| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৮. নগরৰিন্দেয্যসুত্তং
8. Nagaravindeyyasuttaṃ
৪৩৪. এৰং মে সুতং – একং সমযং ভগৰা কোসলেসু চারিকং চরমানো মহতা ভিক্খুসঙ্ঘেন সদ্ধিং যেন নগরৰিন্দং নাম কোসলানং ব্রাহ্মণানং গামো তদৰসরি। অস্সোসুং খো নগরৰিন্দেয্যকা 1 ব্রাহ্মণগহপতিকা – ‘‘সমণো খলু, ভো, গোতমো সক্যপুত্তো সক্যকুলা পব্বজিতো কোসলেসু চারিকং চরমানো মহতা ভিক্খুসঙ্ঘেন সদ্ধিং নগরৰিন্দং অনুপ্পত্তো। তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি। সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি। সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি। সাধু খো পন তথারূপানং অরহতং দস্সনং হোতী’’তি।
434. Evaṃ me sutaṃ – ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena nagaravindaṃ nāma kosalānaṃ brāhmaṇānaṃ gāmo tadavasari. Assosuṃ kho nagaravindeyyakā 2 brāhmaṇagahapatikā – ‘‘samaṇo khalu, bho, gotamo sakyaputto sakyakulā pabbajito kosalesu cārikaṃ caramāno mahatā bhikkhusaṅghena saddhiṃ nagaravindaṃ anuppatto. Taṃ kho pana bhavantaṃ gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Sādhu kho pana tathārūpānaṃ arahataṃ dassanaṃ hotī’’ti.
অথ খো নগরৰিন্দেয্যকা ব্রাহ্মণগহপতিকা যেন ভগৰা তেনুপসঙ্কমিংসু; উপসঙ্কমিত্ৰা অপ্পেকচ্চে ভগৰন্তং অভিৰাদেত্ৰা একমন্তং নিসীদিংসু। অপ্পেকচ্চে ভগৰতা সদ্ধিং সম্মোদিংসু; সম্মোদনীযং কথং সারণীযং ৰীতিসারেত্ৰা একমন্তং নিসীদিংসু। অপ্পেকচ্চে যেন ভগৰা তেনঞ্জলিং পণামেত্ৰা একমন্তং নিসীদিংসু। অপ্পেকচ্চে ভগৰতো সন্তিকে নামগোত্তং সাৰেত্ৰা একমন্তং নিসীদিংসু। অপ্পেকচ্চে তুণ্হীভূতা একমন্তং নিসীদিংসু। একমন্তং নিসিন্নে খো নগরৰিন্দেয্যকে ব্রাহ্মণগহপতিকে ভগৰা এতদৰোচ –
Atha kho nagaravindeyyakā brāhmaṇagahapatikā yena bhagavā tenupasaṅkamiṃsu; upasaṅkamitvā appekacce bhagavantaṃ abhivādetvā ekamantaṃ nisīdiṃsu. Appekacce bhagavatā saddhiṃ sammodiṃsu; sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Appekacce yena bhagavā tenañjaliṃ paṇāmetvā ekamantaṃ nisīdiṃsu. Appekacce bhagavato santike nāmagottaṃ sāvetvā ekamantaṃ nisīdiṃsu. Appekacce tuṇhībhūtā ekamantaṃ nisīdiṃsu. Ekamantaṃ nisinne kho nagaravindeyyake brāhmaṇagahapatike bhagavā etadavoca –
৪৩৫. ‘‘সচে ৰো, গহপতযো, অঞ্ঞতিত্থিযা পরিব্বাজকা এৰং পুচ্ছেয্যুং – ‘কথংভূতা, গহপতযো, সমণব্রাহ্মণা ন সক্কাতব্বা ন গরুকাতব্বা ন মানেতব্বা ন পূজেতব্বা’তি? এৰং পুট্ঠা তুম্হে, গহপতযো, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘যে তে সমণব্রাহ্মণা চক্খুৰিঞ্ঞেয্যেসু রূপেসু অৰীতরাগা অৰীতদোসা অৰীতমোহা, অজ্ঝত্তং অৰূপসন্তচিত্তা, সমৰিসমং চরন্তি কাযেন ৰাচায মনসা, এৰরূপা সমণব্রাহ্মণা ন সক্কাতব্বা ন