| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа • Aṅguttaranikāya |
9. нааг̇асуд̇д̇ам̣
9. Nāgasuttaṃ
40. ‘‘яасмим̣ , бхигкавз, самаяз ааран̃н̃игасса нааг̇асса г̇ожарабасуд̇асса хад̇т̇ийби хад̇т̇инияоби хад̇т̇игалабхааби хад̇т̇ижчаабааби бурад̇о бурад̇о г̇анд̇ваа д̇ин̣аг̇г̇аани чинд̣̇анд̇и, д̇зна, бхигкавз, ааран̃н̃иго нааг̇о аддийяад̇и харааяад̇и ж̇иг̇ужчад̇и. яасмим̣, бхигкавз, самаяз ааран̃н̃игасса нааг̇асса г̇ожарабасуд̇асса хад̇т̇ийби хад̇т̇инияоби хад̇т̇игалабхааби хад̇т̇ижчаабааби обхаг̇г̇обхаг̇г̇ам̣ саакаабхан̇г̇ам̣ каад̣̇анд̇и, д̇зна, бхигкавз, ааран̃н̃иго нааг̇о аддийяад̇и харааяад̇и ж̇иг̇ужчад̇и. яасмим̣ , бхигкавз, самаяз ааран̃н̃игасса нааг̇асса ог̇аахам̣ од̇ин̣н̣асса хад̇т̇ийби хад̇т̇инияоби хад̇т̇игалабхааби хад̇т̇ижчаабааби бурад̇о бурад̇о г̇анд̇ваа сон̣д̣ааяа уд̣̇агам̣ аалол̣знд̇и, д̇зна, бхигкавз, ааран̃н̃иго нааг̇о аддийяад̇и харааяад̇и ж̇иг̇ужчад̇и. яасмим̣, бхигкавз, самаяз ааран̃н̃игасса нааг̇асса ог̇аахаа уд̇д̇ин̣н̣асса хад̇т̇инияо гааяам̣ убанигхам̣санд̇ияо г̇ажчанд̇и, д̇зна, бхигкавз, ааран̃н̃иго нааг̇о аддийяад̇и харааяад̇и ж̇иг̇ужчад̇и.
40. ‘‘Yasmiṃ , bhikkhave, samaye āraññikassa nāgassa gocarapasutassa hatthīpi hatthiniyopi hatthikalabhāpi hatthicchāpāpi purato purato gantvā tiṇaggāni chindanti, tena, bhikkhave, āraññiko nāgo aṭṭīyati harāyati jigucchati. Yasmiṃ, bhikkhave, samaye āraññikassa nāgassa gocarapasutassa hatthīpi hatthiniyopi hatthikalabhāpi hatthicchāpāpi obhaggobhaggaṃ sākhābhaṅgaṃ khādanti, tena, bhikkhave, āraññiko nāgo aṭṭīyati harāyati jigucchati. Yasmiṃ , bhikkhave, samaye āraññikassa nāgassa ogāhaṃ otiṇṇassa hatthīpi hatthiniyopi hatthikalabhāpi hatthicchāpāpi purato purato gantvā soṇḍāya udakaṃ āloḷenti, tena, bhikkhave, āraññiko nāgo aṭṭīyati harāyati jigucchati. Yasmiṃ, bhikkhave, samaye āraññikassa nāgassa ogāhā uttiṇṇassa hatthiniyo kāyaṃ upanighaṃsantiyo gacchanti, tena, bhikkhave, āraññiko nāgo aṭṭīyati harāyati jigucchati.
