| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৩. নগ্গৰগ্গো
3. Naggavaggo
১. নগ্গসিক্খাপদৰণ্ণনা
1. Naggasikkhāpadavaṇṇanā
নগ্গৰগ্গস্স পঠমে নগ্গাতি অনিৰত্থা ৰা অপারুতা ৰা। এৰঞ্হি নহাযন্তিযা সব্বপ্পযোগেসু দুক্কটং, নহানপরিযোসানে পাচিত্তিযং।
Naggavaggassa paṭhame naggāti anivatthā vā apārutā vā. Evañhi nahāyantiyā sabbappayogesu dukkaṭaṃ, nahānapariyosāne pācittiyaṃ.
সাৰত্থিযং সম্বহুলা ভিক্খুনিযো আরব্ভ এৰং নহানৰত্থুস্মিং পঞ্ঞত্তং, উদকসাটিকচীৰরে অচ্ছিন্নে ৰা নট্ঠে ৰা, ‘‘মহগ্ঘং ইদং দিস্ৰা চোরাপি হরেয্যু’’ন্তি এৰরূপাসু আপদাসু ৰা নহাযন্তিযা, উম্মত্তিকাদীনঞ্চ অনাপত্তি। নগ্গতা, অনুঞ্ঞাতকারণাভাৰো, নহানপরিযোসানন্তি ইমানেত্থ তীণি অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ sambahulā bhikkhuniyo ārabbha evaṃ nahānavatthusmiṃ paññattaṃ, udakasāṭikacīvare acchinne vā naṭṭhe vā, ‘‘mahagghaṃ idaṃ disvā corāpi hareyyu’’nti evarūpāsu āpadāsu vā nahāyantiyā, ummattikādīnañca anāpatti. Naggatā, anuññātakāraṇābhāvo, nahānapariyosānanti imānettha tīṇi aṅgāni. Samuṭṭhānādīni eḷakalomasadisānīti.
নগ্গসিক্খাপদৰণ্ণনা নিট্ঠিতা।
Naggasikkhāpadavaṇṇanā niṭṭhitā.
২. উদকসাটিকসিক্খাপদৰণ্ণনা
2. Udakasāṭikasikkhāpadavaṇṇanā
দুতিযে সাৰত্থিযং ছব্বগ্গিযা ভিক্খুনিযো আরব্ভ অপ্পমাণিকাযো উদকসাটিকাযো ধারণৰত্থুস্মিং পঞ্ঞত্তং, সেসমেত্থ সব্বং রতনৰগ্গে নিসীদনসিক্খাপদে ৰুত্তনযেনেৰ ৰেদিতব্বন্তি।
Dutiye sāvatthiyaṃ chabbaggiyā bhikkhuniyo ārabbha appamāṇikāyo udakasāṭikāyo dhāraṇavatthusmiṃ paññattaṃ, sesamettha sabbaṃ ratanavagge nisīdanasikkhāpade vuttanayeneva veditabbanti.
উদকসাটিকসিক্খাপদৰণ্ণনা নিট্ঠিতা।
Udakasāṭikasikkhāpadavaṇṇanā niṭṭhitā.
৩. চীৰরসিব্বনসিক্খাপদৰণ্ণনা
3. Cīvarasibbanasikkhāpadavaṇṇanā
ততিযে ৰিসিব্বেত্ৰাতি দুস্সিব্বিতং পুনসিব্বনত্থায ৰিসিব্বেত্ৰা। অনন্তরাযিকিনীতি দসসু অন্তরাযেসু একেকস্মিম্পি অসতি। অঞ্ঞত্র চতূহপঞ্চাহাতি ৰিসিব্বিতদিৰসতো পঞ্চ দিৰসে অতিক্কামেত্ৰা ‘‘নেৰ সিব্বিস্সামি , ন সিব্বাপনায উস্সুক্কং করিস্সামী’’তি ধুরং নিক্খিত্তমত্তে পাচিত্তিযং।
Tatiye visibbetvāti dussibbitaṃ punasibbanatthāya visibbetvā. Anantarāyikinīti dasasu antarāyesu ekekasmimpi asati. Aññatra catūhapañcāhāti visibbitadivasato pañca divase atikkāmetvā ‘‘neva sibbissāmi , na sibbāpanāya ussukkaṃ karissāmī’’ti dhuraṃ nikkhittamatte pācittiyaṃ.
