Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༣. ནགརོཔམསུཏྟཾ

    3. Nagaropamasuttaṃ

    ༦༧. ‘‘ཡཏོ ཁོ, བྷིཀྑཝེ, རཉྙོ པཙྩནྟིམཾ ནགརཾ སཏྟཧི ནགརཔརིཀྑཱརེཧི སུཔརིཀྑཏཾ 1 ཧོཏི, ཙཏུནྣཉྩ ཨཱཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི། ཨིདཾ ཝུཙྩཏི, བྷིཀྑཝེ, རཉྙོ པཙྩནྟིམཾ ནགརཾ ཨཀརཎཱིཡཾ བཱཧིརེཧི པཙྩཏྠིཀེཧི པཙྩཱམིཏྟེཧི།

    67. ‘‘Yato kho, bhikkhave, rañño paccantimaṃ nagaraṃ sattahi nagaraparikkhārehi suparikkhataṃ 2 hoti, catunnañca āhārānaṃ nikāmalābhī hoti akicchalābhī akasiralābhī. Idaṃ vuccati, bhikkhave, rañño paccantimaṃ nagaraṃ akaraṇīyaṃ bāhirehi paccatthikehi paccāmittehi.

    ‘‘ཀཏམེཧི སཏྟཧི ནགརཔརིཀྑཱརེཧི སུཔརིཀྑཏཾ ཧོཏི? ཨིདྷ, བྷིཀྑཝེ, རཉྙོ པཙྩནྟིམེ ནགརེ ཨེསིཀཱ ཧོཏི གམྦྷཱིརནེམཱ 3 སུནིཁཱཏཱ ཨཙལཱ ཨསམྤཝེདྷཱི 4། ཨིམིནཱ པཋམེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ།

    ‘‘Katamehi sattahi nagaraparikkhārehi suparikkhataṃ hoti? Idha, bhikkhave, rañño paccantime nagare esikā hoti gambhīranemā 5 sunikhātā acalā asampavedhī 6. Iminā paṭhamena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ པརིཁཱ ཧོཏི གམྦྷཱིརཱ ཙེཝ ཝིཏྠཏཱ ཙ། ཨིམིནཱ དུཏིཡེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare parikhā hoti gambhīrā ceva vitthatā ca. Iminā dutiyena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ ཨནུཔརིཡཱཡཔཐོ ཧོཏི ཨུཙྩོ ཙེཝ ཝིཏྠཏོ ཙ། ཨིམིནཱ ཏཏིཡེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare anupariyāyapatho hoti ucco ceva vitthato ca. Iminā tatiyena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ བཧུཾ ཨཱཝུདྷཾ སནྣིཙིཏཾ ཧོཏི སལཱཀཉྩེཝ ཛེཝནིཀཉྩ 7། ཨིམིནཱ ཙཏུཏྠེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare bahuṃ āvudhaṃ sannicitaṃ hoti salākañceva jevanikañca 8. Iminā catutthena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ བཧུབལཀཱཡོ པཊིཝསཏི, སེཡྻཐིདཾ – ཧཏྠཱརོཧཱ ཨསྶཱརོཧཱ རཐིཀཱ དྷནུགྒཧཱ ཙེལཀཱ ཙལཀཱ པིཎྜདཱཡཀཱ ཨུགྒཱ རཱཛཔུཏྟཱ པཀྑནྡིནོ མཧཱནཱགཱ སཱུརཱ ཙམྨཡོདྷིནོ དཱསཀཔུཏྟཱ། ཨིམིནཱ པཉྩམེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare bahubalakāyo paṭivasati, seyyathidaṃ – hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsakaputtā. Iminā pañcamena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ དོཝཱརིཀོ ཧོཏི པཎྜིཏོ བྱཏྟོ མེདྷཱཝཱི ཨཉྙཱཏཱནཾ ནིཝཱརེཏཱ ཉཱཏཱནཾ པཝེསེཏཱ། ཨིམིནཱ ཚཊྛེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare dovāriko hoti paṇḍito byatto medhāvī aññātānaṃ nivāretā ñātānaṃ pavesetā. Iminā chaṭṭhena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ པཱཀཱརོ ཧོཏི ཨུཙྩོ ཙེཝ ཝིཏྠཏོ ཙ ཝཱསནལེཔནསམྤནྣོ ཙ། ཨིམིནཱ སཏྟམེན ནགརཔརིཀྑཱརེན སུཔརིཀྑཏཾ ཧོཏི རཉྙོ པཙྩནྟིམཾ ནགརཾ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨིམེཧི སཏྟཧི ནགརཔརིཀྑཱརེཧི སུཔརིཀྑཏཾ ཧོཏི།

