| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༢༦. ནགྒིཡཔཊིཀྑེཔཀཐཱ
226. Naggiyapaṭikkhepakathā
༣༧༠. ཏེན ཁོ པན སམཡེན ཨཉྙཏརོ བྷིཀྑུ ནགྒོ ཧུཏྭཱ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨེཏདཝོཙ – ‘‘བྷགཝཱ, བྷནྟེ, ཨནེཀཔརིཡཱཡེན ཨཔྤིཙྪསྶ སནྟུཊྛསྶ སལླེཁསྶ དྷུཏསྶ པཱསཱདིཀསྶ ཨཔཙཡསྶ ཝཱིརིཡཱརམྦྷསྶ ཝཎྞཝཱདཱི། ཨིདཾ, བྷནྟེ, ནགྒིཡཾ ཨནེཀཔརིཡཱཡེན ཨཔྤིཙྪཏཱཡ སནྟུཊྛིཏཱཡ སལླེཁཱཡ དྷུཏཏཱཡ 1 པཱསཱདིཀཏཱཡ ཨཔཙཡཱཡ ཝཱིརིཡཱརམྦྷཱཡ སཾཝཏྟཏི། སཱདྷུ, བྷནྟེ, བྷགཝཱ བྷིཀྑཱུནཾ ནགྒིཡཾ ཨནུཛཱནཱཏཱུ’’ཏི། ཝིགརཧི བུདྡྷོ བྷགཝཱ – ‘‘ཨནནུཙྪཝིཀཾ, མོགྷཔུརིས, ཨནནུལོམིཀཾ ཨཔྤཏིརཱུཔཾ ཨསྶཱམཎཀཾ ཨཀཔྤིཡཾ ཨཀརཎཱིཡཾ། ཀཐཉྷི ནཱམ ཏྭཾ, མོགྷཔུརིས, ནགྒིཡཾ ཏིཏྠིཡསམཱདཱནཾ སམཱདིཡིསྶསི། ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰…’’ ཝིགརཧིཏྭཱ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན, བྷིཀྑཝེ, ནགྒིཡཾ ཏིཏྠིཡསམཱདཱནཾ སམཱདིཡིཏབྦཾ། ཡོ སམཱདིཡེཡྻ, ཨཱཔཏྟི ཐུལླཙྩཡསྶཱ’’ཏི།
370. Tena kho pana samayena aññataro bhikkhu naggo hutvā yena bhagavā tenupasaṅkami, upasaṅkamitvā bhagavantaṃ etadavoca – ‘‘bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī. Idaṃ, bhante, naggiyaṃ anekapariyāyena appicchatāya santuṭṭhitāya sallekhāya dhutatāya 2 pāsādikatāya apacayāya vīriyārambhāya saṃvattati. Sādhu, bhante, bhagavā bhikkhūnaṃ naggiyaṃ anujānātū’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, naggiyaṃ titthiyasamādānaṃ samādiyissasi. Netaṃ, moghapurisa, appasannānaṃ vā pasādāya…pe…’’ vigarahitvā dhammiṃ kathaṃ katvā bhikkhū āmantesi – ‘‘na, bhikkhave, naggiyaṃ titthiyasamādānaṃ samādiyitabbaṃ. Yo samādiyeyya, āpatti thullaccayassā’’ti.
ནགྒིཡཔཊིཀྑེཔཀཐཱ ནིཊྛིཏཱ།
Naggiyapaṭikkhepakathā niṭṭhitā.
Footnotes:
