| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
5. д̇хаммигаваг̇г̇о
5. Dhammikavaggo
1. нааг̇асуд̇д̇аван̣н̣анаа
1. Nāgasuttavaṇṇanā
43. бан̃жамасса батамз барисин̃жид̇унд̇и (ма. ни. адта. 1.272) яо жун̣н̣амад̇д̇игаад̣̇ийхи г̇ад̇д̇аани уб̣б̣аддзнд̇о маллагамудтаад̣̇ийхи ваа гхам̣санд̇о нахааяад̇и, со ‘‘нахааяад̇ий’’д̇и вужжад̇и. яо д̇ат̇аа агад̇ваа багад̇ияаава нахааяад̇и, со ‘‘барисин̃жад̇ий’’д̇и вужжад̇и . бхаг̇авад̇о жа сарийрз д̇ат̇аа харид̇аб̣б̣ам̣ раж̇ож̇аллам̣ наама нубалимбад̇и ажчачавибхаавад̇о, уд̇уг̇г̇ахан̣ад̇т̇ам̣ бана бхаг̇аваа гзвалам̣ уд̣̇агз од̇арад̇и. д̇знааха ‘‘г̇ад̇д̇аани барисин̃жид̇у’’нд̇и.
43. Pañcamassa paṭhame parisiñcitunti (ma. ni. aṭṭha. 1.272) yo cuṇṇamattikādīhi gattāni ubbaṭṭento mallakamuṭṭhādīhi vā ghaṃsanto nahāyati, so ‘‘nahāyatī’’ti vuccati. Yo tathā akatvā pakatiyāva nahāyati, so ‘‘parisiñcatī’’ti vuccati . Bhagavato ca sarīre tathā haritabbaṃ rajojallaṃ nāma nupalimpati acchachavibhāvato, utuggahaṇatthaṃ pana bhagavā kevalaṃ udake otarati. Tenāha ‘‘gattāni parisiñcitu’’nti.
буб̣б̣агодтагод̇и баажийнагодтаго. саавад̇т̇ияам̣ гира ж̇зд̇аванавихааро гад̣̇аажи махаа, гад̣̇аажи куд̣̇д̣̇аго. д̇ат̇аа хи со вибассисса бхаг̇авад̇о гаалз яож̇аниго ахоси, сикисса д̇иг̇аавуд̇о, взссабхусса ад̣дхаяож̇аниго, гагусанд̇хасса г̇аавуд̇аббамаан̣о, гон̣ааг̇аманасса ад̣дхаг̇аавуд̇аббамаан̣о, гассабасса вийсад̇иусабхаббамаан̣о, амхаагам̣ бхаг̇авад̇о гаалз адтагарийсаббамаан̣о ж̇аад̇о. д̇амби наг̇арам̣ д̇асса вихаарасса гад̣̇аажи баажийнад̇о ход̇и, гад̣̇аажи д̣̇агкин̣ад̇о, гад̣̇аажи бажчимад̇о, гад̣̇аажи уд̇д̇арад̇о. ж̇зд̇аванаг̇анд̇хагудияам̣ бана жад̇уннам̣ ман̃жабаад̣̇аанам̣ бад̇идтид̇адтаанам̣ ажаламзва. жад̇д̇аари хи ажалажзд̇ияадтаанаани наама махааб̣од̇хибаллан̇гадтаанам̣, исибад̇анз д̇хаммажаггаббавад̇д̇анадтаанам̣, сан̇гассанаг̇арз д̣̇звороханагаалз собаанасса бад̇идтаанадтаанам̣, ман̃жабаад̣̇адтаананд̇и. аяам̣ бана буб̣б̣агодтаго гассабад̣̇асаб̣аласса вийсад̇иусабхавихаарагаалз баажийнад̣̇ваарагодтаго ахоси. со ид̣̇аани ‘‘буб̣б̣агодтаго’’д̇взва бан̃н̃ааяад̇и.
