| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. நக³ரவிந்தெ³ய்யஸுத்தவண்ணனா
8. Nagaravindeyyasuttavaṇṇanā
435. ஸமவிஸமங் சரந்தீதி காயஸமாதி³ங் ஸமஞ்ஞேவ, காயவிஸமாதி³ங் விஸமஞ்ஞேவ சரந்தி கரொந்தி படிபஜ்ஜந்தி. தங் பன ஸமவிஸமங் அஞ்ஞமஞ்ஞங் விருத்³த⁴த்தா விஸதி³ஸத்தா ந ஏகஸ்மிங் காலே ஸம்ப⁴வதீதி ஆஹ – ‘‘காலேன ஸமங் காலேன விஸம’’ந்தி. ஸமசரியம்பி ஹி ஏதந்தி புப்³பே³ ஸமசரியாய ஜோதிதத்தா வுத்தங்.
435.Samavisamaṃcarantīti kāyasamādiṃ samaññeva, kāyavisamādiṃ visamaññeva caranti karonti paṭipajjanti. Taṃ pana samavisamaṃ aññamaññaṃ viruddhattā visadisattā na ekasmiṃ kāle sambhavatīti āha – ‘‘kālena samaṃ kālena visama’’nti. Samacariyampi hi etanti pubbe samacariyāya jotitattā vuttaṃ.
437. ஆகரொந்தி அதி⁴ப்பேதமத்த²ங் ஞாபெந்தி பபோ³தெ⁴ந்தீதி ஆகாரா, ஞாபககாரணந்தி ஆஹ – ‘‘கே ஆகாராதி கானி காரணானீ’’தி. அனுபு³த்³தி⁴யோதி அனுமானஞாணானி. தஞ்ஹி யதா²தி³ட்ட²மத்த²ங் தி³ட்ட²பா⁴வேன அன்வேதி அனுக³ச்ச²தீதி ‘‘அன்வயா’’தி வுச்சதி. ஹரிததிணசம்பகவனாதி³வஸேனாதி ஹரிதகம்ப³லாதி³ஸதி³ஸதிணாதி³வஸேன வித்தா²ரிதகனகபடாதி³ஸதி³விகஸிதசம்பகவனாதி³வஸேன. ஆதி³ஸத்³தே³ன செத்த² கீசகவேணுஸத்³த³மது⁴ரஸப²லாப²லவஸேன ஸத்³த³ரஸானங் அத்தி²பா⁴வோ வேதி³தப்³போ³தி. சம்பகவஸேனேவ பன ப²ஸ்ஸக³ந்தா⁴னம்பி அத்தி²பா⁴வோ வுத்தோதி. தேனாஹ – ‘‘ரூபாத³யோ பஞ்ச காமகு³ணா அத்தீ²’’தி. ‘‘இத்தி²ரூபாதீ³னி ஸந்தா⁴யேதங் கதி²த’’ந்தி வத்வா இந்த்³ரியப³த்³தா⁴ வா ஹொந்து ரூபாத³யோ அனிந்த்³ரியப³த்³தா⁴ வா, ஸப்³பே³பி சேதே கிலேஸுப்பத்தினிமித்ததாய காமகு³ணா ஏவாதி சோத³னங் ஸந்தா⁴ய விஸபா⁴கி³த்தி²க³தா ரூபாத³யோ ஸவிஸேஸங் கிலேஸுப்பத்தினிமித்தந்தி த³ஸ்ஸெந்தோ, ‘‘தானி ஹீ’’திஆதி³மாஹ.
