| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៧. នហានសិក្ខាបទវណ្ណនា
7. Nahānasikkhāpadavaṇṇanā
‘‘ទិយឌ្ឍោ មាសោ សេសោ គិម្ហាន’’ន្តិ ‘‘វស្សានស្ស បឋមោ មាសោ’’ឥច្ចេតេ អឌ្ឍតេយ្យមាសា ឧណ្ហសមយោ, បរិឡាហសមយោតិ គិម្ហានំ សេសោ ទិយឌ្ឍោ មាសោ ឧណ្ហសមយោ, វស្សានស្ស បឋមោ មាសោ បរិឡាហសមយោតិ ឯវំ ឯតេ អឌ្ឍតេយ្យមាសា កមេន ឧណ្ហសមយោ, បរិឡាហសមយោ នាម ហោតីតិ អត្ថោ តេនេវ បទភាជនិយំ ‘‘ឧណ្ហសមយោ នាម ទិយឌ្ឍោ មាសោ សេសោ គិម្ហាន’’ន្តិ, ‘‘បរិឡាហសមយោ នាម វស្សានស្ស បឋមោ មាសោ’’តិ វុត្តំ។ យទា វិនា នហានេន ន ផាសុ ហោតិ, អយំ គិលានសមយោ។ បទភាជនិយំ (បាចិ. ៣៦៤) បន គិលានេ និច្ឆិតេ គិលានកាលោ និច្ឆិតោវ ហោតីតិ ‘‘យស្ស វិនា នហានេន ន ផាសុ ហោតិ, ‘គិលានសមយោ’តិ នហាយិតព្ព’’ន្តិ វុត្តំ។ បរិវេណសម្មជ្ជនមត្តម្បីតិ អន្តមសោ បរិវេណសម្មជ្ជនមត្តម្បិ។
‘‘Diyaḍḍhomāso seso gimhāna’’nti ‘‘vassānassa paṭhamo māso’’iccete aḍḍhateyyamāsā uṇhasamayo, pariḷāhasamayoti gimhānaṃ seso diyaḍḍho māso uṇhasamayo, vassānassa paṭhamo māso pariḷāhasamayoti evaṃ ete aḍḍhateyyamāsā kamena uṇhasamayo, pariḷāhasamayo nāma hotīti attho teneva padabhājaniyaṃ ‘‘uṇhasamayo nāma diyaḍḍho māso seso gimhāna’’nti, ‘‘pariḷāhasamayo nāma vassānassa paṭhamo māso’’ti vuttaṃ. Yadā vinā nahānena na phāsu hoti, ayaṃ gilānasamayo. Padabhājaniyaṃ (pāci. 364) pana gilāne nicchite gilānakālo nicchitova hotīti ‘‘yassa vinā nahānena na phāsu hoti, ‘gilānasamayo’ti nahāyitabba’’nti vuttaṃ. Pariveṇasammajjanamattampīti antamaso pariveṇasammajjanamattampi.
វាលុកំ ឧក្កិរិត្វាតិ សុក្ខាយ នទិយា វាលិកំ ឧត្តិរិត្វា។ អាវាដេសុបីតិ បិ-សទ្ទេន នទិយំ វត្តព្ពមេវ នត្ថីតិ ទស្សេតិ។ អាបទាសូតិ ភមរាទីហិ អនុពន្ធេសុ។
Vālukaṃ ukkiritvāti sukkhāya nadiyā vālikaṃ uttiritvā. Āvāṭesupīti pi-saddena nadiyaṃ vattabbameva natthīti dasseti. Āpadāsūti bhamarādīhi anubandhesu.
នហានសិក្ខាបទវណ្ណនា និដ្ឋិតា។
Nahānasikkhāpadavaṇṇanā niṭṭhitā.
