| Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi |
೩. ನಗ್ಗವಗ್ಗೋ
3. Naggavaggo
೧. ನಗ್ಗಸಿಕ್ಖಾಪದವಣ್ಣನಾ
1. Naggasikkhāpadavaṇṇanā
ನಗ್ಗವಗ್ಗಸ್ಸ ಪಠಮೇ ನಗ್ಗಾತಿ ಅನಿವತ್ಥಾ ವಾ ಅಪಾರುತಾ ವಾ। ಏವಞ್ಹಿ ನಹಾಯನ್ತಿಯಾ ಸಬ್ಬಪ್ಪಯೋಗೇಸು ದುಕ್ಕಟಂ, ನಹಾನಪರಿಯೋಸಾನೇ ಪಾಚಿತ್ತಿಯಂ।
Naggavaggassa paṭhame naggāti anivatthā vā apārutā vā. Evañhi nahāyantiyā sabbappayogesu dukkaṭaṃ, nahānapariyosāne pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಏವಂ ನಹಾನವತ್ಥುಸ್ಮಿಂ ಪಞ್ಞತ್ತಂ, ಉದಕಸಾಟಿಕಚೀವರೇ ಅಚ್ಛಿನ್ನೇ ವಾ ನಟ್ಠೇ ವಾ, ‘‘ಮಹಗ್ಘಂ ಇದಂ ದಿಸ್ವಾ ಚೋರಾಪಿ ಹರೇಯ್ಯು’’ನ್ತಿ ಏವರೂಪಾಸು ಆಪದಾಸು ವಾ ನಹಾಯನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ನಗ್ಗತಾ, ಅನುಞ್ಞಾತಕಾರಣಾಭಾವೋ, ನಹಾನಪರಿಯೋಸಾನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ sambahulā bhikkhuniyo ārabbha evaṃ nahānavatthusmiṃ paññattaṃ, udakasāṭikacīvare acchinne vā naṭṭhe vā, ‘‘mahagghaṃ idaṃ disvā corāpi hareyyu’’nti evarūpāsu āpadāsu vā nahāyantiyā, ummattikādīnañca anāpatti. Naggatā, anuññātakāraṇābhāvo, nahānapariyosānanti imānettha tīṇi aṅgāni. Samuṭṭhānādīni eḷakalomasadisānīti.
ನಗ್ಗಸಿಕ್ಖಾಪದವಣ್ಣನಾ ನಿಟ್ಠಿತಾ।
Naggasikkhāpadavaṇṇanā niṭṭhitā.
೨. ಉದಕಸಾಟಿಕಸಿಕ್ಖಾಪದವಣ್ಣನಾ
2. Udakasāṭikasikkhāpadavaṇṇanā
ದುತಿಯೇ ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಅಪ್ಪಮಾಣಿಕಾಯೋ ಉದಕಸಾಟಿಕಾಯೋ ಧಾರಣವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥ ಸಬ್ಬಂ ರತನವಗ್ಗೇ ನಿಸೀದನಸಿಕ್ಖಾಪದೇ ವುತ್ತನಯೇನೇವ ವೇದಿತಬ್ಬನ್ತಿ।
Dutiye sāvatthiyaṃ chabbaggiyā bhikkhuniyo ārabbha appamāṇikāyo udakasāṭikāyo dhāraṇavatthusmiṃ paññattaṃ, sesamettha sabbaṃ ratanavagge nisīdanasikkhāpade vuttanayeneva veditabbanti.
ಉದಕಸಾಟಿಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Udakasāṭikasikkhāpadavaṇṇanā niṭṭhitā.