সাৰত্থিযং থুল্লনন্দং আরব্ভ চীৰরং ৰিসিব্বেত্ৰা ন সিব্বনৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, তথা উভিন্নম্পি অঞ্ঞস্মিং পরিক্খারে। যা পন অন্তরাযিকিনী ৰা হোতি, পরিযেসিত্ৰা ৰা কিঞ্চি ন লভতি, করোন্তী ৰা পঞ্চাহং অতিক্কামেতি, তস্সা চ, গিলানায চ, আপদাসু চ, উম্মত্তিকাদীনঞ্চ অনাপত্তি। নিৰাসনপারুপনুপগচীৰরতা, উপসম্পন্নায সন্তকতা, সিব্বনত্থায ৰিসিব্বনং ৰা ৰিসিব্বাপনং ৰা, অঞ্ঞত্র অনুঞ্ঞাতকারণা পঞ্চাহাতিক্কমো, ধুরনিক্খেপোতি ইমানেত্থ পঞ্চ অঙ্গানি। সমুট্ঠানাদীনি সমনুভাসনসদিসানীতি।
Sāvatthiyaṃ thullanandaṃ ārabbha cīvaraṃ visibbetvā na sibbanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, tathā ubhinnampi aññasmiṃ parikkhāre. Yā pana antarāyikinī vā hoti, pariyesitvā vā kiñci na labhati, karontī vā pañcāhaṃ atikkāmeti, tassā ca, gilānāya ca, āpadāsu ca, ummattikādīnañca anāpatti. Nivāsanapārupanupagacīvaratā, upasampannāya santakatā, sibbanatthāya visibbanaṃ vā visibbāpanaṃ vā, aññatra anuññātakāraṇā pañcāhātikkamo, dhuranikkhepoti imānettha pañca aṅgāni. Samuṭṭhānādīni samanubhāsanasadisānīti.
চীৰরসিব্বনসিক্খাপদৰণ্ণনা নিট্ঠিতা।
Cīvarasibbanasikkhāpadavaṇṇanā niṭṭhitā.
৪. সঙ্ঘাটিচারসিক্খাপদৰণ্ণনা
4. Saṅghāṭicārasikkhāpadavaṇṇanā
চতুত্থে পঞ্চ অহানি পঞ্চাহং, পঞ্চাহমেৰ পঞ্চাহিকং। সঙ্ঘাটীনং চারো সঙ্ঘাটিচারো, পরিভোগৰসেন ৰা ওতাপনৰসেন ৰা সঙ্ঘটিতট্ঠেন ‘সঙ্ঘাটী’তি লদ্ধনামং তিচীৰরং, উদকসাটিকা, সংকচ্চিকাতি ইমেসং পঞ্চন্নং চীৰরানং পরিৰত্তনন্তি অত্থো। অতিক্কামেয্য পাচিত্তিযন্তি ছট্ঠে অরুণুগ্গমনে একস্মিং চীৰরে ৰুত্তনযেন অপরিৰত্তিতে একা আপত্তি, পঞ্চসু পঞ্চ।
Catutthe pañca ahāni pañcāhaṃ, pañcāhameva pañcāhikaṃ. Saṅghāṭīnaṃ cāro saṅghāṭicāro, paribhogavasena vā otāpanavasena vā saṅghaṭitaṭṭhena ‘saṅghāṭī’ti laddhanāmaṃ ticīvaraṃ, udakasāṭikā, saṃkaccikāti imesaṃ pañcannaṃ cīvarānaṃ parivattananti attho. Atikkāmeyya pācittiyanti chaṭṭhe aruṇuggamane ekasmiṃ cīvare vuttanayena aparivattite ekā āpatti, pañcasu pañca.
