| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
6. නජීරතිසුත්‌තවණ්‌ණනා
6. Najīratisuttavaṇṇanā
76. ඡට්‌ඨෙ නාමගොත්‌තං න ජීරතීති අතීතබුද්‌ධානං යාවජ්‌ජදිවසා නාමගොත්‌තං කථියති, තස්‌මා න ජීරතීති වුච්‌චති. පොරාණා පන ‘‘අද්‌ධානෙ ගච්‌ඡන්‌තෙ න පඤ්‌ඤායිස්‌සති, ජීරණසභාවො පන න හොතියෙවා’’ති වදන්‌ති. ආලස්‍යන්‌ති ආලසියං, යෙන ඨිතට්‌ඨානෙ ඨිතොව, නිසින්‌නට්‌ඨානෙ නිසින්‌නොව හොති, තෙලෙපි උත්‌තරන්‌තෙ ඨිතිං න කරොති. පමාදොති නිද්‌දාය වා කිලෙසවසෙන වා පමාදො. අනුට්‌ඨානන්‌ති කම්‌මසමයෙ කම්‌මකරණවීරියාභාවො. අසංයමොති සීලසඤ්‌ඤමාභාවො විස්‌සට්‌ඨාචාරතා. නිද්‌දාති සොප්‌පබහුලතා. තාය ගච්‌ඡන්‌තොපි ඨිතොපි නිසින්‌නොපි නිද්‌දායති, පගෙව නිපන්‌නො. තන්‌දීති අතිච්‌ඡාතාදිවසෙන ආගන්‌තුකාලසියං. තෙ ඡිද්‌දෙති තානි ඡ ඡිද්‌දානි විවරානි. සබ්‌බසොති සබ්‌බාකාරෙන. තන්‌ති නිපාතමත්‌තං. විවජ්‌ජයෙති වජ්‌ජෙය්‍ය ජහෙය්‍ය. ඡට්‌ඨං.
76. Chaṭṭhe nāmagottaṃ na jīratīti atītabuddhānaṃ yāvajjadivasā nāmagottaṃ kathiyati, tasmā na jīratīti vuccati. Porāṇā pana ‘‘addhāne gacchante na paññāyissati, jīraṇasabhāvo pana na hotiyevā’’ti vadanti. Ālasyanti ālasiyaṃ, yena ṭhitaṭṭhāne ṭhitova, nisinnaṭṭhāne nisinnova hoti, telepi uttarante ṭhitiṃ na karoti. Pamādoti niddāya vā kilesavasena vā pamādo. Anuṭṭhānanti kammasamaye kammakaraṇavīriyābhāvo. Asaṃyamoti sīlasaññamābhāvo vissaṭṭhācāratā. Niddāti soppabahulatā. Tāya gacchantopi ṭhitopi nisinnopi niddāyati, pageva nipanno. Tandīti aticchātādivasena āgantukālasiyaṃ. Te chiddeti tāni cha chiddāni vivarāni. Sabbasoti sabbākārena. Tanti nipātamattaṃ. Vivajjayeti vajjeyya jaheyya. Chaṭṭhaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. නජීරතිසුත්‌තං • 6. Najīratisuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. නජීරතිසුත්‌තවණ්‌ණනා • 6. Najīratisuttavaṇṇanā
