| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. නාගසුත්‌තං
3. Nāgasuttaṃ
151. ‘‘සෙය්‍යථාපි , භික්‌ඛවෙ, හිමවන්‌තං පබ්‌බතරාජං නිස්‌සාය නාගා කායං වඩ්‌ඪෙන්‌ති, බලං ගාහෙන්‌ති; තෙ තත්‌ථ කායං වඩ්‌ඪෙත්‌වා බලං ගාහෙත්‌වා කුසොබ්‌භෙ ඔතරන්‌ති, කුසොබ්‌භෙ 1 ඔතරිත්‌වා මහාසොබ්‌භෙ ඔතරන්‌ති, මහාසොබ්‌භෙ ඔතරිත්‌වා කුන්‌නදියො ඔතරන්‌ති, කුන්‌නදියො ඔතරිත්‌වා මහානදියො ඔතරන්‌ති, මහානදියො ඔතරිත්‌වා මහාසමුද්‌දං 2 ඔතරන්‌ති, තෙ තත්‌ථ මහන්‌තත්‌තං වෙපුල්‌ලත්‌තං ආපජ්‌ජන්‌ති කායෙන; එවමෙව ඛො, භික්‌ඛවෙ, භික්‌ඛු සීලං නිස්‌සාය සීලෙ පතිට්‌ඨාය අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො මහන්‌තත්‌තං වෙපුල්‌ලත්‌තං පාපුණාති ධම්‌මෙසු. කථඤ්‌ච, භික්‌ඛවෙ, භික්‌ඛු සීලං නිස්‌සාය සීලෙ පතිට්‌ඨාය අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො මහන්‌තත්‌තං වෙපුල්‌ලත්‌තං පාපුණාති ධම්‌මෙසු? ඉධ, භික්‌ඛවෙ, භික්‌ඛු සම්‌මාදිට්‌ඨිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… සම්‌මාසමාධිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… එවං ඛො, භික්‌ඛවෙ, භික්‌ඛු සීලං නිස්‌සාය සීලෙ පතිට්‌ඨාය අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො මහන්‌තත්‌තං වෙපුල්‌ලත්‌තං පාපුණාති ධම්‌මෙසූ’’ති. තතියං.
151. ‘‘Seyyathāpi , bhikkhave, himavantaṃ pabbatarājaṃ nissāya nāgā kāyaṃ vaḍḍhenti, balaṃ gāhenti; te tattha kāyaṃ vaḍḍhetvā balaṃ gāhetvā kusobbhe otaranti, kusobbhe 3 otaritvā mahāsobbhe otaranti, mahāsobbhe otaritvā kunnadiyo otaranti, kunnadiyo otaritvā mahānadiyo otaranti, mahānadiyo otaritvā mahāsamuddaṃ 4 otaranti, te tattha mahantattaṃ vepullattaṃ āpajjanti kāyena; evameva kho, bhikkhave, bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto mahantattaṃ vepullattaṃ pāpuṇāti dhammesu. Kathañca, bhikkhave, bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto mahantattaṃ vepullattaṃ pāpuṇāti dhammesu? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto mahantattaṃ vepullattaṃ pāpuṇāti dhammesū’’ti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. නාගසුත්‌තවණ්‌ණනා • 3. Nāgasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. නාගසුත්‌තවණ්‌ණනා • 3. Nāgasuttavaṇṇanā
