| Library / Tipiṭaka / തിപിടക • Tipiṭaka / അങ്ഗുത്തരനികായ (ടീകാ) • Aṅguttaranikāya (ṭīkā) |
൧൦. നാഗിതസുത്തവണ്ണനാ
10. Nāgitasuttavaṇṇanā
൩൦. ദസമേ ഉച്ചാസദ്ദമഹാസദ്ദാതി ഉദ്ധം ഉഗ്ഗതത്താ ഉച്ചോ പത്ഥടോ മഹന്തോ വിനിബ്ഭിജ്ജിത്വാ ഗഹേതും അസക്കുണേയ്യോ സദ്ദോ ഏതേസന്തി ഉച്ചാസദ്ദമഹാസദ്ദാ. വചീഘോസോപി ഹി ബഹൂഹി ഏകജ്ഝം പവത്തിതോ അത്ഥതോ സദ്ദതോ ച ദുരവബോധോ കേവലം മഹാനിഗ്ഘോസോ ഏവ ഹുത്വാ സോതപഥമാഗച്ഛതി. മച്ഛവിലോപേതി മച്ഛാനം വിലുമ്പിത്വാ വിയ ഗഹണേ, മച്ഛാനം വാ വിലുമ്പനേ. കേവട്ടാനഞ്ഹി മച്ഛപച്ഛിഠപിതട്ഠാനേ മഹാജനോ സന്നിപതിത്വാ ‘‘ഇധ അഞ്ഞം ഏകം മച്ഛം ദേഹി, ഏകം മച്ഛഫാലം ദേഹീ’’തി, ‘‘ഏതസ്സ തേ മഹാ ദിന്നോ, മയ്ഹം ഖുദ്ദകോ’’തി ഏവം ഉച്ചാസദ്ദം മഹാസദ്ദം കരോന്തി. മച്ഛഗ്ഗഹണത്ഥം ജാലേ പക്ഖിത്തേപി തസ്മിം ഠാനേ കേവട്ടാ ചേവ അഞ്ഞേ ച ‘‘പവിട്ഠോ ഗഹിതോ’’തി മഹാസദ്ദം കരോന്തി. തം സന്ധായേതം വുത്തം. അസുചിസുഖന്തി കായാസുചിസന്നിസ്സിതത്താ കിലേസാസുചിസന്നിസ്സിതത്താ ച അസുചിസന്നിസ്സിതസുഖം. നേക്ഖമ്മസുഖസ്സാതി കാമതോ നിക്ഖമന്തസ്സ സുഖസ്സ. പവിവേകസുഖസ്സാതി ഗണസങ്ഗണികതോ കിലേസസങ്ഗണികതോ ച വിഗതസ്സ സുഖസ്സ. ഉപസമസുഖസ്സാതി രാഗാദിവൂപസമാവഹസ്സ സുഖസ്സ. സമ്ബോധസുഖന്തി മഗ്ഗസങ്ഖാതസ്സ സമ്ബോധസ്സ നിട്ഠപ്പത്തത്ഥായ സുഖം. സേസം സുവിഞ്ഞേയ്യമേവ.
30. Dasame uccāsaddamahāsaddāti uddhaṃ uggatattā ucco patthaṭo mahanto vinibbhijjitvā gahetuṃ asakkuṇeyyo saddo etesanti uccāsaddamahāsaddā. Vacīghosopi hi bahūhi ekajjhaṃ pavattito atthato saddato ca duravabodho kevalaṃ mahānigghoso eva hutvā sotapathamāgacchati. Macchavilopeti macchānaṃ vilumpitvā viya gahaṇe, macchānaṃ vā vilumpane. Kevaṭṭānañhi macchapacchiṭhapitaṭṭhāne mahājano sannipatitvā ‘‘idha aññaṃ ekaṃ macchaṃ dehi, ekaṃ macchaphālaṃ dehī’’ti, ‘‘etassa te mahā dinno, mayhaṃ khuddako’’ti evaṃ uccāsaddaṃ mahāsaddaṃ karonti. Macchaggahaṇatthaṃ jāle pakkhittepi tasmiṃ ṭhāne kevaṭṭā ceva aññe ca ‘‘paviṭṭho gahito’’ti mahāsaddaṃ karonti. Taṃ sandhāyetaṃ vuttaṃ. Asucisukhanti kāyāsucisannissitattā kilesāsucisannissitattā ca asucisannissitasukhaṃ. Nekkhammasukhassāti kāmato nikkhamantassa sukhassa. Pavivekasukhassāti gaṇasaṅgaṇikato kilesasaṅgaṇikato ca vigatassa sukhassa. Upasamasukhassāti rāgādivūpasamāvahassa sukhassa. Sambodhasukhanti maggasaṅkhātassa sambodhassa niṭṭhappattatthāya sukhaṃ. Sesaṃ suviññeyyameva.
നാഗിതസുത്തവണ്ണനാ നിട്ഠിതാ.
Nāgitasuttavaṇṇanā niṭṭhitā.
പഞ്ചങ്ഗികവഗ്ഗവണ്ണനാ നിട്ഠിതാ.
Pañcaṅgikavaggavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൧൦. നാഗിതസുത്തം • 10. Nāgitasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൧൦. നാഗിതസുത്തവണ്ണനാ • 10. Nāgitasuttavaṇṇanā
