| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
3. நக்³க³வக்³கோ³
3. Naggavaggo
1. நக்³க³ஸிக்கா²பத³வண்ணனா
1. Naggasikkhāpadavaṇṇanā
நக்³க³வக்³க³ஸ்ஸ பட²மே நக்³கா³தி அனிவத்தா² வா அபாருதா வா. ஏவஞ்ஹி நஹாயந்தியா ஸப்³ப³ப்பயோகே³ஸு து³க்கடங், நஹானபரியோஸானே பாசித்தியங்.
Naggavaggassa paṭhame naggāti anivatthā vā apārutā vā. Evañhi nahāyantiyā sabbappayogesu dukkaṭaṃ, nahānapariyosāne pācittiyaṃ.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ ஏவங் நஹானவத்து²ஸ்மிங் பஞ்ஞத்தங், உத³கஸாடிகசீவரே அச்சி²ன்னே வா நட்டே² வா, ‘‘மஹக்³க⁴ங் இத³ங் தி³ஸ்வா சோராபி ஹரெய்யு’’ந்தி ஏவரூபாஸு ஆபதா³ஸு வா நஹாயந்தியா, உம்மத்திகாதீ³னஞ்ச அனாபத்தி. நக்³க³தா, அனுஞ்ஞாதகாரணாபா⁴வோ, நஹானபரியோஸானந்தி இமானெத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Sāvatthiyaṃ sambahulā bhikkhuniyo ārabbha evaṃ nahānavatthusmiṃ paññattaṃ, udakasāṭikacīvare acchinne vā naṭṭhe vā, ‘‘mahagghaṃ idaṃ disvā corāpi hareyyu’’nti evarūpāsu āpadāsu vā nahāyantiyā, ummattikādīnañca anāpatti. Naggatā, anuññātakāraṇābhāvo, nahānapariyosānanti imānettha tīṇi aṅgāni. Samuṭṭhānādīni eḷakalomasadisānīti.
நக்³க³ஸிக்கா²பத³வண்ணனா நிட்டி²தா.
Naggasikkhāpadavaṇṇanā niṭṭhitā.
2. உத³கஸாடிகஸிக்கா²பத³வண்ணனா
2. Udakasāṭikasikkhāpadavaṇṇanā
து³தியே ஸாவத்தி²யங் ச²ப்³ப³க்³கி³யா பி⁴க்கு²னியோ ஆரப்³ப⁴ அப்பமாணிகாயோ உத³கஸாடிகாயோ தா⁴ரணவத்து²ஸ்மிங் பஞ்ஞத்தங், ஸேஸமெத்த² ஸப்³ப³ங் ரதனவக்³கே³ நிஸீத³னஸிக்கா²பதே³ வுத்தனயேனேவ வேதி³தப்³ப³ந்தி.
Dutiye sāvatthiyaṃ chabbaggiyā bhikkhuniyo ārabbha appamāṇikāyo udakasāṭikāyo dhāraṇavatthusmiṃ paññattaṃ, sesamettha sabbaṃ ratanavagge nisīdanasikkhāpade vuttanayeneva veditabbanti.
உத³கஸாடிகஸிக்கா²பத³வண்ணனா நிட்டி²தா.
Udakasāṭikasikkhāpadavaṇṇanā niṭṭhitā.
3. சீவரஸிப்³ப³னஸிக்கா²பத³வண்ணனா
3. Cīvarasibbanasikkhāpadavaṇṇanā
ததியே விஸிப்³பெ³த்வாதி து³ஸ்ஸிப்³பி³தங் புனஸிப்³ப³னத்தா²ய விஸிப்³பெ³த்வா. அனந்தராயிகினீதி த³ஸஸு அந்தராயேஸு ஏகேகஸ்மிம்பி அஸதி. அஞ்ஞத்ர சதூஹபஞ்சாஹாதி விஸிப்³பி³ததி³வஸதோ பஞ்ச தி³வஸே அதிக்காமெத்வா ‘‘நேவ ஸிப்³பி³ஸ்ஸாமி , ந ஸிப்³பா³பனாய உஸ்ஸுக்கங் கரிஸ்ஸாமீ’’தி து⁴ரங் நிக்கி²த்தமத்தே பாசித்தியங்.
