| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
5. наг̇арасуд̇д̇аван̣н̣анаа
5. Nagarasuttavaṇṇanā
65. бан̃жамасуд̇д̇з ‘‘буб̣б̣зва мз, бхигкавз, самб̣од̇хаа’’д̇иаад̣̇и хздтаа сам̣ван̣н̣ид̇амзваад̇и авуд̇д̇амзва сам̣ван̣н̣зд̇ум̣ ‘‘наамаруубз ко сад̇ий’’д̇и аарад̣̇д̇хо . д̇ад̇т̇а д̣̇ваад̣̇асабад̣̇игз бадижжасамуббаад̣̇з имасмим̣ суд̇д̇з яаани д̣̇вз бад̣̇аани аг̇г̇ахид̇аани, нзсам̣ аг̇г̇ахан̣з гааран̣ам̣ бужчид̇ваа виссаж̇ж̇зд̇угаамо д̇зсам̣ г̇ахзд̇аб̣б̣агааран̣ам̣ д̇аава д̣̇ассзнд̇о ‘‘зд̇т̇аа’’д̇иаад̣̇имааха. бажжагкабхууд̇ам̣ бажжуббаннам̣ бхавам̣ батамам̣ г̇ахзд̇ваа д̇ад̣̇ананд̇арам̣ анааг̇ад̇асса ‘‘д̣̇уд̇ияа’’нд̇и г̇ахан̣з ад̇ийд̇о д̇ад̇ияо ход̇ийд̇и ааха ‘‘авиж̇ж̇аасан̇каараа хи д̇ад̇ияо бхаво’’д̇и. нану жзд̇т̇а анааг̇ад̇асса бхавасса г̇ахан̣ам̣ на самбхавад̇и бажжуббаннабхававасзна абхинивзсасса ж̇од̇ид̇ад̇д̇аад̇и? сажжамзд̇ам̣, гааран̣з бана г̇ахид̇з палам̣ г̇ахид̇амзва ход̇ийд̇и д̇ат̇аа вуд̇д̇анд̇и д̣̇адтаб̣б̣ам̣. абижзд̇т̇а анааг̇ад̇о ад̣̇д̇хаа ад̇т̇ад̇о сан̇г̇ахид̇о зва яад̇о ‘‘наамаруубабажжаяаа сал̣ааяад̇ана’’нд̇иаад̣̇инаа анааг̇ад̇ад̣̇д̇хасам̣г̇аахид̇аа д̣̇зсанаа бавад̇д̇аа, жад̇увогааравасзна вин̃н̃аан̣абажжаяаа нааманд̇и висзсо ад̇т̇и. д̇асмаа ‘‘бан̃жавогааравасзнаа’’д̇и вуд̇д̇ам̣. д̇зхийд̇и авиж̇ж̇аасан̇каарзхи аарамман̣абхууд̇зхи. аяам̣ вибассанаад̇и ад̣̇д̇хаабажжуббаннавасзна уд̣̇аяаб̣б̣аяам̣ бассанд̇асса бавад̇д̇авибассанаа. на гхадийяад̇ийд̇и на самиж̇жхад̇и. махаа…бз… абхинивидтод̇и на гхаданз гааран̣амааха, хздтаа г̇ахид̇ад̇д̇аа баадиязггам̣ саммасанийяам̣ на ход̇ийд̇и ад̇хиббааяо.