গরুকাতব্বা ন মানেতব্বা ন পূজেতব্বা। তং কিস্স হেতু? মযম্পি হি চক্খুৰিঞ্ঞেয্যেসু রূপেসু অৰীতরাগা অৰীতদোসা অৰীতমোহা, অজ্ঝত্তং অৰূপসন্তচিত্তা, সমৰিসমং চরাম কাযেন ৰাচায মনসা, তেসং নো সমচরিযম্পি হেতং উত্তরি অপস্সতং। তস্মা তে ভোন্তো সমণব্রাহ্মণা ন সক্কাতব্বা ন গরুকাতব্বা ন মানেতব্বা ন পূজেতব্বা। যে তে সমণব্রাহ্মণা সোতৰিঞ্ঞেয্যেসু সদ্দেসু… ঘানৰিঞ্ঞেয্যেসু গন্ধেসু… জিৰ্হাৰিঞ্ঞেয্যেসু রসেসু… কাযৰিঞ্ঞেয্যেসু ফোট্ঠব্বেসু… মনোৰিঞ্ঞেয্যেসু ধম্মেসু অৰীতরাগা অৰীতদোসা অৰীতমোহা, অজ্ঝত্তং অৰূপসন্তচিত্তা, সমৰিসমং চরন্তি কাযেন ৰাচায মনসা, এৰরূপা সমণব্রাহ্মণা ন সক্কাতব্বা ন গরুকাতব্বা ন মানেতব্বা ন পূজেতব্বা। তং কিস্স হেতু? মযম্পি হি মনোৰিঞ্ঞেয্যেসু ধম্মেসু অৰীতরাগা অৰীতদোসা অৰীতমোহা , অজ্ঝত্তং অৰূপসন্তচিত্তা, সমৰিসমং চরাম কাযেন ৰাচায মনসা, তেসং নো সমচরিযম্পি হেতং উত্তরি অপস্সতং। তস্মা তে ভোন্তো সমণব্রাহ্মণা ন সক্কাতব্বা ন গরুকাতব্বা ন মানেতব্বা ন পূজেতব্বা’তি। এৰং পুট্ঠা তুম্হে, গহপতযো, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ।
435. ‘‘Sace vo, gahapatayo, aññatitthiyā paribbājakā evaṃ puccheyyuṃ – ‘kathaṃbhūtā, gahapatayo, samaṇabrāhmaṇā na sakkātabbā na garukātabbā na mānetabbā na pūjetabbā’ti? Evaṃ puṭṭhā tumhe, gahapatayo, tesaṃ aññatitthiyānaṃ paribbājakānaṃ evaṃ byākareyyātha – ‘ye te samaṇabrāhmaṇā cakkhuviññeyyesu rūpesu avītarāgā avītadosā avītamohā, ajjhattaṃ avūpasantacittā, samavisamaṃ caranti kāyena vācāya manasā, evarūpā samaṇabrāhmaṇā na sakkātabbā na garukātabbā na mānetabbā na pūjetabbā. Taṃ kissa hetu? Mayampi hi cakkhuviññeyyesu rūpesu avītarāgā avītadosā avītamohā, ajjhattaṃ avūpasantacittā, samavisamaṃ carāma kāyena vācāya manasā, tesaṃ no samacariyampi hetaṃ uttari apassataṃ. Tasmā te bhonto samaṇabrāhmaṇā na sakkātabbā na garukātabbā na mānetabbā na pūjetabbā. Ye te samaṇabrāhmaṇā sotaviññeyyesu saddesu… ghānaviññeyyesu gandhesu… jivhāviññeyyesu rasesu… kāyaviññeyyesu phoṭṭhabbesu… manoviññeyyesu dhammesu avītarāgā avītadosā avītamohā, ajjhattaṃ avūpasantacittā, samavisamaṃ caranti kāyena vācāya manasā, evarūpā samaṇabrāhmaṇā na sakkātabbā na garukātabbā na mānetabbā na pūjetabbā. Taṃ kissa hetu? Mayampi hi manoviññeyyesu dhammesu avītarāgā avītadosā avītamohā , ajjhattaṃ avūpasantacittā, samavisamaṃ carāma kāyena vācāya manasā, tesaṃ no samacariyampi hetaṃ uttari apassataṃ. Tasmā te bhonto samaṇabrāhmaṇā na sakkātabbā na garukātabbā na mānetabbā na pūjetabbā’ti. Evaṃ puṭṭhā tumhe, gahapatayo, tesaṃ aññatitthiyānaṃ paribbājakānaṃ evaṃ byākareyyātha.
৪৩৬. ‘‘সচে পন ৰো, গহপতযো, অঞ্ঞতিত্থিযা পরিব্বাজকা এৰং পুচ্ছেয্যুং – ‘কথংভূতা, গহপতযো, সমণব্রাহ্মণা সক্কাতব্বা গরুকাতব্বা মানেতব্বা পূজেতব্বা’তি? এৰং পুট্ঠা তুম্হে, গহপতযো, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘যে তে সমণব্রাহ্মণা চক্খুৰিঞ্ঞেয্যেসু রূপেসু ৰীতরাগা ৰীতদোসা ৰীতমোহা, অজ্ঝত্তং ৰূপসন্তচিত্তা, সমচরিযং চরন্তি কাযেন ৰাচায মনসা, এৰরূপা সমণব্রাহ্মণা সক্কাতব্বা গরুকাতব্বা মানেতব্বা পূজেতব্বা। তং কিস্স হেতু? মযম্পি হি 3 চক্খুৰিঞ্ঞেয্যেসু রূপেসু অৰীতরাগা অৰীতদোসা অৰীতমোহা, অজ্ঝত্তং অৰূপসন্তচিত্তা, সমৰিসমং চরাম কাযেন ৰাচায মনসা, তেসং নো সমচরিযম্পি হেতং উত্তরি পস্সতং। তস্মা তে ভোন্তো সমণব্রাহ্মণা সক্কাতব্বা গরুকাতব্বা মানেতব্বা পূজেতব্বা। যে তে সমণব্রাহ্মণা সোতৰিঞ্ঞেয্যেসু সদ্দেসু… ঘানৰিঞ্ঞেয্যেসু গন্ধেসু… জিৰ্হাৰিঞ্ঞেয্যেসু রসেসু… কাযৰিঞ্ঞেয্যেসু ফোট্ঠব্বেসু… মনোৰিঞ্ঞেয্যেসু ধম্মেসু ৰীতরাগা ৰীতদোসা ৰীতমোহা, অজ্ঝত্তং ৰূপসন্তচিত্তা, সমচরিযং চরন্তি কাযেন ৰাচায মনসা, এৰরূপা সমণব্রাহ্মণা সক্কাতব্বা গরুকাতব্বা মানেতব্বা পূজেতব্বা। তং কিস্স হেতু? মযম্পি হি মনোৰিঞ্ঞেয্যেসু ধম্মেসু অৰীতরাগা অৰীতদোসা অৰীতমোহা অজ্ঝত্তং অৰূপসন্তচিত্তা, সমৰিসমং চরাম কাযেন ৰাচায মনসা, তেসং নো সমচরিযম্পি হেতং উত্তরি পস্সতং। তস্মা তে ভোন্তো সমণব্রাহ্মণা সক্কাতব্বা গরুকাতব্বা মানেতব্বা পূজেতব্বা’তি । এৰং পুট্ঠা তুম্হে, গহপতযো, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ।
436. ‘‘Sace pana vo, gahapatayo, aññatitthiyā paribbājakā evaṃ puccheyyuṃ – ‘kathaṃbhūtā, gahapatayo, samaṇabrāhmaṇā sakkātabbā garukātabbā mānetabbā pūjetabbā’ti? Evaṃ puṭṭhā tumhe, gahapatayo, tesaṃ aññatitthiyānaṃ paribbājakānaṃ evaṃ byākareyyātha – ‘ye te samaṇabrāhmaṇā cakkhuviññeyyesu rūpesu vītarāgā vītadosā vītamohā, ajjhattaṃ vūpasantacittā, samacariyaṃ caranti kāyena vācāya manasā, evarūpā samaṇabrāhmaṇā sakkātabbā garukātabbā mānetabbā pūjetabbā. Taṃ kissa hetu? Mayampi hi 4 cakkhuviññeyyesu rūpesu avītarāgā avītadosā avītamohā, ajjhattaṃ avūpasantacittā, samavisamaṃ carāma kāyena vācāya manasā, tesaṃ no samacariyampi hetaṃ uttari passataṃ. Tasmā te bhonto samaṇabrāhmaṇā