṃ; saṅkhāranirodhagāminiṃ paṭipadaṃ abbhaññāsiṃ. Tadabhiññā ācikkhiṃ bhikkhūnaṃ bhikkhunīnaṃ upāsakānaṃ upāsikānaṃ. Tayidaṃ, bhikkhave , brahmacariyaṃ iddhañceva phītañca vitthārikaṃ bāhujaññaṃ puthubhūtaṃ yāva devamanussehi suppakāsita’’nti. Pañcamaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 5. наг̇арасуд̇д̇аван̣н̣анаа • 5. Nagarasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 5. наг̇арасуд̇д̇аван̣н̣анаа • 5. Nagarasuttavaṇṇanā
