| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. နာဂိတသုတ္တဝဏ္ဏနာ
10. Nāgitasuttavaṇṇanā
၃၀. ဒသမေ ဥဒ္ဓံ ဥဂ္ဂတတ္တာ ဥစ္စော, ရာသိဘာဝေန စ မဟာ သဒ္ဒော ဧတေသန္တိ ဥစ္စာသဒ္ဒမဟာသဒ္ဒာ။ တေသု ဟိ ဥဂ္ဂတုဂ္ဂတေသု ခတ္တိယမဟာသာလ-ဗ္ရာဟ္မဏမဟာသာလာဒီသု မဟာသက္ကာရံ ဂဟေတ္ဝာ အာဂတေသု ‘‘အသုကသ္သ ဩကာသံ ဒေထ, အသုကသ္သ ဩကာသံ ဒေထာ’’တိ ဝုတ္တေ ‘‘မယံ ပဌမတရံ အာဂတာ, မယ္ဟံ ပဌမတရံ အာဂတာ, နတ္ထိ ဩကာသော’’တိ ဧဝံ အညမညံ ကထေန္တာနံ သဒ္ဒော ဥစ္စော စေဝ မဟာ စ အဟောသိ။ ကေဝဋ္ဋာ မညေ မစ္ဆဝိလောပေတိ ကေဝဋ္ဋာ ဝိယ မစ္ဆဝိလောပေ။ တေသဉ္ဟိ မစ္ဆပစ္ဆိံ ဂဟေတ္ဝာ အာဂတာနံ ဝိက္ကိဏနဋ္ဌာနေ ‘‘မယ္ဟံ ဒေထ မယ္ဟံ ဒေထာ’’တိ ဝဒတော မဟာဇနသ္သ ဧဝရူပော သဒ္ဒော ဟောတိ။ မီဠ္ဟသုခန္တိ အသုစိသုခံ။ မိဒ္ဓသုခန္တိ နိဒ္ဒာသုခံ။ လာဘသက္ကာရသိလောကသုခန္တိ လာဘသက္ကာရဉ္စေဝ ဝဏ္ဏဘဏနဉ္စ နိသ္သာယ ဥပ္ပန္နသုခံ။
30. Dasame uddhaṃ uggatattā ucco, rāsibhāvena ca mahā saddo etesanti uccāsaddamahāsaddā. Tesu hi uggatuggatesu khattiyamahāsāla-brāhmaṇamahāsālādīsu mahāsakkāraṃ gahetvā āgatesu ‘‘asukassa okāsaṃ detha, asukassa okāsaṃ dethā’’ti vutte ‘‘mayaṃ paṭhamataraṃ āgatā, mayhaṃ paṭhamataraṃ āgatā, natthi okāso’’ti evaṃ aññamaññaṃ kathentānaṃ saddo ucco ceva mahā ca ahosi. Kevaṭṭā maññe macchavilopeti kevaṭṭā viya macchavilope. Tesañhi macchapacchiṃ gahetvā āgatānaṃ vikkiṇanaṭṭhāne ‘‘mayhaṃ detha mayhaṃ dethā’’ti vadato mahājanassa evarūpo saddo hoti. Mīḷhasukhanti asucisukhaṃ. Middhasukhanti niddāsukhaṃ. Lābhasakkārasilokasukhanti lābhasakkārañceva vaṇṇabhaṇanañca nissāya uppannasukhaṃ.
တံနိန္နာဝ ဂမိသ္သန္တီတိ တံ တဒေဝ ဘဂဝတော ဂတဋ္ဌာနံ ဂမိသ္သန္တိ, အနုဗန္ဓိသ္သန္တိယေဝာတိ ဝုတ္တံ ဟောတိ။ တထာ ဟိ, ဘန္တေ, ဘဂဝတော သီလပညာဏန္တိ ယသ္မာ တထာဝိဓံ တုမ္ဟာကံ သီလဉ္စ ဉာဏဉ္စာတိ အတ္ထော။ မာ စ မယာ ယသောတိ မယာ သဒ္ဓိံ ယသောပိ မာ သမာဂစ္ဆတု။ ပိယာနန္တိ ပိယဇနာနံ။ ဧသော တသ္သ နိသ္သန္ဒောတိ ဧသာ ပိယဘာဝသ္သ နိပ္ဖတ္တိ။ အသုဘနိမိတ္တာနုယောဂန္တိ အသုဘကမ္မဋ္ဌာနာနုယောဂံ။ သုဘနိမိတ္တေတိ ရာဂဋ္ဌာနိယေ ဣဋ္ဌာရမ္မဏေ။ ဧသော တသ္သ နိသ္သန္ဒောတိ ဧသာ တသ္သ အသုဘနိမိတ္တာနုယောဂသ္သ နိပ္ဖတ္တိ။ ဧဝမိမသ္မိံ သုတ္တေ ဣမေသု ပဉ္စသု ဌာနေသု ဝိပသ္သနာဝ ကထိတာတိ။
Taṃninnāvagamissantīti taṃ tadeva bhagavato gataṭṭhānaṃ gamissanti, anubandhissantiyevāti vuttaṃ hoti. Tathā hi, bhante, bhagavato sīlapaññāṇanti yasmā tathāvidhaṃ tumhākaṃ sīlañca ñāṇañcāti attho. Mā ca mayā yasoti mayā saddhiṃ yasopi mā samāgacchatu. Piyānanti piyajanānaṃ. Eso tassa nissandoti esā piyabhāvassa nipphatti. Asubhanimittānuyoganti asubhakammaṭṭhānānuyogaṃ. Subhanimitteti rāgaṭṭhāniye iṭṭhārammaṇe. Eso tassa nissandoti esā tassa asubhanimittānuyogassa nipphatti. Evamimasmiṃ sutte imesu pañcasu ṭhānesu vipassanāva kathitāti.
ပဉ္စင္ဂိကဝဂ္ဂော တတိယော။
Pañcaṅgikavaggo tatiyo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. နာဂိတသုတ္တံ • 10. Nāgitasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. နာဂိတသုတ္တဝဏ္ဏနာ • 10. Nāgitasuttavaṇṇanā