Tatiye visibbetvāti dussibbitaṃ punasibbanatthāya visibbetvā. Anantarāyikinīti dasasu antarāyesu ekekasmimpi asati. Aññatra catūhapañcāhāti visibbitadivasato pañca divase atikkāmetvā ‘‘neva sibbissāmi , na sibbāpanāya ussukkaṃ karissāmī’’ti dhuraṃ nikkhittamatte pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ சீவரங் விஸிப்³பெ³த்வா ந ஸிப்³ப³னவத்து²ஸ்மிங் பஞ்ஞத்தங், திகபாசித்தியங், அனுபஸம்பன்னாய திகது³க்கடங், ததா² உபி⁴ன்னம்பி அஞ்ஞஸ்மிங் பரிக்கா²ரே. யா பன அந்தராயிகினீ வா ஹோதி, பரியேஸித்வா வா கிஞ்சி ந லப⁴தி, கரொந்தீ வா பஞ்சாஹங் அதிக்காமேதி, தஸ்ஸா ச, கி³லானாய ச, ஆபதா³ஸு ச, உம்மத்திகாதீ³னஞ்ச அனாபத்தி. நிவாஸனபாருபனுபக³சீவரதா, உபஸம்பன்னாய ஸந்தகதா, ஸிப்³ப³னத்தா²ய விஸிப்³ப³னங் வா விஸிப்³பா³பனங் வா, அஞ்ஞத்ர அனுஞ்ஞாதகாரணா பஞ்சாஹாதிக்கமோ, து⁴ரனிக்கே²போதி இமானெத்த² பஞ்ச அங்கா³னி. ஸமுட்டா²னாதீ³னி ஸமனுபா⁴ஸனஸதி³ஸானீதி.
Sāvatthiyaṃ thullanandaṃ ārabbha cīvaraṃ visibbetvā na sibbanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, tathā ubhinnampi aññasmiṃ parikkhāre. Yā pana antarāyikinī vā hoti, pariyesitvā vā kiñci na labhati, karontī vā pañcāhaṃ atikkāmeti, tassā ca, gilānāya ca, āpadāsu ca, ummattikādīnañca anāpatti. Nivāsanapārupanupagacīvaratā, upasampannāya santakatā, sibbanatthāya visibbanaṃ vā visibbāpanaṃ vā, aññatra anuññātakāraṇā pañcāhātikkamo, dhuranikkhepoti imānettha pañca aṅgāni. Samuṭṭhānādīni samanubhāsanasadisānīti.
சீவரஸிப்³ப³னஸிக்கா²பத³வண்ணனா நிட்டி²தா.
Cīvarasibbanasikkhāpadavaṇṇanā niṭṭhitā.
4. ஸங்கா⁴டிசாரஸிக்கா²பத³வண்ணனா
4. Saṅghāṭicārasikkhāpadavaṇṇanā
சதுத்தே² பஞ்ச அஹானி பஞ்சாஹங், பஞ்சாஹமேவ பஞ்சாஹிகங். ஸங்கா⁴டீனங் சாரோ ஸங்கா⁴டிசாரோ, பரிபோ⁴க³வஸேன வா ஓதாபனவஸேன வா ஸங்க⁴டிதட்டே²ன ‘ஸங்கா⁴டீ’தி லத்³த⁴னாமங் திசீவரங், உத³கஸாடிகா, ஸங்கச்சிகாதி இமேஸங் பஞ்சன்னங் சீவரானங் பரிவத்தனந்தி அத்தோ². அதிக்காமெய்ய பாசித்தியந்தி ச²ட்டே² அருணுக்³க³மனே ஏகஸ்மிங் சீவரே வுத்தனயேன அபரிவத்திதே ஏகா ஆபத்தி, பஞ்சஸு பஞ்ச.