    ‘‘Puna caparaṃ, bhikkhave, rañño paccantime nagare pākāro hoti ucco ceva vitthato ca vāsanalepanasampanno ca. Iminā sattamena nagaraparikkhārena suparikkhataṃ hoti rañño paccantimaṃ nagaraṃ abbhantarānaṃ guttiyā bāhirānaṃ paṭighātāya. Imehi sattahi nagaraparikkhārehi suparikkhataṃ hoti.

    ‘‘ཀཏམེསཾ ཙཏུནྣཾ ཨཱཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི? ཨིདྷ, བྷིཀྑཝེ, རཉྙོ པཙྩནྟིམེ ནགརེ བཧུཾ ཏིཎཀཊྛོདཀཾ སནྣིཙིཏཾ ཧོཏི ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ།

    ‘‘Katamesaṃ catunnaṃ āhārānaṃ nikāmalābhī hoti akicchalābhī akasiralābhī? Idha, bhikkhave, rañño paccantime nagare bahuṃ tiṇakaṭṭhodakaṃ sannicitaṃ hoti abbhantarānaṃ ratiyā aparitassāya phāsuvihārāya bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ བཧུཾ སཱལིཡཝཀཾ སནྣིཙིཏཾ ཧོཏི ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare bahuṃ sāliyavakaṃ sannicitaṃ hoti abbhantarānaṃ ratiyā aparitassāya phāsuvihārāya bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ བཧུཾ ཏིལམུགྒམཱསཱཔརཎྞཾ སནྣིཙིཏཾ ཧོཏི ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ།

    ‘‘Puna caparaṃ, bhikkhave, rañño paccantime nagare bahuṃ tilamuggamāsāparaṇṇaṃ sannicitaṃ hoti abbhantarānaṃ ratiyā aparitassāya phāsuvihārāya bāhirānaṃ paṭighātāya.

    ‘‘པུན ཙཔརཾ, བྷིཀྑཝེ, རཉྙོ པཙྩནྟིམེ ནགརེ བཧུཾ བྷེསཛྫཾ སནྣིཙིཏཾ ཧོཏི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ ལོཎཾ ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ། ཨིམེསཾ ཁོ, བྷིཀྑཝེ, ཙཏུནྣཾ ཨཱཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི།

    ‘‘Puna caparaṃ, bhikkhave, rañño paccantime nagare bahuṃ bhesajjaṃ sannicitaṃ hoti, seyyathidaṃ – sappi navanītaṃ telaṃ madhu phāṇitaṃ loṇaṃ abbhantarānaṃ ratiyā aparitassāya phāsuvihārāya bāhirānaṃ paṭighātāya. Imesaṃ kho, bhikkhave, catunnaṃ āhārānaṃ nikāmalābhī hoti akicchalābhī akasiralābhī.

    ‘‘ཡཏོ ཁོ, བྷིཀྑཝེ, རཉྙོ པཙྩནྟིམཾ ནགརཾ ཨིམེཧི སཏྟཧི ནགརཔརིཀྑཱརེཧི སུཔརིཀྑཏཾ ཧོཏི, ཨིམེསཉྩ ཙཏུནྣཾ ཨཱཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི། ཨིདཾ ཝུཙྩཏི, བྷིཀྑཝེ, རཉྙོ པཙྩནྟིམཾ ནགརཾ ཨཀརཎཱིཡཾ བཱཧིརེཧི པཙྩཏྠིཀེཧི པཙྩཱམིཏྟེཧི། ཨེཝམེཝཾ ཁོ, བྷིཀྑཝེ, ཡཏོ ཨརིཡསཱཝཀོ སཏྟཧི སདྡྷམྨེཧི སམནྣཱགཏོ ཧོཏི, ཙཏུནྣཉྩ ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི། ཨཡཾ ཝུཙྩཏི, བྷིཀྑཝེ, ཨརིཡསཱཝཀོ ཨཀརཎཱིཡོ མཱརསྶ ཨཀརཎཱིཡོ པཱཔིམཏོ། ཀཏམེཧི སཏྟཧི སདྡྷམྨེཧི སམནྣཱགཏོ ཧོཏི?