೩. ಚೀವರಸಿಬ್ಬನಸಿಕ್ಖಾಪದವಣ್ಣನಾ
3. Cīvarasibbanasikkhāpadavaṇṇanā
ತತಿಯೇ ವಿಸಿಬ್ಬೇತ್ವಾತಿ ದುಸ್ಸಿಬ್ಬಿತಂ ಪುನಸಿಬ್ಬನತ್ಥಾಯ ವಿಸಿಬ್ಬೇತ್ವಾ। ಅನನ್ತರಾಯಿಕಿನೀತಿ ದಸಸು ಅನ್ತರಾಯೇಸು ಏಕೇಕಸ್ಮಿಮ್ಪಿ ಅಸತಿ। ಅಞ್ಞತ್ರ ಚತೂಹಪಞ್ಚಾಹಾತಿ ವಿಸಿಬ್ಬಿತದಿವಸತೋ ಪಞ್ಚ ದಿವಸೇ ಅತಿಕ್ಕಾಮೇತ್ವಾ ‘‘ನೇವ ಸಿಬ್ಬಿಸ್ಸಾಮಿ , ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರಿಸ್ಸಾಮೀ’’ತಿ ಧುರಂ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ।
Tatiye visibbetvāti dussibbitaṃ punasibbanatthāya visibbetvā. Anantarāyikinīti dasasu antarāyesu ekekasmimpi asati. Aññatra catūhapañcāhāti visibbitadivasato pañca divase atikkāmetvā ‘‘neva sibbissāmi , na sibbāpanāya ussukkaṃ karissāmī’’ti dhuraṃ nikkhittamatte pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಚೀವರಂ ವಿಸಿಬ್ಬೇತ್ವಾ ನ ಸಿಬ್ಬನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ, ತಥಾ ಉಭಿನ್ನಮ್ಪಿ ಅಞ್ಞಸ್ಮಿಂ ಪರಿಕ್ಖಾರೇ। ಯಾ ಪನ ಅನ್ತರಾಯಿಕಿನೀ ವಾ ಹೋತಿ, ಪರಿಯೇಸಿತ್ವಾ ವಾ ಕಿಞ್ಚಿ ನ ಲಭತಿ, ಕರೋನ್ತೀ ವಾ ಪಞ್ಚಾಹಂ ಅತಿಕ್ಕಾಮೇತಿ, ತಸ್ಸಾ ಚ, ಗಿಲಾನಾಯ ಚ, ಆಪದಾಸು ಚ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ನಿವಾಸನಪಾರುಪನುಪಗಚೀವರತಾ, ಉಪಸಮ್ಪನ್ನಾಯ ಸನ್ತಕತಾ, ಸಿಬ್ಬನತ್ಥಾಯ ವಿಸಿಬ್ಬನಂ ವಾ ವಿಸಿಬ್ಬಾಪನಂ ವಾ, ಅಞ್ಞತ್ರ ಅನುಞ್ಞಾತಕಾರಣಾ ಪಞ್ಚಾಹಾತಿಕ್ಕಮೋ, ಧುರನಿಕ್ಖೇಪೋತಿ ಇಮಾನೇತ್ಥ ಪಞ್ಚ ಅಙ್ಗಾನಿ। ಸಮುಟ್ಠಾನಾದೀನಿ ಸಮನುಭಾಸನಸದಿಸಾನೀತಿ।
Sāvatthiyaṃ thullanandaṃ ārabbha cīvaraṃ visibbetvā na sibbanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, tathā ubhinnampi aññasmiṃ parikkhāre. Yā pana antarāyikinī vā hoti, pariyesitvā vā kiñci na labhati, karontī vā pañcāhaṃ atikkāmeti, tassā ca, gilānāya ca, āpadāsu ca, ummattikādīnañca anāpatti. Nivāsanapārupanupagacīvaratā, upasampannāya santakatā, sibbanatthāya visibbanaṃ vā visibbāpanaṃ vā, aññatra anuññātakāraṇā pañcāhātikkamo, dhuranikkhepoti imānettha pañca aṅgāni. Samuṭṭhānādīni samanubhāsanasadisānīti.
ಚೀವರಸಿಬ್ಬನಸಿಕ್ಖಾಪದವಣ್ಣನಾ ನಿಟ್ಠಿತಾ।
Cīvarasibbanasikkhāpadavaṇṇanā niṭṭhitā.
