| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၂. နာဂိတသုတ္တဝဏ္ဏနာ
12. Nāgitasuttavaṇṇanā
၄၂. ဒ္ဝာဒသမေ ဂာမန္တဝိဟာရိန္တိ ဂာမန္တသေနာသနဝာသိံ။ သမာဟိတံ နိသိန္နန္တိ တသ္မိံ ဂာမန္တသေနာသနေ သမာဓိံ အပ္ပေတ္ဝာ နိသိန္နံ။ ဣဒာနိမန္တိ ဣဒာနိ ဣမံ။ သမာဓိမ္ဟာ စာဝေသ္သတီတိ သမာဓိတော ဥဋ္ဌာပေသ္သတိ။ န အတ္တမနော ဟောမီတိ န သကမနော ဟောမိ။ ပစလာယမာနန္တိ နိဒ္ဒာယမာနံ။ ဧကတ္တန္တိ ဧကသဘာဝံ, ဧကဂ္ဂတာဘူတံ အရညသညံယေဝ စိတ္တေ ကရိသ္သတီတိ အတ္ထော။ အနုရက္ခိသ္သတီတိ အနုဂ္ဂဏ္ဟိသ္သတိ။ အဝိမုတ္တံ ဝာ စိတ္တံ ဝိမောစေသ္သတီတိ အညသ္မိံ ကာလေ အဝိမုတ္တံ စိတ္တံ ဣဒာနိ ပဉ္စဟိ ဝိမုတ္တီဟိ ဝိမောစယိသ္သတိ။ ရိဉ္စတီတိ ဝဇ္ဇေတိ ဝိသ္သဇ္ဇေတိ။ ပဋိပဏာမေတ္ဝာတိ ပနုဒိတ္ဝာ ဝိသ္သဇ္ဇေတ္ဝာ။ ဥစ္စာရပသ္သာဝကမ္မာယာတိ ဥစ္စာရပသ္သာဝကရဏတ္ထာယ။ ဣမိနာ ဧတ္တကေန ဌာနေန သတ္ထာရာ အရညသေနာသနသ္သ ဝဏ္ဏော ကထိတော။ သုတ္တသ္သ ပန ပဌမကောဋ္ဌာသေ ယံ ဝတ္တဗ္ဗံ, တံ ဟေဋ္ဌာ ဝုတ္တမေဝာတိ။
42. Dvādasame gāmantavihārinti gāmantasenāsanavāsiṃ. Samāhitaṃ nisinnanti tasmiṃ gāmantasenāsane samādhiṃ appetvā nisinnaṃ. Idānimanti idāni imaṃ. Samādhimhā cāvessatīti samādhito uṭṭhāpessati. Na attamano homīti na sakamano homi. Pacalāyamānanti niddāyamānaṃ. Ekattanti ekasabhāvaṃ, ekaggatābhūtaṃ araññasaññaṃyeva citte karissatīti attho. Anurakkhissatīti anuggaṇhissati. Avimuttaṃ vā cittaṃ vimocessatīti aññasmiṃ kāle avimuttaṃ cittaṃ idāni pañcahi vimuttīhi vimocayissati. Riñcatīti vajjeti vissajjeti. Paṭipaṇāmetvāti panuditvā vissajjetvā. Uccārapassāvakammāyāti uccārapassāvakaraṇatthāya. Iminā ettakena ṭhānena satthārā araññasenāsanassa vaṇṇo kathito. Suttassa pana paṭhamakoṭṭhāse yaṃ vattabbaṃ, taṃ heṭṭhā vuttamevāti.
ဒေဝတာဝဂ္ဂော စတုတ္ထော။
Devatāvaggo catuttho.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၂. နာဂိတသုတ္တံ • 12. Nāgitasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၂. နာဂိတသုတ္တဝဏ္ဏနာ • 12. Nāgitasuttavaṇṇanā