    ‘‘Yato kho, bhikkhave, rañño paccantimaṃ nagaraṃ imehi sattahi nagaraparikkhārehi suparikkhataṃ hoti, imesañca catunnaṃ āhārānaṃ nikāmalābhī hoti akicchalābhī akasiralābhī. Idaṃ vuccati, bhikkhave, rañño paccantimaṃ nagaraṃ akaraṇīyaṃ bāhirehi paccatthikehi paccāmittehi. Evamevaṃ kho, bhikkhave, yato ariyasāvako sattahi saddhammehi samannāgato hoti, catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī. Ayaṃ vuccati, bhikkhave, ariyasāvako akaraṇīyo mārassa akaraṇīyo pāpimato. Katamehi sattahi saddhammehi samannāgato hoti?

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ ཨེསིཀཱ ཧོཏི གམྦྷཱིརནེམཱ སུནིཁཱཏཱ ཨཙལཱ ཨསམྤཝེདྷཱི ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ སདྡྷོ ཧོཏི, སདྡཧཏི ཏཐཱགཏསྶ བོདྷིཾ ‘ཨིཏིཔི སོ…པེ॰… བུདྡྷོ བྷགཝཱ’ཏི། སདྡྷེསིཀོ, བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ པཋམེན སདྡྷམྨེན སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare esikā hoti gambhīranemā sunikhātā acalā asampavedhī abbhantarānaṃ guttiyā bāhirānaṃ paṭighātāya. Evamevaṃ kho, bhikkhave, ariyasāvako saddho hoti, saddahati tathāgatassa bodhiṃ ‘itipi so…pe… buddho bhagavā’ti. Saddhesiko, bhikkhave, ariyasāvako akusalaṃ pajahati, kusalaṃ bhāveti; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā paṭhamena saddhammena samannāgato hoti.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ པརིཀྑཱ ཧོཏི གམྦྷཱིརཱ ཙེཝ ཝིཏྠཏཱ ཙ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ ཧིརཱིམཱ ཧོཏི, ཧིརཱིཡཏི ཀཱཡདུཙྩརིཏེན ཝཙཱིདུཙྩརིཏེན མནོདུཙྩརིཏེན, ཧིརཱིཡཏི པཱཔཀཱནཾ ཨཀུསལཱནཾ དྷམྨཱནཾ སམཱཔཏྟིཡཱ། ཧིརཱིཔརིཀྑོ ཁོ, བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ དུཏིཡེན སདྡྷམྨེན སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare parikkhā hoti gambhīrā ceva vitthatā ca abbhantarānaṃ guttiyā bāhirānaṃ paṭighātāya. Evamevaṃ kho, bhikkhave, ariyasāvako hirīmā hoti, hirīyati kāyaduccaritena vacīduccaritena manoduccaritena, hirīyati pāpakānaṃ akusalānaṃ dhammānaṃ samāpattiyā. Hirīparikkho kho, bhikkhave, ariyasāvako akusalaṃ pajahati, kusalaṃ bhāveti; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā dutiyena saddhammena samannāgato hoti.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ ཨནུཔརིཡཱཡཔཐོ ཧོཏི ཨུཙྩོ ཙེཝ ཝིཏྠཏོ ཙ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ ཨོཏྟཔྤཱི ཧོཏི, ཨོཏྟཔྤཏི ཀཱཡདུཙྩརིཏེན ཝཙཱིདུཙྩརིཏེན མནོདུཙྩརིཏེན, ཨོཏྟཔྤཏི པཱཔཀཱནཾ ཨཀུསལཱནཾ དྷམྨཱནཾ སམཱཔཏྟིཡཱ། ཨོཏྟཔྤཔརིཡཱཡཔཐོ , བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི ; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ ཏཏིཡེན སདྡྷམྨེན སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare anupariyāyapatho hoti ucco ceva vitthato ca abbhantarānaṃ guttiyā bāhirānaṃ paṭighātāya. Evamevaṃ kho, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṃ akusalānaṃ dhammānaṃ samāpattiyā. Ottappapariyāyapatho , bhikkhave, ariyasāvako akusalaṃ pajahati, kusalaṃ bhāveti ; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā tatiyena saddhammena samannāgato hoti.