೪. ಸಙ್ಘಾಟಿಚಾರಸಿಕ್ಖಾಪದವಣ್ಣನಾ
4. Saṅghāṭicārasikkhāpadavaṇṇanā
ಚತುತ್ಥೇ ಪಞ್ಚ ಅಹಾನಿ ಪಞ್ಚಾಹಂ, ಪಞ್ಚಾಹಮೇವ ಪಞ್ಚಾಹಿಕಂ। ಸಙ್ಘಾಟೀನಂ ಚಾರೋ ಸಙ್ಘಾಟಿಚಾರೋ, ಪರಿಭೋಗವಸೇನ ವಾ ಓತಾಪನವಸೇನ ವಾ ಸಙ್ಘಟಿತಟ್ಠೇನ ‘ಸಙ್ಘಾಟೀ’ತಿ ಲದ್ಧನಾಮಂ ತಿಚೀವರಂ, ಉದಕಸಾಟಿಕಾ, ಸಂಕಚ್ಚಿಕಾತಿ ಇಮೇಸಂ ಪಞ್ಚನ್ನಂ ಚೀವರಾನಂ ಪರಿವತ್ತನನ್ತಿ ಅತ್ಥೋ। ಅತಿಕ್ಕಾಮೇಯ್ಯ ಪಾಚಿತ್ತಿಯನ್ತಿ ಛಟ್ಠೇ ಅರುಣುಗ್ಗಮನೇ ಏಕಸ್ಮಿಂ ಚೀವರೇ ವುತ್ತನಯೇನ ಅಪರಿವತ್ತಿತೇ ಏಕಾ ಆಪತ್ತಿ, ಪಞ್ಚಸು ಪಞ್ಚ।
Catutthe pañca ahāni pañcāhaṃ, pañcāhameva pañcāhikaṃ. Saṅghāṭīnaṃ cāro saṅghāṭicāro, paribhogavasena vā otāpanavasena vā saṅghaṭitaṭṭhena ‘saṅghāṭī’ti laddhanāmaṃ ticīvaraṃ, udakasāṭikā, saṃkaccikāti imesaṃ pañcannaṃ cīvarānaṃ parivattananti attho. Atikkāmeyya pācittiyanti chaṭṭhe aruṇuggamane ekasmiṃ cīvare vuttanayena aparivattite ekā āpatti, pañcasu pañca.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಚೀವರಂ ನಿಕ್ಖಿಪಿತ್ವಾ ಸನ್ತರುತ್ತರೇನ ಜನಪದಚಾರಿಕಂ ಪಕ್ಕಮನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಪಞ್ಚಾಹಾನತಿಕ್ಕನ್ತೇ ದ್ವಿಕದುಕ್ಕಟಂ। ತಸ್ಮಿಂ ಪನ ಅನತಿಕ್ಕನ್ತಸಞ್ಞಾಯ, ಪಞ್ಚಮಂ ದಿವಸಂ ಪಞ್ಚ ಚೀವರಾನಿ ನಿವಾಸೇನ್ತಿಯಾ ವಾ ಪಾರುಪನ್ತಿಯಾ ವಾ ಓತಾಪೇನ್ತಿಯಾ ವಾ, ಗಿಲಾನಾಯ, ‘‘ಇದಂ ಮೇ ಚೀವರಂ ಮಹಗ್ಘಂ ಈದಿಸೇ ಚೋರಭಯೇ ನ ಸಕ್ಕಾ ಧಾರೇತು’’ನ್ತಿ ಏವರೂಪಾಸು ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಪಞ್ಚನ್ನಂ ಚೀವರಾನಂ ಅಞ್ಞತರತಾ, ಪಞ್ಚಾಹಾತಿಕ್ಕಮೋ, ಅನುಞ್ಞಾತಕಾರಣಾಭಾವೋ, ಅಪರಿವತ್ತನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಕಥಿನಸದಿಸಾನೀತಿ।
Sāvatthiyaṃ sambahulā bhikkhuniyo ārabbha cīvaraṃ nikkhipitvā santaruttarena janapadacārikaṃ pakkamanavatthusmiṃ paññattaṃ, tikapācittiyaṃ, pañcāhānatikkante dvikadukkaṭaṃ. Tasmiṃ pana anatikkantasaññāya, pañcamaṃ divasaṃ pañca cīvarāni nivāsentiyā vā pārupantiyā vā otāpentiyā vā, gilānāya, ‘‘idaṃ me cīvaraṃ mahagghaṃ īdise corabhaye na sakkā dhāretu’’nti evarūpāsu āpadāsu, ummattikādīnañca anāpatti. Pañcannaṃ cīvarānaṃ aññataratā, pañcāhātikkamo, anuññātakāraṇābhāvo, aparivattananti imānettha cattāri aṅgāni. Samuṭṭhānādīni kathinasadisānīti.
ಸಙ್ಘಾಟಿಚಾರಸಿಕ್ಖಾಪದವಣ್ಣನಾ ನಿಟ್ಠಿತಾ।
Saṅghāṭicārasikkhāpadavaṇṇanā niṭṭhitā.
೫. ಚೀವರಸಙ್ಕಮನೀಯಸಿಕ್ಖಾಪದವಣ್ಣನಾ
5. Cīvarasaṅkamanīyasikkhāpadavaṇṇanā
ಪಞ್ಚಮೇ ಚೀವರಸಙ್ಕಮನೀಯನ್ತಿ ಸಙ್ಕಮೇತಬ್ಬಂ ಚೀವರಂ, ಅಞ್ಞಿಸ್ಸಾ ಸನ್ತಕಂ ಅನಾಪುಚ್ಛಾ ಗಹಿತಂ ಪುನ ಪಟಿದಾತಬ್ಬಂ ಪಞ್ಚನ್ನಂ ಅಞ್ಞತರಂ ಚೀವರನ್ತಿ ಅತ್ಥೋ। ಧಾರೇಯ್ಯಾತಿ ಸಚೇ ತಂ ನಿವಾಸೇತಿ ವಾ ಪಾರುಪತಿ ವಾ ಪಾಚಿತ್ತಿಯಂ।
Pañcame cīvarasaṅkamanīyanti saṅkametabbaṃ cīvaraṃ, aññissā santakaṃ anāpucchā gahitaṃ puna paṭidātabbaṃ pañcannaṃ aññataraṃ cīvaranti attho. Dhāreyyāti sace taṃ nivāseti vā pārupati vā pācittiyaṃ.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಭಿಕ್ಖುನಿಯಾ ಚೀವರಂ ಆದಾಯ ಅನಾಪುಚ್ಛಾ ಪಾರುಪನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ। ಯಾ ಪನ ತಾಯ ವಾ ದಿನ್ನಂ, ತಂ ವಾ ಆಪುಚ್ಛಾ, ಅಚ್ಛಿನ್ನನಟ್ಠಚೀವರಿಕಾ ವಾ ಹುತ್ವಾ, ‘‘ಇದಂ ಮೇ ಚೀವರಂ ಮಹಗ್ಘಂ ಈದಿಸೇ ಚೋರಭಯೇ ನ ಸಕ್ಕಾ ಧಾರೇತು’’ನ್ತಿ ಏವರೂಪಾಸು ಆಪದಾಸು ವಾ ಧಾರೇತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಚೀವರಸಙ್ಕಮನೀಯತಾ, ಉಪಸಮ್ಪನ್ನಾಯ ಸನ್ತಕತಾ, ಅನುಞ್ಞಾತಕಾರಣಾಭಾವೋ, ಧಾರಣನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಕಥಿನಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ।
Sāvatthiyaṃ aññataraṃ bhikkhuniṃ ārabbha bhikkhuniyā cīvaraṃ ādāya anāpucchā pārupanavatthusmiṃ paññattaṃ, tikapācittiyaṃ, anupasampannāya tikadukkaṭaṃ. Yā pana tāya vā dinnaṃ, taṃ vā āpucchā, acchinnanaṭṭhacīvarikā vā hutvā, ‘‘idaṃ me cīvaraṃ mahagghaṃ īdise corabhaye na sakkā dhāretu’’nti evarūpāsu āpadāsu vā dhāreti, tassā, ummattikādīnañca anāpatti. Cīvarasaṅkamanīyatā, upasampannāya santakatā, anuññātakāraṇābhāvo, dhāraṇanti imānettha cattāri aṅgāni. Samuṭṭhānādīni paṭhamakathinasadisāni, idaṃ pana kiriyākiriyanti.
ಚೀವರಸಙ್ಕಮನೀಯಸಿಕ್ಖಾಪದವಣ್ಣನಾ ನಿಟ್ಠಿತಾ।
Cīvarasaṅkamanīyasikkhāpadavaṇṇanā niṭṭhitā.
