| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
२. नागसेनपञ्हो
2. Nāgasenapañho
२. थेरो आह ‘‘लोणं, महाराज, चक्खुविञ्ञेय्य’’न्ति। ‘‘आम, भन्ते, चक्खुविञ्ञेय्य’’न्ति। ‘‘सुट्ठु खो, महाराज, जानाही’’ति। ‘‘किं पन, भन्ते, जिव्हाविञ्ञेय्य’’न्ति? ‘‘आम, महाराज, जिव्हाविञ्ञेय्य’’न्ति। ‘‘किं पन, भन्ते, सब्बं लोणं जिव्हाय विजानाती’’ति? ‘‘आम, महाराज, सब्बं लोणं जिव्हाय विजानाति’’।
2. Thero āha ‘‘loṇaṃ, mahārāja, cakkhuviññeyya’’nti. ‘‘Āma, bhante, cakkhuviññeyya’’nti. ‘‘Suṭṭhu kho, mahārāja, jānāhī’’ti. ‘‘Kiṃ pana, bhante, jivhāviññeyya’’nti? ‘‘Āma, mahārāja, jivhāviññeyya’’nti. ‘‘Kiṃ pana, bhante, sabbaṃ loṇaṃ jivhāya vijānātī’’ti? ‘‘Āma, mahārāja, sabbaṃ loṇaṃ jivhāya vijānāti’’.
‘‘यदि, भन्ते, सब्बं लोणं जिव्हाय विजानाति, किस्स पन तं सकटेहि बलीबद्दा 1 आहरन्ति, ननु लोणमेव आहरितब्ब’’न्ति? ‘‘न सक्का, महाराज, लोणमेव आहरितुं एकतोभावगता एते धम्मा गोचरनानत्तगता लोणं गरुभावो चाति। सक्का पन, महाराज, लोणं तुलाय तुलयितु’’न्ति? ‘‘आम, भन्ते, सक्का’’ति। ‘‘न सक्का, महाराज, लोणं तुलाय तुलयितुं, गरुभावो तुलाय तुलियती’’ति।
‘‘Yadi, bhante, sabbaṃ loṇaṃ jivhāya vijānāti, kissa pana taṃ sakaṭehi balībaddā 2 āharanti, nanu loṇameva āharitabba’’nti? ‘‘Na sakkā, mahārāja, loṇameva āharituṃ ekatobhāvagatā ete dhammā gocaranānattagatā loṇaṃ garubhāvo cāti. Sakkā pana, mahārāja, loṇaṃ tulāya tulayitu’’nti? ‘‘Āma, bhante, sakkā’’ti. ‘‘Na sakkā, mahārāja, loṇaṃ tulāya tulayituṃ, garubhāvo tulāya tuliyatī’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
नागसेनपञ्हो दुतियो।
Nāgasenapañho dutiyo.
Footnotes:
