| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. நாக³ஸுத்தங்
9. Nāgasuttaṃ
231. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ நவோ பி⁴க்கு² அதிவேலங் குலானி உபஸங்கமதி. தமேனங் பி⁴க்கூ² ஏவமாஹங்ஸு – ‘‘மாயஸ்மா அதிவேலங் குலானி உபஸங்கமீ’’தி. ஸோ பி⁴க்கு² பி⁴க்கூ²ஹி வுச்சமானோ ஏவமாஹ – ‘‘இமே ஹி நாம தே²ரா பி⁴க்கூ² குலானி உபஸங்கமிதப்³ப³ங் மஞ்ஞிஸ்ஸந்தி, கிமங்க³ங் 1 பனாஹ’’ந்தி?
231. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro navo bhikkhu ativelaṃ kulāni upasaṅkamati. Tamenaṃ bhikkhū evamāhaṃsu – ‘‘māyasmā ativelaṃ kulāni upasaṅkamī’’ti. So bhikkhu bhikkhūhi vuccamāno evamāha – ‘‘ime hi nāma therā bhikkhū kulāni upasaṅkamitabbaṃ maññissanti, kimaṅgaṃ 2 panāha’’nti?
அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘இத⁴, ப⁴ந்தே, அஞ்ஞதரோ நவோ பி⁴க்கு² அதிவேலங் குலானி உபஸங்கமதி. தமேனங் பி⁴க்கூ² ஏவமாஹங்ஸு – ‘மாயஸ்மா அதிவேலங் குலானி உபஸங்கமீ’தி. ஸோ பி⁴க்கு² பி⁴க்கூ²ஹி வுச்சமானோ ஏவமாஹ – ‘இமே ஹி நாம தே²ரா பி⁴க்கூ² குலானி உபஸங்கமிதப்³ப³ங் மஞ்ஞிஸ்ஸந்தி, கிமங்க³ங் பனாஹ’’’ந்தி.
Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, aññataro navo bhikkhu ativelaṃ kulāni upasaṅkamati. Tamenaṃ bhikkhū evamāhaṃsu – ‘māyasmā ativelaṃ kulāni upasaṅkamī’ti. So bhikkhu bhikkhūhi vuccamāno evamāha – ‘ime hi nāma therā bhikkhū kulāni upasaṅkamitabbaṃ maññissanti, kimaṅgaṃ panāha’’’nti.
‘‘பூ⁴தபுப்³ப³ங் , பி⁴க்க²வே, அரஞ்ஞாயதனே மஹாஸரஸீ. தங் நாகா³ உபனிஸ்ஸாய விஹரந்தி. தே தங் ஸரஸிங் ஓகா³ஹெத்வா ஸொண்டா³ய பி⁴ஸமுளாலங் அப்³பு³ஹெத்வா 3 ஸுவிக்கா²லிதங் விக்கா²லெத்வா அகத்³த³மங் ஸங்கா²தி³த்வா 4 அஜ்ஜோ²ஹரந்தி. தேஸங் தங் வண்ணாய சேவ ஹோதி ப³லாய ச, ந ச ததோனிதா³னங் மரணங் வா நிக³ச்ச²ந்தி மரணமத்தங் வா து³க்க²ங். தேஸங்யேவ கோ² பன, பி⁴க்க²வே, மஹானாகா³னங் அனுஸிக்க²மானா தருணா பி⁴ங்கச்சா²பா தங் ஸரஸிங் ஓகா³ஹெத்வா ஸொண்டா³ய பி⁴ஸமுளாலங் அப்³பு³ஹெத்வா ந ஸுவிக்கா²லிதங் விக்கா²லெத்வா ஸகத்³த³மங் அஸங்கா²தி³த்வா அஜ்ஜோ²ஹரந்தி. தேஸங் தங் நேவ வண்ணாய ஹோதி ந ப³லாய. ததோனிதா³னங் மரணங் வா நிக³ச்ச²ந்தி மரணமத்தங் வா து³க்க²ங்.
