| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၂၆. နဂ္ဂိယပဋိက္ခေပကထာ
226. Naggiyapaṭikkhepakathā
၃၇၀. တေန ခော ပန သမယေန အညတရော ဘိက္ခု နဂ္ဂော ဟုတ္ဝာ ယေန ဘဂဝာ တေနုပသင္ကမိ, ဥပသင္ကမိတ္ဝာ ဘဂဝန္တံ ဧတဒဝောစ – ‘‘ဘဂဝာ, ဘန္တေ, အနေကပရိယာယေန အပ္ပိစ္ဆသ္သ သန္တုဋ္ဌသ္သ သလ္လေခသ္သ ဓုတသ္သ ပာသာဒိကသ္သ အပစယသ္သ ဝီရိယာရမ္ဘသ္သ ဝဏ္ဏဝာဒီ။ ဣဒံ, ဘန္တေ, နဂ္ဂိယံ အနေကပရိယာယေန အပ္ပိစ္ဆတာယ သန္တုဋ္ဌိတာယ သလ္လေခာယ ဓုတတာယ 1 ပာသာဒိကတာယ အပစယာယ ဝီရိယာရမ္ဘာယ သံဝတ္တတိ။ သာဓု, ဘန္တေ, ဘဂဝာ ဘိက္ခူနံ နဂ္ဂိယံ အနုဇာနာတူ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ တ္ဝံ, မောဃပုရိသ, နဂ္ဂိယံ တိတ္ထိယသမာဒာနံ သမာဒိယိသ္သသိ။ နေတံ, မောဃပုရိသ, အပ္ပသန္နာနံ ဝာ ပသာဒာယ။ပေ.။’’ ဝိဂရဟိတ္ဝာ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န, ဘိက္ခဝေ, နဂ္ဂိယံ တိတ္ထိယသမာဒာနံ သမာဒိယိတဗ္ဗံ။ ယော သမာဒိယေယ္ယ, အာပတ္တိ ထုလ္လစ္စယသ္သာ’’တိ။
370. Tena kho pana samayena aññataro bhikkhu naggo hutvā yena bhagavā tenupasaṅkami, upasaṅkamitvā bhagavantaṃ etadavoca – ‘‘bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī. Idaṃ, bhante, naggiyaṃ anekapariyāyena appicchatāya santuṭṭhitāya sallekhāya dhutatāya 2 pāsādikatāya apacayāya vīriyārambhāya saṃvattati. Sādhu, bhante, bhagavā bhikkhūnaṃ naggiyaṃ anujānātū’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, naggiyaṃ titthiyasamādānaṃ samādiyissasi. Netaṃ, moghapurisa, appasannānaṃ vā pasādāya…pe…’’ vigarahitvā dhammiṃ kathaṃ katvā bhikkhū āmantesi – ‘‘na, bhikkhave, naggiyaṃ titthiyasamādānaṃ samādiyitabbaṃ. Yo samādiyeyya, āpatti thullaccayassā’’ti.
နဂ္ဂိယပဋိက္ခေပကထာ နိဋ္ဌိတာ။
Naggiyapaṭikkhepakathā niṭṭhitā.
Footnotes:
