| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. နာဂိတသုတ္တဝဏ္ဏနာ
10. Nāgitasuttavaṇṇanā
၃၀. ဒသမေ ဥစ္စာသဒ္ဒမဟာသဒ္ဒာတိ ဥဒ္ဓံ ဥဂ္ဂတတ္တာ ဥစ္စော ပတ္ထဋော မဟန္တော ဝိနိဗ္ဘိဇ္ဇိတ္ဝာ ဂဟေတုံ အသက္ကုဏေယ္ယော သဒ္ဒော ဧတေသန္တိ ဥစ္စာသဒ္ဒမဟာသဒ္ဒာ။ ဝစီဃောသောပိ ဟိ ဗဟူဟိ ဧကဇ္ဈံ ပဝတ္တိတော အတ္ထတော သဒ္ဒတော စ ဒုရဝဗောဓော ကေဝလံ မဟာနိဂ္ဃောသော ဧဝ ဟုတ္ဝာ သောတပထမာဂစ္ဆတိ။ မစ္ဆဝိလောပေတိ မစ္ဆာနံ ဝိလုမ္ပိတ္ဝာ ဝိယ ဂဟဏေ, မစ္ဆာနံ ဝာ ဝိလုမ္ပနေ။ ကေဝဋ္ဋာနဉ္ဟိ မစ္ဆပစ္ဆိဌပိတဋ္ဌာနေ မဟာဇနော သန္နိပတိတ္ဝာ ‘‘ဣဓ အညံ ဧကံ မစ္ဆံ ဒေဟိ, ဧကံ မစ္ဆဖာလံ ဒေဟီ’’တိ, ‘‘ဧတသ္သ တေ မဟာ ဒိန္နော, မယ္ဟံ ခုဒ္ဒကော’’တိ ဧဝံ ဥစ္စာသဒ္ဒံ မဟာသဒ္ဒံ ကရောန္တိ။ မစ္ဆဂ္ဂဟဏတ္ထံ ဇာလေ ပက္ခိတ္တေပိ တသ္မိံ ဌာနေ ကေဝဋ္ဋာ စေဝ အညေ စ ‘‘ပဝိဋ္ဌော ဂဟိတော’’တိ မဟာသဒ္ဒံ ကရောန္တိ။ တံ သန္ဓာယေတံ ဝုတ္တံ။ အသုစိသုခန္တိ ကာယာသုစိသန္နိသ္သိတတ္တာ ကိလေသာသုစိသန္နိသ္သိတတ္တာ စ အသုစိသန္နိသ္သိတသုခံ။ နေက္ခမ္မသုခသ္သာတိ ကာမတော နိက္ခမန္တသ္သ သုခသ္သ။ ပဝိဝေကသုခသ္သာတိ ဂဏသင္ဂဏိကတော ကိလေသသင္ဂဏိကတော စ ဝိဂတသ္သ သုခသ္သ။ ဥပသမသုခသ္သာတိ ရာဂာဒိဝူပသမာဝဟသ္သ သုခသ္သ။ သမ္ဗောဓသုခန္တိ မဂ္ဂသင္ခာတသ္သ သမ္ဗောဓသ္သ နိဋ္ဌပ္ပတ္တတ္ထာယ သုခံ။ သေသံ သုဝိညေယ္ယမေဝ။
30. Dasame uccāsaddamahāsaddāti uddhaṃ uggatattā ucco patthaṭo mahanto vinibbhijjitvā gahetuṃ asakkuṇeyyo saddo etesanti uccāsaddamahāsaddā. Vacīghosopi hi bahūhi ekajjhaṃ pavattito atthato saddato ca duravabodho kevalaṃ mahānigghoso eva hutvā sotapathamāgacchati. Macchavilopeti macchānaṃ vilumpitvā viya gahaṇe, macchānaṃ vā vilumpane. Kevaṭṭānañhi macchapacchiṭhapitaṭṭhāne mahājano sannipatitvā ‘‘idha aññaṃ ekaṃ macchaṃ dehi, ekaṃ macchaphālaṃ dehī’’ti, ‘‘etassa te mahā dinno, mayhaṃ khuddako’’ti evaṃ uccāsaddaṃ mahāsaddaṃ karonti. Macchaggahaṇatthaṃ jāle pakkhittepi tasmiṃ ṭhāne kevaṭṭā ceva aññe ca ‘‘paviṭṭho gahito’’ti mahāsaddaṃ karonti. Taṃ sandhāyetaṃ vuttaṃ. Asucisukhanti kāyāsucisannissitattā kilesāsucisannissitattā ca asucisannissitasukhaṃ. Nekkhammasukhassāti kāmato nikkhamantassa sukhassa. Pavivekasukhassāti gaṇasaṅgaṇikato kilesasaṅgaṇikato ca vigatassa sukhassa. Upasamasukhassāti rāgādivūpasamāvahassa sukhassa. Sambodhasukhanti maggasaṅkhātassa sambodhassa niṭṭhappattatthāya sukhaṃ. Sesaṃ suviññeyyameva.
နာဂိတသုတ္တဝဏ္ဏနာ နိဋ္ဌိတာ။
Nāgitasuttavaṇṇanā niṭṭhitā.
ပဉ္စင္ဂိကဝဂ္ဂဝဏ္ဏနာ နိဋ္ဌိတာ။
Pañcaṅgikavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. နာဂိတသုတ္တံ • 10. Nāgitasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. နာဂိတသုတ္တဝဏ္ဏနာ • 10. Nāgitasuttavaṇṇanā