Catutthe pañca ahāni pañcāhaṃ, pañcāhameva pañcāhikaṃ. Saṅghāṭīnaṃ cāro saṅghāṭicāro, paribhogavasena vā otāpanavasena vā saṅghaṭitaṭṭhena ‘saṅghāṭī’ti laddhanāmaṃ ticīvaraṃ, udakasāṭikā, saṃkaccikāti imesaṃ pañcannaṃ cīvarānaṃ parivattananti attho. Atikkāmeyya pācittiyanti chaṭṭhe aruṇuggamane ekasmiṃ cīvare vuttanayena aparivattite ekā āpatti, pañcasu pañca.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமனவத்து²ஸ்மிங் பஞ்ஞத்தங், திகபாசித்தியங், பஞ்சாஹானதிக்கந்தே த்³விகது³க்கடங். தஸ்மிங் பன அனதிக்கந்தஸஞ்ஞாய, பஞ்சமங் தி³வஸங் பஞ்ச சீவரானி நிவாஸெந்தியா வா பாருபந்தியா வா ஓதாபெந்தியா வா, கி³லானாய, ‘‘இத³ங் மே சீவரங் மஹக்³க⁴ங் ஈதி³ஸே சோரப⁴யே ந ஸக்கா தா⁴ரேது’’ந்தி ஏவரூபாஸு ஆபதா³ஸு, உம்மத்திகாதீ³னஞ்ச அனாபத்தி. பஞ்சன்னங் சீவரானங் அஞ்ஞதரதா, பஞ்சாஹாதிக்கமோ, அனுஞ்ஞாதகாரணாபா⁴வோ, அபரிவத்தனந்தி இமானெத்த² சத்தாரி அங்கா³னி. ஸமுட்டா²னாதீ³னி கதி²னஸதி³ஸானீதி.
Sāvatthiyaṃ sambahulā bhikkhuniyo ārabbha cīvaraṃ nikkhipitvā santaruttarena janapadacārikaṃ pakkamanavatthusmiṃ paññattaṃ, tikapācittiyaṃ, pañcāhānatikkante dvikadukkaṭaṃ. Tasmiṃ pana anatikkantasaññāya, pañcamaṃ divasaṃ pañca cīvarāni nivāsentiyā vā pārupantiyā vā otāpentiyā vā, gilānāya, ‘‘idaṃ me cīvaraṃ mahagghaṃ īdise corabhaye na sakkā dhāretu’’nti evarūpāsu āpadāsu, ummattikādīnañca anāpatti. Pañcannaṃ cīvarānaṃ aññataratā, pañcāhātikkamo, anuññātakāraṇābhāvo, aparivattananti imānettha cattāri aṅgāni. Samuṭṭhānādīni kathinasadisānīti.
ஸங்கா⁴டிசாரஸிக்கா²பத³வண்ணனா நிட்டி²தா.
Saṅghāṭicārasikkhāpadavaṇṇanā niṭṭhitā.
5. சீவரஸங்கமனீயஸிக்கா²பத³வண்ணனா
5. Cīvarasaṅkamanīyasikkhāpadavaṇṇanā
பஞ்சமே சீவரஸங்கமனீயந்தி ஸங்கமேதப்³ப³ங் சீவரங், அஞ்ஞிஸ்ஸா ஸந்தகங் அனாபுச்சா² க³ஹிதங் புன படிதா³தப்³ப³ங் பஞ்சன்னங் அஞ்ஞதரங் சீவரந்தி அத்தோ². தா⁴ரெய்யாதி ஸசே தங் நிவாஸேதி வா பாருபதி வா பாசித்தியங்.
Pañcame cīvarasaṅkamanīyanti saṅkametabbaṃ cīvaraṃ, aññissā santakaṃ anāpucchā gahitaṃ puna paṭidātabbaṃ pañcannaṃ aññataraṃ cīvaranti attho. Dhāreyyāti sace taṃ nivāseti vā pārupati vā pācittiyaṃ.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ பி⁴க்கு²னியா சீவரங் ஆதா³ய அனாபுச்சா² பாருபனவத்து²ஸ்மிங் பஞ்ஞத்தங், திகபாசித்தியங், அனுபஸம்பன்னாய திகது³க்கடங். யா பன தாய வா தி³ன்னங், தங் வா ஆபுச்சா², அச்சி²ன்னநட்ட²சீவரிகா வா ஹுத்வா, ‘‘இத³ங் மே சீவரங் மஹக்³க⁴ங் ஈதி³ஸே சோரப⁴யே ந ஸக்கா தா⁴ரேது’’ந்தி ஏவரூபாஸு ஆபதா³ஸு வா தா⁴ரேதி, தஸ்ஸா, உம்மத்திகாதீ³னஞ்ச அனாபத்தி. சீவரஸங்கமனீயதா, உபஸம்பன்னாய ஸந்தகதா, அனுஞ்ஞாதகாரணாபா⁴வோ, தா⁴ரணந்தி இமானெத்த² சத்தாரி அங்கா³னி. ஸமுட்டா²னாதீ³னி பட²மகதி²னஸதி³ஸானி, இத³ங் பன கிரியாகிரியந்தி.
