| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. নাগিতসুত্তৰণ্ণনা
10. Nāgitasuttavaṇṇanā
৩০. দসমে উদ্ধং উগ্গতত্তা উচ্চো, রাসিভাৰেন চ মহা সদ্দো এতেসন্তি উচ্চাসদ্দমহাসদ্দা। তেসু হি উগ্গতুগ্গতেসু খত্তিযমহাসাল-ব্রাহ্মণমহাসালাদীসু মহাসক্কারং গহেত্ৰা আগতেসু ‘‘অসুকস্স ওকাসং দেথ, অসুকস্স ওকাসং দেথা’’তি ৰুত্তে ‘‘মযং পঠমতরং আগতা, ময্হং পঠমতরং আগতা, নত্থি ওকাসো’’তি এৰং অঞ্ঞমঞ্ঞং কথেন্তানং সদ্দো উচ্চো চেৰ মহা চ অহোসি। কেৰট্টা মঞ্ঞে মচ্ছৰিলোপেতি কেৰট্টা ৰিয মচ্ছৰিলোপে। তেসঞ্হি মচ্ছপচ্ছিং গহেত্ৰা আগতানং ৰিক্কিণনট্ঠানে ‘‘ময্হং দেথ ময্হং দেথা’’তি ৰদতো মহাজনস্স এৰরূপো সদ্দো হোতি। মীল়্হসুখন্তি অসুচিসুখং। মিদ্ধসুখন্তি নিদ্দাসুখং। লাভসক্কারসিলোকসুখন্তি লাভসক্কারঞ্চেৰ ৰণ্ণভণনঞ্চ নিস্সায উপ্পন্নসুখং।
30. Dasame uddhaṃ uggatattā ucco, rāsibhāvena ca mahā saddo etesanti uccāsaddamahāsaddā. Tesu hi uggatuggatesu khattiyamahāsāla-brāhmaṇamahāsālādīsu mahāsakkāraṃ gahetvā āgatesu ‘‘asukassa okāsaṃ detha, asukassa okāsaṃ dethā’’ti vutte ‘‘mayaṃ paṭhamataraṃ āgatā, mayhaṃ paṭhamataraṃ āgatā, natthi okāso’’ti evaṃ aññamaññaṃ kathentānaṃ saddo ucco ceva mahā ca ahosi. Kevaṭṭā maññe macchavilopeti kevaṭṭā viya macchavilope. Tesañhi macchapacchiṃ gahetvā āgatānaṃ vikkiṇanaṭṭhāne ‘‘mayhaṃ detha mayhaṃ dethā’’ti vadato mahājanassa evarūpo saddo hoti. Mīḷhasukhanti asucisukhaṃ. Middhasukhanti niddāsukhaṃ. Lābhasakkārasilokasukhanti lābhasakkārañceva vaṇṇabhaṇanañca nissāya uppannasukhaṃ.
তংনিন্নাৰ গমিস্সন্তীতি তং তদেৰ ভগৰতো গতট্ঠানং গমিস্সন্তি, অনুবন্ধিস্সন্তিযেৰাতি ৰুত্তং হোতি। তথা হি, ভন্তে, ভগৰতো সীলপঞ্ঞাণন্তি যস্মা তথাৰিধং তুম্হাকং সীলঞ্চ ঞাণঞ্চাতি অত্থো। মা চ মযা যসোতি মযা সদ্ধিং যসোপি মা সমাগচ্ছতু। পিযানন্তি পিযজনানং। এসো তস্স নিস্সন্দোতি এসা পিযভাৰস্স নিপ্ফত্তি। অসুভনিমিত্তানুযোগন্তি অসুভকম্মট্ঠানানুযোগং। সুভনিমিত্তেতি রাগট্ঠানিযে ইট্ঠারম্মণে। এসো তস্স নিস্সন্দোতি এসা তস্স অসুভনিমিত্তানুযোগস্স নিপ্ফত্তি। এৰমিমস্মিং সুত্তে ইমেসু পঞ্চসু ঠানেসু ৰিপস্সনাৰ কথিতাতি।
Taṃninnāvagamissantīti taṃ tadeva bhagavato gataṭṭhānaṃ gamissanti, anubandhissantiyevāti vuttaṃ hoti. Tathā hi, bhante, bhagavato sīlapaññāṇanti yasmā tathāvidhaṃ tumhākaṃ sīlañca ñāṇañcāti attho. Mā ca mayā yasoti mayā saddhiṃ yasopi mā samāgacchatu. Piyānanti piyajanānaṃ. Eso tassa nissandoti esā piyabhāvassa nipphatti. Asubhanimittānuyoganti asubhakammaṭṭhānānuyogaṃ. Subhanimitteti rāgaṭṭhāniye iṭṭhārammaṇe. Eso tassa nissandoti esā tassa asubhanimittānuyogassa nipphatti. Evamimasmiṃ sutte imesu pañcasu ṭhānesu vipassanāva kathitāti.
পঞ্চঙ্গিকৰগ্গো ততিযো।
Pañcaṅgikavaggo tatiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. নাগিতসুত্তং • 10. Nāgitasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. নাগিতসুত্তৰণ্ণনা • 10. Nāgitasuttavaṇṇanā