সাৰত্থিযং সম্বহুলা ভিক্খুনিযো আরব্ভ চীৰরং নিক্খিপিত্ৰা সন্তরুত্তরেন জনপদচারিকং পক্কমনৰত্থুস্মিং পঞ্ঞত্তং, তিকপাচিত্তিযং, পঞ্চাহানতিক্কন্তে দ্ৰিকদুক্কটং। তস্মিং পন অনতিক্কন্তসঞ্ঞায, পঞ্চমং দিৰসং পঞ্চ চীৰরানি নিৰাসেন্তিযা ৰা পারুপন্তিযা ৰা ওতাপেন্তিযা ৰা, গিলানায, ‘‘ইদং মে চীৰরং মহগ্ঘং ঈদিসে চোরভযে ন সক্কা ধারেতু’’ন্তি এৰরূপাসু আপদাসু, উম্মত্তিকাদীনঞ্চ অনাপত্তি। পঞ্চন্নং চীৰরানং অঞ্ঞতরতা, পঞ্চাহাতিক্কমো, অনুঞ্ঞাতকারণাভাৰো, অপরিৰত্তনন্তি ইমানেত্থ চত্তারি অঙ্গানি। সমুট্ঠানাদীনি কথিনসদিসানীতি।
Sāvatthiyaṃ sambahulā bhikkhuniyo ārabbha cīvaraṃ nikkhipitvā santaruttarena janapadacārikaṃ pakkamanavatthusmiṃ paññattaṃ, tikapācittiyaṃ, pañcāhānatikkante dvikadukkaṭaṃ. Tasmiṃ pana anatikkantasaññāya, pañcamaṃ divasaṃ pañca cīvarāni nivāsentiyā vā pārupantiyā vā otāpentiyā vā, gilānāya, ‘‘idaṃ me cīvaraṃ mahagghaṃ īdise corabhaye na sakkā dhāretu’’nti evarūpāsu āpadāsu, ummattikādīnañca anāpatti. Pañcannaṃ cīvarānaṃ aññataratā, pañcāhātikkamo, anuññātakāraṇābhāvo, aparivattananti imānettha cattāri aṅgāni. Samuṭṭhānādīni kathinasadisānīti.
সঙ্ঘাটিচারসিক্খাপদৰণ্ণনা নিট্ঠিতা।
Saṅghāṭicārasikkhāpadavaṇṇanā niṭṭhitā.
৫. চীৰরসঙ্কমনীযসিক্খাপদৰণ্ণনা
5. Cīvarasaṅkamanīyasikkhāpadavaṇṇanā
পঞ্চমে চীৰরসঙ্কমনীযন্তি সঙ্কমেতব্বং চীৰরং, অঞ্ঞিস্সা সন্তকং অনাপুচ্ছা গহিতং পুন পটিদাতব্বং পঞ্চন্নং অঞ্ঞতরং চীৰরন্তি অত্থো। ধারেয্যাতি সচে তং নিৰাসেতি ৰা পারুপতি ৰা পাচিত্তিযং।
Pañcame cīvarasaṅkamanīyanti saṅkametabbaṃ cīvaraṃ, aññissā santakaṃ anāpucchā gahitaṃ puna paṭidātabbaṃ pañcannaṃ aññataraṃ cīvaranti attho. Dhāreyyāti sace taṃ nivāseti vā pārupati vā pācittiyaṃ.