Sāvatthiyaṃ aññataraṃ bhikkhuniṃ ārabbha bhikkhuniyā cīvaraṃ ādāya anāpucchā pārupanavatthusmiṃ paññattaṃ, tikapācittiyaṃ, anupasampannāya tikadukkaṭaṃ. Yā pana tāya vā dinnaṃ, taṃ vā āpucchā, acchinnanaṭṭhacīvarikā vā hutvā, ‘‘idaṃ me cīvaraṃ mahagghaṃ īdise corabhaye na sakkā dhāretu’’nti evarūpāsu āpadāsu vā dhāreti, tassā, ummattikādīnañca anāpatti. Cīvarasaṅkamanīyatā, upasampannāya santakatā, anuññātakāraṇābhāvo, dhāraṇanti imānettha cattāri aṅgāni. Samuṭṭhānādīni paṭhamakathinasadisāni, idaṃ pana kiriyākiriyanti.
சீவரஸங்கமனீயஸிக்கா²பத³வண்ணனா நிட்டி²தா.
Cīvarasaṅkamanīyasikkhāpadavaṇṇanā niṭṭhitā.
6. க³ணசீவரஸிக்கா²பத³வண்ணனா
6. Gaṇacīvarasikkhāpadavaṇṇanā
ச²ட்டே² க³ணஸ்ஸாதி பி⁴க்கு²னிஸங்க⁴ஸ்ஸ. சீவரலாப⁴ந்தி விகப்பனுபக³ம்பி பச்சி²மங் லபி⁴தப்³ப³ங் சீவரங். அந்தராயங் கரெய்யாதி யதா² தே தா³துகாமா ந தெ³ந்தி, ஏவங் பரக்கமெய்ய. பாசித்தியந்தி ஸசே தஸ்ஸா வசனேன தே ந தெ³ந்தி, பி⁴க்கு²னியா பாசித்தியங்.
Chaṭṭhe gaṇassāti bhikkhunisaṅghassa. Cīvaralābhanti vikappanupagampi pacchimaṃ labhitabbaṃ cīvaraṃ. Antarāyaṃ kareyyāti yathā te dātukāmā na denti, evaṃ parakkameyya. Pācittiyanti sace tassā vacanena te na denti, bhikkhuniyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ க³ணஸ்ஸ சீவரலாப⁴ந்தராயகரணவத்து²ஸ்மிங் பஞ்ஞத்தங், அஞ்ஞஸ்மிங் பரிக்கா²ரே து³க்கடங், ஸம்ப³ஹுலானங் பன ஏகபி⁴க்கு²னியா வா சீவரலாபே⁴பி து³க்கடமேவ. ‘‘ஸமக்³க⁴காலே த³ஸ்ஸதா²’’தி ஏவங் ஆனிஸங்ஸங் த³ஸ்ஸெத்வா நிவாரெந்தியா, உம்மத்திகாதீ³னஞ்ச அனாபத்தி. விகப்பனுபக³பச்சி²மதா, ஸங்க⁴ஸ்ஸ பரிணதபா⁴வோ, வினா ஆனிஸங்ஸத³ஸ்ஸனேன அந்தராயகரணந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.