೬. ಗಣಚೀವರಸಿಕ್ಖಾಪದವಣ್ಣನಾ
6. Gaṇacīvarasikkhāpadavaṇṇanā
ಛಟ್ಠೇ ಗಣಸ್ಸಾತಿ ಭಿಕ್ಖುನಿಸಙ್ಘಸ್ಸ। ಚೀವರಲಾಭನ್ತಿ ವಿಕಪ್ಪನುಪಗಮ್ಪಿ ಪಚ್ಛಿಮಂ ಲಭಿತಬ್ಬಂ ಚೀವರಂ। ಅನ್ತರಾಯಂ ಕರೇಯ್ಯಾತಿ ಯಥಾ ತೇ ದಾತುಕಾಮಾ ನ ದೇನ್ತಿ, ಏವಂ ಪರಕ್ಕಮೇಯ್ಯ। ಪಾಚಿತ್ತಿಯನ್ತಿ ಸಚೇ ತಸ್ಸಾ ವಚನೇನ ತೇ ನ ದೇನ್ತಿ, ಭಿಕ್ಖುನಿಯಾ ಪಾಚಿತ್ತಿಯಂ।
Chaṭṭhe gaṇassāti bhikkhunisaṅghassa. Cīvaralābhanti vikappanupagampi pacchimaṃ labhitabbaṃ cīvaraṃ. Antarāyaṃ kareyyāti yathā te dātukāmā na denti, evaṃ parakkameyya. Pācittiyanti sace tassā vacanena te na denti, bhikkhuniyā pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಗಣಸ್ಸ ಚೀವರಲಾಭನ್ತರಾಯಕರಣವತ್ಥುಸ್ಮಿಂ ಪಞ್ಞತ್ತಂ, ಅಞ್ಞಸ್ಮಿಂ ಪರಿಕ್ಖಾರೇ ದುಕ್ಕಟಂ, ಸಮ್ಬಹುಲಾನಂ ಪನ ಏಕಭಿಕ್ಖುನಿಯಾ ವಾ ಚೀವರಲಾಭೇಪಿ ದುಕ್ಕಟಮೇವ। ‘‘ಸಮಗ್ಘಕಾಲೇ ದಸ್ಸಥಾ’’ತಿ ಏವಂ ಆನಿಸಂಸಂ ದಸ್ಸೇತ್ವಾ ನಿವಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ವಿಕಪ್ಪನುಪಗಪಚ್ಛಿಮತಾ, ಸಙ್ಘಸ್ಸ ಪರಿಣತಭಾವೋ, ವಿನಾ ಆನಿಸಂಸದಸ್ಸನೇನ ಅನ್ತರಾಯಕರಣನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನೀತಿ।
Sāvatthiyaṃ thullanandaṃ ārabbha gaṇassa cīvaralābhantarāyakaraṇavatthusmiṃ paññattaṃ, aññasmiṃ parikkhāre dukkaṭaṃ, sambahulānaṃ pana ekabhikkhuniyā vā cīvaralābhepi dukkaṭameva. ‘‘Samagghakāle dassathā’’ti evaṃ ānisaṃsaṃ dassetvā nivārentiyā, ummattikādīnañca anāpatti. Vikappanupagapacchimatā, saṅghassa pariṇatabhāvo, vinā ānisaṃsadassanena antarāyakaraṇanti imānettha tīṇi aṅgāni. Samuṭṭhānādīni adinnādānasadisānīti.
ಗಣಚೀವರಸಿಕ್ಖಾಪದವಣ್ಣನಾ ನಿಟ್ಠಿತಾ।
Gaṇacīvarasikkhāpadavaṇṇanā niṭṭhitā.
೭. ಪಟಿಬಾಹನಸಿಕ್ಖಾಪದವಣ್ಣನಾ
7. Paṭibāhanasikkhāpadavaṇṇanā
ಸತ್ತಮೇ ಧಮ್ಮಿಕಂ ಚೀವರವಿಭಙ್ಗನ್ತಿ ಸಮಗ್ಗೇನ ಸಙ್ಘೇನ ಸನ್ನಿಪತಿತ್ವಾ ಕರೀಯಮಾನಂ ಚೀವರವಿಭಙ್ಗ। ಪಟಿಬಾಹೇಯ್ಯಾತಿ ಪಟಿಸೇಧೇಯ್ಯ, ಏವಂ ಪಟಿಸೇಧೇನ್ತಿಯಾ ಪಾಚಿತ್ತಿಯಂ।
Sattame dhammikaṃ cīvaravibhaṅganti samaggena saṅghena sannipatitvā karīyamānaṃ cīvaravibhaṅga. Paṭibāheyyāti paṭisedheyya, evaṃ paṭisedhentiyā pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹನವತ್ಥುಸ್ಮಿಂ ಪಞ್ಞತ್ತಂ, ಧಮ್ಮಿಕೇ ವೇಮತಿಕಾಯ, ಅಧಮ್ಮಿಕೇ ಧಮ್ಮಿಕಸಞ್ಞಾಯ ಚೇವ ವೇಮತಿಕಾಯ ಚ ದುಕ್ಕಟಂ। ಉಭಯತ್ಥ ಅಧಮ್ಮಿಕಸಞ್ಞಾಯ, ಆನಿಸಂಸಂ ದಸ್ಸೇತ್ವಾ ಪಟಿಬಾಹನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಚೀವರವಿಭಙ್ಗಸ್ಸ ಧಮ್ಮಿಕತಾ, ಧಮ್ಮಿಕಸಞ್ಞಿತಾ, ವಿನಾ ಆನಿಸಂಸೇನ ಪಟಿಬಾಹನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನೇವಾತಿ।
Sāvatthiyaṃ thullanandaṃ ārabbha dhammikaṃ cīvaravibhaṅgaṃ paṭibāhanavatthusmiṃ paññattaṃ, dhammike vematikāya, adhammike dhammikasaññāya ceva vematikāya ca dukkaṭaṃ. Ubhayattha adhammikasaññāya, ānisaṃsaṃ dassetvā paṭibāhantiyā, ummattikādīnañca anāpatti. Cīvaravibhaṅgassa dhammikatā, dhammikasaññitā, vinā ānisaṃsena paṭibāhananti imānettha tīṇi aṅgāni. Samuṭṭhānādīni adinnādānasadisānevāti.
