| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៦. នជីរតិសុត្តវណ្ណនា
6. Najīratisuttavaṇṇanā
៧៦. នាមគោត្តន្តិ តិស្សោ កស្សបោ គោតមោតិ ឯវរូបំ នាមញ្ច គោត្តញ្ច។ និទស្សនមត្តមេតំ, តស្មា សព្ពស្ស បញ្ញត្តិយា លក្ខណវចនន្តិ ទដ្ឋព្ពំ។ ន ជីរតីតិ អសភាវធម្មត្តា ឧប្បាទវយាភាវតោ ជរំ ន បាបុណាតិ។ តេនាហ ‘‘ជីរណសភាវោ ន ហោតី’’តិ។ យស្មា សមញ្ញាភាវតោ កាលន្តរេបិ តំ សមញ្ញាយតេវ, តស្មា ‘‘អតីតពុទ្ធានំ…បេ.… ន ជីរតីតិ វុច្ចតី’’តិ អាហ។
76.Nāmagottanti tisso kassapo gotamoti evarūpaṃ nāmañca gottañca. Nidassanamattametaṃ, tasmā sabbassa paññattiyā lakkhaṇavacananti daṭṭhabbaṃ. Na jīratīti asabhāvadhammattā uppādavayābhāvato jaraṃ na pāpuṇāti. Tenāha ‘‘jīraṇasabhāvo na hotī’’ti. Yasmā samaññābhāvato kālantarepi taṃ samaññāyateva, tasmā ‘‘atītabuddhānaṃ…pe… na jīratīti vuccatī’’ti āha.
អាលសិយន្តិ អលសភាវោ ទឡ្ហកោសជ្ជំ។ តេនាហ ‘‘យេនា’’តិអាទិ។ ឋិតិន្តិ ព្យាបារំ។ និទ្ទាវសេន បមជ្ជនំ កត្តព្ពស្ស អករណំ។ កិលេសវសេន បមជ្ជនំ អកត្តព្ពស្ស ករណម្បិ។ កម្មសមយេតិ កម្មំ កាតុំ យុត្តកាលេ។ កម្មករណវីរិយាភាវោតិ តំកម្មកិរិយសមុដ្ឋាបកវីរិយាភាវោ។ សោ បន អត្ថតោ វីរិយបដិបក្ខោ អកុសលចិត្តុប្បាទោ, ន វីរិយស្ស អភាវមត្តំ។ សីលសញ្ញមាភាវោ ទុស្សីល្យំ។ វិស្សដ្ឋាចារតា នាម អនាចារោ។ សោប្បពហុលតាតិ និទ្ទាលុតា ។ យតោ គហណហត្ថោបិ ន កិលាសុបិ បុរិសោ និទ្ទាយ អភិភុយ្យតិ។ តេនាហ ‘‘តាយា’’តិអាទិ។ អតិច្ឆាតាទីនីតិ អាទិ-សទ្ទេន អភិភុយ្យតាទិំ សង្គណ្ហាតិ។ អាគន្តុកាលសិយំ ន បុព្ពេ វុត្តអាលស្យំ វិយ បកតិសិទ្ធំ។ ‘‘តេ ឆិទ្ទេ’’តិ បាឡិយំ លិង្គវិបល្លាសេន វុត្តន្តិ អាហ ‘‘តានិ ឆ ឆិទ្ទានី’’តិ។ កុសលចិត្តប្បវត្តិយា អនោកាសភាវតោ ឆិទ្ទានិ។ តេនាហ ភគវា – ‘‘យត្ថ វិត្តំ ន តិដ្ឋតី’’តិ។ សព្ពាការេន លេសមត្តំ អសេសេត្វាតិ អធិប្បាយោ។
Ālasiyanti alasabhāvo daḷhakosajjaṃ. Tenāha ‘‘yenā’’tiādi. Ṭhitinti byāpāraṃ. Niddāvasena pamajjanaṃ kattabbassa akaraṇaṃ. Kilesavasena pamajjanaṃ akattabbassa karaṇampi. Kammasamayeti kammaṃ kātuṃ yuttakāle. Kammakaraṇavīriyābhāvoti taṃkammakiriyasamuṭṭhāpakavīriyābhāvo. So pana atthato vīriyapaṭipakkho akusalacittuppādo, na vīriyassa abhāvamattaṃ. Sīlasaññamābhāvo dussīlyaṃ. Vissaṭṭhācāratā nāma anācāro. Soppabahulatāti niddālutā . Yato gahaṇahatthopi na kilāsupi puriso niddāya abhibhuyyati. Tenāha ‘‘tāyā’’tiādi. Aticchātādīnīti ādi-saddena abhibhuyyatādiṃ saṅgaṇhāti. Āgantukālasiyaṃ na pubbe vuttaālasyaṃ viya pakatisiddhaṃ. ‘‘Te chidde’’ti pāḷiyaṃ liṅgavipallāsena vuttanti āha ‘‘tāni cha chiddānī’’ti. Kusalacittappavattiyā anokāsabhāvato chiddāni. Tenāha bhagavā – ‘‘yattha vittaṃ na tiṭṭhatī’’ti. Sabbākārena lesamattaṃ asesetvāti adhippāyo.
នជីរតិសុត្តវណ្ណនា និដ្ឋិតា។
Najīratisuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៦. នជីរតិសុត្តំ • 6. Najīratisuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. នជីរតិសុត្តវណ្ណនា • 6. Najīratisuttavaṇṇanā