Sāvatthiyaṃ thullanandaṃ ārabbha gaṇassa cīvaralābhantarāyakaraṇavatthusmiṃ paññattaṃ, aññasmiṃ parikkhāre dukkaṭaṃ, sambahulānaṃ pana ekabhikkhuniyā vā cīvaralābhepi dukkaṭameva. ‘‘Samagghakāle dassathā’’ti evaṃ ānisaṃsaṃ dassetvā nivārentiyā, ummattikādīnañca anāpatti. Vikappanupagapacchimatā, saṅghassa pariṇatabhāvo, vinā ānisaṃsadassanena antarāyakaraṇanti imānettha tīṇi aṅgāni. Samuṭṭhānādīni adinnādānasadisānīti.
க³ணசீவரஸிக்கா²பத³வண்ணனா நிட்டி²தா.
Gaṇacīvarasikkhāpadavaṇṇanā niṭṭhitā.
7. படிபா³ஹனஸிக்கா²பத³வண்ணனா
7. Paṭibāhanasikkhāpadavaṇṇanā
ஸத்தமே த⁴ம்மிகங் சீவரவிப⁴ங்க³ந்தி ஸமக்³கே³ன ஸங்கே⁴ன ஸன்னிபதித்வா கரீயமானங் சீவரவிப⁴ங்க³. படிபா³ஹெய்யாதி படிஸேதெ⁴ய்ய, ஏவங் படிஸேதெ⁴ந்தியா பாசித்தியங்.
Sattame dhammikaṃ cīvaravibhaṅganti samaggena saṅghena sannipatitvā karīyamānaṃ cīvaravibhaṅga. Paṭibāheyyāti paṭisedheyya, evaṃ paṭisedhentiyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ த⁴ம்மிகங் சீவரவிப⁴ங்க³ங் படிபா³ஹனவத்து²ஸ்மிங் பஞ்ஞத்தங், த⁴ம்மிகே வேமதிகாய, அத⁴ம்மிகே த⁴ம்மிகஸஞ்ஞாய சேவ வேமதிகாய ச து³க்கடங். உப⁴யத்த² அத⁴ம்மிகஸஞ்ஞாய, ஆனிஸங்ஸங் த³ஸ்ஸெத்வா படிபா³ஹந்தியா, உம்மத்திகாதீ³னஞ்ச அனாபத்தி. சீவரவிப⁴ங்க³ஸ்ஸ த⁴ம்மிகதா, த⁴ம்மிகஸஞ்ஞிதா, வினா ஆனிஸங்ஸேன படிபா³ஹனந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானேவாதி.
Sāvatthiyaṃ thullanandaṃ ārabbha dhammikaṃ cīvaravibhaṅgaṃ paṭibāhanavatthusmiṃ paññattaṃ, dhammike vematikāya, adhammike dhammikasaññāya ceva vematikāya ca dukkaṭaṃ. Ubhayattha adhammikasaññāya, ānisaṃsaṃ dassetvā paṭibāhantiyā, ummattikādīnañca anāpatti. Cīvaravibhaṅgassa dhammikatā, dhammikasaññitā, vinā ānisaṃsena paṭibāhananti imānettha tīṇi aṅgāni. Samuṭṭhānādīni adinnādānasadisānevāti.
படிபா³ஹனஸிக்கா²பத³வண்ணனா நிட்டி²தா.
Paṭibāhanasikkhāpadavaṇṇanā niṭṭhitā.
8. சீவரதா³னஸிக்கா²பத³வண்ணனா
8. Cīvaradānasikkhāpadavaṇṇanā
அட்ட²மே ஸமணசீவரந்தி கப்பகதங் நிவாஸனபாருபனுபக³ங், ஏவரூபங் ட²பெத்வா பஞ்ச ஸஹத⁴ம்மிகே மாதாபிதரோ ச யஸ்ஸ கஸ்ஸசி க³ஹட்ட²ஸ்ஸ வா பப்³ப³ஜிதஸ்ஸ வா பரிச்சஜித்வா தெ³ந்தியா பாசித்தியங்.