Pubbakoṭṭhakoti pācīnakoṭṭhako. Sāvatthiyaṃ kira jetavanavihāro kadāci mahā, kadāci khuddako. Tathā hi so vipassissa bhagavato kāle yojaniko ahosi, sikhissa tigāvuto, vessabhussa aḍḍhayojaniko, kakusandhassa gāvutappamāṇo, koṇāgamanassa aḍḍhagāvutappamāṇo, kassapassa vīsatiusabhappamāṇo, amhākaṃ bhagavato kāle aṭṭhakarīsappamāṇo jāto. Tampi nagaraṃ tassa vihārassa kadāci pācīnato hoti, kadāci dakkhiṇato, kadāci pacchimato, kadāci uttarato. Jetavanagandhakuṭiyaṃ pana catunnaṃ mañcapādānaṃ patiṭṭhitaṭṭhānaṃ acalameva. Cattāri hi acalacetiyaṭṭhānāni nāma mahābodhipallaṅkaṭṭhānaṃ, isipatane dhammacakkappavattanaṭṭhānaṃ, saṅkassanagare devorohanakāle sopānassa patiṭṭhānaṭṭhānaṃ, mañcapādaṭṭhānanti. Ayaṃ pana pubbakoṭṭhako kassapadasabalassa vīsatiusabhavihārakāle pācīnadvārakoṭṭhako ahosi. So idāni ‘‘pubbakoṭṭhako’’tveva paññāyati.
гассабад̣̇асаб̣аласса гаалз ажиравад̇ий наг̇арам̣ баригкибид̇ваа санд̣̇амаанаа буб̣б̣агодтагам̣ бад̇ваа уд̣̇агзна бхинд̣̇ид̇ваа маханд̇ам̣ уд̣̇агарахад̣̇ам̣ маабзси самад̇ид̇д̇игам̣ анубуб̣б̣аг̇амбхийрам̣. д̇ад̇т̇а згам̣ ран̃н̃о нхаанад̇ид̇т̇ам̣, згам̣ нааг̇араанам̣, згам̣ бхигкусан̇гхасса, згам̣ б̣уд̣̇д̇хаананд̇и звам̣ баадизггаани нхаанад̇ид̇т̇аани хонд̇и раман̣ийяаанивиббагин̣н̣араж̇ад̇абаддасад̣̇исаваалугаани. ид̇и бхаг̇авад̇аа ааяасмад̇аа аананд̣̇зна сад̣̇д̇хим̣ язна аяам̣ зваруубо буб̣б̣агодтаго, д̇знубасан̇гами г̇ад̇д̇аани барисин̃жид̇ум̣. ат̇ааяасмаа аананд̣̇о уд̣̇агасаадигам̣ убанаамзси. бхаг̇аваа сурад̇д̇ад̣̇убаддам̣ абанзд̇ваа уд̣̇агасаадигам̣ ниваасзси. т̇зро д̣̇убаддзна сад̣̇д̇хим̣ махаажийварам̣ ад̇д̇ано хад̇т̇аг̇ад̇ам̣ агааси. бхаг̇аваа уд̣̇агам̣ од̇ари, саход̇аран̣знзвасса уд̣̇агз мажчагажчабаа саб̣б̣з суван̣н̣аван̣н̣аа ахзсум̣, яанд̇анаал̣игаахи суван̣н̣арасад̇хаараани син̃жанагаало вияа суван̣н̣абадаббасааран̣агаало вияа жа ахоси. ат̇а бхаг̇авад̇о нахаанавад̇д̇ам̣ д̣̇ассзд̇ваа бажжуд̇д̇ин̣н̣асса т̇зро сурад̇д̇ад̣̇убаддам̣ убанаамзси. бхаг̇аваа д̇ам̣ ниваасзд̇ваа виж̇ж̇уллад̇аасад̣̇исам̣ гааяаб̣анд̇ханам̣ б̣анд̇хид̇ваа махаажийварам̣ анд̇анд̇зна сам̣харид̇ваа бад̣̇умаг̇аб̣бхасад̣̇исам̣ гад̇ваа убанийд̇ам̣ д̣̇вийсу ган̣н̣зсу г̇ахзд̇ваа адтааси. д̇зна вуд̇д̇ам̣ ‘‘буб̣б̣агодтагз г̇ад̇д̇аани барисин̃жид̇ваа згажийваро адтаасий’’д̇и.
