| Library / Tipiṭaka / तिपिटक • Tipiṭaka / परिवारपाळि • Parivārapāḷi |
३. नहानवग्गो
3. Nahānavaggo
२३३. नग्गा नहायन्ती द्वे आपत्तियो आपज्जति। नहायति, पयोगे दुक्कटं; नहानपरियोसाने आपत्ति पाचित्तियस्स।
233. Naggā nahāyantī dve āpattiyo āpajjati. Nahāyati, payoge dukkaṭaṃ; nahānapariyosāne āpatti pācittiyassa.
पमाणातिक्कन्तं उदकसाटिकं कारापेन्ती द्वे आपत्तियो आपज्जति। कारापेति, पयोगे दुक्कटं; कारापिते, आपत्ति पाचित्तियस्स।
Pamāṇātikkantaṃ udakasāṭikaṃ kārāpentī dve āpattiyo āpajjati. Kārāpeti, payoge dukkaṭaṃ; kārāpite, āpatti pācittiyassa.
भिक्खुनिया चीवरं विसिब्बेत्वा वा विसिब्बापेत्वा वा नेव सिब्बेन्ती न सिब्बापनाय उस्सुक्कं करोन्ती एकं आपत्तिं आपज्जति। पाचित्तियं।
Bhikkhuniyā cīvaraṃ visibbetvā vā visibbāpetvā vā neva sibbentī na sibbāpanāya ussukkaṃ karontī ekaṃ āpattiṃ āpajjati. Pācittiyaṃ.
पञ्चाहिकं सङ्घाटिचारं अतिक्कामेन्ती एकं आपत्तिं आपज्जति। पाचित्तियं। चीवरसङ्कमनीयं धारेन्ती द्वे आपत्तियो आपज्जति। धारेति, पयोगे दुक्कटं; धारिते, आपत्ति पाचित्तियस्स।
Pañcāhikaṃ saṅghāṭicāraṃ atikkāmentī ekaṃ āpattiṃ āpajjati. Pācittiyaṃ. Cīvarasaṅkamanīyaṃ dhārentī dve āpattiyo āpajjati. Dhāreti, payoge dukkaṭaṃ; dhārite, āpatti pācittiyassa.
गणस्स चीवरलाभं अन्तरायं करोन्ती द्वे आपत्तियो आपज्जति। करोति, पयोगे दुक्कटं; कते, आपत्ति पाचित्तियस्स।
Gaṇassa cīvaralābhaṃ antarāyaṃ karontī dve āpattiyo āpajjati. Karoti, payoge dukkaṭaṃ; kate, āpatti pācittiyassa.
धम्मिकं चीवरविभङ्गं पटिबाहन्ती द्वे आपत्तियो आपज्जति। पटिबाहति, पयोगे दुक्कटं; पटिबाहिते, आपत्ति पाचित्तियस्स।
Dhammikaṃ cīvaravibhaṅgaṃ paṭibāhantī dve āpattiyo āpajjati. Paṭibāhati, payoge dukkaṭaṃ; paṭibāhite, āpatti pācittiyassa.
अगारिकस्स वा परिब्बाजकस्स वा परिब्बाजिकाय वा समणचीवरं देन्ती द्वे आपत्तियो आपज्जति। देति, पयोगे दुक्कटं; दिन्ने, आपत्ति पाचित्तियस्स।
Agārikassa vā paribbājakassa vā paribbājikāya vā samaṇacīvaraṃ dentī dve āpattiyo āpajjati. Deti, payoge dukkaṭaṃ; dinne, āpatti pācittiyassa.
दुब्बलचीवरपच्चासा चीवरकालसमयं अतिक्कामेन्ती द्वे आपत्तियो आपज्जति। अतिक्कामेति, पयोगे दुक्कटं; अतिक्कामिते, आपत्ति पाचित्तियस्स।
Dubbalacīvarapaccāsā cīvarakālasamayaṃ atikkāmentī dve āpattiyo āpajjati. Atikkāmeti, payoge dukkaṭaṃ; atikkāmite, āpatti pācittiyassa.
धम्मिकं कथिनुद्धारं पटिबाहन्ती द्वे आपत्तियो आपज्जति। पटिबाहति, पयोगे दुक्कटं; पटिबाहिते, आपत्ति पाचित्तियस्स।
Dhammikaṃ kathinuddhāraṃ paṭibāhantī dve āpattiyo āpajjati. Paṭibāhati, payoge dukkaṭaṃ; paṭibāhite, āpatti pācittiyassa.
नहानवग्गो ततियो।
Nahānavaggo tatiyo.