ಪಟಿಬಾಹನಸಿಕ್ಖಾಪದವಣ್ಣನಾ ನಿಟ್ಠಿತಾ।
Paṭibāhanasikkhāpadavaṇṇanā niṭṭhitā.
೮. ಚೀವರದಾನಸಿಕ್ಖಾಪದವಣ್ಣನಾ
8. Cīvaradānasikkhāpadavaṇṇanā
ಅಟ್ಠಮೇ ಸಮಣಚೀವರನ್ತಿ ಕಪ್ಪಕತಂ ನಿವಾಸನಪಾರುಪನುಪಗಂ, ಏವರೂಪಂ ಠಪೇತ್ವಾ ಪಞ್ಚ ಸಹಧಮ್ಮಿಕೇ ಮಾತಾಪಿತರೋ ಚ ಯಸ್ಸ ಕಸ್ಸಚಿ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ ಪರಿಚ್ಚಜಿತ್ವಾ ದೇನ್ತಿಯಾ ಪಾಚಿತ್ತಿಯಂ।
Aṭṭhame samaṇacīvaranti kappakataṃ nivāsanapārupanupagaṃ, evarūpaṃ ṭhapetvā pañca sahadhammike mātāpitaro ca yassa kassaci gahaṭṭhassa vā pabbajitassa vā pariccajitvā dentiyā pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಅಗಾರಿಕಸ್ಸ ಸಮಣಚೀವರದಾನವತ್ಥುಸ್ಮಿಂ ಪಞ್ಞತ್ತಂ, ಭಿಕ್ಖುನೋ ದುಕ್ಕಟಂ। ಮಾತಾಪಿತೂನಂ ಪರಿಚ್ಚಜಿತ್ವಾಪಿ, ಅಞ್ಞೇಸಂ ತಾವಕಾಲಿಕಮೇವ ದೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸಮಣಚೀವರತಾ, ಠಪೇತ್ವಾ ಸಹಧಮ್ಮಿಕೇ ಚ ಮಾತಾಪಿತರೋ ಚ ಅಞ್ಞೇಸಂ ದಾನಂ, ಅತಾವಕಾಲಿಕತಾತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಸಞ್ಚರಿತ್ತಸದಿಸಾನೀತಿ।
Sāvatthiyaṃ thullanandaṃ ārabbha agārikassa samaṇacīvaradānavatthusmiṃ paññattaṃ, bhikkhuno dukkaṭaṃ. Mātāpitūnaṃ pariccajitvāpi, aññesaṃ tāvakālikameva dentiyā, ummattikādīnañca anāpatti. Samaṇacīvaratā, ṭhapetvā sahadhammike ca mātāpitaro ca aññesaṃ dānaṃ, atāvakālikatāti imānettha tīṇi aṅgāni. Samuṭṭhānādīni sañcarittasadisānīti.
ಚೀವರದಾನಸಿಕ್ಖಾಪದವಣ್ಣನಾ ನಿಟ್ಠಿತಾ।
Cīvaradānasikkhāpadavaṇṇanā niṭṭhitā.