সাৰত্থিযং অঞ্ঞতরং ভিক্খুনিং আরব্ভ ভিক্খুনিযা চীৰরং আদায অনাপুচ্ছা পারুপনৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং। যা পন তায ৰা দিন্নং, তং ৰা আপুচ্ছা, অচ্ছিন্ননট্ঠচীৰরিকা ৰা হুত্ৰা, ‘‘ইদং মে চীৰরং মহগ্ঘং ঈদিসে চোরভযে ন সক্কা ধারেতু’’ন্তি এৰরূপাসু আপদাসু ৰা ধারেতি, তস্সা, উম্মত্তিকাদীনঞ্চ অনাপত্তি। চীৰরসঙ্কমনীযতা, উপসম্পন্নায সন্তকতা, অনুঞ্ঞাতকারণাভাৰো, ধারণন্তি ইমানেত্থ চত্তারি অঙ্গানি। সমুট্ঠানাদীনি পঠমকথিনসদিসানি, ইদং পন কিরিযাকিরিযন্তি।
Sāvatthiyaṃ aññataraṃ bhikkhuniṃ ārabbha bhikkhuniyā cīvaraṃ ādāya anāpucchā pārupanavatthusmiṃ paññattaṃ, tikapācittiyaṃ, anupasampannāya tikadukkaṭaṃ. Yā pana tāya vā dinnaṃ, taṃ vā āpucchā, acchinnanaṭṭhacīvarikā vā hutvā, ‘‘idaṃ me cīvaraṃ mahagghaṃ īdise corabhaye na sakkā dhāretu’’nti evarūpāsu āpadāsu vā dhāreti, tassā, ummattikādīnañca anāpatti. Cīvarasaṅkamanīyatā, upasampannāya santakatā, anuññātakāraṇābhāvo, dhāraṇanti imānettha cattāri aṅgāni. Samuṭṭhānādīni paṭhamakathinasadisāni, idaṃ pana kiriyākiriyanti.
চীৰরসঙ্কমনীযসিক্খাপদৰণ্ণনা নিট্ঠিতা।
Cīvarasaṅkamanīyasikkhāpadavaṇṇanā niṭṭhitā.
৬. গণচীৰরসিক্খাপদৰণ্ণনা
6. Gaṇacīvarasikkhāpadavaṇṇanā
ছট্ঠে গণস্সাতি ভিক্খুনিসঙ্ঘস্স। চীৰরলাভন্তি ৰিকপ্পনুপগম্পি পচ্ছিমং লভিতব্বং চীৰরং। অন্তরাযং করেয্যাতি যথা তে দাতুকামা ন দেন্তি, এৰং পরক্কমেয্য। পাচিত্তিযন্তি সচে তস্সা ৰচনেন তে ন দেন্তি, ভিক্খুনিযা পাচিত্তিযং।
Chaṭṭhe gaṇassāti bhikkhunisaṅghassa. Cīvaralābhanti vikappanupagampi pacchimaṃ labhitabbaṃ cīvaraṃ. Antarāyaṃ kareyyāti yathā te dātukāmā na denti, evaṃ parakkameyya. Pācittiyanti sace tassā vacanena te na denti, bhikkhuniyā pācittiyaṃ.
সাৰত্থিযং থুল্লনন্দং আরব্ভ গণস্স চীৰরলাভন্তরাযকরণৰত্থুস্মিং পঞ্ঞত্তং, অঞ্ঞস্মিং পরিক্খারে দুক্কটং, সম্বহুলানং পন একভিক্খুনিযা ৰা চীৰরলাভেপি দুক্কটমেৰ। ‘‘সমগ্ঘকালে দস্সথা’’তি এৰং আনিসংসং দস্সেত্ৰা নিৰারেন্তিযা, উম্মত্তিকাদীনঞ্চ অনাপত্তি। ৰিকপ্পনুপগপচ্ছিমতা, সঙ্ঘস্স পরিণতভাৰো, ৰিনা আনিসংসদস্সনেন অন্তরাযকরণন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানীতি।
Sāvatthiyaṃ thullanandaṃ ārabbha gaṇassa cīvaralābhantarāyakaraṇavatthusmiṃ paññattaṃ, aññasmiṃ parikkhāre dukkaṭaṃ, sambahulānaṃ pana ekabhikkhuniyā vā cīvaralābhepi dukkaṭameva. ‘‘Samagghakāle dassathā’’ti evaṃ ānisaṃsaṃ dassetvā nivārentiyā, ummattikādīnañca anāpatti. Vikappanupagapacchimatā, saṅghassa pariṇatabhāvo, vinā ānisaṃsadassanena antarāyakaraṇanti imānettha tīṇi aṅgāni. Samuṭṭhānādīni adinnādānasadisānīti.