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ བཧུཾ ཨཱཝུདྷཾ སནྣིཙིཏཾ ཧོཏི སལཱཀཉྩེཝ ཛེཝནིཀཉྩ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ བཧུསྶུཏོ ཧོཏི…པེ॰… དིཊྛིཡཱ སུཔྤཊིཝིདྡྷཱ། སུཏཱཝུདྷོ, བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ ཙཏུཏྠེན སདྡྷམྨེན སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare bahuṃ āvudhaṃ sannicitaṃ hoti salākañceva jevanikañca abbhantarānaṃ guttiyā bāhirānaṃ paṭighātāya. Evamevaṃ kho, bhikkhave, ariyasāvako bahussuto hoti…pe… diṭṭhiyā suppaṭividdhā. Sutāvudho, bhikkhave, ariyasāvako akusalaṃ pajahati, kusalaṃ bhāveti; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā catutthena saddhammena samannāgato hoti.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ བཧུབལཀཱཡོ པཊིཝསཏི, སེཡྻཐིདཾ – ཧཏྠཱརོཧཱ ཨསྶཱརོཧཱ རཐིཀཱ དྷནུགྒཧཱ ཙེལཀཱ ཙལཀཱ པིཎྜདཱཡཀཱ ཨུགྒཱ རཱཛཔུཏྟཱ པཀྑནྡིནོ མཧཱནཱགཱ སཱུརཱ ཙམྨཡོདྷིནོ དཱསཀཔུཏྟཱ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ ཨཱརདྡྷཝཱིརིཡོ ཝིཧརཏི ཨཀུསལཱནཾ དྷམྨཱནཾ པཧཱནཱཡ, ཀུསལཱནཾ དྷམྨཱནཾ ཨུཔསམྤདཱཡ, ཐཱམཝཱ དལ༹ྷཔརཀྐམོ ཨནིཀྑིཏྟདྷུརོ ཀུསལེསུ དྷམྨེསུ། ཝཱིརིཡབལཀཱཡོ, བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ པཉྩམེན སདྡྷམྨེན སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare bahubalakāyo paṭivasati, seyyathidaṃ – hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsakaputtā abbhantarānaṃ guttiyā bāhirānaṃ paṭighātāya. Evamevaṃ kho, bhikkhave, ariyasāvako āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Vīriyabalakāyo, bhikkhave, ariyasāvako akusalaṃ pajahati, kusalaṃ bhāveti; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā pañcamena saddhammena samannāgato hoti.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ དོཝཱརིཀོ ཧོཏི པཎྜིཏོ བྱཏྟོ མེདྷཱཝཱི ཨཉྙཱཏཱནཾ ནིཝཱརེཏཱ ཉཱཏཱནཾ པཝེསེཏཱ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ སཏིམཱ ཧོཏི པརམེན སཏིནེཔཀྐེན སམནྣཱགཏོ ཙིརཀཏམྤི ཙིརབྷཱསིཏམྤི སརིཏཱ ཨནུསྶརིཏཱ། སཏིདོཝཱརིཀོ, བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ ཚཊྛེན སདྡྷམྨེན སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare dovāriko hoti paṇḍito byatto medhāvī aññātānaṃ nivāretā ñātānaṃ pavesetā abbhantarānaṃ guttiyā bāhirānaṃ paṭighātāya . Evamevaṃ kho, bhikkhave, ariyasāvako satimā hoti paramena satinepakkena samannāgato cirakatampi cirabhāsitampi saritā anussaritā. Satidovāriko, bhikkhave, ariyasāvako akusalaṃ pajahati, kusalaṃ bhāveti; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā chaṭṭhena saddhammena samannāgato hoti.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ པཱཀཱརོ ཧོཏི ཨུཙྩོ ཙེཝ ཝིཏྠཏོ ཙ ཝཱསནལེཔནསམྤནྣོ ཙ ཨབྦྷནྟརཱནཾ གུཏྟིཡཱ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ པཉྙཝཱ ཧོཏི ཨུདཡཏྠགཱམིནིཡཱ པཉྙཱཡ སམནྣཱགཏོ ཨརིཡཱཡ ནིབྦེདྷིཀཱཡ སམྨཱ དུཀྑཀྑཡགཱམིནིཡཱ། པཉྙཱཝཱསནལེཔནསམྤནྣོ, བྷིཀྑཝེ, ཨརིཡསཱཝཀོ ཨཀུསལཾ པཛཧཏི, ཀུསལཾ བྷཱཝེཏི; སཱཝཛྫཾ པཛཧཏི, ཨནཝཛྫཾ བྷཱཝེཏི; སུདྡྷཾ ཨཏྟཱནཾ པརིཧརཏི། ཨིམིནཱ སཏྟམེན སདྡྷམྨེན སམནྣཱགཏོ ཧོཏི། ཨིམེཧི སཏྟཧི སདྡྷམྨེཧི སམནྣཱགཏོ ཧོཏི།