sakkātabbā garukātabbā mānetabbā pūjetabbā. Ye te samaṇabrāhmaṇā sotaviññeyyesu saddesu… ghānaviññeyyesu gandhesu… jivhāviññeyyesu rasesu… kāyaviññeyyesu phoṭṭhabbesu… manoviññeyyesu dhammesu vītarāgā vītadosā vītamohā, ajjhattaṃ vūpasantacittā, samacariyaṃ caranti kāyena vācāya manasā, evarūpā samaṇabrāhmaṇā sakkātabbā garukātabbā mānetabbā pūjetabbā. Taṃ kissa hetu? Mayampi hi manoviññeyyesu dhammesu avītarāgā avītadosā avītamohā ajjhattaṃ avūpasantacittā, samavisamaṃ carāma kāyena vācāya manasā, tesaṃ no samacariyampi hetaṃ uttari passataṃ. Tasmā te bhonto samaṇabrāhmaṇā sakkātabbā garukātabbā mānetabbā pūjetabbā’ti . Evaṃ puṭṭhā tumhe, gahapatayo, tesaṃ aññatitthiyānaṃ paribbājakānaṃ evaṃ byākareyyātha.
৪৩৭. ‘‘সচে পন ৰো 5, গহপতযো, অঞ্ঞতিত্থিযা পরিব্বাজকা এৰং পুচ্ছেয্যুং – ‘কে পনাযস্মন্তানং আকারা, কে অন্ৰযা, যেন তুম্হে আযস্মন্তো এৰং ৰদেথ? অদ্ধা তে আযস্মন্তো ৰীতরাগা ৰা রাগৰিনযায ৰা পটিপন্না, ৰীতদোসা ৰা দোসৰিনযায ৰা পটিপন্না, ৰীতমোহা ৰা মোহৰিনযায ৰা পটিপন্না’তি? এৰং পুট্ঠা তুম্হে, গহপতযো, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘তথা হি তে আযস্মন্তো অরঞ্ঞৰনপত্থানি পন্তানি সেনাসনানি পটিসেৰন্তি। নত্থি খো পন তত্থ তথারূপা চক্খুৰিঞ্ঞেয্যা রূপা যে দিস্ৰা দিস্ৰা অভিরমেয্যুং, নত্থি খো পন তত্থ তথারূপা সোতৰিঞ্ঞেয্যা সদ্দা যে সুত্ৰা সুত্ৰা অভিরমেয্যুং, নত্থি খো পন তত্থ তথারূপা ঘানৰিঞ্ঞেয্যা গন্ধা যে ঘাযিত্ৰা ঘাযিত্ৰা অভিরমেয্যুং , নত্থি খো পন তত্থ তথারূপা জিৰ্হাৰিঞ্ঞেয্যা রসা যে সাযিত্ৰা সাযিত্ৰা অভিরমেয্যুং, নত্থি খো পন তত্থ তথারূপা কাযৰিঞ্ঞেয্যা ফোট্ঠব্বা যে ফুসিত্ৰা ফুসিত্ৰা অভিরমেয্যুং। ইমে খো নো, আৰুসো, আকারা, ইমে অন্ৰযা, যেন মযং 6 এৰং ৰদেম – অদ্ধা তে আযস্মন্তো ৰীতরাগা ৰা রাগৰিনযায ৰা পটিপন্না, ৰীতদোসা ৰা দোসৰিনযায ৰা পটিপন্না, ৰীতমোহা ৰা মোহৰিনযায ৰা পটিপন্না’তি। এৰং পুট্ঠা তুম্হে, গহপতযো, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথা’’তি।
