| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
6. නජීරතිසුත්‌තවණ්‌ණනා
6. Najīratisuttavaṇṇanā
76. නාමගොත්‌තන්‌ති තිස්‌සො කස්‌සපො ගොතමොති එවරූපං නාමඤ්‌ච ගොත්‌තඤ්‌ච. නිදස්‌සනමත්‌තමෙතං, තස්‌මා සබ්‌බස්‌ස පඤ්‌ඤත්‌තියා ලක්‌ඛණවචනන්‌ති දට්‌ඨබ්‌බං. න ජීරතීති අසභාවධම්‌මත්‌තා උප්‌පාදවයාභාවතො ජරං න පාපුණාති. තෙනාහ ‘‘ජීරණසභාවො න හොතී’’ති. යස්‌මා සමඤ්‌ඤාභාවතො කාලන්‌තරෙපි තං සමඤ්‌ඤායතෙව, තස්‌මා ‘‘අතීතබුද්‌ධානං…පෙ.… න ජීරතීති වුච්‌චතී’’ති ආහ.
76.Nāmagottanti tisso kassapo gotamoti evarūpaṃ nāmañca gottañca. Nidassanamattametaṃ, tasmā sabbassa paññattiyā lakkhaṇavacananti daṭṭhabbaṃ. Na jīratīti asabhāvadhammattā uppādavayābhāvato jaraṃ na pāpuṇāti. Tenāha ‘‘jīraṇasabhāvo na hotī’’ti. Yasmā samaññābhāvato kālantarepi taṃ samaññāyateva, tasmā ‘‘atītabuddhānaṃ…pe… na jīratīti vuccatī’’ti āha.
ආලසියන්‌ති අලසභාවො දළ්‌හකොසජ්‌ජං. තෙනාහ ‘‘යෙනා’’තිආදි. ඨිතින්‌ති බ්‍යාපාරං. නිද්‌දාවසෙන පමජ්‌ජනං කත්‌තබ්‌බස්‌ස අකරණං. කිලෙසවසෙන පමජ්‌ජනං අකත්‌තබ්‌බස්‌ස කරණම්‌පි. කම්‌මසමයෙති කම්‌මං කාතුං යුත්‌තකාලෙ. කම්‌මකරණවීරියාභාවොති තංකම්‌මකිරියසමුට්‌ඨාපකවීරියාභාවො. සො පන අත්‌ථතො වීරියපටිපක්‌ඛො අකුසලචිත්‌තුප්‌පාදො, න වීරියස්‌ස අභාවමත්‌තං. සීලසඤ්‌ඤමාභාවො දුස්‌සීල්‍යං. විස්‌සට්‌ඨාචාරතා නාම අනාචාරො. සොප්‌පබහුලතාති නිද්‌දාලුතා . යතො ගහණහත්‌ථොපි න කිලාසුපි පුරිසො නිද්‌දාය අභිභුය්‍යති. තෙනාහ ‘‘තායා’’තිආදි. අතිච්‌ඡාතාදීනීති ආදි-සද්‌දෙන අභිභුය්‍යතාදිං සඞ්‌ගණ්‌හාති. ආගන්‌තුකාලසියං න පුබ්‌බෙ වුත්‌තආලස්‍යං විය පකතිසිද්‌ධං. ‘‘තෙ ඡිද්‌දෙ’’ති පාළියං ලිඞ්‌ගවිපල්‌ලාසෙන වුත්‌තන්‌ති ආහ ‘‘තානි ඡ ඡිද්‌දානී’’ති. කුසලචිත්‌තප්‌පවත්‌තියා අනොකාසභාවතො ඡිද්‌දානි. තෙනාහ භගවා – ‘‘යත්‌ථ විත්‌තං න තිට්‌ඨතී’’ති. සබ්‌බාකාරෙන ලෙසමත්‌තං අසෙසෙත්‌වාති අධිප්‌පායො.
Ālasiyanti alasabhāvo daḷhakosajjaṃ. Tenāha ‘‘yenā’’tiādi. Ṭhitinti byāpāraṃ. Niddāvasena pamajjanaṃ kattabbassa akaraṇaṃ. Kilesavasena pamajjanaṃ akattabbassa karaṇampi. Kammasamayeti kammaṃ kātuṃ yuttakāle. Kammakaraṇavīriyābhāvoti taṃkammakiriyasamuṭṭhāpakavīriyābhāvo. So pana atthato vīriyapaṭipakkho akusalacittuppādo, na vīriyassa abhāvamattaṃ. Sīlasaññamābhāvo dussīlyaṃ. Vissaṭṭhācāratā nāma anācāro. Soppabahulatāti niddālutā . Yato gahaṇahatthopi na kilāsupi puriso niddāya abhibhuyyati. Tenāha ‘‘tāyā’’tiādi. Aticchātādīnīti ādi-saddena abhibhuyyatādiṃ saṅgaṇhāti. Āgantukālasiyaṃ na pubbe vuttaālasyaṃ viya pakatisiddhaṃ. ‘‘Te chidde’’ti pāḷiyaṃ liṅgavipallāsena vuttanti āha ‘‘tāni cha chiddānī’’ti. Kusalacittappavattiyā anokāsabhāvato chiddāni. Tenāha bhagavā – ‘‘yattha vittaṃ na tiṭṭhatī’’ti. Sabbākārena lesamattaṃ asesetvāti adhippāyo.
නජීරතිසුත්‌තවණ්‌ණනා නිට්‌ඨිතා.
Najīratisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. නජීරතිසුත්‌තං • 6. Najīratisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. නජීරතිසුත්‌තවණ්‌ණනා • 6. Najīratisuttavaṇṇanā