‘‘Bhūtapubbaṃ , bhikkhave, araññāyatane mahāsarasī. Taṃ nāgā upanissāya viharanti. Te taṃ sarasiṃ ogāhetvā soṇḍāya bhisamuḷālaṃ abbuhetvā 5 suvikkhālitaṃ vikkhāletvā akaddamaṃ saṅkhāditvā 6 ajjhoharanti. Tesaṃ taṃ vaṇṇāya ceva hoti balāya ca, na ca tatonidānaṃ maraṇaṃ vā nigacchanti maraṇamattaṃ vā dukkhaṃ. Tesaṃyeva kho pana, bhikkhave, mahānāgānaṃ anusikkhamānā taruṇā bhiṅkacchāpā taṃ sarasiṃ ogāhetvā soṇḍāya bhisamuḷālaṃ abbuhetvā na suvikkhālitaṃ vikkhāletvā sakaddamaṃ asaṅkhāditvā ajjhoharanti. Tesaṃ taṃ neva vaṇṇāya hoti na balāya. Tatonidānaṃ maraṇaṃ vā nigacchanti maraṇamattaṃ vā dukkhaṃ.
‘‘ஏவமேவ கோ², பி⁴க்க²வே, இத⁴ தே²ரா பி⁴க்கூ² புப்³ப³ண்ஹஸமயங் நிவாஸெத்வா பத்தசீவரமாதா³ய கா³மங் வா நிக³மங் வா பிண்டா³ய பவிஸந்தி. தே தத்த² த⁴ம்மங் பா⁴ஸந்தி. தேஸங் கி³ஹீ பஸன்னாகாரங் கரொந்தி. தே தங் லாப⁴ங் அக³தி⁴தா அமுச்சி²தா அனஜ்ஜோ²பன்னா 7 ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜந்தி. தேஸங் தங் வண்ணாய சேவ ஹோதி ப³லாய ச, ந ச ததோனிதா³னங் மரணங் வா நிக³ச்ச²ந்தி மரணமத்தங் வா து³க்க²ங். தேஸங்யேவ கோ² பன, பி⁴க்க²வே, தே²ரானங் பி⁴க்கூ²னங் அனுஸிக்க²மானா நவா பி⁴க்கூ² புப்³ப³ண்ஹஸமயங் நிவாஸெத்வா பத்தசீவரமாதா³ய கா³மங் வா நிக³மங் வா பிண்டா³ய பவிஸந்தி. தே தத்த² த⁴ம்மங் பா⁴ஸந்தி. தேஸங் கி³ஹீ பஸன்னாகாரங் கரொந்தி. தே தங் லாப⁴ங் க³தி⁴தா முச்சி²தா அஜ்ஜோ²பன்னா அனாதீ³னவத³ஸ்ஸாவினோ அனிஸ்ஸரணபஞ்ஞா பரிபு⁴ஞ்ஜந்தி. தேஸங் தங் நேவ வண்ணாய ஹோதி ந ப³லாய, தே ததோனிதா³னங் மரணங் வா நிக³ச்ச²ந்தி மரணமத்தங் வா து³க்க²ங். தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘அக³தி⁴தா அமுச்சி²தா அனஜ்ஜோ²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா தங் லாப⁴ங் பரிபு⁴ஞ்ஜிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி . நவமங்.
‘‘Evameva kho, bhikkhave, idha therā bhikkhū pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisanti. Te tattha dhammaṃ bhāsanti. Tesaṃ gihī pasannākāraṃ karonti. Te taṃ lābhaṃ agadhitā amucchitā anajjhopannā 8 ādīnavadassāvino nissaraṇapaññā paribhuñjanti. Tesaṃ taṃ vaṇṇāya ceva hoti balāya ca, na ca tatonidānaṃ maraṇaṃ vā nigacchanti maraṇamattaṃ vā dukkhaṃ. Tesaṃyeva kho pana, bhikkhave, therānaṃ bhikkhūnaṃ anusikkhamānā navā bhikkhū pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisanti. Te tattha dhammaṃ bhāsanti. Tesaṃ gihī pasannākāraṃ karonti. Te taṃ lābhaṃ gadhitā mucchitā ajjhopannā anādīnavadassāvino anissaraṇapaññā paribhuñjanti. Tesaṃ taṃ neva vaṇṇāya hoti na balāya, te tatonidānaṃ maraṇaṃ vā nigacchanti maraṇamattaṃ vā dukkhaṃ. Tasmātiha, bhikkhave, evaṃ sikkhitabbaṃ – ‘agadhitā amucchitā anajjhopannā ādīnavadassāvino nissaraṇapaññā taṃ lābhaṃ paribhuñjissāmā’ti. Evañhi vo, bhikkhave, sikkhitabba’’nti . Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. நாக³ஸுத்தவண்ணனா • 9. Nāgasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. நாக³ஸுத்தவண்ணனா • 9. Nāgasuttavaṇṇanā