গণচীৰরসিক্খাপদৰণ্ণনা নিট্ঠিতা।
Gaṇacīvarasikkhāpadavaṇṇanā niṭṭhitā.
৭. পটিবাহনসিক্খাপদৰণ্ণনা
7. Paṭibāhanasikkhāpadavaṇṇanā
সত্তমে ধম্মিকং চীৰরৰিভঙ্গন্তি সমগ্গেন সঙ্ঘেন সন্নিপতিত্ৰা করীযমানং চীৰরৰিভঙ্গ। পটিবাহেয্যাতি পটিসেধেয্য, এৰং পটিসেধেন্তিযা পাচিত্তিযং।
Sattame dhammikaṃ cīvaravibhaṅganti samaggena saṅghena sannipatitvā karīyamānaṃ cīvaravibhaṅga. Paṭibāheyyāti paṭisedheyya, evaṃ paṭisedhentiyā pācittiyaṃ.
সাৰত্থিযং থুল্লনন্দং আরব্ভ ধম্মিকং চীৰরৰিভঙ্গং পটিবাহনৰত্থুস্মিং পঞ্ঞত্তং, ধম্মিকে ৰেমতিকায, অধম্মিকে ধম্মিকসঞ্ঞায চেৰ ৰেমতিকায চ দুক্কটং। উভযত্থ অধম্মিকসঞ্ঞায, আনিসংসং দস্সেত্ৰা পটিবাহন্তিযা, উম্মত্তিকাদীনঞ্চ অনাপত্তি। চীৰরৰিভঙ্গস্স ধম্মিকতা, ধম্মিকসঞ্ঞিতা, ৰিনা আনিসংসেন পটিবাহনন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানেৰাতি।
Sāvatthiyaṃ thullanandaṃ ārabbha dhammikaṃ cīvaravibhaṅgaṃ paṭibāhanavatthusmiṃ paññattaṃ, dhammike vematikāya, adhammike dhammikasaññāya ceva vematikāya ca dukkaṭaṃ. Ubhayattha adhammikasaññāya, ānisaṃsaṃ dassetvā paṭibāhantiyā, ummattikādīnañca anāpatti. Cīvaravibhaṅgassa dhammikatā, dhammikasaññitā, vinā ānisaṃsena paṭibāhananti imānettha tīṇi aṅgāni. Samuṭṭhānādīni adinnādānasadisānevāti.
পটিবাহনসিক্খাপদৰণ্ণনা নিট্ঠিতা।
Paṭibāhanasikkhāpadavaṇṇanā niṭṭhitā.
৮. চীৰরদানসিক্খাপদৰণ্ণনা
8. Cīvaradānasikkhāpadavaṇṇanā
অট্ঠমে সমণচীৰরন্তি কপ্পকতং নিৰাসনপারুপনুপগং, এৰরূপং ঠপেত্ৰা পঞ্চ সহধম্মিকে মাতাপিতরো চ যস্স কস্সচি গহট্ঠস্স ৰা পব্বজিতস্স ৰা পরিচ্চজিত্ৰা দেন্তিযা পাচিত্তিযং।
Aṭṭhame samaṇacīvaranti kappakataṃ nivāsanapārupanupagaṃ, evarūpaṃ ṭhapetvā pañca sahadhammike mātāpitaro ca yassa kassaci gahaṭṭhassa vā pabbajitassa vā pariccajitvā dentiyā pācittiyaṃ.