437. ‘‘Sace pana vo 7, gahapatayo, aññatitthiyā paribbājakā evaṃ puccheyyuṃ – ‘ke panāyasmantānaṃ ākārā, ke anvayā, yena tumhe āyasmanto evaṃ vadetha? Addhā te āyasmanto vītarāgā vā rāgavinayāya vā paṭipannā, vītadosā vā dosavinayāya vā paṭipannā, vītamohā vā mohavinayāya vā paṭipannā’ti? Evaṃ puṭṭhā tumhe, gahapatayo, tesaṃ aññatitthiyānaṃ paribbājakānaṃ evaṃ byākareyyātha – ‘tathā hi te āyasmanto araññavanapatthāni pantāni senāsanāni paṭisevanti. Natthi kho pana tattha tathārūpā cakkhuviññeyyā rūpā ye disvā disvā abhirameyyuṃ, natthi kho pana tattha tathārūpā sotaviññeyyā saddā ye sutvā sutvā abhirameyyuṃ, natthi kho pana tattha tathārūpā ghānaviññeyyā gandhā ye ghāyitvā ghāyitvā abhirameyyuṃ , natthi kho pana tattha tathārūpā jivhāviññeyyā rasā ye sāyitvā sāyitvā abhirameyyuṃ, natthi kho pana tattha tathārūpā kāyaviññeyyā phoṭṭhabbā ye phusitvā phusitvā abhirameyyuṃ. Ime kho no, āvuso, ākārā, ime anvayā, yena mayaṃ 8 evaṃ vadema – addhā te āyasmanto vītarāgā vā rāgavinayāya vā paṭipannā, vītadosā vā dosavinayāya vā paṭipannā, vītamohā vā mohavinayāya vā paṭipannā’ti. Evaṃ puṭṭhā tumhe, gahapatayo, tesaṃ aññatitthiyānaṃ paribbājakānaṃ evaṃ byākareyyāthā’’ti.
এৰং ৰুত্তে, নগরৰিন্দেয্যকা ব্রাহ্মণগহপতিকা ভগৰন্তং এতদৰোচুং – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – ‘চক্খুমন্তো রূপানি দক্খন্তী’তি; এৰমেৰং ভোতা গোতমেন অনেকপরিযাযেন ধম্মো পকাসিতো। এতে মযং ভৰন্তং গোতমং সরণং গচ্ছাম ধম্মঞ্চ ভিক্খুসঙ্ঘঞ্চ। উপাসকে নো ভৰং গোতমো ধারেতু অজ্জতগ্গে পাণুপেতে সরণং গতে’’তি।
Evaṃ vutte, nagaravindeyyakā brāhmaṇagahapatikā bhagavantaṃ etadavocuṃ – ‘‘abhikkantaṃ, bho gotama, abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – ‘cakkhumanto rūpāni dakkhantī’ti; evamevaṃ bhotā gotamena anekapariyāyena dhammo pakāsito. Ete mayaṃ bhavantaṃ gotamaṃ saraṇaṃ gacchāma dhammañca bhikkhusaṅghañca. Upāsake no bhavaṃ gotamo dhāretu ajjatagge pāṇupete saraṇaṃ gate’’ti.
নগরৰিন্দেয্যসুত্তং নিট্ঠিতং অট্ঠমং।
Nagaravindeyyasuttaṃ niṭṭhitaṃ aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৮. নগরৰিন্দেয্যসুত্তৰণ্ণনা • 8. Nagaravindeyyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৮. নগরৰিন্দেয্যসুত্তৰণ্ণনা • 8. Nagaravindeyyasuttavaṇṇanā