65. Pañcamasutte ‘‘pubbeva me, bhikkhave, sambodhā’’tiādi heṭṭhā saṃvaṇṇitamevāti avuttameva saṃvaṇṇetuṃ ‘‘nāmarūpe kho satī’’ti āraddho . Tattha dvādasapadike paṭiccasamuppāde imasmiṃ sutte yāni dve padāni aggahitāni, nesaṃ aggahaṇe kāraṇaṃ pucchitvā vissajjetukāmo tesaṃ gahetabbakāraṇaṃ tāva dassento ‘‘etthā’’tiādimāha. Paccakkhabhūtaṃ paccuppannaṃ bhavaṃ paṭhamaṃ gahetvā tadanantaraṃ anāgatassa ‘‘dutiya’’nti gahaṇe atīto tatiyo hotīti āha ‘‘avijjāsaṅkhārā hi tatiyo bhavo’’ti. Nanu cettha anāgatassa bhavassa gahaṇaṃ na sambhavati paccuppannabhavavasena abhinivesassa jotitattāti? Saccametaṃ, kāraṇe pana gahite phalaṃ gahitameva hotīti tathā vuttanti daṭṭhabbaṃ. Apicettha anāgato addhā atthato saṅgahito eva yato ‘‘nāmarūpapaccayā saḷāyatana’’ntiādinā anāgataddhasaṃgāhitā desanā pavattā, catuvokāravasena viññāṇapaccayā nāmanti viseso atthi. Tasmā ‘‘pañcavokāravasenā’’ti vuttaṃ. Tehīti avijjāsaṅkhārehi ārammaṇabhūtehi. Ayaṃ vipassanāti addhāpaccuppannavasena udayabbayaṃ passantassa pavattavipassanā. Na ghaṭīyatīti na samijjhati. Mahā…pe… abhiniviṭṭhoti na ghaṭane kāraṇamāha, heṭṭhā gahitattā pāṭiyekkaṃ sammasanīyaṃ na hotīti adhippāyo.
ад̣̇идтзсууд̇и анаваб̣уд̣̇д̇хзсу. жад̇усажжасса ануб̣од̇хзна на бхавид̇аб̣б̣анд̇и ааха ‘‘на саггаа б̣уд̣̇д̇хзна бхавид̇у’’нд̇и. иминаад̇и махаасад̇д̇зна. д̇зд̇и авиж̇ж̇аасан̇каараа. бхаваубаад̣̇аанад̇ан̣хаавасзнаад̇и бхаваубаад̣̇аанад̇ан̣хаад̣̇ассанавасзна. д̣̇идтаава ‘‘д̇ам̣сахаг̇ад̇аа’’д̇и самаанаяог̇агкамад̇д̇аа. на барабхааг̇ам̣ канзяяа ад̇д̇анаа ижчид̇асса г̇ахид̇ад̇д̇аа барабхааг̇з ан̃н̃асса абхаавад̇о жа. д̇знааха ‘‘гассажи над̇т̇ид̇ааяаа’’д̇и. бадинивад̇д̇зсийд̇и бадисам̣хари. бадинивад̇д̇анз бана гааран̣ам̣ д̣̇ассзд̇ум̣ ‘‘д̇ад̣̇зд̇а’’нд̇иаад̣̇и вуд̇д̇ам̣. абхиннадтаананд̇и акан̣ид̇адтаанам̣.
Adiṭṭhesūti anavabuddhesu. Catusaccassa anubodhena na bhavitabbanti āha ‘‘na sakkā buddhena bhavitu’’nti. Imināti mahāsattena. Teti avijjāsaṅkhārā. Bhavaupādānataṇhāvasenāti bhavaupādānataṇhādassanavasena. Diṭṭhāva ‘‘taṃsahagatā’’ti samānayogakkhamattā. Na parabhāgaṃ khaneyya attanā icchitassa gahitattā parabhāge aññassa abhāvato ca. Tenāha ‘‘kassaci natthitāyā’’ti. Paṭinivattesīti paṭisaṃhari. Paṭinivattane pana kāraṇaṃ dassetuṃ ‘‘tadeta’’ntiādi vuttaṃ. Abhinnaṭṭhānanti akhaṇitaṭṭhānaṃ.