সাৰত্থিযং থুল্লনন্দং আরব্ভ অগারিকস্স সমণচীৰরদানৰত্থুস্মিং পঞ্ঞত্তং, ভিক্খুনো দুক্কটং। মাতাপিতূনং পরিচ্চজিত্ৰাপি, অঞ্ঞেসং তাৰকালিকমেৰ দেন্তিযা, উম্মত্তিকাদীনঞ্চ অনাপত্তি। সমণচীৰরতা, ঠপেত্ৰা সহধম্মিকে চ মাতাপিতরো চ অঞ্ঞেসং দানং, অতাৰকালিকতাতি ইমানেত্থ তীণি অঙ্গানি। সমুট্ঠানাদীনি সঞ্চরিত্তসদিসানীতি।
Sāvatthiyaṃ thullanandaṃ ārabbha agārikassa samaṇacīvaradānavatthusmiṃ paññattaṃ, bhikkhuno dukkaṭaṃ. Mātāpitūnaṃ pariccajitvāpi, aññesaṃ tāvakālikameva dentiyā, ummattikādīnañca anāpatti. Samaṇacīvaratā, ṭhapetvā sahadhammike ca mātāpitaro ca aññesaṃ dānaṃ, atāvakālikatāti imānettha tīṇi aṅgāni. Samuṭṭhānādīni sañcarittasadisānīti.
চীৰরদানসিক্খাপদৰণ্ণনা নিট্ঠিতা।
Cīvaradānasikkhāpadavaṇṇanā niṭṭhitā.
৯. কালঅতিক্কমনসিক্খাপদৰণ্ণনা
9. Kālaatikkamanasikkhāpadavaṇṇanā
নৰমে দুব্বলচীৰরপচ্চাসাযাতি দুব্বলায চীৰরপচ্চাসায, ‘‘সচে সক্কোম দস্সামা’’তি এত্তকমত্তং সুত্ৰা উপ্পাদিতায আসাযাতি অত্থো । চীৰরকালসমযং অতিক্কামেয্যাতি ৰস্সংৰুট্ঠভিক্খুনীহি কালচীৰরে ভাজিযমানে ‘‘আগমেয্যাথ, অয্যে, অত্থি সঙ্ঘস্স চীৰরপচ্চাসা’’তি ৰত্ৰা তং চীৰরৰিভঙ্গং চীৰরকালং অতিক্কামেয্য, তস্সা অনত্থতে কথিনে ৰস্সানস্স পচ্ছিমমাসং, অত্থতে কথিনে কথিনুব্ভারদিৰসং অতিক্কামেন্তিযা পাচিত্তিযং।
Navame dubbalacīvarapaccāsāyāti dubbalāya cīvarapaccāsāya, ‘‘sace sakkoma dassāmā’’ti ettakamattaṃ sutvā uppāditāya āsāyāti attho . Cīvarakālasamayaṃ atikkāmeyyāti vassaṃvuṭṭhabhikkhunīhi kālacīvare bhājiyamāne ‘‘āgameyyātha, ayye, atthi saṅghassa cīvarapaccāsā’’ti vatvā taṃ cīvaravibhaṅgaṃ cīvarakālaṃ atikkāmeyya, tassā anatthate kathine vassānassa pacchimamāsaṃ, atthate kathine kathinubbhāradivasaṃ atikkāmentiyā pācittiyaṃ.