೯. ಕಾಲಅತಿಕ್ಕಮನಸಿಕ್ಖಾಪದವಣ್ಣನಾ
9. Kālaatikkamanasikkhāpadavaṇṇanā
ನವಮೇ ದುಬ್ಬಲಚೀವರಪಚ್ಚಾಸಾಯಾತಿ ದುಬ್ಬಲಾಯ ಚೀವರಪಚ್ಚಾಸಾಯ, ‘‘ಸಚೇ ಸಕ್ಕೋಮ ದಸ್ಸಾಮಾ’’ತಿ ಏತ್ತಕಮತ್ತಂ ಸುತ್ವಾ ಉಪ್ಪಾದಿತಾಯ ಆಸಾಯಾತಿ ಅತ್ಥೋ । ಚೀವರಕಾಲಸಮಯಂ ಅತಿಕ್ಕಾಮೇಯ್ಯಾತಿ ವಸ್ಸಂವುಟ್ಠಭಿಕ್ಖುನೀಹಿ ಕಾಲಚೀವರೇ ಭಾಜಿಯಮಾನೇ ‘‘ಆಗಮೇಯ್ಯಾಥ, ಅಯ್ಯೇ, ಅತ್ಥಿ ಸಙ್ಘಸ್ಸ ಚೀವರಪಚ್ಚಾಸಾ’’ತಿ ವತ್ವಾ ತಂ ಚೀವರವಿಭಙ್ಗಂ ಚೀವರಕಾಲಂ ಅತಿಕ್ಕಾಮೇಯ್ಯ, ತಸ್ಸಾ ಅನತ್ಥತೇ ಕಥಿನೇ ವಸ್ಸಾನಸ್ಸ ಪಚ್ಛಿಮಮಾಸಂ, ಅತ್ಥತೇ ಕಥಿನೇ ಕಥಿನುಬ್ಭಾರದಿವಸಂ ಅತಿಕ್ಕಾಮೇನ್ತಿಯಾ ಪಾಚಿತ್ತಿಯಂ।
Navame dubbalacīvarapaccāsāyāti dubbalāya cīvarapaccāsāya, ‘‘sace sakkoma dassāmā’’ti ettakamattaṃ sutvā uppāditāya āsāyāti attho . Cīvarakālasamayaṃ atikkāmeyyāti vassaṃvuṭṭhabhikkhunīhi kālacīvare bhājiyamāne ‘‘āgameyyātha, ayye, atthi saṅghassa cīvarapaccāsā’’ti vatvā taṃ cīvaravibhaṅgaṃ cīvarakālaṃ atikkāmeyya, tassā anatthate kathine vassānassa pacchimamāsaṃ, atthate kathine kathinubbhāradivasaṃ atikkāmentiyā pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಮನವತ್ಥುಸ್ಮಿಂ ಪಞ್ಞತ್ತಂ, ದುಬ್ಬಲಚೀವರೇ ವೇಮತಿಕಾಯ, ಅದುಬ್ಬಲಚೀವರೇ ದುಬ್ಬಲಚೀವರಸಞ್ಞಾಯ ಚೇವ ವೇಮತಿಕಾಯ ಚ ದುಕ್ಕಟಂ। ಉಭಯತ್ಥ ಅದುಬ್ಬಲಚೀವರಸಞ್ಞಾಯ, ಕಿಞ್ಚಾಪಿ ‘ನ ಸಕ್ಕೋಮಾ’ತಿ ವದನ್ತಿ, ‘‘ಇದಾನಿ ಪನ ತೇಸಂ ಕಪ್ಪಾಸೋ ವಾ ಉಪ್ಪಜ್ಜಿಸ್ಸತಿ, ಸದ್ಧೋ ವಾ ಪುರಿಸೋ ಆಗಮಿಸ್ಸತಿ, ತಸ್ಮಿಂ ಆಗತೇ ಅದ್ಧಾ ದಸ್ಸನ್ತೀ’’ತಿ ಏವಂ ಆನಿಸಂಸಂ ದಸ್ಸೇತ್ವಾ ನಿವಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ದುಬ್ಬಲಚೀವರತಾ, ದುಬ್ಬಲಸಞ್ಞಿತಾ, ವಿನಾ ಆನಿಸಂಸೇನ ನಿವಾರಣನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನೀತಿ।
Sāvatthiyaṃ thullanandaṃ ārabbha dubbalacīvarapaccāsāya cīvarakālasamayaṃ atikkamanavatthusmiṃ paññattaṃ, dubbalacīvare vematikāya, adubbalacīvare dubbalacīvarasaññāya ceva vematikāya ca dukkaṭaṃ. Ubhayattha adubbalacīvarasaññāya, kiñcāpi ‘na sakkomā’ti vadanti, ‘‘idāni pana tesaṃ kappāso vā uppajjissati, saddho vā puriso āgamissati, tasmiṃ āgate addhā dassantī’’ti evaṃ ānisaṃsaṃ dassetvā nivārentiyā, ummattikādīnañca anāpatti. Dubbalacīvaratā, dubbalasaññitā, vinā ānisaṃsena nivāraṇanti imānettha tīṇi aṅgāni. Samuṭṭhānādīni adinnādānasadisānīti.