437. Ākaronti adhippetamatthaṃ ñāpenti pabodhentīti ākārā, ñāpakakāraṇanti āha – ‘‘ke ākārāti kāni kāraṇānī’’ti. Anubuddhiyoti anumānañāṇāni. Tañhi yathādiṭṭhamatthaṃ diṭṭhabhāvena anveti anugacchatīti ‘‘anvayā’’ti vuccati. Haritatiṇacampakavanādivasenāti haritakambalādisadisatiṇādivasena vitthāritakanakapaṭādisadivikasitacampakavanādivasena. Ādisaddena cettha kīcakaveṇusaddamadhurasaphalāphalavasena saddarasānaṃ atthibhāvo veditabboti. Campakavaseneva pana phassagandhānampi atthibhāvo vuttoti. Tenāha – ‘‘rūpādayo pañca kāmaguṇā atthī’’ti. ‘‘Itthirūpādīni sandhāyetaṃ kathita’’nti vatvā indriyabaddhā vā hontu rūpādayo anindriyabaddhā vā, sabbepi cete kilesuppattinimittatāya kāmaguṇā evāti codanaṃ sandhāya visabhāgitthigatā rūpādayo savisesaṃ kilesuppattinimittanti dassento, ‘‘tāni hī’’tiādimāha.
தத்த² தானீதி ரூபாதீ³னி. ஹி-ஸத்³தோ³ ஹேதுஅத்தோ². தேன யதா²வுத்தமத்த²ங் ஸமத்தே²தி, ‘‘யஸ்மா புரிஸஸ்ஸ சித்தங் பரியாதா³ய திட்ட²ந்தி, தஸ்மா இத்தி²ரூபாதீ³னி ஸந்தா⁴ய ஏதங் கதி²த’’ந்தி. புரிஸஸ்ஸ சித்தந்தி புரிஸஸ்ஸ சதுபூ⁴மகங் குஸலசித்தங் பரியாதா³ய க³ஹெத்வா அந்தோமுட்டி²க³தங் விய கத்வா. ‘‘ஹத்தி²காயங் பரியாதி³யித்வா’’திஆதீ³ஸு (ஸங்॰ நி॰ 1.126) ஹி க³ஹணங் பரியாதா³னங் நாம, ‘‘அனிச்சஸஞ்ஞா பா⁴விதா ப³ஹுலீகதா ஸப்³ப³ங் காமராக³ங் பரியாதி³யதீ’’திஆதீ³ஸு (ஸங்॰ நி॰ 3.102) கே²பனங் பரியாதா³னங், இத⁴ உப⁴யம்பி வட்டதி. இதா³னி யதா²வுத்தமத்த²ங் ஸுத்தேனேவ ஸாதே⁴துங், ‘‘யதா²ஹா’’திஆதி³ வுத்தங். தத்த² ‘‘நாஹங், பி⁴க்க²வே’’திஆதீ³ஸு ந-காரோ படிஸேத⁴த்தோ². அஹந்தி ப⁴க³வா அத்தானங் நித்³தி³ஸதி. பி⁴க்க²வேதி பி⁴க்கூ² ஆலபதி. அஞ்ஞந்தி இதா³னி வத்தப்³ப³ங் இத்தி²ரூபதோ அஞ்ஞங். ஏகரூபம்பீதி ஏகம்பி ரூபங். ஸமனுபஸ்ஸாமீதி ஞாணஸ்ஸ ஸமனுபஸ்ஸனா அதி⁴ப்பேதா, ஹெட்டா² ந-காரங் ஆனெத்வா ஸம்ப³ந்தி⁴தப்³ப³ங். அயஞ்ஹெத்த² அத்தோ² – ‘‘அஹங், பி⁴க்க²வே, ஸப்³ப³ஞ்ஞுதஞ்ஞாணேன ஸப்³ப³ஸோ ஓலோகெந்தோ அஞ்ஞங் ஏகரூபம்பி ந ஸமனுபஸ்ஸாமீ’’தி. யங் ஏவங் புரிஸஸ்ஸ சித்தங் பரியாதா³ய திட்ட²தீதி யங் ரூபங் ரூபக³ருகஸ்ஸ புரிஸஸ்ஸ ஸப்³ப³ம்பி குஸலசித்தங் பவத்திதுங் அப்பதா³னவஸேன பரியாதி³யித்வா க³ஹெத்வா கே²பெத்வா ச திட்ட²தி. யத²யித³ங் இத்தி²ரூபந்தி இத்தி²யா ரூபகாயங். ரூபஸத்³தோ³ க²ந்தா⁴தி³அனேகத்த²வாசகோ, இத⁴ பன இத்தி²யா சதுஸமுட்டா²னே ரூபாயதனே வண்ணதா⁴துயங் த³ட்ட²ப்³போ³. ‘‘இத்தி²ரூபங், பி⁴க்க²வே, புரிஸஸ்ஸ சித்தங் பரியாதா³ய திட்ட²தீ’’தி இத³ங் புரிமஸ்ஸேவ த³ள்ஹீகரணத்த²ங் வுத்தங். புரிமங் ‘‘யத²யித³ங், பி⁴க்க²வே, இத்தி²ரூப’’ந்தி இத³ங் ஓபம்மவஸேன வுத்தங், இத³ங் பரியாதா³னபா⁴வே நித³ஸ்ஸனந்தி த³ட்ட²ப்³ப³ங். ஸேஸங் ஸுவிஞ்ஞெய்யமேவ.