‘‘д̇асмим̣, бхигкавз, самаяз ааран̃н̃игасса нааг̇асса звам̣ ход̇и – ‘ахам̣ ко зд̇арахи аагин̣н̣о вихараами хад̇т̇ийхи хад̇т̇инийхи хад̇т̇игалабхзхи хад̇т̇ижчаабзхи . чиннаг̇г̇аани жзва д̇ин̣аани каад̣̇аами, обхаг̇г̇обхаг̇г̇ан̃жа мз саакаабхан̇г̇ам̣ каад̣̇анд̇и 1, аавилаани жа баанийяаани биваами, ог̇аахаа жа 2 мз уд̇д̇ин̣н̣асса хад̇т̇инияо гааяам̣ убанигхам̣санд̇ияо г̇ажчанд̇и. яам̣нуунаахам̣ зго г̇ан̣асмаа вуубагадто вихарзяяа’нд̇и. со абарзна самаязна зго г̇ан̣асмаа вуубагадто вихарад̇и, ажчиннаг̇г̇аани жзва д̇ин̣аани каад̣̇ад̇и, обхаг̇г̇обхаг̇г̇ан̃жасса саакаабхан̇г̇ам̣ на каад̣̇анд̇и 3, анаавилаани жа баанийяаани бивад̇и, ог̇аахаа жасса уд̇д̇ин̣н̣асса на хад̇т̇инияо гааяам̣ убанигхам̣санд̇ияо г̇ажчанд̇и.
‘‘Tasmiṃ, bhikkhave, samaye āraññikassa nāgassa evaṃ hoti – ‘ahaṃ kho etarahi ākiṇṇo viharāmi hatthīhi hatthinīhi hatthikalabhehi hatthicchāpehi . Chinnaggāni ceva tiṇāni khādāmi, obhaggobhaggañca me sākhābhaṅgaṃ khādanti 4, āvilāni ca pānīyāni pivāmi, ogāhā ca 5 me uttiṇṇassa hatthiniyo kāyaṃ upanighaṃsantiyo gacchanti. Yaṃnūnāhaṃ eko gaṇasmā vūpakaṭṭho vihareyya’nti. So aparena samayena eko gaṇasmā vūpakaṭṭho viharati, acchinnaggāni ceva tiṇāni khādati, obhaggobhaggañcassa sākhābhaṅgaṃ na khādanti 6, anāvilāni ca pānīyāni pivati, ogāhā cassa uttiṇṇassa na hatthiniyo kāyaṃ upanighaṃsantiyo gacchanti.
‘‘д̇асмим̣, бхигкавз, самаяз ааран̃н̃игасса нааг̇асса звам̣ ход̇и – ‘ахам̣ ко буб̣б̣з аагин̣н̣о вихаасим̣ хад̇т̇ийхи хад̇т̇инийхи хад̇т̇игалабхзхи хад̇т̇ижчаабзхи, чиннаг̇г̇аани жзва д̇ин̣аани каад̣̇им̣, обхаг̇г̇обхаг̇г̇ан̃жа мз саакаабхан̇г̇ам̣ каад̣̇им̣су, аавилаани жа баанийяаани абааяим̣, ог̇аахаа 7 жа мз уд̇д̇ин̣н̣асса хад̇т̇инияо гааяам̣ убанигхам̣санд̇ияо аг̇амам̣су. сохам̣ зд̇арахи зго г̇ан̣асмаа вуубагадто вихараами, ажчиннаг̇г̇аани жзва д̇ин̣аани каад̣̇аами, обхаг̇г̇обхаг̇г̇ан̃жа мз саакаабхан̇г̇ам̣ на каад̣̇анд̇и, анаавилаани жа баанийяаани биваами, ог̇аахаа жа мз уд̇д̇ин̣н̣асса на хад̇т̇инияо гааяам̣ убанигхам̣санд̇ияо г̇ажчанд̇ий’д̇и. со сон̣д̣ааяа саакаабхан̇г̇ам̣ бхан̃ж̇ид̇ваа саакаабхан̇г̇зна гааяам̣ баримаж̇ж̇ид̇ваа ад̇д̇амано сон̣д̣ам̣ сам̣харад̇и 8,.
‘‘Tasmiṃ, bhikkhave, samaye āraññikassa nāgassa evaṃ hoti – ‘ahaṃ kho pubbe ākiṇṇo vihāsiṃ hatthīhi hatthinīhi hatthikalabhehi hatthicchāpehi, chinnaggāni ceva tiṇāni khādiṃ, obhaggobhaggañca me sākhābhaṅgaṃ khādiṃsu, āvilāni ca pānīyāni apāyiṃ, ogāhā 9 ca me uttiṇṇassa hatthiniyo kāyaṃ upanighaṃsantiyo agamaṃsu. Sohaṃ etarahi eko gaṇasmā vūpakaṭṭho viharāmi, acchinnaggāni ceva tiṇāni khādāmi, obhaggobhaggañca me sākhābhaṅgaṃ na khādanti, anāvilāni ca pānīyāni pivāmi, ogāhā ca me uttiṇṇassa na hatthiniyo kāyaṃ upanighaṃsantiyo gacchantī’ti. So soṇḍāya sākhābhaṅgaṃ bhañjitvā sākhābhaṅgena kāyaṃ parimajjitvā attamano soṇḍaṃ saṃharati 10,.