Kassapadasabalassa kāle aciravatī nagaraṃ parikkhipitvā sandamānā pubbakoṭṭhakaṃ patvā udakena bhinditvā mahantaṃ udakarahadaṃ māpesi samatittikaṃ anupubbagambhīraṃ. Tattha ekaṃ rañño nhānatitthaṃ, ekaṃ nāgarānaṃ, ekaṃ bhikkhusaṅghassa, ekaṃ buddhānanti evaṃ pāṭiekkāni nhānatitthāni honti ramaṇīyānivippakiṇṇarajatapaṭṭasadisavālukāni. Iti bhagavatā āyasmatā ānandena saddhiṃ yena ayaṃ evarūpo pubbakoṭṭhako, tenupasaṅkami gattāni parisiñcituṃ. Athāyasmā ānando udakasāṭikaṃ upanāmesi. Bhagavā surattadupaṭṭaṃ apanetvā udakasāṭikaṃ nivāsesi. Thero dupaṭṭena saddhiṃ mahācīvaraṃ attano hatthagataṃ akāsi. Bhagavā udakaṃ otari, sahotaraṇenevassa udake macchakacchapā sabbe suvaṇṇavaṇṇā ahesuṃ, yantanāḷikāhi suvaṇṇarasadhārāni siñcanakālo viya suvaṇṇapaṭappasāraṇakālo viya ca ahosi. Atha bhagavato nahānavattaṃ dassetvā paccuttiṇṇassa thero surattadupaṭṭaṃ upanāmesi. Bhagavā taṃ nivāsetvā vijjullatāsadisaṃ kāyabandhanaṃ bandhitvā mahācīvaraṃ antantena saṃharitvā padumagabbhasadisaṃ katvā upanītaṃ dvīsu kaṇṇesu gahetvā aṭṭhāsi. Tena vuttaṃ ‘‘pubbakoṭṭhake gattāni parisiñcitvā ekacīvaro aṭṭhāsī’’ti.
звам̣ тид̇асса бана бхаг̇авад̇о сарийрам̣ вигасид̇абад̣̇умабубпасад̣̇исам̣ саб̣б̣абаалипуллам̣ баарижчад̇д̇агам̣, д̇аараамарийживигасид̇ан̃жа г̇аг̇анад̇алам̣ сирияаа авахасамаанам̣ вияа вирожид̇т̇а, б̣яаамаббабхаабаригкзбавилаасиний жасса д̣̇вад̇д̇им̣саваралагкан̣амаалаа г̇ант̇ид̇ваа табид̇аа д̣̇вад̇д̇им̣са жанд̣̇имаа вияа, д̣̇вад̇д̇им̣са суурияаа вияа, бадибаадияаа табид̇ад̣̇вад̇д̇им̣сажаггавад̇д̇ид̣̇вад̇д̇им̣сад̣̇зварааж̇ад̣̇вад̇д̇им̣самахааб̣рахмаано вияа жа ад̇ивияа вирожид̇т̇а. яасмаа жа бхаг̇авад̇о сарийрам̣ суд̇ханд̇ажаамийгарасамаанаван̣н̣ам̣, субарисод̇хид̇абаваал̣аружирад̇оран̣ам̣, сувисуд̣̇д̇ханийларад̇анаавалисад̣̇исагзсад̇анурухам̣, д̇асмаа д̇ахам̣ д̇ахам̣ виниг̇г̇ад̇асуж̇аад̇аж̇аад̇ихин̇г̇улагарасуубасобхид̇ам̣ убари сад̇амзгхарад̇анаавалисужчаад̣̇ид̇ам̣ ж̇ан̇г̇амамива ганагаг̇ирисикарам̣ вирожид̇т̇а. д̇асмин̃жа