| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၇. နဟာနသိက္ခာပဒဝဏ္ဏနာ
7. Nahānasikkhāpadavaṇṇanā
‘‘ဒိယဍ္ဎော မာသော သေသော ဂိမ္ဟာန’’န္တိ ‘‘ဝသ္သာနသ္သ ပဌမော မာသော’’ဣစ္စေတေ အဍ္ဎတေယ္ယမာသာ ဥဏ္ဟသမယော, ပရိဠာဟသမယောတိ ဂိမ္ဟာနံ သေသော ဒိယဍ္ဎော မာသော ဥဏ္ဟသမယော, ဝသ္သာနသ္သ ပဌမော မာသော ပရိဠာဟသမယောတိ ဧဝံ ဧတေ အဍ္ဎတေယ္ယမာသာ ကမေန ဥဏ္ဟသမယော, ပရိဠာဟသမယော နာမ ဟောတီတိ အတ္ထော တေနေဝ ပဒဘာဇနိယံ ‘‘ဥဏ္ဟသမယော နာမ ဒိယဍ္ဎော မာသော သေသော ဂိမ္ဟာန’’န္တိ, ‘‘ပရိဠာဟသမယော နာမ ဝသ္သာနသ္သ ပဌမော မာသော’’တိ ဝုတ္တံ။ ယဒာ ဝိနာ နဟာနေန န ဖာသု ဟောတိ, အယံ ဂိလာနသမယော။ ပဒဘာဇနိယံ (ပာစိ. ၃၆၄) ပန ဂိလာနေ နိစ္ဆိတေ ဂိလာနကာလော နိစ္ဆိတောဝ ဟောတီတိ ‘‘ယသ္သ ဝိနာ နဟာနေန န ဖာသု ဟောတိ, ‘ဂိလာနသမယော’တိ နဟာယိတဗ္ဗ’’န္တိ ဝုတ္တံ။ ပရိဝေဏသမ္မဇ္ဇနမတ္တမ္ပီတိ အန္တမသော ပရိဝေဏသမ္မဇ္ဇနမတ္တမ္ပိ။
‘‘Diyaḍḍhomāso seso gimhāna’’nti ‘‘vassānassa paṭhamo māso’’iccete aḍḍhateyyamāsā uṇhasamayo, pariḷāhasamayoti gimhānaṃ seso diyaḍḍho māso uṇhasamayo, vassānassa paṭhamo māso pariḷāhasamayoti evaṃ ete aḍḍhateyyamāsā kamena uṇhasamayo, pariḷāhasamayo nāma hotīti attho teneva padabhājaniyaṃ ‘‘uṇhasamayo nāma diyaḍḍho māso seso gimhāna’’nti, ‘‘pariḷāhasamayo nāma vassānassa paṭhamo māso’’ti vuttaṃ. Yadā vinā nahānena na phāsu hoti, ayaṃ gilānasamayo. Padabhājaniyaṃ (pāci. 364) pana gilāne nicchite gilānakālo nicchitova hotīti ‘‘yassa vinā nahānena na phāsu hoti, ‘gilānasamayo’ti nahāyitabba’’nti vuttaṃ. Pariveṇasammajjanamattampīti antamaso pariveṇasammajjanamattampi.
ဝာလုကံ ဥက္ကိရိတ္ဝာတိ သုက္ခာယ နဒိယာ ဝာလိကံ ဥတ္တိရိတ္ဝာ။ အာဝာဋေသုပီတိ ပိ-သဒ္ဒေန နဒိယံ ဝတ္တဗ္ဗမေဝ နတ္ထီတိ ဒသ္သေတိ။ အာပဒာသူတိ ဘမရာဒီဟိ အနုဗန္ဓေသု။
Vālukaṃ ukkiritvāti sukkhāya nadiyā vālikaṃ uttiritvā. Āvāṭesupīti pi-saddena nadiyaṃ vattabbameva natthīti dasseti. Āpadāsūti bhamarādīhi anubandhesu.
နဟာနသိက္ခာပဒဝဏ္ဏနာ နိဋ္ဌိတာ။
Nahānasikkhāpadavaṇṇanā niṭṭhitā.