‘‘звамзвам̣ ко, бхигкавз, яасмим̣ самаяз бхигку аагин̣н̣о вихарад̇и бхигкуухи бхигкунийхи убаасагзхи убаасигаахи ран̃н̃аа рааж̇амахаамад̇д̇зхи д̇ид̇т̇иязхи д̇ид̇т̇ияасаавагзхи, д̇асмим̣, бхигкавз, самаяз бхигкусса звам̣ ход̇и – ‘ахам̣ ко зд̇арахи аагин̣н̣о вихараами бхигкуухи бхигкунийхи убаасагзхи убаасигаахи ран̃н̃аа рааж̇амахаамад̇д̇зхи д̇ид̇т̇иязхи д̇ид̇т̇ияасаавагзхи. яам̣нуунаахам̣ зго г̇ан̣асмаа вуубагадто вихарзяяа’нд̇и. со вивид̇д̇ам̣ сзнаасанам̣ бхаж̇ад̇и аран̃н̃ам̣ ругкамуулам̣ баб̣б̣ад̇ам̣ ганд̣̇арам̣ г̇ириг̇ухам̣ сусаанам̣ ванабад̇т̇ам̣ аб̣бхогаасам̣ балаалабун̃ж̇ам̣ . со аран̃н̃аг̇ад̇о ваа ругкамуулаг̇ад̇о ваа сун̃н̃ааг̇аараг̇ад̇о ваа нисийд̣̇ад̇и баллан̇гам̣ аабхуж̇ид̇ваа уж̇ум̣ гааяам̣ бан̣ид̇хааяа баримукам̣ сад̇им̣ убадтабзд̇ваа.
‘‘Evamevaṃ kho, bhikkhave, yasmiṃ samaye bhikkhu ākiṇṇo viharati bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi, tasmiṃ, bhikkhave, samaye bhikkhussa evaṃ hoti – ‘ahaṃ kho etarahi ākiṇṇo viharāmi bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi. Yaṃnūnāhaṃ eko gaṇasmā vūpakaṭṭho vihareyya’nti. So vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ . So araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā.
‘‘со абхиж̇жхам̣ логз бахааяа виг̇ад̇аабхиж̇жхзна жзд̇асаа вихарад̇и, абхиж̇жхааяа жид̇д̇ам̣ барисод̇хзд̇и; б̣яаабаад̣̇абад̣̇осам̣ бахааяа аб̣яаабаннажид̇д̇о вихарад̇и саб̣б̣абаан̣абхууд̇ахид̇аанугамбий, б̣яаабаад̣̇абад̣̇осаа жид̇д̇ам̣ барисод̇хзд̇и; т̇инамид̣̇д̇хам̣ бахааяа виг̇ад̇ат̇инамид̣̇д̇хо вихарад̇и аалогасан̃н̃ий сад̇о самбаж̇аано, т̇инамид̣̇д̇хаа жид̇д̇ам̣ барисод̇хзд̇и; уд̣̇д̇хажжагуггужжам̣ бахааяа ануд̣̇д̇хад̇о вихарад̇и аж̇жхад̇д̇ам̣ вуубасанд̇ажид̇д̇о, уд̣̇д̇хажжагуггужжаа жид̇д̇ам̣ барисод̇хзд̇и; вижигижчам̣ бахааяа д̇ин̣н̣авижигижчо вихарад̇и агат̇ам̣гат̇ий гусалзсу д̇хаммзсу, вижигижчааяа жид̇д̇ам̣ барисод̇хзд̇и. со имз бан̃жа нийваран̣з бахааяа жзд̇асо убаггилзсз бан̃н̃ааяа д̣̇уб̣б̣алийгаран̣з вивижжзва гаамзхи вивижжа агусалзхи д̇хаммзхи савид̇аггам̣ савижаарам̣ вивзгаж̇ам̣ бийд̇исукам̣ батамам̣ жхаанам̣ убасамбаж̇ж̇а вихарад̇и. со ад̇д̇амано сон̣д̣ам̣ сам̣харад̇и 11. вид̇аггавижаараанам̣ вуубасамаа…бз… д̣̇уд̇ияам̣ жхаанам̣… д̇ад̇ияам̣ жхаанам̣… жад̇уд̇т̇ам̣ жхаанам̣ убасамбаж̇ж̇а вихарад̇и. со ад̇д̇амано сон̣д̣ам̣ сам̣харад̇и.