Tattha tānīti rūpādīni. Hi-saddo hetuattho. Tena yathāvuttamatthaṃ samattheti, ‘‘yasmā purisassa cittaṃ pariyādāya tiṭṭhanti, tasmā itthirūpādīni sandhāya etaṃ kathita’’nti. Purisassa cittanti purisassa catubhūmakaṃ kusalacittaṃ pariyādāya gahetvā antomuṭṭhigataṃ viya katvā. ‘‘Hatthikāyaṃ pariyādiyitvā’’tiādīsu (saṃ. ni. 1.126) hi gahaṇaṃ pariyādānaṃ nāma, ‘‘aniccasaññā bhāvitā bahulīkatā sabbaṃ kāmarāgaṃ pariyādiyatī’’tiādīsu (saṃ. ni. 3.102) khepanaṃ pariyādānaṃ, idha ubhayampi vaṭṭati. Idāni yathāvuttamatthaṃ sutteneva sādhetuṃ, ‘‘yathāhā’’tiādi vuttaṃ. Tattha ‘‘nāhaṃ, bhikkhave’’tiādīsu na-kāro paṭisedhattho. Ahanti bhagavā attānaṃ niddisati. Bhikkhaveti bhikkhū ālapati. Aññanti idāni vattabbaṃ itthirūpato aññaṃ. Ekarūpampīti ekampi rūpaṃ. Samanupassāmīti ñāṇassa samanupassanā adhippetā, heṭṭhā na-kāraṃ ānetvā sambandhitabbaṃ. Ayañhettha attho – ‘‘ahaṃ, bhikkhave, sabbaññutaññāṇena sabbaso olokento aññaṃ ekarūpampi na samanupassāmī’’ti. Yaṃ evaṃ purisassa cittaṃ pariyādāya tiṭṭhatīti yaṃ rūpaṃ rūpagarukassa purisassa sabbampi kusalacittaṃ pavattituṃ appadānavasena pariyādiyitvā gahetvā khepetvā ca tiṭṭhati. Yathayidaṃ itthirūpanti itthiyā rūpakāyaṃ. Rūpasaddo khandhādianekatthavācako, idha pana itthiyā catusamuṭṭhāne rūpāyatane vaṇṇadhātuyaṃ daṭṭhabbo. ‘‘Itthirūpaṃ, bhikkhave, purisassa cittaṃ pariyādāya tiṭṭhatī’’ti idaṃ purimasseva daḷhīkaraṇatthaṃ vuttaṃ. Purimaṃ ‘‘yathayidaṃ, bhikkhave, itthirūpa’’nti idaṃ opammavasena vuttaṃ, idaṃ pariyādānabhāve nidassananti daṭṭhabbaṃ. Sesaṃ suviññeyyameva.
நக³ரவிந்தெ³ய்யஸுத்தவண்ணனாய லீனத்த²ப்பகாஸனா ஸமத்தா.
Nagaravindeyyasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. நக³ரவிந்தெ³ய்யஸுத்தங் • 8. Nagaravindeyyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. நக³ரவிந்தெ³ய்யஸுத்தவண்ணனா • 8. Nagaravindeyyasuttavaṇṇanā