бажжаяад̇од̇и хзд̇уд̇о, сан̇каарад̇од̇и ад̇т̇о. ‘‘гимхи ну ко сад̇и ж̇араамаран̣ам̣ ход̇ий’’д̇иаад̣̇инаа хзд̇убарамбаравасзна палабарамбарааяа гид̇д̇амаанааяа, гимхи ну ко сад̇и вин̃н̃аан̣ам̣ ход̇ийд̇и жа вижааран̣ааяа сан̇каарз ко сад̇и вин̃н̃аан̣асса висзсад̇о гааран̣абхууд̇о сан̇кааро аг̇г̇ахид̇о, д̇ад̇о вин̃н̃аан̣ам̣ бадинивад̇д̇ад̇и наама, на саб̣б̣абажжаяад̇о. д̇знзвааха ‘‘наамаруубз ко сад̇и вин̃н̃аан̣ам̣ ход̇ий’’д̇и. гим̣ наама хзд̇т̇а сахаж̇аад̇аад̣̇ивасзнзва бажжаяабхууд̇ам̣ ад̇хиббзд̇ам̣, на гаммуубаниссаяавасзна бажжуббаннавасзна абхинивзсасса ж̇од̇ид̇ад̇д̇аа. аарамман̣ад̇од̇и авиж̇ж̇аасан̇каарасан̇каад̇ааарамман̣ад̇о, ад̇ийд̇абхавасан̇каад̇ааарамман̣ад̇о. ад̇ийд̇ад̣̇д̇хабарияаабаннаа хи авиж̇ж̇аасан̇каараа. д̇ад̇о бадинивад̇д̇амаанам̣ вин̃н̃аан̣ам̣ ад̇ийд̇абхавоби бадинивад̇д̇ад̇и наама. убхаяамбийд̇и бадисанд̇хивин̃н̃аан̣ам̣ вибассанаавин̃н̃аан̣амби. наамаруубам̣ на ад̇иггамад̇ийд̇и бажжаяабхууд̇ам̣ аарамман̣абхууд̇ан̃жа наамаруубам̣ на ад̇иггамад̇и д̇зна винаа авад̇д̇анад̇о. д̇знааха ‘‘наамаруубад̇о барам̣ на г̇ажчад̇ий’’д̇и. вин̃н̃аан̣з наамаруубасса бажжаяз хонд̇зд̇и бадисанд̇хивин̃н̃аан̣з наамаруубасса бажжаяз хонд̇з. наамаруубз вин̃н̃аан̣асса бажжаяз хонд̇зд̇и наамаруубз бадисанд̇хивин̃н̃аан̣асса бажжаяз хонд̇з. жад̇увогаарабан̃жавогаарабхававасзна яат̇аарахам̣ яож̇анаа взд̣̇ид̇аб̣б̣аа. д̣̇вийсуби ан̃н̃аман̃н̃ам̣ бажжаязсу хонд̇зсууд̇и бана бан̃жавогаарабхававасзна. зд̇д̇агзнаад̇и звам̣ вин̃н̃аан̣анаамаруубаанам̣ ан̃н̃аман̃н̃ам̣ убад̇т̇амбхавасзна бавад̇д̇ияаа. ж̇ааязт̇а ваа убабаж̇ж̇зт̇а ваад̇и ‘‘сад̇д̇о ж̇ааяад̇и убабаж̇ж̇ад̇ий’’д̇и саман̃н̃аа ход̇и вин̃н̃аан̣анаамаруубавинимуд̇д̇асса сад̇д̇абан̃н̃ад̇д̇ияаа убаад̣̇аанабхууд̇асса д̇хаммасса абхаавад̇о. д̇знааха ‘‘ид̇о хий’’д̇иаад̣̇и. зд̇ад̣̇зваад̇и ‘‘вин̃н̃аан̣ам̣ наамарууба’’нд̇и зд̇ам̣ д̣̇ваяамзва.