সাৰত্থিযং থুল্লনন্দং আরব্ভ দুব্বলচীৰরপচ্চাসায চীৰরকালসমযং অতিক্কমনৰত্থুস্মিং পঞ্ঞত্তং, দুব্বলচীৰরে ৰেমতিকায, অদুব্বলচীৰরে দুব্বলচীৰরসঞ্ঞায চেৰ ৰেমতিকায চ দুক্কটং। উভযত্থ অদুব্বলচীৰরসঞ্ঞায, কিঞ্চাপি ‘ন সক্কোমা’তি ৰদন্তি, ‘‘ইদানি পন তেসং কপ্পাসো ৰা উপ্পজ্জিস্সতি, সদ্ধো ৰা পুরিসো আগমিস্সতি, তস্মিং আগতে অদ্ধা দস্সন্তী’’তি এৰং আনিসংসং দস্সেত্ৰা নিৰারেন্তিযা, উম্মত্তিকাদীনঞ্চ অনাপত্তি। দুব্বলচীৰরতা, দুব্বলসঞ্ঞিতা, ৰিনা আনিসংসেন নিৰারণন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানীতি।
Sāvatthiyaṃ thullanandaṃ ārabbha dubbalacīvarapaccāsāya cīvarakālasamayaṃ atikkamanavatthusmiṃ paññattaṃ, dubbalacīvare vematikāya, adubbalacīvare dubbalacīvarasaññāya ceva vematikāya ca dukkaṭaṃ. Ubhayattha adubbalacīvarasaññāya, kiñcāpi ‘na sakkomā’ti vadanti, ‘‘idāni pana tesaṃ kappāso vā uppajjissati, saddho vā puriso āgamissati, tasmiṃ āgate addhā dassantī’’ti evaṃ ānisaṃsaṃ dassetvā nivārentiyā, ummattikādīnañca anāpatti. Dubbalacīvaratā, dubbalasaññitā, vinā ānisaṃsena nivāraṇanti imānettha tīṇi aṅgāni. Samuṭṭhānādīni adinnādānasadisānīti.
কালঅতিক্কমনসিক্খাপদৰণ্ণনা নিট্ঠিতা।
Kālaatikkamanasikkhāpadavaṇṇanā niṭṭhitā.
১০. কথিনুদ্ধারসিক্খাপদৰণ্ণনা
10. Kathinuddhārasikkhāpadavaṇṇanā
দসমে ধম্মিকং কথিনুদ্ধারন্তি সব্বাসং ভিক্খুনীনং অকালচীৰরং দাতুকামেন উপাসকেন যত্তকো অত্থারমূলিকো আনিসংসো, ততো অধিকং ৰা সমকং ৰা দত্ৰা যাচিতেন সমগ্গেন ভিক্খুনিসঙ্ঘেন যং কথিনং ঞত্তিদুতিযকম্মেন অন্তরা উদ্ধরীযতি, তস্স সো উদ্ধারো ‘ধম্মিকো’তি ৰুচ্চতি, এৰরূপং কথিনুদ্ধারন্তি অত্থো। পটিবাহেয্যাতি নিৰারেয্য, তস্স এৰরূপং কথিনুদ্ধারং নিৰারেন্তিযা পাচিত্তিযং।
Dasame dhammikaṃ kathinuddhāranti sabbāsaṃ bhikkhunīnaṃ akālacīvaraṃ dātukāmena upāsakena yattako atthāramūliko ānisaṃso, tato adhikaṃ vā samakaṃ vā datvā yācitena samaggena bhikkhunisaṅghena yaṃ kathinaṃ ñattidutiyakammena antarā uddharīyati, tassa so uddhāro ‘dhammiko’ti vuccati, evarūpaṃ kathinuddhāranti attho. Paṭibāheyyāti nivāreyya, tassa evarūpaṃ kathinuddhāraṃ nivārentiyā pācittiyaṃ.
সাৰত্থিযং থুল্লনন্দং আরব্ভ কথিনুদ্ধারং পটিবাহনৰত্থুস্মিং পঞ্ঞত্তং, সেসং সত্তমে ৰুত্তনযেনেৰ ৰেদিতব্বন্তি।
Sāvatthiyaṃ thullanandaṃ ārabbha kathinuddhāraṃ paṭibāhanavatthusmiṃ paññattaṃ, sesaṃ sattame vuttanayeneva veditabbanti.
কথিনুদ্ধারসিক্খাপদৰণ্ণনা নিট্ঠিতা।
Kathinuddhārasikkhāpadavaṇṇanā niṭṭhitā.
নগ্গৰগ্গো ততিযো।
Naggavaggo tatiyo.