самаяз д̣̇асаб̣аласса сарийрад̇о нигкамид̇ваа чаб̣б̣ан̣н̣арасмияо саманд̇ад̇о асийд̇ихад̇т̇аббамаан̣з бад̣̇зсз аад̇хааванд̇ий вид̇хааванд̇ий рад̇анаавалирад̇анад̣̇аамарад̇анажун̣н̣авиббагин̣н̣ам̣ вияа басаарид̇арад̇анажид̇д̇аган̃жанабаддамива аасин̃жамааналаакаарасад̇хаараажид̇д̇амива уггаасад̇анибаад̇асамаагуламива ниранд̇аравиббагин̣н̣аган̣игаарагин̇гин̣игабубпамива вааяувзг̇асамуд̣̇д̇хад̇ажинабидтажун̣н̣аран̃ж̇ид̇амива инд̣̇ад̇ханувиж̇ж̇уллад̇аавид̇аанасант̇ад̇амива жа г̇аг̇анад̇алам̣, д̇ам̣ таанам̣ баванан̃жа саммаа паранд̇и. ван̣н̣абхууми наамзсаа. зваруубзсу таанзсу б̣уд̣̇д̇хаанам̣ сарийраван̣н̣ам̣ ваа г̇ун̣аван̣н̣ам̣ ваа жун̣н̣ияабад̣̇зхи ваа г̇аат̇аахи ваа ад̇т̇ан̃жа убамааяо жа гааран̣аани жа аахарид̇ваа бадиб̣алзна д̇хаммагат̇игзна буурзд̇ваа гат̇зд̇ум̣ ваддад̇и. зваруубзсу хи таанзсу д̇хаммагат̇игасса т̇аамо взд̣̇ид̇аб̣б̣о. буб̣б̣асад̣̇исаани гурумаанод̇и нируд̣̇агаани гурумаано, сугкаабаяамаанод̇и ад̇т̇о. сод̣̇агз г̇ад̇д̇з жийварам̣ баарубанд̇асса хи жийварз ган̣н̣игаани удтаханд̇и, баригкаарабхан̣д̣ам̣ д̣̇уссад̇и, б̣уд̣̇д̇хаанам̣ бана сарийрз раж̇ож̇аллам̣ на убалимбад̇и, бад̣̇умабад̇д̇з угкид̇д̇ауд̣̇агаб̣инд̣̇у вияа уд̣̇агам̣ виниваддзд̇ваа г̇ажчад̇и. звам̣ санд̇зби сигкааг̇ааравад̇ааяа бхаг̇аваа ‘‘баб̣б̣аж̇ид̇авад̇д̇ам̣ наамзд̇а’’нд̇и махаажийварам̣ убхосу ган̣н̣зсу г̇ахзд̇ваа бурад̇о гааяам̣ бадижчаад̣̇зд̇ваа адтааси.
Evaṃ ṭhitassa pana bhagavato sarīraṃ vikasitapadumapupphasadisaṃ sabbapāliphullaṃ pāricchattakaṃ, tārāmarīcivikasitañca gaganatalaṃ siriyā avahasamānaṃ viya virocittha, byāmappabhāparikkhepavilāsinī cassa dvattiṃsavaralakkhaṇamālā ganthitvā ṭhapitā dvattiṃsa candimā viya, dvattiṃsa sūriyā viya, paṭipāṭiyā ṭhapitadvattiṃsacakkavattidvattiṃsadevarājadvattiṃsamahābrahmāno viya ca ativiya virocittha. Yasmā ca bhagavato sarīraṃ sudhantacāmīkarasamānavaṇṇaṃ, suparisodhitapavāḷaruciratoraṇaṃ, suvisuddhanīlaratanāvalisadisakesatanuruhaṃ, tasmā tahaṃ tahaṃ viniggatasujātajātihiṅgulakarasūpasobhitaṃ upari satamegharatanāvalisucchāditaṃ jaṅgamamiva kanakagirisikharaṃ virocittha. Tasmiñca samaye dasabalassa sarīrato nikkhamitvā chabbaṇṇarasmiyo samantato asītihatthappamāṇe padese ādhāvantī vidhāvantī ratanāvaliratanadāmaratanacuṇṇavippakiṇṇaṃ viya pasāritaratanacittakañcanapaṭṭamiva āsiñcamānalākhārasadhārācittamiva ukkāsatanipātasamākulamiva nirantaravippakiṇṇakaṇikārakiṅkiṇikapupphamiva vāyuvegasamuddhatacinapiṭṭhacuṇṇarañjitamiva indadhanuvijjullatāvitānasanthatamiva ca gaganatalaṃ, taṃ ṭhānaṃ pavanañca sammā pharanti. Vaṇṇabhūmi nāmesā. Evarūpesu ṭhānesu buddhānaṃ sarīravaṇṇaṃ vā guṇavaṇṇaṃ vā cuṇṇiyapadehi vā gāthāhi vā atthañca upamāyo ca kāraṇāni ca āharitvā paṭibalena dhammakathikena pūretvā kathetuṃ vaṭṭati. Evarūpesu hi ṭhānesu dhammakathikassa thāmo veditabbo. Pubbasadisāni kurumānoti nirudakāni kurumāno, sukkhāpayamānoti attho. Sodake gatte cīvaraṃ pārupantassa hi cīvare kaṇṇikāni uṭṭhahanti, parikkhārabhaṇḍaṃ dussati, buddhānaṃ pana sarīre rajojallaṃ na upalimpati, padumapatte ukkhittaudakabindu viya udakaṃ vinivaṭṭetvā gacchati. Evaṃ santepi sikkhāgāravatāya bhagavā ‘‘pabbajitavattaṃ nāmeta’’nti mahācīvaraṃ ubhosu kaṇṇesu gahetvā purato kāyaṃ paṭicchādetvā aṭṭhāsi.
д̇аал̣ид̇ан̃жа ваад̣̇ид̇ан̃жа д̇аал̣ид̇аваад̣̇ид̇ам̣, д̇уурияаанам̣ д̇аал̣ид̇аваад̣̇ид̇ам̣ д̇уурияад̇аал̣ид̇аваад̣̇ид̇ам̣. маханд̇ан̃жа д̇ам̣ д̇уурияад̇аал̣ид̇аваад̣̇ид̇ан̃жаад̇и махаад̇уурияад̇аал̣ид̇аваад̣̇ид̇ам̣. д̇знааха ‘‘маханд̇знаа’’д̇иаад̣̇и. ат̇а ваа бхзримуд̣̇ин̇г̇абан̣аваад̣̇ид̇уурияаанам̣ д̇аал̣ид̇ам̣ вийн̣аавзл̣уг̇омукиаад̣̇ийнам̣ ваад̣̇ид̇ан̃жа д̇уурияад̇аал̣ид̇аваад̣̇ид̇анд̇и ваа звамзд̇т̇а ад̇т̇о д̣̇адтаб̣б̣о.
Tāḷitañca vāditañca tāḷitavāditaṃ, tūriyānaṃ tāḷitavāditaṃ tūriyatāḷitavāditaṃ. Mahantañca taṃ tūriyatāḷitavāditañcāti mahātūriyatāḷitavāditaṃ. Tenāha ‘‘mahantenā’’tiādi. Atha vā bherimudiṅgapaṇavāditūriyānaṃ tāḷitaṃ vīṇāveḷugomukhiādīnaṃ vāditañca tūriyatāḷitavāditanti vā evamettha attho daṭṭhabbo.