ಕಾಲಅತಿಕ್ಕಮನಸಿಕ್ಖಾಪದವಣ್ಣನಾ ನಿಟ್ಠಿತಾ।
Kālaatikkamanasikkhāpadavaṇṇanā niṭṭhitā.
೧೦. ಕಥಿನುದ್ಧಾರಸಿಕ್ಖಾಪದವಣ್ಣನಾ
10. Kathinuddhārasikkhāpadavaṇṇanā
ದಸಮೇ ಧಮ್ಮಿಕಂ ಕಥಿನುದ್ಧಾರನ್ತಿ ಸಬ್ಬಾಸಂ ಭಿಕ್ಖುನೀನಂ ಅಕಾಲಚೀವರಂ ದಾತುಕಾಮೇನ ಉಪಾಸಕೇನ ಯತ್ತಕೋ ಅತ್ಥಾರಮೂಲಿಕೋ ಆನಿಸಂಸೋ, ತತೋ ಅಧಿಕಂ ವಾ ಸಮಕಂ ವಾ ದತ್ವಾ ಯಾಚಿತೇನ ಸಮಗ್ಗೇನ ಭಿಕ್ಖುನಿಸಙ್ಘೇನ ಯಂ ಕಥಿನಂ ಞತ್ತಿದುತಿಯಕಮ್ಮೇನ ಅನ್ತರಾ ಉದ್ಧರೀಯತಿ, ತಸ್ಸ ಸೋ ಉದ್ಧಾರೋ ‘ಧಮ್ಮಿಕೋ’ತಿ ವುಚ್ಚತಿ, ಏವರೂಪಂ ಕಥಿನುದ್ಧಾರನ್ತಿ ಅತ್ಥೋ। ಪಟಿಬಾಹೇಯ್ಯಾತಿ ನಿವಾರೇಯ್ಯ, ತಸ್ಸ ಏವರೂಪಂ ಕಥಿನುದ್ಧಾರಂ ನಿವಾರೇನ್ತಿಯಾ ಪಾಚಿತ್ತಿಯಂ।
Dasame dhammikaṃ kathinuddhāranti sabbāsaṃ bhikkhunīnaṃ akālacīvaraṃ dātukāmena upāsakena yattako atthāramūliko ānisaṃso, tato adhikaṃ vā samakaṃ vā datvā yācitena samaggena bhikkhunisaṅghena yaṃ kathinaṃ ñattidutiyakammena antarā uddharīyati, tassa so uddhāro ‘dhammiko’ti vuccati, evarūpaṃ kathinuddhāranti attho. Paṭibāheyyāti nivāreyya, tassa evarūpaṃ kathinuddhāraṃ nivārentiyā pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಕಥಿನುದ್ಧಾರಂ ಪಟಿಬಾಹನವತ್ಥುಸ್ಮಿಂ ಪಞ್ಞತ್ತಂ, ಸೇಸಂ ಸತ್ತಮೇ ವುತ್ತನಯೇನೇವ ವೇದಿತಬ್ಬನ್ತಿ।
Sāvatthiyaṃ thullanandaṃ ārabbha kathinuddhāraṃ paṭibāhanavatthusmiṃ paññattaṃ, sesaṃ sattame vuttanayeneva veditabbanti.
ಕಥಿನುದ್ಧಾರಸಿಕ್ಖಾಪದವಣ್ಣನಾ ನಿಟ್ಠಿತಾ।
Kathinuddhārasikkhāpadavaṇṇanā niṭṭhitā.
ನಗ್ಗವಗ್ಗೋ ತತಿಯೋ।
Naggavaggo tatiyo.
