| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. නාගිතසුත්‌තවණ්‌ණනා
10. Nāgitasuttavaṇṇanā
30. දසමෙ උද්‌ධං උග්‌ගතත්‌තා උච්‌චො, රාසිභාවෙන ච මහා සද්‌දො එතෙසන්‌ති උච්‌චාසද්‌දමහාසද්‌දා. තෙසු හි උග්‌ගතුග්‌ගතෙසු ඛත්‌තියමහාසාල-බ්‍රාහ්‌මණමහාසාලාදීසු මහාසක්‌කාරං ගහෙත්‌වා ආගතෙසු ‘‘අසුකස්‌ස ඔකාසං දෙථ, අසුකස්‌ස ඔකාසං දෙථා’’ති වුත්‌තෙ ‘‘මයං පඨමතරං ආගතා, මය්‌හං පඨමතරං ආගතා, නත්‌ථි ඔකාසො’’ති එවං අඤ්‌ඤමඤ්‌ඤං කථෙන්‌තානං සද්‌දො උච්‌චො චෙව මහා ච අහොසි. කෙවට්‌ටා මඤ්‌ඤෙ මච්‌ඡවිලොපෙති කෙවට්‌ටා විය මච්‌ඡවිලොපෙ. තෙසඤ්‌හි මච්‌ඡපච්‌ඡිං ගහෙත්‌වා ආගතානං වික්‌කිණනට්‌ඨානෙ ‘‘මය්‌හං දෙථ මය්‌හං දෙථා’’ති වදතො මහාජනස්‌ස එවරූපො සද්‌දො හොති. මීළ්‌හසුඛන්‌ති අසුචිසුඛං. මිද්‌ධසුඛන්‌ති නිද්‌දාසුඛං. ලාභසක්‌කාරසිලොකසුඛන්‌ති ලාභසක්‌කාරඤ්‌චෙව වණ්‌ණභණනඤ්‌ච නිස්‌සාය උප්‌පන්‌නසුඛං.
30. Dasame uddhaṃ uggatattā ucco, rāsibhāvena ca mahā saddo etesanti uccāsaddamahāsaddā. Tesu hi uggatuggatesu khattiyamahāsāla-brāhmaṇamahāsālādīsu mahāsakkāraṃ gahetvā āgatesu ‘‘asukassa okāsaṃ detha, asukassa okāsaṃ dethā’’ti vutte ‘‘mayaṃ paṭhamataraṃ āgatā, mayhaṃ paṭhamataraṃ āgatā, natthi okāso’’ti evaṃ aññamaññaṃ kathentānaṃ saddo ucco ceva mahā ca ahosi. Kevaṭṭā maññe macchavilopeti kevaṭṭā viya macchavilope. Tesañhi macchapacchiṃ gahetvā āgatānaṃ vikkiṇanaṭṭhāne ‘‘mayhaṃ detha mayhaṃ dethā’’ti vadato mahājanassa evarūpo saddo hoti. Mīḷhasukhanti asucisukhaṃ. Middhasukhanti niddāsukhaṃ. Lābhasakkārasilokasukhanti lābhasakkārañceva vaṇṇabhaṇanañca nissāya uppannasukhaṃ.
තංනින්‌නාව ගමිස්‌සන්‌තීති තං තදෙව භගවතො ගතට්‌ඨානං ගමිස්‌සන්‌ති, අනුබන්‌ධිස්‌සන්‌තියෙවාති වුත්‌තං හොති. තථා හි, භන්‌තෙ, භගවතො සීලපඤ්‌ඤාණන්‌ති යස්‌මා තථාවිධං තුම්‌හාකං සීලඤ්‌ච ඤාණඤ්‌චාති අත්‌ථො. මා ච මයා යසොති මයා සද්‌ධිං යසොපි මා සමාගච්‌ඡතු. පියානන්‌ති පියජනානං. එසො තස්‌ස නිස්‌සන්‌දොති එසා පියභාවස්‌ස නිප්‌ඵත්‌ති. අසුභනිමිත්‌තානුයොගන්‌ති අසුභකම්‌මට්‌ඨානානුයොගං. සුභනිමිත්‌තෙති රාගට්‌ඨානියෙ ඉට්‌ඨාරම්‌මණෙ. එසො තස්‌ස නිස්‌සන්‌දොති එසා තස්‌ස අසුභනිමිත්‌තානුයොගස්‌ස නිප්‌ඵත්‌ති. එවමිමස්‌මිං සුත්‌තෙ ඉමෙසු පඤ්‌චසු ඨානෙසු විපස්‌සනාව කථිතාති.
Taṃninnāvagamissantīti taṃ tadeva bhagavato gataṭṭhānaṃ gamissanti, anubandhissantiyevāti vuttaṃ hoti. Tathā hi, bhante, bhagavato sīlapaññāṇanti yasmā tathāvidhaṃ tumhākaṃ sīlañca ñāṇañcāti attho. Mā ca mayā yasoti mayā saddhiṃ yasopi mā samāgacchatu. Piyānanti piyajanānaṃ. Eso tassa nissandoti esā piyabhāvassa nipphatti. Asubhanimittānuyoganti asubhakammaṭṭhānānuyogaṃ. Subhanimitteti rāgaṭṭhāniye iṭṭhārammaṇe. Eso tassa nissandoti esā tassa asubhanimittānuyogassa nipphatti. Evamimasmiṃ sutte imesu pañcasu ṭhānesu vipassanāva kathitāti.
පඤ්‌චඞ්‌ගිකවග්‌ගො තතියො.
Pañcaṅgikavaggo tatiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. නාගිතසුත්‌තං • 10. Nāgitasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. නාගිතසුත්‌තවණ්‌ණනා • 10. Nāgitasuttavaṇṇanā