абхин̃н̃аабаарам̣ г̇ад̇од̇и абхин̃н̃аабаараг̇уу. звам̣ сзсзсуби. со хи бхаг̇аваа саб̣б̣ад̇хаммз абхиж̇аананд̇о г̇ад̇од̇и абхин̃н̃аабаараг̇уу. д̇зсу бан̃жубаад̣̇аанагканд̇хз бариж̇аананд̇о г̇ад̇од̇и барин̃н̃аабаараг̇уу. саб̣б̣агилзсз баж̇аханд̇о г̇ад̇од̇и бахаанабаараг̇уу. жад̇д̇ааро маг̇г̇з бхаавзнд̇о г̇ад̇од̇и бхааванаабаараг̇уу. нирод̇хам̣ сажчигаронд̇о г̇ад̇од̇и сажчигирияаабаараг̇уу. саб̣б̣асамаабад̇д̇им̣ самаабаж̇ж̇анд̇о г̇ад̇од̇и самаабад̇д̇ибаараг̇уу. суб̣рахмад̣̇звабуд̇д̇аад̣̇аяод̇и зд̇т̇а со гира д̣̇звабуд̇д̇о ажчараасан̇гхабаривуд̇о нанд̣̇анагийл̣ид̇ам̣ гад̇ваа баарижчад̇д̇агамуулз бан̃н̃ад̇д̇аасанз нисийд̣̇и. д̇ам̣ бан̃жасад̇аа бариваарзд̇ваа нисиннаа , бан̃жасад̇аа ругкам̣ абхирухид̇ваа мад̇хурассарзна г̇ааяид̇ваа бубпаани баад̇знд̇и. д̇аани г̇ахзд̇ваа ид̇араа згад̇ован̣дигамаалаава г̇ант̇знд̇и. ат̇а ругкам̣ абхирул̣хаа убажчзд̣̇агавасзна згаббахаарзнзва гаалам̣ гад̇ваа авийжимхи ниб̣б̣ад̇д̇аа махаад̣̇угкам̣ анубхаванд̇и. ат̇а гаалз г̇ажчанд̇з д̣̇звабуд̇д̇о ‘‘имаасам̣ нзва сад̣̇д̣̇о суяяад̇и , на бубпаани баад̇знд̇и, гахам̣ ну ко г̇ад̇аа’’д̇и ааваж̇ж̇знд̇о нираяз ниб̣б̣ад̇д̇абхаавам̣ д̣̇исваа бияавад̇т̇угасогзна руббамаано жинд̇зси – ‘‘зд̇аа д̇аава яат̇аагаммзна г̇ад̇аа, маяхам̣ ааяусан̇кааро гид̇д̇аго’’д̇и. со ‘‘сад̇д̇амз д̣̇ивасз маяааби авасзсаахи бан̃жасад̇аахи сад̣̇д̇хим̣ гаалам̣ гад̇ваа д̇ад̇т̇зва ниб̣б̣ад̇д̇ид̇аб̣б̣а’’нд̇и д̣̇исваа б̣алавад̇арзна согзна самаббид̇о. ‘‘имам̣ маяхам̣ согам̣ сад̣̇звагз логз ан̃н̃ад̇ра д̇ат̇ааг̇ад̇аа ниб̣б̣аабзд̇ум̣ самад̇т̇о над̇т̇ий’’д̇и жинд̇зд̇ваа сад̇т̇у санд̇игам̣ г̇анд̇ваа ванд̣̇ид̇ваа згаманд̇ам̣ тид̇о –
Abhiññāpāraṃ gatoti abhiññāpāragū. Evaṃ sesesupi. So hi bhagavā sabbadhamme abhijānanto gatoti abhiññāpāragū. Tesu pañcupādānakkhandhe parijānanto gatoti pariññāpāragū. Sabbakilese pajahanto gatoti pahānapāragū. Cattāro magge bhāvento gatoti bhāvanāpāragū. Nirodhaṃ sacchikaronto gatoti sacchikiriyāpāragū. Sabbasamāpattiṃ samāpajjanto gatoti samāpattipāragū. Subrahmadevaputtādayoti ettha so kira devaputto accharāsaṅghaparivuto nandanakīḷitaṃ katvā pāricchattakamūle paññattāsane nisīdi. Taṃ pañcasatā parivāretvā nisinnā , pañcasatā rukkhaṃ abhiruhitvā madhurassarena gāyitvā pupphāni pātenti. Tāni gahetvā itarā