| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. நக³ரோபமஸுத்தவண்ணனா
3. Nagaropamasuttavaṇṇanā
67. ததியே யதோதி யதா³. பச்சந்திமந்தி ரட்ட²பரியந்தே ரட்டா²வஸானே நிவிட்ட²ங். மஜ்ஜி²மதே³ஸனக³ரஸ்ஸ பன ரக்கா²கிச்சங் நத்தி², தேன தங் ந க³ஹிதங். நக³ரபரிக்கா²ரேஹி ஸுபரிக்க²தந்தி நக³ராலங்காரேஹி அலங்கதங். அகரணீயந்தி அகத்தப்³ப³ங் அஜினியங். க³ம்பீ⁴ரனேமாதி க³ம்பீ⁴ரஆவாடா. ஸுனிகா²தாதி ஸுட்டு² ஸன்னிஸீதா³பிதா. தங் பனேதங் ஏஸிகாத²ம்ப⁴ங் இட்ட²காஹி வா கரொந்தி ஸிலாஹி வா க²தி³ராதீ³ஹி வா ஸாரருக்கே²ஹி. தங் நக³ரகு³த்தத்தா²ய கரொந்தா ப³ஹினக³ரே கரொந்தி, அலங்காரத்தா²ய கரொந்தா அந்தோனக³ரே. தங் இட்ட²காமயங் கரொந்தா மஹந்தங் ஆவாடங் கத்வா சயங் சினித்வா உபரி அட்ட²ங்ஸங் கத்வா ஸுதா⁴ய லிம்பந்தி. யதா³ ஹத்தி²னா த³ந்தேஹி அபி⁴ஹதோ ந சலதி, ததா³ ஸுலித்தோ நாம ஹோதி. ஸிலாத²ம்பா⁴த³யோபி அட்ட²ங்ஸா ஏவ ஹொந்தி. தே ஸசே அட்ட² ரதனா ஹொந்தி, சதுரதனமத்தங் ஆவாடே பவிஸதி, சதுரதனமத்தங் உபரி ஹோதி. ஸோளஸரதனவீஸதிரதனேஸுபி ஏஸேவ நயோ. ஸப்³பே³ஸஞ்ஹி உபட்³ட⁴ங் ஹெட்டா² ஹோதி, உபட்³ட⁴ங் உபரி. தே கோ³முத்தவங்கா ஹொந்தி, தேன தேஸங் அந்தரே பத³ரமயங் கத்வா கம்மங் காதுங் ஸக்கா ஹோதி, தே பன கதசித்தகம்மா பக்³க³ஹிதத்³த⁴ஜாவ ஹொந்தி.
67. Tatiye yatoti yadā. Paccantimanti raṭṭhapariyante raṭṭhāvasāne niviṭṭhaṃ. Majjhimadesanagarassa pana rakkhākiccaṃ natthi, tena taṃ na gahitaṃ. Nagaraparikkhārehi suparikkhatanti nagarālaṅkārehi alaṅkataṃ. Akaraṇīyanti akattabbaṃ ajiniyaṃ. Gambhīranemāti gambhīraāvāṭā. Sunikhātāti suṭṭhu sannisīdāpitā. Taṃ panetaṃ esikāthambhaṃ iṭṭhakāhi vā karonti silāhi vā khadirādīhi vā sārarukkhehi. Taṃ nagaraguttatthāya karontā bahinagare karonti, alaṅkāratthāya karontā antonagare. Taṃ iṭṭhakāmayaṃ karontā mahantaṃ āvāṭaṃ katvā cayaṃ cinitvā upari aṭṭhaṃsaṃ katvā sudhāya limpanti. Yadā hatthinā dantehi abhihato na calati, tadā sulitto nāma hoti. Silāthambhādayopi aṭṭhaṃsā eva honti. Te sace aṭṭha ratanā honti, caturatanamattaṃ āvāṭe pavisati, caturatanamattaṃ upari hoti. Soḷasaratanavīsatiratanesupi eseva nayo. Sabbesañhi upaḍḍhaṃ heṭṭhā hoti, upaḍḍhaṃ upari. Te gomuttavaṅkā honti, tena tesaṃ antare padaramayaṃ katvā kammaṃ kātuṃ sakkā hoti, te pana katacittakammā paggahitaddhajāva honti.
பரிகா²தி பரிக்கி²பித்வா டி²தமாதிகா. அனுபரியாயபதோ²தி அந்தோ பாகாரஸ்ஸ பாகாரேன ஸத்³தி⁴ங் க³தோ மஹாபதோ², யத்த² டி²தா ப³ஹிபாகாரே டி²தேஹி ஸத்³தி⁴ங் யுஜ்ஜ²ந்தி. ஸலாகந்தி ஸரதோமராதி³னிஸ்ஸக்³கி³யாவுத⁴ங். ஜேவனிகந்தி ஏகதோதா⁴ராதி³ஸேஸாவுத⁴ங்.
Parikhāti parikkhipitvā ṭhitamātikā. Anupariyāyapathoti anto pākārassa pākārena saddhiṃ gato mahāpatho, yattha ṭhitā bahipākāre ṭhitehi saddhiṃ yujjhanti. Salākanti saratomarādinissaggiyāvudhaṃ. Jevanikanti ekatodhārādisesāvudhaṃ.
ஹத்தா²ரோஹாதி ஸப்³பே³பி ஹத்தி²ஆசரியஹத்தி²வேஜ்ஜஹத்தி²ப³ந்தா⁴த³யோ. அஸ்ஸாரோஹாதி ஸப்³பே³பி அஸ்ஸாசரியஅஸ்ஸவேஜ்ஜஅஸ்ஸப³ந்தா⁴த³யோ. ரதி²காதி ஸப்³பே³பி ரதா²சரியரத²யோத⁴ரத²ரக்கா²த³யோ. த⁴னுக்³க³ஹாதி இஸ்ஸாஸா. சேலகாதி யே யுத்³தே⁴ ஜயத்³த⁴ஜங் க³ஹெத்வா புரதோ க³ச்ச²ந்தி. சலகாதி ‘‘இத⁴ ரஞ்ஞோ டா²னங் ஹோது, இத⁴ அஸுகமஹாமத்தஸ்ஸா’’தி ஏவங் ஸேனாப்³யூஹகாரகா. பிண்ட³தா³யிகாதி ஸாஹஸிகமஹாயோதா⁴. தே கிர பரஸேனங் பவிஸித்வா பிண்ட³பிண்ட³மிவ செ²த்வா செ²த்வா த³யந்தி, உப்பதித்வா நிக்³க³ச்ச²ந்தீதி அத்தோ². யே வா ஸங்கா³மமஜ்ஜே² யோதா⁴னங் ப⁴த்தபானீயங் க³ஹெத்வா பவிஸந்தி, தேஸம்பேதங் நாமங். உக்³கா³ ராஜபுத்தாதி உக்³க³துக்³க³தா ஸங்கா³மாவசரா ராஜபுத்தா. பக்க²ந்தி³னோதி யே ‘‘கஸ்ஸ ஸீஸங் வா ஆவுத⁴ங் வா ஆஹராமா’’தி வத்வா ‘‘அஸுகஸ்ஸா’’தி வுத்தா ஸங்கா³மங் பக்க²ந்தி³த்வா ததே³வ ஆஹரந்தி, இமே பக்க²ந்த³ந்தீதி பக்க²ந்தி³னோ. மஹானாகா³ விய மஹானாகா³, ஹத்தி²ஆதீ³ஸுபி அபி⁴முக²ங் ஆக³ச்ச²ந்தேஸு அனிவத்தியயோதா⁴னங் ஏதங் அதி⁴வசனங். ஸூராதி ஏகஸூரா, யே ஸஜாலிகாபி ஸவம்மிகாபி ஸமுத்³த³ங் தரிதுங் ஸக்கொந்தி. சம்மயோதி⁴னோதி யே சம்மகஞ்சுகங் வா பவிஸித்வா ஸரபரித்தாணசம்மங் வா க³ஹெத்வா யுஜ்ஜ²ந்தி. தா³ஸகபுத்தாதி ப³லவஸினேஹா க⁴ரதா³ஸயோதா⁴ . தோ³வாரிகோதி த்³வாரபாலகோ. வாஸனலேபனஸம்பன்னோதி வாஸனேன ஸப்³ப³விவரபடிச்சா²த³னேன ஸுதா⁴லேபேன ஸம்பன்னோ. ப³ஹி வா கா²ணுபாகாரஸங்கா²தேன வாஸனேன க⁴னமட்டே²ன ச ஸுதா⁴லேபேன ஸம்பன்னோ புண்ணக⁴டபந்திங் த³ஸ்ஸெத்வா கதசித்தகம்மபக்³க³ஹிதத்³த⁴ஜோ. திணகட்டோ²த³கந்தி ஹத்தி²அஸ்ஸாதீ³னங் கா⁴ஸத்தா²ய கே³ஹானஞ்ச சா²த³னத்தா²ய ஆஹரித்வா ப³ஹூஸு டா²னேஸு ட²பிததிணஞ்ச, கே³ஹகரணபசனாதீ³னங் அத்தா²ய ஆஹரித்வா ட²பிதகட்ட²ஞ்ச, யந்தேஹி பவேஸெத்வா பொக்க²ரணீஸு ட²பிதஉத³கஞ்ச. ஸன்னிசிதங் ஹோதீதி படிகச்சேவ அனேகேஸு டா²னேஸு ஸுட்டு² நிசிதங் ஹோதி. அப்³ப⁴ந்தரானங் ரதியாதி அந்தோனக³ரவாஸீனங் ரதிஅத்தா²ய. அபரிதஸ்ஸாயாதி தாஸங் அனாபஜ்ஜனத்தா²ய. ஸாலியவகந்தி நானப்பகாரா ஸாலியோ சேவ யவா ச. திலமுக்³க³மாஸாபரண்ணந்தி திலமுக்³க³மாஸா ச ஸேஸாபரண்ணஞ்ச.
Hatthārohāti sabbepi hatthiācariyahatthivejjahatthibandhādayo. Assārohāti sabbepi assācariyaassavejjaassabandhādayo. Rathikāti sabbepi rathācariyarathayodharatharakkhādayo. Dhanuggahāti issāsā. Celakāti ye yuddhe jayaddhajaṃ gahetvā purato gacchanti. Calakāti ‘‘idha rañño ṭhānaṃ hotu, idha asukamahāmattassā’’ti evaṃ senābyūhakārakā. Piṇḍadāyikāti sāhasikamahāyodhā. Te kira parasenaṃ pavisitvā piṇḍapiṇḍamiva chetvā chetvā dayanti, uppatitvā niggacchantīti attho. Ye vā saṅgāmamajjhe yodhānaṃ bhattapānīyaṃ gahetvā pavisanti, tesampetaṃ nāmaṃ. Uggā rājaputtāti uggatuggatā saṅgāmāvacarā rājaputtā. Pakkhandinoti ye ‘‘kassa sīsaṃ vā āvudhaṃ vā āharāmā’’ti vatvā ‘‘asukassā’’ti vuttā saṅgāmaṃ pakkhanditvā tadeva āharanti, ime pakkhandantīti pakkhandino. Mahānāgā viya mahānāgā, hatthiādīsupi abhimukhaṃ āgacchantesu anivattiyayodhānaṃ etaṃ adhivacanaṃ. Sūrāti ekasūrā, ye sajālikāpi savammikāpi samuddaṃ tarituṃ sakkonti. Cammayodhinoti ye cammakañcukaṃ vā pavisitvā saraparittāṇacammaṃ vā gahetvā yujjhanti. Dāsakaputtāti balavasinehā gharadāsayodhā . Dovārikoti dvārapālako. Vāsanalepanasampannoti vāsanena sabbavivarapaṭicchādanena sudhālepena sampanno. Bahi vā khāṇupākārasaṅkhātena vāsanena ghanamaṭṭhena ca sudhālepena sampanno puṇṇaghaṭapantiṃ dassetvā katacittakammapaggahitaddhajo. Tiṇakaṭṭhodakanti hatthiassādīnaṃ ghāsatthāya gehānañca chādanatthāya āharitvā bahūsu ṭhānesu ṭhapitatiṇañca, gehakaraṇapacanādīnaṃ atthāya āharitvā ṭhapitakaṭṭhañca, yantehi pavesetvā pokkharaṇīsu ṭhapitaudakañca. Sannicitaṃ hotīti paṭikacceva anekesu ṭhānesu suṭṭhu nicitaṃ hoti. Abbhantarānaṃ ratiyāti antonagaravāsīnaṃ ratiatthāya. Aparitassāyāti tāsaṃ anāpajjanatthāya. Sāliyavakanti nānappakārā sāliyo ceva yavā ca. Tilamuggamāsāparaṇṇanti tilamuggamāsā ca sesāparaṇṇañca.
இதா³னி யஸ்மா ததா²க³தஸ்ஸ நக³ரே கம்மங் நாம நத்தி² , நக³ரஸதி³ஸங் பன அரியஸாவகங், நக³ரபரிக்கா²ரஸதி³ஸே ச ஸத்த த⁴ம்மே, சதுஆஹாரஸதி³ஸானி ச சத்தாரி ஜா²னானி த³ஸ்ஸெத்வா ஏகாத³ஸஸு டா²னேஸு அரஹத்தங் பக்கி²பித்வா தே³ஸனங் வினிவட்டெஸ்ஸாமீதி அயங் உபமா ஆப⁴தா. தஸ்மா தங் தே³ஸனங் பகாஸேதுங் இத³ங் ஏவமேவ கோ²திஆதி³ ஆரத்³த⁴ங். தத்த² ஸத்³த⁴ம்மேஹீதி ஸுத⁴ம்மேஹி. ஸத்³தோ⁴தி ஓகப்பனஸத்³தா⁴ய சேவ பச்சக்க²ஸத்³தா⁴ய ச ஸமன்னாக³தோ. தத்த² தா³னஸீலாதீ³னங் ப²லங் ஸத்³த³ஹித்வா தா³னாதி³புஞ்ஞகரணே ஸத்³தா⁴ ஓகப்பனஸத்³தா⁴ நாம. மக்³கே³ன ஆக³தஸத்³தா⁴ பச்சக்க²ஸத்³தா⁴ நாம. பஸாத³ஸத்³தா⁴திபி ஏஸா ஏவ. தஸ்ஸா லக்க²ணாதீ³ஹி விபா⁴கோ³ வேதி³தப்³போ³.
Idāni yasmā tathāgatassa nagare kammaṃ nāma natthi , nagarasadisaṃ pana ariyasāvakaṃ, nagaraparikkhārasadise ca satta dhamme, catuāhārasadisāni ca cattāri jhānāni dassetvā ekādasasu ṭhānesu arahattaṃ pakkhipitvā desanaṃ vinivaṭṭessāmīti ayaṃ upamā ābhatā. Tasmā taṃ desanaṃ pakāsetuṃ idaṃ evameva khotiādi āraddhaṃ. Tattha saddhammehīti sudhammehi. Saddhoti okappanasaddhāya ceva paccakkhasaddhāya ca samannāgato. Tattha dānasīlādīnaṃ phalaṃ saddahitvā dānādipuññakaraṇe saddhā okappanasaddhā nāma. Maggena āgatasaddhā paccakkhasaddhā nāma. Pasādasaddhātipi esā eva. Tassā lakkhaṇādīhi vibhāgo veditabbo.
‘‘ஸம்பக்க²ந்த³னலக்க²ணா ச, மஹாராஜ, ஸத்³தா⁴ ஸம்பஸாத³னலக்க²ணா சா’’தி (மி॰ ப॰ 2.1.10) ஹி வசனதோ இத³ங் ஸத்³தா⁴ய லக்க²ணங் நாம. ‘‘தீஹி, பி⁴க்க²வே, டா²னேஹி ஸத்³தோ⁴ பஸன்னோ வேதி³தப்³போ³. கதமேஹி தீஹி? ஸீலவந்தானங் த³ஸ்ஸனகாமோ ஹோதீ’’திஆதி³னா (அ॰ நி॰ 3.42) நயேன வுத்தங் பன ஸத்³தா⁴ய நிமித்தங் நாம. ‘‘கோ சாஹாரோ ஸத்³தா⁴ய, ஸத்³த⁴ம்மஸ்ஸவனந்திஸ்ஸ வசனீய’’ந்தி (அ॰ நி॰ 10.61) அயங் பனஸ்ஸா ஆஹாரோ நாம. ‘‘ஸத்³தா⁴பப்³ப³ஜிதஸ்ஸ, பி⁴க்க²வே, பி⁴க்கு²னோ அயங் அனுத⁴ம்மோ ஹோதி, யங் ரூபே நிப்³பி³தா³ப³ஹுலோ விஹரிஸ்ஸதீ’’தி அயமஸ்ஸ அனுத⁴ம்மோ நாம. ‘‘ஸத்³தா⁴ ப³ந்த⁴தி பாதெ²ய்யங், ஸிரீ போ⁴கா³னமாஸயோ’’ (ஸங்॰ நி॰ 1.79). ‘‘ஸத்³தா⁴ து³தியா புரிஸஸ்ஸ ஹோதி’’ (ஸங்॰ நி॰ 1.36). ‘‘ஸத்³தா⁴ய தரதி ஓக⁴ங்’’ (ஸங்॰ நி॰ 1.246). ‘‘ஸத்³தா⁴ பீ³ஜங் தபோ வுட்டி²’’ (ஸு॰ நி॰ 77; ஸங்॰ நி॰ 1.197). ‘‘ஸத்³தா⁴ஹத்தோ² மஹானாகோ³. உபேகா²ஸேதத³ந்தவா’’திஆதீ³ஸு பன ஸுத்தேஸு ஏதிஸ்ஸா ப³த்³த⁴ப⁴த்தபுடாதி³ஸரிக்க²தாய அனேகஸரஸதா ப⁴க³வதா பகாஸிதா. இமஸ்மிங் பன நக³ரோபமஸுத்தந்தே ஏஸா அசலஸுப்பதிட்டி²ததாய ஏஸிகாத²ம்ப⁴ஸதி³ஸா கத்வா த³ஸ்ஸிதா.
‘‘Sampakkhandanalakkhaṇā ca, mahārāja, saddhā sampasādanalakkhaṇā cā’’ti (mi. pa. 2.1.10) hi vacanato idaṃ saddhāya lakkhaṇaṃ nāma. ‘‘Tīhi, bhikkhave, ṭhānehi saddho pasanno veditabbo. Katamehi tīhi? Sīlavantānaṃ dassanakāmo hotī’’tiādinā (a. ni. 3.42) nayena vuttaṃ pana saddhāya nimittaṃ nāma. ‘‘Ko cāhāro saddhāya, saddhammassavanantissa vacanīya’’nti (a. ni. 10.61) ayaṃ panassā āhāro nāma. ‘‘Saddhāpabbajitassa, bhikkhave, bhikkhuno ayaṃ anudhammo hoti, yaṃ rūpe nibbidābahulo viharissatī’’ti ayamassa anudhammo nāma. ‘‘Saddhā bandhati pātheyyaṃ, sirī bhogānamāsayo’’ (saṃ. ni. 1.79). ‘‘Saddhā dutiyā purisassa hoti’’ (saṃ. ni. 1.36). ‘‘Saddhāya tarati oghaṃ’’ (saṃ. ni. 1.246). ‘‘Saddhā bījaṃ tapo vuṭṭhi’’ (su. ni. 77; saṃ. ni. 1.197). ‘‘Saddhāhattho mahānāgo. Upekhāsetadantavā’’tiādīsu pana suttesu etissā baddhabhattapuṭādisarikkhatāya anekasarasatā bhagavatā pakāsitā. Imasmiṃ pana nagaropamasuttante esā acalasuppatiṭṭhitatāya esikāthambhasadisā katvā dassitā.
ஸத்³தே⁴ஸிகோதி ஸத்³த⁴ங் ஏஸிகாத²ம்ப⁴ங் கத்வா அரியஸாவகோ அகுஸலங் பஜஹதீதி இமினா நயேன ஸப்³ப³பதே³ஸு யோஜனா காதப்³பா³. அபிசெத்த² ஹிரொத்தப்பேஹி தீஸு த்³வாரேஸு ஸங்வரோ ஸம்பஜ்ஜதி, ஸோ சதுபாரிஸுத்³தி⁴ஸீலங் ஹோதி . இதி இமஸ்மிங் ஸுத்தே ஏகாத³ஸஸு டா²னேஸு அரஹத்தங் பக்கி²பித்வா தே³ஸனாய கூடங் க³ஹிதந்தி வேதி³தப்³ப³ங்.
Saddhesikoti saddhaṃ esikāthambhaṃ katvā ariyasāvako akusalaṃ pajahatīti iminā nayena sabbapadesu yojanā kātabbā. Apicettha hirottappehi tīsu dvāresu saṃvaro sampajjati, so catupārisuddhisīlaṃ hoti . Iti imasmiṃ sutte ekādasasu ṭhānesu arahattaṃ pakkhipitvā desanāya kūṭaṃ gahitanti veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. நக³ரோபமஸுத்தங் • 3. Nagaropamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. நக³ரோபமஸுத்தவண்ணனா • 3. Nagaropamasuttavaṇṇanā