    ‘‘Seyyathāpi, bhikkhave, rañño paccantime nagare pākāro hoti ucco ceva vitthato ca vāsanalepanasampanno ca abbhantarānaṃ guttiyā bāhirānaṃ paṭighātāya. Evamevaṃ kho, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā. Paññāvāsanalepanasampanno, bhikkhave, ariyasāvako akusalaṃ pajahati, kusalaṃ bhāveti; sāvajjaṃ pajahati, anavajjaṃ bhāveti; suddhaṃ attānaṃ pariharati. Iminā sattamena saddhammena samannāgato hoti. Imehi sattahi saddhammehi samannāgato hoti.

    ‘‘ཀཏམེསཾ ཙཏུནྣཾ ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི? སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ བཧུཾ ཏིཎཀཊྛོདཀཾ སནྣིཙིཏཾ ཧོཏི ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི ཨཏྟནོ རཏིཡཱ ཨཔརིཏསྶཱཡ ཕཱསུཝིཧཱརཱཡ ཨོཀྐམནཱཡ ནིབྦཱནསྶ།

    ‘‘Katamesaṃ catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī? Seyyathāpi, bhikkhave, rañño paccantime nagare bahuṃ tiṇakaṭṭhodakaṃ sannicitaṃ hoti abbhantarānaṃ ratiyā aparitassāya phāsuvihārāya bāhirānaṃ paṭighātāya. Evamevaṃ kho, bhikkhave, ariyasāvako vivicceva kāmehi…pe… paṭhamaṃ jhānaṃ upasampajja viharati attano ratiyā aparitassāya phāsuvihārāya okkamanāya nibbānassa.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ བཧུཾ སཱལིཡཝཀཾ སནྣིཙིཏཾ ཧོཏི ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ ཝིཏཀྐཝིཙཱརཱནཾ ཝཱུཔསམཱ…པེ॰… དུཏིཡཾ ཛྷཱནཾ ཨུཔསམྤཛྫ ཝིཧརཏི ཨཏྟནོ རཏིཡཱ ཨཔརིཏསྶཱཡ ཕཱསུཝིཧཱརཱཡ ཨོཀྐམནཱཡ ནིབྦཱནསྶ།

    ‘‘Seyyathāpi, bhikkhave, rañño paccantime nagare bahuṃ sāliyavakaṃ sannicitaṃ hoti abbhantarānaṃ ratiyā aparitassāya phāsuvihārāya bāhirānaṃ paṭighātāya. Evamevaṃ kho, bhikkhave, ariyasāvako vitakkavicārānaṃ vūpasamā…pe… dutiyaṃ jhānaṃ upasampajja viharati attano ratiyā aparitassāya phāsuvihārāya okkamanāya nibbānassa.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ བཧུཾ ཏིལམུགྒམཱསཱཔརཎྞཾ སནྣིཙིཏཾ ཧོཏི ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ། ཨེཝམེཝཾ ཁོ, བྷིཀྑཝེ, ཨརིཡསཱཝཀོ པཱིཏིཡཱ ཙ ཝིརཱགཱ…པེ॰… ཏཏིཡཾ ཛྷཱནཾ ཨུཔསམྤཛྫ ཝིཧརཏི ཨཏྟནོ རཏིཡཱ ཨཔརིཏསྶཱཡ ཕཱསུཝིཧཱརཱཡ ཨོཀྐམནཱཡ ནིབྦཱནསྶ།