ekatovaṇṭikamālāva ganthenti. Atha rukkhaṃ abhiruḷhā upacchedakavasena ekappahāreneva kālaṃ katvā avīcimhi nibbattā mahādukkhaṃ anubhavanti. Atha kāle gacchante devaputto ‘‘imāsaṃ neva saddo suyyati , na pupphāni pātenti, kahaṃ nu kho gatā’’ti āvajjento niraye nibbattabhāvaṃ disvā piyavatthukasokena ruppamāno cintesi – ‘‘etā tāva yathākammena gatā, mayhaṃ āyusaṅkhāro kittako’’ti. So ‘‘sattame divase mayāpi avasesāhi pañcasatāhi saddhiṃ kālaṃ katvā tattheva nibbattitabba’’nti disvā balavatarena sokena samappito. ‘‘Imaṃ mayhaṃ sokaṃ sadevake loke aññatra tathāgatā nibbāpetuṃ samattho natthī’’ti cintetvā satthu santikaṃ gantvā vanditvā ekamantaṃ ṭhito –
‘‘нижжам̣ уд̇расд̇амид̣̇ам̣ жид̇д̇ам̣, нижжам̣ уб̣б̣иг̇г̇амид̣̇ам̣ мано;
‘‘Niccaṃ utrastamidaṃ cittaṃ, niccaṃ ubbiggamidaṃ mano;
ануббаннзсу гижчзсу, ат̇о уббад̇ид̇зсу жа;
Anuppannesu kicchesu, atho uppatitesu ca;
сажз ад̇т̇и ануд̇расд̇ам̣, д̇ам̣ мз агкаахи бужчид̇о’’д̇и. (сам̣. ни. 1.98) –
Sace atthi anutrastaṃ, taṃ me akkhāhi pucchito’’ti. (saṃ. ni. 1.98) –
имам̣ г̇аат̇амабхааси. бхаг̇аваабисса –
Imaṃ gāthamabhāsi. Bhagavāpissa –
‘‘наан̃н̃ад̇ра б̣ож̇жхаа д̇абасаа, наан̃н̃ад̇ринд̣̇рияасам̣вараа;
‘‘Nāññatra bojjhā tapasā, nāññatrindriyasaṃvarā;
наан̃н̃ад̇ра саб̣б̣аниссаг̇г̇аа, сод̇т̇им̣ бассаами баан̣ина’’нд̇и. (сам̣. ни. 1.98) –
Nāññatra sabbanissaggā, sotthiṃ passāmi pāṇina’’nti. (saṃ. ni. 1.98) –
д̇хаммам̣ д̣̇зсзси. со д̣̇зсанаабарияосаанз виг̇ад̇асого бан̃жахи ажчараасад̇зхи сад̣̇д̇хим̣ сод̇аабад̇д̇ипалз бад̇идтааяа бхаг̇аванд̇ам̣ намассамаано адтааси. д̇ам̣ санд̇хааязд̇ам̣ вуд̇д̇ам̣ ‘‘д̣̇угкаббад̇д̇аа суб̣рахмад̣̇звабуд̇д̇аад̣̇аяо’’д̇и. аад̣̇и-сад̣̇д̣̇зна жанд̣̇асуурияад̣̇звабуд̇д̇аад̣̇аяо сан̇г̇ан̣хаад̇и. жад̇уухи гааран̣зхийд̇и аарагад̇д̇аа, арийнам̣ араанан̃жа хад̇ад̇д̇аа, бажжаяаад̣̇ийнам̣ арахад̇д̇аа, баабагаран̣з рахаабхааваад̇и имзхи жад̇уухи гааран̣зхи.
Dhammaṃ desesi. So desanāpariyosāne vigatasoko pañcahi accharāsatehi saddhiṃ sotāpattiphale patiṭṭhāya bhagavantaṃ namassamāno aṭṭhāsi. Taṃ sandhāyetaṃ vuttaṃ ‘‘dukkhappattā subrahmadevaputtādayo’’ti. Ādi-saddena candasūriyadevaputtādayo saṅgaṇhāti. Catūhi kāraṇehīti ārakattā, arīnaṃ arānañca hatattā, paccayādīnaṃ arahattā, pāpakaraṇe rahābhāvāti imehi catūhi kāraṇehi.