Aṭṭhame samaṇacīvaranti kappakataṃ nivāsanapārupanupagaṃ, evarūpaṃ ṭhapetvā pañca sahadhammike mātāpitaro ca yassa kassaci gahaṭṭhassa vā pabbajitassa vā pariccajitvā dentiyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ அகா³ரிகஸ்ஸ ஸமணசீவரதா³னவத்து²ஸ்மிங் பஞ்ஞத்தங், பி⁴க்கு²னோ து³க்கடங். மாதாபிதூனங் பரிச்சஜித்வாபி, அஞ்ஞேஸங் தாவகாலிகமேவ தெ³ந்தியா, உம்மத்திகாதீ³னஞ்ச அனாபத்தி. ஸமணசீவரதா, ட²பெத்வா ஸஹத⁴ம்மிகே ச மாதாபிதரோ ச அஞ்ஞேஸங் தா³னங், அதாவகாலிகதாதி இமானெத்த² தீணி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.
Sāvatthiyaṃ thullanandaṃ ārabbha agārikassa samaṇacīvaradānavatthusmiṃ paññattaṃ, bhikkhuno dukkaṭaṃ. Mātāpitūnaṃ pariccajitvāpi, aññesaṃ tāvakālikameva dentiyā, ummattikādīnañca anāpatti. Samaṇacīvaratā, ṭhapetvā sahadhammike ca mātāpitaro ca aññesaṃ dānaṃ, atāvakālikatāti imānettha tīṇi aṅgāni. Samuṭṭhānādīni sañcarittasadisānīti.
சீவரதா³னஸிக்கா²பத³வண்ணனா நிட்டி²தா.
Cīvaradānasikkhāpadavaṇṇanā niṭṭhitā.
9. காலஅதிக்கமனஸிக்கா²பத³வண்ணனா
9. Kālaatikkamanasikkhāpadavaṇṇanā
நவமே து³ப்³ப³லசீவரபச்சாஸாயாதி து³ப்³ப³லாய சீவரபச்சாஸாய, ‘‘ஸசே ஸக்கோம த³ஸ்ஸாமா’’தி எத்தகமத்தங் ஸுத்வா உப்பாதி³தாய ஆஸாயாதி அத்தோ² . சீவரகாலஸமயங் அதிக்காமெய்யாதி வஸ்ஸங்வுட்ட²பி⁴க்கு²னீஹி காலசீவரே பா⁴ஜியமானே ‘‘ஆக³மெய்யாத², அய்யே, அத்தி² ஸங்க⁴ஸ்ஸ சீவரபச்சாஸா’’தி வத்வா தங் சீவரவிப⁴ங்க³ங் சீவரகாலங் அதிக்காமெய்ய, தஸ்ஸா அனத்த²தே கதி²னே வஸ்ஸானஸ்ஸ பச்சி²மமாஸங், அத்த²தே கதி²னே கதி²னுப்³பா⁴ரதி³வஸங் அதிக்காமெந்தியா பாசித்தியங்.
Navame dubbalacīvarapaccāsāyāti dubbalāya cīvarapaccāsāya, ‘‘sace sakkoma dassāmā’’ti ettakamattaṃ sutvā uppāditāya āsāyāti attho . Cīvarakālasamayaṃ atikkāmeyyāti vassaṃvuṭṭhabhikkhunīhi kālacīvare bhājiyamāne ‘‘āgameyyātha, ayye, atthi saṅghassa cīvarapaccāsā’’ti vatvā taṃ cīvaravibhaṅgaṃ cīvarakālaṃ atikkāmeyya, tassā anatthate kathine vassānassa pacchimamāsaṃ, atthate kathine kathinubbhāradivasaṃ atikkāmentiyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ து³ப்³ப³லசீவரபச்சாஸாய சீவரகாலஸமயங் அதிக்கமனவத்து²ஸ்மிங் பஞ்ஞத்தங், து³ப்³ப³லசீவரே வேமதிகாய, அது³ப்³ப³லசீவரே து³ப்³ப³லசீவரஸஞ்ஞாய சேவ வேமதிகாய ச து³க்கடங். உப⁴யத்த² அது³ப்³ப³லசீவரஸஞ்ஞாய, கிஞ்சாபி ‘ந ஸக்கோமா’தி வத³ந்தி, ‘‘இதா³னி பன தேஸங் கப்பாஸோ வா உப்பஜ்ஜிஸ்ஸதி, ஸத்³தோ⁴ வா புரிஸோ ஆக³மிஸ்ஸதி, தஸ்மிங் ஆக³தே அத்³தா⁴ த³ஸ்ஸந்தீ’’தி ஏவங் ஆனிஸங்ஸங் த³ஸ்ஸெத்வா நிவாரெந்தியா, உம்மத்திகாதீ³னஞ்ச அனாபத்தி. து³ப்³ப³லசீவரதா, து³ப்³ப³லஸஞ்ஞிதா, வினா ஆனிஸங்ஸேன நிவாரணந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.
