| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၃. နဟာနဝဂ္ဂော
3. Nahānavaggo
၂၃၃. နဂ္ဂာ နဟာယန္တီ ဒ္ဝေ အာပတ္တိယော အာပဇ္ဇတိ။ နဟာယတိ, ပယောဂေ ဒုက္ကဋံ; နဟာနပရိယောသာနေ အာပတ္တိ ပာစိတ္တိယသ္သ။
233. Naggā nahāyantī dve āpattiyo āpajjati. Nahāyati, payoge dukkaṭaṃ; nahānapariyosāne āpatti pācittiyassa.
ပမာဏာတိက္ကန္တံ ဥဒကသာဋိကံ ကာရာပေန္တီ ဒ္ဝေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ, အာပတ္တိ ပာစိတ္တိယသ္သ။
Pamāṇātikkantaṃ udakasāṭikaṃ kārāpentī dve āpattiyo āpajjati. Kārāpeti, payoge dukkaṭaṃ; kārāpite, āpatti pācittiyassa.
ဘိက္ခုနိယာ စီဝရံ ဝိသိဗ္ဗေတ္ဝာ ဝာ ဝိသိဗ္ဗာပေတ္ဝာ ဝာ နေဝ သိဗ္ဗေန္တီ န သိဗ္ဗာပနာယ ဥသ္သုက္ကံ ကရောန္တီ ဧကံ အာပတ္တိံ အာပဇ္ဇတိ။ ပာစိတ္တိယံ။
Bhikkhuniyā cīvaraṃ visibbetvā vā visibbāpetvā vā neva sibbentī na sibbāpanāya ussukkaṃ karontī ekaṃ āpattiṃ āpajjati. Pācittiyaṃ.
ပဉ္စာဟိကံ သင္ဃာဋိစာရံ အတိက္ကာမေန္တီ ဧကံ အာပတ္တိံ အာပဇ္ဇတိ။ ပာစိတ္တိယံ။ စီဝရသင္ကမနီယံ ဓာရေန္တီ ဒ္ဝေ အာပတ္တိယော အာပဇ္ဇတိ။ ဓာရေတိ, ပယောဂေ ဒုက္ကဋံ; ဓာရိတေ, အာပတ္တိ ပာစိတ္တိယသ္သ။
Pañcāhikaṃ saṅghāṭicāraṃ atikkāmentī ekaṃ āpattiṃ āpajjati. Pācittiyaṃ. Cīvarasaṅkamanīyaṃ dhārentī dve āpattiyo āpajjati. Dhāreti, payoge dukkaṭaṃ; dhārite, āpatti pācittiyassa.
ဂဏသ္သ စီဝရလာဘံ အန္တရာယံ ကရောန္တီ ဒ္ဝေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ, အာပတ္တိ ပာစိတ္တိယသ္သ။
Gaṇassa cīvaralābhaṃ antarāyaṃ karontī dve āpattiyo āpajjati. Karoti, payoge dukkaṭaṃ; kate, āpatti pācittiyassa.
ဓမ္မိကံ စီဝရဝိဘင္ဂံ ပဋိဗာဟန္တီ ဒ္ဝေ အာပတ္တိယော အာပဇ္ဇတိ။ ပဋိဗာဟတိ, ပယောဂေ ဒုက္ကဋံ; ပဋိဗာဟိတေ, အာပတ္တိ ပာစိတ္တိယသ္သ။
Dhammikaṃ cīvaravibhaṅgaṃ paṭibāhantī dve āpattiyo āpajjati. Paṭibāhati, payoge dukkaṭaṃ; paṭibāhite, āpatti pācittiyassa.
အဂာရိကသ္သ ဝာ ပရိဗ္ဗာဇကသ္သ ဝာ ပရိဗ္ဗာဇိကာယ ဝာ သမဏစီဝရံ ဒေန္တီ ဒ္ဝေ အာပတ္တိယော အာပဇ္ဇတိ။ ဒေတိ, ပယောဂေ ဒုက္ကဋံ; ဒိန္နေ, အာပတ္တိ ပာစိတ္တိယသ္သ။
Agārikassa vā paribbājakassa vā paribbājikāya vā samaṇacīvaraṃ dentī dve āpattiyo āpajjati. Deti, payoge dukkaṭaṃ; dinne, āpatti pācittiyassa.
ဒုဗ္ဗလစီဝရပစ္စာသာ စီဝရကာလသမယံ အတိက္ကာမေန္တီ ဒ္ဝေ အာပတ္တိယော အာပဇ္ဇတိ။ အတိက္ကာမေတိ, ပယောဂေ ဒုက္ကဋံ; အတိက္ကာမိတေ, အာပတ္တိ ပာစိတ္တိယသ္သ။
Dubbalacīvarapaccāsā cīvarakālasamayaṃ atikkāmentī dve āpattiyo āpajjati. Atikkāmeti, payoge dukkaṭaṃ; atikkāmite, āpatti pācittiyassa.
ဓမ္မိကံ ကထိနုဒ္ဓာရံ ပဋိဗာဟန္တီ ဒ္ဝေ အာပတ္တိယော အာပဇ္ဇတိ။ ပဋိဗာဟတိ, ပယောဂေ ဒုက္ကဋံ; ပဋိဗာဟိတေ, အာပတ္တိ ပာစိတ္တိယသ္သ။
Dhammikaṃ kathinuddhāraṃ paṭibāhantī dve āpattiyo āpajjati. Paṭibāhati, payoge dukkaṭaṃ; paṭibāhite, āpatti pācittiyassa.
နဟာနဝဂ္ဂော တတိယော။
Nahānavaggo tatiyo.
