| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৭. নহানসিক্খাপদৰণ্ণনা
7. Nahānasikkhāpadavaṇṇanā
‘‘দিযড্ঢো মাসো সেসো গিম্হান’’ন্তি ‘‘ৰস্সানস্স পঠমো মাসো’’ইচ্চেতে অড্ঢতেয্যমাসা উণ্হসমযো, পরিল়াহসমযোতি গিম্হানং সেসো দিযড্ঢো মাসো উণ্হসমযো, ৰস্সানস্স পঠমো মাসো পরিল়াহসমযোতি এৰং এতে অড্ঢতেয্যমাসা কমেন উণ্হসমযো, পরিল়াহসমযো নাম হোতীতি অত্থো তেনেৰ পদভাজনিযং ‘‘উণ্হসমযো নাম দিযড্ঢো মাসো সেসো গিম্হান’’ন্তি, ‘‘পরিল়াহসমযো নাম ৰস্সানস্স পঠমো মাসো’’তি ৰুত্তং। যদা ৰিনা নহানেন ন ফাসু হোতি, অযং গিলানসমযো। পদভাজনিযং (পাচি॰ ৩৬৪) পন গিলানে নিচ্ছিতে গিলানকালো নিচ্ছিতোৰ হোতীতি ‘‘যস্স ৰিনা নহানেন ন ফাসু হোতি, ‘গিলানসমযো’তি নহাযিতব্ব’’ন্তি ৰুত্তং। পরিৰেণসম্মজ্জনমত্তম্পীতি অন্তমসো পরিৰেণসম্মজ্জনমত্তম্পি।
‘‘Diyaḍḍhomāso seso gimhāna’’nti ‘‘vassānassa paṭhamo māso’’iccete aḍḍhateyyamāsā uṇhasamayo, pariḷāhasamayoti gimhānaṃ seso diyaḍḍho māso uṇhasamayo, vassānassa paṭhamo māso pariḷāhasamayoti evaṃ ete aḍḍhateyyamāsā kamena uṇhasamayo, pariḷāhasamayo nāma hotīti attho teneva padabhājaniyaṃ ‘‘uṇhasamayo nāma diyaḍḍho māso seso gimhāna’’nti, ‘‘pariḷāhasamayo nāma vassānassa paṭhamo māso’’ti vuttaṃ. Yadā vinā nahānena na phāsu hoti, ayaṃ gilānasamayo. Padabhājaniyaṃ (pāci. 364) pana gilāne nicchite gilānakālo nicchitova hotīti ‘‘yassa vinā nahānena na phāsu hoti, ‘gilānasamayo’ti nahāyitabba’’nti vuttaṃ. Pariveṇasammajjanamattampīti antamaso pariveṇasammajjanamattampi.
ৰালুকং উক্কিরিত্ৰাতি সুক্খায নদিযা ৰালিকং উত্তিরিত্ৰা। আৰাটেসুপীতি পি-সদ্দেন নদিযং ৰত্তব্বমেৰ নত্থীতি দস্সেতি। আপদাসূতি ভমরাদীহি অনুবন্ধেসু।
Vālukaṃ ukkiritvāti sukkhāya nadiyā vālikaṃ uttiritvā. Āvāṭesupīti pi-saddena nadiyaṃ vattabbameva natthīti dasseti. Āpadāsūti bhamarādīhi anubandhesu.
নহানসিক্খাপদৰণ্ণনা নিট্ঠিতা।
Nahānasikkhāpadavaṇṇanā niṭṭhitā.