Sāvatthiyaṃ thullanandaṃ ārabbha dubbalacīvarapaccāsāya cīvarakālasamayaṃ atikkamanavatthusmiṃ paññattaṃ, dubbalacīvare vematikāya, adubbalacīvare dubbalacīvarasaññāya ceva vematikāya ca dukkaṭaṃ. Ubhayattha adubbalacīvarasaññāya, kiñcāpi ‘na sakkomā’ti vadanti, ‘‘idāni pana tesaṃ kappāso vā uppajjissati, saddho vā puriso āgamissati, tasmiṃ āgate addhā dassantī’’ti evaṃ ānisaṃsaṃ dassetvā nivārentiyā, ummattikādīnañca anāpatti. Dubbalacīvaratā, dubbalasaññitā, vinā ānisaṃsena nivāraṇanti imānettha tīṇi aṅgāni. Samuṭṭhānādīni adinnādānasadisānīti.
காலஅதிக்கமனஸிக்கா²பத³வண்ணனா நிட்டி²தா.
Kālaatikkamanasikkhāpadavaṇṇanā niṭṭhitā.
10. கதி²னுத்³தா⁴ரஸிக்கா²பத³வண்ணனா
10. Kathinuddhārasikkhāpadavaṇṇanā
த³ஸமே த⁴ம்மிகங் கதி²னுத்³தா⁴ரந்தி ஸப்³பா³ஸங் பி⁴க்கு²னீனங் அகாலசீவரங் தா³துகாமேன உபாஸகேன யத்தகோ அத்தா²ரமூலிகோ ஆனிஸங்ஸோ, ததோ அதி⁴கங் வா ஸமகங் வா த³த்வா யாசிதேன ஸமக்³கே³ன பி⁴க்கு²னிஸங்கே⁴ன யங் கதி²னங் ஞத்திது³தியகம்மேன அந்தரா உத்³த⁴ரீயதி, தஸ்ஸ ஸோ உத்³தா⁴ரோ ‘த⁴ம்மிகோ’தி வுச்சதி, ஏவரூபங் கதி²னுத்³தா⁴ரந்தி அத்தோ². படிபா³ஹெய்யாதி நிவாரெய்ய, தஸ்ஸ ஏவரூபங் கதி²னுத்³தா⁴ரங் நிவாரெந்தியா பாசித்தியங்.
Dasame dhammikaṃ kathinuddhāranti sabbāsaṃ bhikkhunīnaṃ akālacīvaraṃ dātukāmena upāsakena yattako atthāramūliko ānisaṃso, tato adhikaṃ vā samakaṃ vā datvā yācitena samaggena bhikkhunisaṅghena yaṃ kathinaṃ ñattidutiyakammena antarā uddharīyati, tassa so uddhāro ‘dhammiko’ti vuccati, evarūpaṃ kathinuddhāranti attho. Paṭibāheyyāti nivāreyya, tassa evarūpaṃ kathinuddhāraṃ nivārentiyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ கதி²னுத்³தா⁴ரங் படிபா³ஹனவத்து²ஸ்மிங் பஞ்ஞத்தங், ஸேஸங் ஸத்தமே வுத்தனயேனேவ வேதி³தப்³ப³ந்தி.
Sāvatthiyaṃ thullanandaṃ ārabbha kathinuddhāraṃ paṭibāhanavatthusmiṃ paññattaṃ, sesaṃ sattame vuttanayeneva veditabbanti.
கதி²னுத்³தா⁴ரஸிக்கா²பத³வண்ணனா நிட்டி²தா.
Kathinuddhārasikkhāpadavaṇṇanā niṭṭhitā.
நக்³க³வக்³கோ³ ததியோ.
Naggavaggo tatiyo.