    ‘‘Seyyathāpi, bhikkhave, rañño paccantime nagare bahuṃ tilamuggamāsāparaṇṇaṃ sannicitaṃ hoti abbhantarānaṃ ratiyā aparitassāya phāsuvihārāya bāhirānaṃ paṭighātāya. Evamevaṃ kho, bhikkhave, ariyasāvako pītiyā ca virāgā…pe… tatiyaṃ jhānaṃ upasampajja viharati attano ratiyā aparitassāya phāsuvihārāya okkamanāya nibbānassa.

    ‘‘སེཡྻཐཱཔི, བྷིཀྑཝེ, རཉྙོ པཙྩནྟིམེ ནགརེ བཧུཾ བྷེསཛྫཾ སནྣིཙིཏཾ ཧོཏི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ ལོཎཾ ཨབྦྷནྟརཱནཾ རཏིཡཱ ཨཔརིཏསྶཱཡ ཕཱསུཝིཧཱརཱཡ བཱཧིརཱནཾ པཊིགྷཱཏཱཡ། ཨེཝམེཝཾ ཁོ བྷིཀྑཝེ, ཨརིཡསཱཝཀོ སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི ཨཏྟནོ རཏིཡཱ ཨཔརིཏསྶཱཡ ཕཱསུཝིཧཱརཱཡ ཨོཀྐམནཱཡ ནིབྦཱནསྶ། ཨིམེསཾ ཙཏུནྣཾ ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི།

    ‘‘Seyyathāpi, bhikkhave, rañño paccantime nagare bahuṃ bhesajjaṃ sannicitaṃ hoti, seyyathidaṃ – sappi navanītaṃ telaṃ madhu phāṇitaṃ loṇaṃ abbhantarānaṃ ratiyā aparitassāya phāsuvihārāya bāhirānaṃ paṭighātāya. Evamevaṃ kho bhikkhave, ariyasāvako sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati attano ratiyā aparitassāya phāsuvihārāya okkamanāya nibbānassa. Imesaṃ catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī.

    ‘‘ཡཏོ ཁོ, བྷིཀྑཝེ, ཨརིཡསཱཝཀོ ཨིམེཧི སཏྟཧི སདྡྷམྨེཧི སམནྣཱགཏོ ཧོཏི, ཨིམེསཉྩ ཙཏུནྣཾ ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི། ཨཡཾ ཝུཙྩཏི, བྷིཀྑཝེ, ཨརིཡསཱཝཀོ ཨཀརཎཱིཡོ མཱརསྶ ཨཀརཎཱིཡོ པཱཔིམཏོ’’ཏི། ཏཏིཡཾ།

    ‘‘Yato kho, bhikkhave, ariyasāvako imehi sattahi saddhammehi samannāgato hoti, imesañca catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī. Ayaṃ vuccati, bhikkhave, ariyasāvako akaraṇīyo mārassa akaraṇīyo pāpimato’’ti. Tatiyaṃ.




    Next: ༤. དྷམྨཉྙཱུསུཏྟཾ • 4. Dhammaññūsuttaṃ




    Footnotes:
    1. སུཔརིཀྑིཏྟཾ (ཀ॰)
    2. suparikkhittaṃ (ka.)
    3. གམྦྷཱིརནེམི (ཀ॰)
    4. ཨསམྤཝེདྷི (སཱི॰ སྱཱ॰)
    5. gambhīranemi (ka.)
    6. asampavedhi (sī. syā.)
    7. ཛེཝནིཡཉྩ (སཱི॰ ཨཊྛ॰)
    8. jevaniyañca (sī. aṭṭha.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣. ནགརོཔམསུཏྟཝཎྞནཱ • 3. Nagaropamasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༣. ནགརོཔམསུཏྟཝཎྞནཱ • 3. Nagaropamasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact