| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. நாக³ஸுத்தவண்ணனா
3. Nāgasuttavaṇṇanā
151. ப³லங் கா³ஹெந்தீதி ப³லங் க³ண்ஹந்தி, க³ஹிதப³லா தி²ரஸரீரா ஹொந்தி. குஸொப்³பே⁴ ஓதரந்தீதிஆதீ³ஸு அயமனுபுப்³பி³கதா² – நாகி³னியோ கிர உதுஸமயே பதிட்டி²தக³ப்³பா⁴ சிந்தெந்தி – ‘‘ஸசே மயங் இத⁴ விஜாயிஸ்ஸாம, ஏவங் நோ தா³ரகா ஊமிவேக³ஞ்ச ஸுபண்ணஸ்ஸ ச பக்க²ந்தி³த்வா ஆக³தஸ்ஸ வேக³ங் ஸஹிதுங் ந ஸக்கி²ஸ்ஸந்தீ’’தி தா மஹாஸமுத்³தே³ நிமுஜ்ஜித்வா ஸம்ப⁴ஜ்ஜமுக²த்³வாரங் பத்வா பஞ்ச மஹானதி³யோ பவிஸித்வா ஹிமவந்தங் க³ச்ச²ந்தி. தத்த² ஸுபண்ணேஹி அபக்க²ந்த³னீயாஸு ஸுவண்ணரஜதமணிகு³ஹாஸு வஸமானா விஜாயித்வா நாக³போதகே கொ³ப்ப²காதி³பமாணேஸு உத³கேஸு ஓதாரெத்வா உத³கதரணங் ஸிக்கா²பெந்தி.
151.Balaṃgāhentīti balaṃ gaṇhanti, gahitabalā thirasarīrā honti. Kusobbhe otarantītiādīsu ayamanupubbikathā – nāginiyo kira utusamaye patiṭṭhitagabbhā cintenti – ‘‘sace mayaṃ idha vijāyissāma, evaṃ no dārakā ūmivegañca supaṇṇassa ca pakkhanditvā āgatassa vegaṃ sahituṃ na sakkhissantī’’ti tā mahāsamudde nimujjitvā sambhajjamukhadvāraṃ patvā pañca mahānadiyo pavisitvā himavantaṃ gacchanti. Tattha supaṇṇehi apakkhandanīyāsu suvaṇṇarajatamaṇiguhāsu vasamānā vijāyitvā nāgapotake gopphakādipamāṇesu udakesu otāretvā udakataraṇaṃ sikkhāpenti.
அத² யதா³ அனுக்கமேன தே நாகா³ க³ங்கா³தீ³னங் நதீ³னங் ஓரிமதீரதோ பரதீரங், பரதீரதோ ஓரிமதீரந்தி தரணபடிதரணங் காதுங் ஸக்கொந்தி, ததா³ ‘‘இதா³னி நோ தா³ரகா ஊமிவேக³ஞ்ச க³ருளவேக³ஞ்ச ஸஹிதுங் ஸக்கி²ஸ்ஸந்தீ’’தி ஞத்வா அத்தனோ ஆனுபா⁴வேன மஹாமேக⁴ங் ஸமுட்டா²பெத்வா ஸகலஹிமவந்தங் ஏகோத³கங் விய குருமானா தே³வங் வஸ்ஸாபெத்வா ஸுவண்ணரஜதாதி³மயா நாவா மாபெத்வா உபரி ஸுவண்ணதாரகவிசித்தங் ஸமோஸரிதக³ந்த⁴புப்ப²தா³மங் சேலவிதானங் ப³ந்தி⁴த்வா ஸுரபி⁴சந்த³னக³ந்த⁴புப்பா²தீ³னி ஆதா³ய தாஹி நாவாஹி பஞ்ச மஹானதி³யோ ஓகா³ஹித்வா அனுக்கமேன மஹாஸமுத்³த³ங் பாபுணந்தி. தத்த² ச வஸந்தா த³ஸப்³யாம-ஸதப்³யாம-ஸஹஸ்ஸப்³யாம-ஸதஸஹஸ்ஸப்³யாம-பமாணதங் ஆபஜ்ஜந்தா மஹந்தத்தங் வேபுல்லத்தங் ஆபஜ்ஜந்தி நாம.
Atha yadā anukkamena te nāgā gaṅgādīnaṃ nadīnaṃ orimatīrato paratīraṃ, paratīrato orimatīranti taraṇapaṭitaraṇaṃ kātuṃ sakkonti, tadā ‘‘idāni no dārakā ūmivegañca garuḷavegañca sahituṃ sakkhissantī’’ti ñatvā attano ānubhāvena mahāmeghaṃ samuṭṭhāpetvā sakalahimavantaṃ ekodakaṃ viya kurumānā devaṃ vassāpetvā suvaṇṇarajatādimayā nāvā māpetvā upari suvaṇṇatārakavicittaṃ samosaritagandhapupphadāmaṃ celavitānaṃ bandhitvā surabhicandanagandhapupphādīni ādāya tāhi nāvāhi pañca mahānadiyo ogāhitvā anukkamena mahāsamuddaṃ pāpuṇanti. Tattha ca vasantā dasabyāma-satabyāma-sahassabyāma-satasahassabyāma-pamāṇataṃ āpajjantā mahantattaṃ vepullattaṃ āpajjanti nāma.
ஏவமேவ கோ²தி எத்த² ஹிமவந்தபப்³ப³தோ விய சதுபாரிஸுத்³தி⁴ஸீலங் த³ட்ட²ப்³ப³ங், நாக³போதகா விய யோகா³வசரா, குஸொப்³பா⁴த³யோ விய அரியமக்³கோ³, மஹாஸமுத்³தோ³ விய நிப்³பா³னங். யதா² நாக³போதகா ஹிமவந்தே பதிட்டா²ய குஸொப்³பா⁴தீ³ஹி மஹாஸமுத்³த³ங் பத்வா காயமஹந்தத்தங் ஆபஜ்ஜந்தி, ஏவங் யோகி³னோ ஸீலங் நிஸ்ஸாய ஸீலே பதிட்டா²ய அரியமக்³கே³ன நிப்³பா³னங் பத்வா அரஹத்தமக்³கே³னேவ ஆக³தேஸு ச²ஸு அபி⁴ஞ்ஞாத⁴ம்மேஸு கு³ணஸரீரமஹந்தத்தங் பாபுணந்தீதி.
Evameva khoti ettha himavantapabbato viya catupārisuddhisīlaṃ daṭṭhabbaṃ, nāgapotakā viya yogāvacarā, kusobbhādayo viya ariyamaggo, mahāsamuddo viya nibbānaṃ. Yathā nāgapotakā himavante patiṭṭhāya kusobbhādīhi mahāsamuddaṃ patvā kāyamahantattaṃ āpajjanti, evaṃ yogino sīlaṃ nissāya sīle patiṭṭhāya ariyamaggena nibbānaṃ patvā arahattamaggeneva āgatesu chasu abhiññādhammesu guṇasarīramahantattaṃ pāpuṇantīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. நாக³ஸுத்தங் • 3. Nāgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. நாக³ஸுத்தவண்ணனா • 3. Nāgasuttavaṇṇanā