д̣̇асавид̇хасам̣яож̇анаанийд̇и орамбхааг̇ияуд̣̇д̇хамбхааг̇ияабхзд̣̇ад̇о д̣̇асавид̇хасам̣яож̇анаани. саб̣б̣з ажжаружийд̇и саб̣б̣асад̇д̇з ад̇иггамид̇ваа бавад̇д̇аружи. адтамаганд̇и сод̇аабад̇д̇имаг̇г̇адтам̣ санд̇хааяа вад̣̇ад̇и. сод̇аабаннод̇и паладто г̇ахид̇о.
Dasavidhasaṃyojanānīti orambhāgiyuddhambhāgiyabhedato dasavidhasaṃyojanāni. Sabbe accarucīti sabbasatte atikkamitvā pavattaruci. Aṭṭhamakanti sotāpattimaggaṭṭhaṃ sandhāya vadati. Sotāpannoti phalaṭṭho gahito.
соражжанд̇и ‘‘д̇ад̇т̇а гад̇амам̣ соражжам̣? яо гааяиго авийд̇иггамо, ваажасиго авийд̇иггамо, гааяигаваажасиго авийд̇иггамо, ид̣̇ам̣ вужжад̇и соражжам̣, саб̣б̣ааби сийласам̣варо соражжа’’нд̇и (д̇ха. са. 1349) важанад̇о сужисийлам̣ ‘‘соражжа’’нд̇и вуд̇д̇ам̣. гаруун̣аад̇и гарун̣ааб̣рахмавихаарамааха. гарун̣аабуб̣б̣абхааг̇од̇и д̇асса буб̣б̣абхааг̇ам̣ убажаараж̇жхаанам̣ вад̣̇ад̇и.
Soraccanti ‘‘tattha katamaṃ soraccaṃ? Yo kāyiko avītikkamo, vācasiko avītikkamo, kāyikavācasiko avītikkamo, idaṃ vuccati soraccaṃ, sabbāpi sīlasaṃvaro soracca’’nti (dha. sa. 1349) vacanato sucisīlaṃ ‘‘soracca’’nti vuttaṃ. Karūṇāti karuṇābrahmavihāramāha. Karuṇāpubbabhāgoti tassa pubbabhāgaṃ upacārajjhānaṃ vadati.
д̣̇увид̇хзна жхаанзнаад̇и аарамман̣уубаниж̇жхааналагкан̣уубаниж̇жхаанабхзд̣̇ад̇о д̣̇увид̇хзна жхаанаманзна. бан̃жавид̇хамижчааж̇ийвавасзнаад̇и гуханаалабанаанзмид̇д̇игад̇ааниббзсигад̇аалаабхзналаабхам̣ниж̇иг̇ийсанад̇аасан̇каад̇а- бан̃жавид̇хамижчааж̇ийвавасзна. на либбад̇ийд̇и на аллийяад̇и анусаяад̇о аарамман̣агаран̣ад̇о ваа д̇ан̣хаад̣̇идтиабхинивзсаабхаавад̇о. сзсамзд̇т̇а уд̇д̇аанамзва.
Duvidhenajhānenāti ārammaṇūpanijjhānalakkhaṇūpanijjhānabhedato duvidhena jhānamanena. Pañcavidhamicchājīvavasenāti kuhanālapanānemittikatānippesikatālābhenalābhaṃnijigīsanatāsaṅkhāta- pañcavidhamicchājīvavasena. Na lippatīti na allīyati anusayato ārammaṇakaraṇato vā taṇhādiṭṭhiabhinivesābhāvato. Sesamettha uttānameva.
нааг̇асуд̇д̇аван̣н̣анаа нидтид̇аа.
Nāgasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. нааг̇асуд̇д̇ам̣ • 1. Nāgasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 1. нааг̇асуд̇д̇аван̣н̣анаа • 1. Nāgasuttavaṇṇanā