‘‘So abhijjhaṃ loke pahāya vigatābhijjhena cetasā viharati, abhijjhāya cittaṃ parisodheti; byāpādapadosaṃ pahāya abyāpannacitto viharati sabbapāṇabhūtahitānukampī, byāpādapadosā cittaṃ parisodheti; thinamiddhaṃ pahāya vigatathinamiddho viharati ālokasaññī sato sampajāno, thinamiddhā cittaṃ parisodheti; uddhaccakukkuccaṃ pahāya anuddhato viharati ajjhattaṃ vūpasantacitto, uddhaccakukkuccā cittaṃ parisodheti; vicikicchaṃ pahāya tiṇṇavicikiccho viharati akathaṃkathī kusalesu dhammesu, vicikicchāya cittaṃ parisodheti. So ime pañca nīvaraṇe pahāya cetaso upakkilese paññāya dubbalīkaraṇe vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. So attamano soṇḍaṃ saṃharati 12. Vitakkavicārānaṃ vūpasamā…pe… dutiyaṃ jhānaṃ… tatiyaṃ jhānaṃ… catutthaṃ jhānaṃ upasampajja viharati. So attamano soṇḍaṃ saṃharati.
‘‘саб̣б̣асо руубасан̃н̃аанам̣ самад̇иггамаа бадигхасан̃н̃аанам̣ ад̇т̇ан̇г̇амаа наанад̇д̇асан̃н̃аанам̣ аманасигаараа ‘ананд̇о аагаасо’д̇и аагаасаанан̃жааяад̇анам̣ убасамбаж̇ж̇а вихарад̇и. со ад̇д̇амано сон̣д̣ам̣ сам̣харад̇и. саб̣б̣асо аагаасаанан̃жааяад̇анам̣ самад̇иггамма ‘ананд̇ам̣ вин̃н̃аан̣а’нд̇и вин̃н̃аан̣ан̃жааяад̇анам̣ убасамбаж̇ж̇а вихарад̇и… саб̣б̣асо вин̃н̃аан̣ан̃жааяад̇анам̣ самад̇иггамма ‘над̇т̇и гин̃жий’д̇и аагин̃жан̃н̃ааяад̇анам̣ убасамбаж̇ж̇а вихарад̇и… саб̣б̣асо аагин̃жан̃н̃ааяад̇анам̣ самад̇иггамма нзвасан̃н̃аанаасан̃н̃ааяад̇анам̣ убасамбаж̇ж̇а вихарад̇и… саб̣б̣асо нзвасан̃н̃аанаасан̃н̃ааяад̇анам̣ самад̇иггамма сан̃н̃аавзд̣̇аяид̇анирод̇хам̣ убасамбаж̇ж̇а вихарад̇и, бан̃н̃ааяа жасса д̣̇исваа аасаваа баригкийн̣аа хонд̇и. со ад̇д̇амано сон̣д̣ам̣ сам̣харад̇ий’’д̇и. навамам̣.
‘‘Sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati. So attamano soṇḍaṃ saṃharati. Sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati… sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati… sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati… sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. So attamano soṇḍaṃ saṃharatī’’ti. Navamaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 9. нааг̇асуд̇д̇аван̣н̣анаа • 9. Nāgasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 8-9. д̣̇зваасурасан̇г̇аамасуд̇д̇аад̣̇иван̣н̣анаа • 8-9. Devāsurasaṅgāmasuttādivaṇṇanā