Paccayatoti hetuto, saṅkhāratoti attho. ‘‘Kimhi nu kho sati jarāmaraṇaṃ hotī’’tiādinā hetuparamparavasena phalaparamparāya kittamānāya, kimhi nu kho sati viññāṇaṃ hotīti ca vicāraṇāya saṅkhāre kho sati viññāṇassa visesato kāraṇabhūto saṅkhāro aggahito, tato viññāṇaṃ paṭinivattati nāma, na sabbapaccayato. Tenevāha ‘‘nāmarūpe kho sati viññāṇaṃ hotī’’ti. Kiṃ nāma hettha sahajātādivaseneva paccayabhūtaṃ adhippetaṃ, na kammūpanissayavasena paccuppannavasena abhinivesassa jotitattā. Ārammaṇatoti avijjāsaṅkhārasaṅkhātaārammaṇato, atītabhavasaṅkhātaārammaṇato. Atītaddhapariyāpannā hi avijjāsaṅkhārā. Tato paṭinivattamānaṃ viññāṇaṃ atītabhavopi paṭinivattati nāma. Ubhayampīti paṭisandhiviññāṇaṃ vipassanāviññāṇampi. Nāmarūpaṃ na atikkamatīti paccayabhūtaṃ ārammaṇabhūtañca nāmarūpaṃ na atikkamati tena vinā avattanato. Tenāha ‘‘nāmarūpato paraṃ na gacchatī’’ti. Viññāṇe nāmarūpassa paccaye honteti paṭisandhiviññāṇe nāmarūpassa paccaye honte. Nāmarūpe viññāṇassa paccaye honteti nāmarūpe paṭisandhiviññāṇassa paccaye honte. Catuvokārapañcavokārabhavavasena yathārahaṃ yojanā veditabbā. Dvīsupi aññamaññaṃ paccayesu hontesūti pana pañcavokārabhavavasena. Ettakenāti evaṃ viññāṇanāmarūpānaṃ aññamaññaṃ upatthambhavasena pavattiyā. Jāyetha vā upapajjetha vāti ‘‘satto jāyati upapajjatī’’ti samaññā hoti viññāṇanāmarūpavinimuttassa sattapaññattiyā upādānabhūtassa dhammassa abhāvato. Tenāha ‘‘ito hī’’tiādi. Etadevāti ‘‘viññāṇaṃ nāmarūpa’’nti etaṃ dvayameva.
абараабаражуд̇ибадисанд̇хийхийд̇и абараабаражуд̇ибадисанд̇хид̣̇ийбагзхи ‘‘жавад̇и, убабаж̇ж̇ад̇ий’’д̇и д̣̇вийхи бад̣̇зхи. бан̃жа бад̣̇аанийд̇и ‘‘ж̇ааязт̇а ваа’’д̇иаад̣̇ийни бан̃жа бад̣̇аани. нану д̇ад̇т̇а батамад̇ад̇иязхи жад̇уд̇т̇абан̃жамаани ад̇т̇ад̇о абхиннаанийд̇и? сажжам̣, вин̃н̃аан̣анаамаруубаанам̣ абараабаруббад̇д̇ид̣̇ассанад̇т̇ам̣ звам̣ вуд̇д̇ам̣. д̇знааха ‘‘абараабаражуд̇ибадисанд̇хийхий’’д̇и. зд̇д̇аавад̇аад̇и вуд̇д̇амзвад̇т̇анд̇и яо ‘‘зд̇д̇аавад̇аа’’д̇и бад̣̇зна буб̣б̣з вуд̇д̇о, д̇амзва яат̇аавуд̇д̇амад̇т̇ам̣ ‘‘яад̣̇ид̣̇а’’нд̇иаад̣̇инаа нияяаад̇знд̇о буна вад̇ваа. ануломабажжаяаагааравасзнаад̇и бажжаяад̇хаммад̣̇ассанабуб̣б̣агабажжаяуббаннад̇хаммад̣̇ассанавасзна. бажжаяад̇хаммаанан̃хи ад̇д̇ано бажжаяуббаннасса бажжаяабхааво ид̣̇аббажжаяад̇аа бажжаяаагааро, со жа ‘‘авиж̇ж̇аабажжаяаа сан̇каараа’’д̇иаад̣̇инаа вуд̇д̇о сан̇кааруббад̇д̇ияаа ануломанад̇о ануломабажжаяаагааро, д̇асса васзна.
