| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৮. নাগসমালৰগ্গো
8. Nāgasamālavaggo
১. নাগসমালত্থেরঅপদানৰণ্ণনা
1. Nāgasamālattheraapadānavaṇṇanā
আপাটলিং অহং পুপ্ফন্তিআদিকং আযস্মতো নাগসমালত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা তথারূপসজ্জনসংসগ্গস্স অলাভেন সত্থরি ধরমানকালে দস্সনসৰনপূজাকম্মমকরিত্ৰা পরিনিব্বুতকালে তস্স ভগৰতো সারীরিকধাতুং নিদহিত্ৰা কতচেতিযম্হি চিত্তং পসাদেত্ৰা পাটলিপুপ্ফং পূজেত্ৰা সোমনস্সং উপ্পাদেত্ৰা যাৰতাযুকং ঠত্ৰা তেনেৰ সোমনস্সেন ততো কালং কতো তুসিতাদীসু ছসু দেৰলোকেসু সুখমনুভৰিত্ৰা অপরভাগে মনুস্সেসু মনুস্সসম্পত্তিং অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো নাগরুক্খপল্লৰকোমল়সদিসসরীরত্তা নাগসমালোতি মাতাপিতূহি কতনামধেয্যো ভগৰতি পসন্নো পব্বজিত্ৰা নচিরস্সেৰ অরহা অহোসি।
Āpāṭaliṃahaṃ pupphantiādikaṃ āyasmato nāgasamālattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā tathārūpasajjanasaṃsaggassa alābhena satthari dharamānakāle dassanasavanapūjākammamakaritvā parinibbutakāle tassa bhagavato sārīrikadhātuṃ nidahitvā katacetiyamhi cittaṃ pasādetvā pāṭalipupphaṃ pūjetvā somanassaṃ uppādetvā yāvatāyukaṃ ṭhatvā teneva somanassena tato kālaṃ kato tusitādīsu chasu devalokesu sukhamanubhavitvā aparabhāge manussesu manussasampattiṃ anubhavitvā imasmiṃ buddhuppāde kulagehe nibbatto viññutaṃ patto nāgarukkhapallavakomaḷasadisasarīrattā nāgasamāloti mātāpitūhi katanāmadheyyo bhagavati pasanno pabbajitvā nacirasseva arahā ahosi.
১. সো পচ্ছা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো আপাটলিং অহং পুপ্ফন্তিআদিমাহ। তত্থ আপাটলিন্তি আ সমন্ততো, আদরেন ৰা পাটলিপুপ্ফং গহেত্ৰা অহং থূপম্হি অভিরোপেসিং পূজেসিন্তি অত্থো। উজ্ঝিতং সুমহাপথেতি সব্বনগরৰাসীনং ৰন্দনপূজনত্থায মহাপথে নগরমজ্ঝে ৰীথিযং উজ্ঝিতং উট্ঠাপিতং, ইট্ঠককম্মসুধাকম্মাদীহি নিপ্ফাদিতন্তি অত্থো। সেসং হেট্ঠা ৰুত্তনযত্তা উত্তানত্থত্তা চ সুৰিঞ্ঞেয্যমেৰাতি।
1. So pacchā attano pubbakammaṃ saritvā somanassajāto pubbacaritāpadānaṃ pakāsento āpāṭaliṃ ahaṃ pupphantiādimāha. Tattha āpāṭalinti ā samantato, ādarena vā pāṭalipupphaṃ gahetvā ahaṃ thūpamhi abhiropesiṃ pūjesinti attho. Ujjhitaṃ sumahāpatheti sabbanagaravāsīnaṃ vandanapūjanatthāya mahāpathe nagaramajjhe vīthiyaṃ ujjhitaṃ uṭṭhāpitaṃ, iṭṭhakakammasudhākammādīhi nipphāditanti attho. Sesaṃ heṭṭhā vuttanayattā uttānatthattā ca suviññeyyamevāti.
নাগসমালত্থেরঅপদানৰণ্ণনা সমত্তা।
Nāgasamālattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. নাগসমালত্থেরঅপদানং • 1. Nāgasamālattheraapadānaṃ
