| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
8. නාගසමාලවග්‌ගො
8. Nāgasamālavaggo
1. නාගසමාලත්‌ථෙරඅපදානවණ්‌ණනා
1. Nāgasamālattheraapadānavaṇṇanā
ආපාටලිං අහං පුප්‌ඵන්‌තිආදිකං ආයස්‌මතො නාගසමාලත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිඛිස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො ඝරාවාසං සණ්‌ඨපෙත්‌වා තථාරූපසජ්‌ජනසංසග්‌ගස්‌ස අලාභෙන සත්‌ථරි ධරමානකාලෙ දස්‌සනසවනපූජාකම්‌මමකරිත්‌වා පරිනිබ්‌බුතකාලෙ තස්‌ස භගවතො සාරීරිකධාතුං නිදහිත්‌වා කතචෙතියම්‌හි චිත්‌තං පසාදෙත්‌වා පාටලිපුප්‌ඵං පූජෙත්‌වා සොමනස්‌සං උප්‌පාදෙත්‌වා යාවතායුකං ඨත්‌වා තෙනෙව සොමනස්‌සෙන තතො කාලං කතො තුසිතාදීසු ඡසු දෙවලොකෙසු සුඛමනුභවිත්‌වා අපරභාගෙ මනුස්‌සෙසු මනුස්‌සසම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො නාගරුක්‌ඛපල්‌ලවකොමළසදිසසරීරත්‌තා නාගසමාලොති මාතාපිතූහි කතනාමධෙය්‍යො භගවති පසන්‌නො පබ්‌බජිත්‌වා නචිරස්‌සෙව අරහා අහොසි.
Āpāṭaliṃahaṃ pupphantiādikaṃ āyasmato nāgasamālattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā tathārūpasajjanasaṃsaggassa alābhena satthari dharamānakāle dassanasavanapūjākammamakaritvā parinibbutakāle tassa bhagavato sārīrikadhātuṃ nidahitvā katacetiyamhi cittaṃ pasādetvā pāṭalipupphaṃ pūjetvā somanassaṃ uppādetvā yāvatāyukaṃ ṭhatvā teneva somanassena tato kālaṃ kato tusitādīsu chasu devalokesu sukhamanubhavitvā aparabhāge manussesu manussasampattiṃ anubhavitvā imasmiṃ buddhuppāde kulagehe nibbatto viññutaṃ patto nāgarukkhapallavakomaḷasadisasarīrattā nāgasamāloti mātāpitūhi katanāmadheyyo bhagavati pasanno pabbajitvā nacirasseva arahā ahosi.
1. සො පච්‌ඡා අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො ආපාටලිං අහං පුප්‌ඵන්‌තිආදිමාහ. තත්‌ථ ආපාටලින්‌ති ආ සමන්‌තතො, ආදරෙන වා පාටලිපුප්‌ඵං ගහෙත්‌වා අහං ථූපම්‌හි අභිරොපෙසිං පූජෙසින්‌ති අත්‌ථො. උජ්‌ඣිතං සුමහාපථෙති සබ්‌බනගරවාසීනං වන්‌දනපූජනත්‌ථාය මහාපථෙ නගරමජ්‌ඣෙ වීථියං උජ්‌ඣිතං උට්‌ඨාපිතං, ඉට්‌ඨකකම්‌මසුධාකම්‌මාදීහි නිප්‌ඵාදිතන්‌ති අත්‌ථො. සෙසං හෙට්‌ඨා වුත්‌තනයත්‌තා උත්‌තානත්‌ථත්‌තා ච සුවිඤ්‌ඤෙය්‍යමෙවාති.
1. So pacchā attano pubbakammaṃ saritvā somanassajāto pubbacaritāpadānaṃ pakāsento āpāṭaliṃ ahaṃ pupphantiādimāha. Tattha āpāṭalinti ā samantato, ādarena vā pāṭalipupphaṃ gahetvā ahaṃ thūpamhi abhiropesiṃ pūjesinti attho. Ujjhitaṃ sumahāpatheti sabbanagaravāsīnaṃ vandanapūjanatthāya mahāpathe nagaramajjhe vīthiyaṃ ujjhitaṃ uṭṭhāpitaṃ, iṭṭhakakammasudhākammādīhi nipphāditanti attho. Sesaṃ heṭṭhā vuttanayattā uttānatthattā ca suviññeyyamevāti.
නාගසමාලත්‌ථෙරඅපදානවණ්‌ණනා සමත්‌තා.
Nāgasamālattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. නාගසමාලත්‌ථෙරඅපදානං • 1. Nāgasamālattheraapadānaṃ