Aparāparacutipaṭisandhīhīti aparāparacutipaṭisandhidīpakehi ‘‘cavati, upapajjatī’’ti dvīhi padehi. Pañca padānīti ‘‘jāyetha vā’’tiādīni pañca padāni. Nanu tattha paṭhamatatiyehi catutthapañcamāni atthato abhinnānīti? Saccaṃ, viññāṇanāmarūpānaṃ aparāparuppattidassanatthaṃ evaṃ vuttaṃ. Tenāha ‘‘aparāparacutipaṭisandhīhī’’ti. Ettāvatāti vuttamevatthanti yo ‘‘ettāvatā’’ti padena pubbe vutto, tameva yathāvuttamatthaṃ ‘‘yadida’’ntiādinā niyyātento puna vatvā. Anulomapaccayākāravasenāti paccayadhammadassanapubbakapaccayuppannadhammadassanavasena. Paccayadhammānañhi attano paccayuppannassa paccayabhāvo idappaccayatā paccayākāro, so ca ‘‘avijjāpaccayā saṅkhārā’’tiādinā vutto saṅkhāruppattiyā anulomanato anulomapaccayākāro, tassa vasena.
аабад̇од̇и барикааг̇ад̇ауд̣̇агад̇о. д̣̇ваарасамбад̇д̇ияаа д̇ад̇т̇а васанд̇аанам̣ бавзсананиг̇г̇аманапаасуд̇ааяа убабхог̇абарибхог̇авад̇т̇усамбад̇д̇ияаа сарийражид̇д̇асукад̇ааяа наг̇арасса манун̃н̃ад̇аад̇и вуд̇д̇ам̣ ‘‘саманд̇аа …бз… раман̣ийяа’’нд̇и. буб̣б̣з сун̃н̃абхаавзна аран̃н̃асад̣̇исам̣ худ̇ваа тид̇ам̣ ж̇анаваасам̣ гаронд̇з наг̇арасса лагкан̣аббад̇д̇ам̣ ход̇ийд̇и вуд̇д̇ам̣ ‘‘д̇ам̣ абарзна самаязна ид̣̇д̇хан̃жзва асса пийд̇ан̃жаа’’д̇и.
Āpatoti parikhāgataudakato. Dvārasampattiyā tattha vasantānaṃ pavesananiggamanaphāsutāya upabhogaparibhogavatthusampattiyā sarīracittasukhatāya nagarassa manuññatāti vuttaṃ ‘‘samantā …pe… ramaṇīya’’nti. Pubbe suññabhāvena araññasadisaṃ hutvā ṭhitaṃ janavāsaṃ karonte nagarassa lakkhaṇappattaṃ hotīti vuttaṃ ‘‘taṃ aparena samayena iddhañceva assa phītañcā’’ti.
‘‘буб̣б̣зва ко банасса гааяагаммам̣ важийгаммам̣ ааж̇ийво жа субарисуд̣̇д̇хо’’д̇и важанад̇о д̇ийхи вирад̇ийхи сад̣̇д̇хим̣ буб̣б̣абхааг̇амаг̇г̇оби адтан̇г̇игавохаарам̣ лад̣̇д̇хум̣ арахад̇ийд̇и вуд̇д̇ам̣ ‘‘адтан̇г̇игасса вибассанаамаг̇г̇ассаа’’д̇и. вибассанааяа жин̣н̣анд̇зд̇и вибассанааяа сан̃жарид̇ад̇ааяа д̇ад̇т̇а д̇ад̇т̇а д̇ааяа вибассанааяа д̇ийрид̇з бариязсид̇з. логуд̇д̇арамаг̇г̇ад̣̇ассананд̇и анумаанаад̣̇ивасзна логуд̇д̇арамаг̇г̇асса д̣̇ассанам̣. д̇ат̇аа хи ниб̣б̣аананаг̇арасса д̣̇ассанам̣ д̣̇адтаб̣б̣ам̣. д̣̇идтагаалод̇и ад̇хиг̇амавасзна д̣̇идтагаало. маг̇г̇апалавасзна уббаннаа баробан̣н̣ааса анаваж̇ж̇ад̇хаммаа, бажжавзгкан̣ан̃аан̣ам̣ бана д̇зсам̣ вавад̇т̇аабагам̣. яаабзд̇ваад̇и жараабзд̇ваа.
‘‘Pubbeva kho panassa kāyakammaṃ vacīkammaṃ ājīvo ca suparisuddho’’ti vacanato tīhi viratīhi saddhiṃ pubbabhāgamaggopi aṭṭhaṅgikavohāraṃ laddhuṃ arahatīti vuttaṃ ‘‘aṭṭhaṅgikassa vipassanāmaggassā’’ti. Vipassanāya ciṇṇanteti vipassanāya sañcaritatāya tattha tattha tāya vipassanāya tīrite pariyesite. Lokuttaramaggadassananti anumānādivasena lokuttaramaggassa dassanaṃ. Tathā hi nibbānanagarassa dassanaṃ daṭṭhabbaṃ. Diṭṭhakāloti adhigamavasena diṭṭhakālo. Maggaphalavasena uppannā paropaṇṇāsa anavajjadhammā, paccavekkhaṇañāṇaṃ pana tesaṃ vavatthāpakaṃ. Yāpetvāti carāpetvā.
авад̇д̇амаанагадтзнаад̇и б̣уд̣̇д̇хасун̃н̃з логз гассажи санд̇аанз аббавад̇д̇анад̇ова уббаад̣̇аад̣̇ивасзна вад̇д̇амаанавасзна. д̇ат̇аа хи бхаг̇аваа ‘‘ануббаннасса маг̇г̇асса уббаад̣̇зд̇аа, асан̃ж̇аад̇асса сан̃ж̇анзд̇аа’’д̇иаад̣̇игзхи т̇омид̇о. буб̣б̣агзхи махзсийхи бадибанно хи арияамаг̇г̇о ид̇арзхи анд̇араа гзхижи авал̣ан̃ж̇ид̇од̇и вуд̇д̇ам̣ ‘‘авал̣ан̃ж̇анадтзна бураан̣амаг̇г̇о’’д̇и. жхаанассаад̣̇знаад̇и жхаанасукзна жхаанабийд̇ияаа. субхигкам̣ бан̣ийд̇ад̇хаммаамад̇ад̇ааяа д̇ид̇д̇иаавахам̣. бубпид̇ам̣ убасобхид̇ам̣. яаава д̣̇асасахассажаггаваал̣зд̇и вуд̇д̇ам̣ ‘‘згиссаа логад̇хаад̇уяаа’’д̇и барижчиннаб̣уд̣̇д̇хакзд̇д̇ад̇д̇аа. д̇асса ад̇т̇ид̇ааяа хи барижчзд̣̇о ад̇т̇и. зд̇асмим̣ анд̇арзд̇и зд̇асмим̣ огаасз.
Avattamānakaṭṭhenāti buddhasuññe loke kassaci santāne appavattanatova uppādādivasena vattamānavasena. Tathā hi bhagavā ‘‘anuppannassa maggassa uppādetā, asañjātassa sañjanetā’’tiādikehi thomito. Pubbakehi mahesīhi paṭipanno hi ariyamaggo itarehi antarā kehici avaḷañjitoti vuttaṃ ‘‘avaḷañjanaṭṭhena purāṇamaggo’’ti. Jhānassādenāti jhānasukhena jhānapītiyā. Subhikkhaṃ paṇītadhammāmatatāya tittiāvahaṃ. Pupphitaṃ upasobhitaṃ. Yāva dasasahassacakkavāḷeti vuttaṃ ‘‘ekissā lokadhātuyā’’ti paricchinnabuddhakhettattā. Tassa atthitāya hi paricchedo atthi. Etasmiṃ antareti etasmiṃ okāse.
наг̇арасуд̇д̇аван̣н̣анаа нидтид̇аа.
Nagarasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 5. наг̇арасуд̇д̇ам̣ • 5. Nagarasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 5. наг̇арасуд̇д̇аван̣н̣анаа • 5. Nagarasuttavaṇṇanā
